Published By Said Al Habsy

SAFINA YA UONGOFU

“UHAKIKA WA NJIA KWA WASIOJUA UHAKIKA”

Anasema Imaam Nuuruddin Assalimi –Allah amridhie- katika Utunzi wake wenye jina “KASHFUL HAQIIQA LIMAN JAHILA TARIIQAH” (( Kubainisha uhakika kwa wsioijua njia ))

Maibadhi ni alama ** ya makhalifa barara
   Wametwita mahasima** Bani Umaya fujara
     Tukaridhia kwa wema ** wa Abdallah jahara
      Kwa hoja na usalama ** katukinga na sharara

Ndio…. Hakika Qauli ya haki ni kuwa njia hiyo ya haki, ILIJIASISI TENA KWA UONGOZI WA MWANACHUONI FAQIIHI JABIR BIN ZAID AL UZDI – ALLAH AWE RADHI NAYE – kwa kuchukua njia ya siri kwa ajili ya kuihifadhi daawa yenyewe, wote wakawa chini ya kivuli chake na wakajiunga katika uongozi wake, na ikapendelewa wasilitaje jina lake wala kuyataja mahusiano yake na daawa kwa wakati ule, asije akakamatwa na watawala dhalimu wa kibanii Umayya, isjekufa daawa yao hali bado ipo mwanzo wa kuinuka kwake, na kwa hakika hiyo ndiyo njia ya mwanzo aloipita Mtume s.a.w. wakati wa mwanzo wa kutumwa kwake, mpaka ilipopata nguvu dini, Allah mtukufu akaidhihirisha.
Basi jua – ewe mwenye himma – kuwa Imaam Jabir bin Zaid alikuwa akiweka vikao vya siri, akikutana na marafiki zake na wanafunzi wake, wanapokea kutoka kwake elimu, na anawaandaa kwa ajili ya kutoa daawa na mipango ya kisiasa. Na zilielekea fikra zake sehemu za mbali kutokea Basra, akatuma walinganiaji walolelewa katika uchamungu, kutopenda dunia, na usafi, kwenda sehemu nyingi za mbali wafikishe daawa iliyotokana na Quran tukufu na sunnah toharifu, na alijitahidi kuwe kuna mawasiliano ya kuendelea baina yake na wanadaawa hao, basi wakawa ni nuru ya kuangaza kwa uongofu na amani baada ya kuondoka kwake, na hao ndio waliitwa WABEBAJI WA ELIMU (( HAMALATUL ILMI )).

Ndugu yangu, zingatia kuwa mwenendo wa Imam Jabir wa kujificha uliiwezesha daawa kubakia katika usafi wake, na kwa haraka daawa ilikua na kuenea ili iwe ni muendelezo wa ule uongofu auridhiao Allah mtukufu kwa viumbe wake, na ukawa ni uhalisia ambao ummah unaishi ndani yake mpaka leo, tofauti na makundi mengine yalochukua njia ya mapambano ya kivita, yalopelekea kumalizika kwa makundi hayo.

Na hakikuja kifo cha Nahodha huyu mahiri, ispokuwa tayari misingi ya njia hii ilikuwa wazi kwa wanafunzi wake, nao ukawa ni urathi mtukufu, nani fikra safi katika haki, na kuwafanya ni mabwana wakubwa walouza nafsi zao kwa ajili ya Allah mtukufu, hawaogopi lawama za mwenye kulaumu, ilitoka roho yake – Imaam Jabir -kwenda kwa mola wake mwaka 93h, Allah mtukufu awe radhi naye na amlipe kwa alivyouhudumia uislam kila la kheri.

Basi nani alishika usukani wa safina hii, ambayo imeanza kurejeshwa katika mstari wa sawa ??.

Bila shaka umejua – Allah autie nuru moyo wako – kuwa chuo hichi cha Imaam Jabir bin Zaid kilitoa idadi kubwa ya viongozi wa hali ya juu., na wanachuoni marejeo, akiwa juu yao IMAAM ABUU UBAIDA MUSLIM BIN ABI KARIIMA ALTAMIIMY – Allah mtukufu amridhie - ambaye yeye ndio alichukua uongozi baada ya muasisi wake Imaam Jabir bin Zaid, na hiyo ni kwa kuwa Abu ubaida alikuwa na nguvu ya kuipigania haki, na kuweka wazi itikadi yake ya sawa, na wingi wa ilmu yake, na kudhihiri usafi wake… na kwa kuwa Abu ubaidah zilimng’ata adhabu za Hajjaj bin Yousef alijua kuwa dola ya haki kwa misingi ya shura na uadilifu haiwezi kusimama ispokuwa iwe mbali na utawala wa banii Umayya na makao makuu ya uchunguzi wao mkubwa. Akaanza kuwatuma maduat sehemu za mbali kulingania.
Je daawa hii ya mbali, ilileta matunda yaliyotarajiwa ?? malizia sehemu ya mwisho….

Published By Said Al Habsy

SAFINA YA UONGOFU

JE IBN ZIYAAD ALILIACHA KUNDI LA IMAAM ABII BILAAL LIKAE KWA AMANI ??

Laaa bali Ibn Ziyaad aliwafuatilia, akawashtukiza kwa jeshi kubwa la askari elfu nne ( 4000 ), ukaingia wakati wa Ijumaa nao bado wapo katka vita, akaamrisha Abuu Bilal kusimamisha vita, akasema kuwaambia wapinzani : “hakika leo mpo katika siku tukufu, basi tuacheni tusali nanyi msali” wakawakubalia kwa hadaa na vitimbi, Abu Bilaal na watu wake walipoingia katika sala, jeshi la Banii Umayya liliwavamia likawaua wakiwa baina ya wenye kurukuu na kusujudu na kukaa, mwaka 61h, wakafa wakiwa mashahidi – Allah mtukufu awe radhi nao wote -, basi fahamu ewe msomaji – Allah akuthibitishe katika haki - kuwa baada ya kuuwawa kwa Abii Bilaal, na katika hali ya uovu, adhabu na mauaji ya Banii Umayya, kukatokea mgawanyiko katika safu za Muhakkima, na ikadhihiri mitazamo isiyokuwa ya pamoja katika fikra, na hiyo ni karibia mwaka 64, katika migawanyiko miwili.

WALIOCHUPA MIPAKA

Hawa walitoka katika misingi ya salaf wema waliotangulia, wakachukua njia ya nguvu kama makundi yaliyopita ya Talha, Zubeir na Bii Aisha, au kama kundi la Muawiya, au kama kundi la Ally dhidi ya Ahlu naharawaani, wakasema watu hawa : Ni lazima kuhama na kutojuzu kukaa katika miji ya wenye kuwakhalifu katika waislam, wakavunja heshima za watu, na wakawaadhibu watu na kuwauwa, na hao walikuwa ni AZAARIQAH wafuasi wa Naafii bin Azraq, SUFRIYYA wafuasi wa Abdallah bin Swaffar na ANNAJDIYAH wafuasi wa Najdah bin Aamir ( hawa ndio waliojulikanwa kwa jina la KHAWAARIJ )

WALIOBAKI KATIKA HAKI YA WEMA WALIOTANGULIA

Hawa walifuata njia ya kati na kati, hawakusema ni wajibu kuhama, wala hawakuwakafirisha wenye kukhalifu, bali walihalalisha kuwarithi, kuwaoa, na kukaa nao na hawa walijulikanwa kwa jina la (ALQAADAH), na katika mtazamo huu wametokea IBADHI.
Ndugu yetu mpenzi sasa hivi tukwenda pamoja katika kutazama historia ya kundi hili la Alqaada yaani waliokaa na kuacha kuwapiga vita viongozi waovu wa banii Umayya kama walivyoitwa hivyo na Makhawariji.
Na bila shaka msomaji mpendwa unajua sababu ya wao kutopigana kwa panga kuzuwiya uovu wa banii umayya kama ukubwa wa jeshi la batili, uchache wa wafuasi wa haki, na kutokukamilika kwa sharti za kutoka dhidi ya waovu. Kwa ajili hiyo walifadhilisha kubaki wamekaa wakifundisha na kujadiliana nao kwa hoja, na alikuwa Abdullah bin Ibadhi Attamiimi ndiyo msemaji wao mkuu, akichukua rai zake na hoja za kusema kutoka kwa Imaam Jabir bin Zaid Al Uzdi.
Imaam Jabir bin Zaid Yule Faqihi mkubwa, muanzilishi na muasisi wa njia ya Ahli l haqq wal istiqama, mufti wao na imam wao wa kiroho, msingi wa madhehebu na muangalizi wake, mwenye kurejewa katika uandishi wake na kuyanyayua majengo yake, na bila shaka uongozi haulazimishi kuwa uwe anajulikanwa na watu wote, au kuonekana mbee za watu, na bila shaka mwenye kutazama barua za Imam Jabir bin Zaid baina yake na Imaam Abdullah bin Ibadhi ambaye ni mwanafunzi wake, inambainikia wazi haya yalosemwa.

JE NINI MAENDELEO YA WATU HAWA WA HAQI ? FUATILIA

Published By Ust. Abu Muslim

SAFINA YA UONGOFU - 09

MAKAO MAKUU YA HAQI NA HATARI DHIDI YAKE

Ndugu msomaji…!! kuwa makao makuu ya daawa ya watu wa haki yamekuwa ni BASRA, kwa jitihada ya Abii Bilaal na kuweka kwake misingi thabiti ya kuinusuru dini, dini ambayo hawakuweza kuisimamia dola ya Banii Umayyah ukweli wa kuisimamia, wakavumilia Abu Bilal na wafuasi wake aina tofauti za adhabu, na shida kubwa.

Msafara huu wa haki ulikuwa unakwenda kwa ushauri na usimamizi wa kuendelea wa mwanachuoni maarufu JABIR BIN ZAID AL-UZDI ambaye yeye na Abii Bilal walikuwa wakipendana sana kwa udugu wa kweli kwa ajili ya Allah mtukufu, na wala isikupite kuwa Imaam Jabir bin Zaid Al-uzdi alichukua elimu kutoka chemchemi safi, masahaba wa Mtume Muhammad s.a.w kama Bahari ya elim Abdullah bin Abbaas, kama ambavyo alikuwa mwanafunzi wa Mama wa waumini Aisha R.A.

Zingatia ewe msomaji kuwa alipotawala huyu Ubaidullah bin Ziyaad na ukazidi uovu wake dhidi ya Muhakkima, kwa kuwaua bila ya huruma, na kuwafukuza katika mji, na alipoona Abuu Bilaal yanayowafika wapinzani wa dola ya banii Umayya, aliazimia kutoka katika mji wa Basra, na akamshauri Imaam Jabir “Hatuwezi kukaa baina ya hawa madhalimu, hukmu zao zinatupitia, wakiwa mbali na uadilifu, wakiachana na kila lililo bora, Wallahi kufanya subra katika mambo haya ni jambo kubwa – lisilovumilika”

Imaam Jabir Al-uzdi hakupinga hilo, akatoka Abu Bilaal akiwa na watu arobaini, waloitwa Shuraat ( walozitoa nafsi zao kwa ajili ya Allah mtukufu ), kwa kuwa waliziuza nafsi zao kwa kununua Akhera,na hilo ni kheri kwa wachamungu, wakaenda wakakaa katika mji wa Aasik ( Ahwaazi), wala hakusema ni lazima kuhama wala haikufanya hiyo kuwa ni dini, hawatii khofu walioaminika, wala halalishi kuvunja heshma, wala hachukui mali za watu, wala hateki watu, wala hasemi kuwa watu wake ni washirikina, na hapa tusimame pamoja ili tuziweke wazi hikma za kutoka Abii Bilaal kutoka katika utawala wa Banii Umayya, nazo ni :

1. Kukimbia kwa ajili ya kuhifadhi dini
2. Kuitanabahisha dola kuwa dhulma yake hivumiliki
3. Kutanabahisha Ummah uovu wa dola ya Banii Umayya

Je kundi hili la haki litaachwa na Madhalimu wenye kiu ya damu ya watu wa haki? fuatilia

Published By Ust. Abu Muslim

SAFINA YA UONGOFU - 08

ABU BILAAL MIRDAAS BIN HUDEIR ALTAMIIMI R.A.

Abu Bilal Mirdaas bin Hudeir Altamiimi alisifika kwa elimu, uchamungu na ushujaa. Alichukua njia ya kati na kati katika kueneza daawa na kusuluhisha jamii, alikuwa akiweka vikao vya kuwakinaisha watu manhaj yake ilosifika kwa kutokuwa na kupendelea nguvu kuwa ni njia au mwenendo wa kurekebisha mambo, na kwa kutazama ule muonekano wake wa uchamungu na uadilifu kwa kila mtu, muonekano ulioamini kuwa kurekebisha mambo kwa nguvu si katika tabia za dini ya kiislamu, kwa kuwa yeye aliwaidhika na makosa ya Imaam Ally ya kuwaua Ahlu Nahrwaan, kama ambavyo yeye alikuwa anakosoa kuwakata viungo maiti, na anajitenga mbali na wenye kufanya hayo, na alikuwa akiwalea wafuasi wake kumcha Allah mtukufu katika damu za waja wa Allah na mali zao, basi akawa akiwakataza kujihalalishia mali za wenye kuwakhalifu katika rai, na kumpiga vita yoyote katika wao, ispokuwa kama watafanyiwa uadui au kupigwa.

Jua ewe ndugu msomaji – usawa unaziteka nafsi na kufunika uovu wake, kwa ajili hiyo siasa ya Gavana wa dola ya Amawiiyya Ziad bin Abi Abiihi ( 45 – 53 ) ni ya ulaini na samehevu dhidi ya Abii Bilaa na wafuasi wake.
Kwa fikra hii ya sawa, yenye kung’aa ambayo alikuwa akiibeba Abu Bilaal, akichukua nuru yake katika Qur an na Sunnah ya Mtume s.a.w., na ule wepesi wa daawa yake, na kuchukua mambo ya dawa kwa usamehevu walizidi wafuasi wake, wakajiunga wengi na wakawa wengi wako tayari kumnusuru, ikasimama daawa yake na misingi yake na zikadhihiri alama zake.

Kudumu kwa hali moja ni mustahiil, ewe msomaji endelea kufuatilia, na jipe himma kwani njia bado yaendelea… Alipokufa Ziyaad alishika ugavana mtoto wake Ubaidullah ambaye hakufuata siasa ya baba yake, aligeukia siasa ya nguvu, kuua na kuadhibu, na hawakusalimika Almuhakkima na uovu wake. Basi hebu tazama maneno yake – Allah akuhifadhi ewe msomaji – kuhusu daawa ya Abii Bilaal, alisema Ubaidullah “ Maneno ya watu hawa – Mirdaas na watu wake – yanapenya haraka katika moyo kuliko moto katika majani makavu” na hiyo yatokana na kukubalika sana daawa yake.

Je kundi hili lilobeba Uislam kwa amana litasalamika na uovu wa mtawala huyu?? Au watadhulumiwa tena kama walivodhulumiwa Ahlu nahrwaan ?? fuatilia…

Published By Ust. Abu Muslim

BAADA YA KUUWAWA AHLU NAHRAWAAN R.A.

Jua na uzingatie vizuri kuwa aliyepata khasara kubwa katika matukio haya ni Ally bin Abi Taalib, kwani baada ya kuuwawa Ahlu Nahrawaan,  mambo yalienda kwa maslaha ya Muawiya, na likafarikiana jeshi la Ally wala hakubaki na wanajeshi mia tatu au chini ya hapo, alipoona hivyo Ally alirudi katika mji wa KUFA, na halikusimama tena jambo lake baada ya kuwaua watu wa Nahrawaan, Muawiya akampokonya kwa nguvu miji ya Yemen, Hijaz, na Misri, na wala hakutiiwa mpaka alipouwawa.

Na hapa zingatia ewe mfuatiliaji mweye akili – ya kuwa dola ya kiislam haina kiongozi wa kuyaendesha mambo yake kwa sharia ya Allah na uongofu wake, kwa kuwa Ally alijifuta uongozi kwa kukubali hukmu ya watu (( Na nani aliye mwema zaidi katika kuhukumu kuliko Allah mtukufu kwa watu wenye yaqiin )), Muawiya akachukua uongozi bila kufuata sharia, Amma wale waliotaka kuutia adabu uasi wa muawiya, wakakataa hukmu ya watu baada ya kutoka hukmu ya Allah mtukufu, waliotaka kuufanya thabiti uongozi wake Ally, na walotaka kumsaidia ndio waliouwawa na jeshi la Ally  mwenyewe, na hawakubakia ispokuwa wachache.

Ewe mwenye kutafuta nuru ya usawa.. njoo pamoja nasi tufuatilie athari za wale waliookoka katika mavamizi haya katika AHLU NAHRAWAAN, basi ujue kuwa lile kundi lilitawanyika katika miji ya karibu, hasa katika miji ya KUFA na BASRA, na katika waliokwenda BASRA kulikuwa na kundi liliofuata njia ya siri katika kueneza haki, na ilikuwa siri kwa kuwa walikuwa wachache katika mazingira magumu ya kisiasa, yaliyojaa uonevu na dhulma wa dola ya Amawiyya, ambayo ilimuadhibu kila asiyekubali aina mbalimbali za adhabu (( NA WALA MSIMILI KWA WALE WALIODHUMU )) na alikuwa kiongozi wao ni ABU BILAAL MIRDAAS BIN HUDEYR ALTAMIIMI – Allah awe radhi naye.

Published By Ust. Abu Muslim

NAHODHA WA TANO NA FITNA ZA WAASI

Baada ya Shura, wasomi katika masahaba walimchagua Sahaba Abdullah bin Wahb Arraasibii awe khalifa wa tano wa waislam, na ikawa hakuna khalifa wa kisheria kwa wakati huo ispokuwa yeye Abdullah Raasibii. Wakatoka masahaba hawa kwenda sehem inaitwa Naharawan wakiwa watu Elfu kumi na mbili taqriiban.

Hapa … ikadhihirika kufeli kwa TAHKIIM – sulhu ya Ally na Muawiya – kwani walokutana – Abu Musa Al ash ari na Amru bin Al aas – kila mmoja alitoka na rai yake, na vipi wataelewana hali ya kuwa Hukmu ya Allah wameiweka pembeni, na ikabainika wazi kuwa kundi la wasomi – walokataa Tahkiim - ndilo lipo katika haki.

Na ninafikiri ndugu yangu wenye kuitaka haki umejua ni nani walikuwa wenye kuinusuru haki na nani walikuwa wanayanusuru matamanio ya nafsi zao ? waloinusuru haki walikuwa ni MUHAKKIMAH/ AHLU HAARURA/ AHLU NAHRAWAAN ambao walijitahidi kuifanyia kazi hukmu ya Allah mtukufu walipotofautina watu.

Ally bin Abi Talib hakuipenda hukmu ya Abu Musa Al ash’ari na Amru bin Al aas, na hakika hukmu ile ilikuwa pigo kubwa kwake, akakusanyika na wafuasi wake waliobaki naye ili aende Sham kumpiga Muawiya, lakiniii… Muawiya hakumuachia Ally afanye hilo, alishamuwekea majasusi, ukatengenezwa uongo mpya mwingine ili kumuwashia fitna nyingine, akaambiwa Ati Ahlu nahrawaani wanaua watu, ati watavamia Alkuufa, … n.k. wakaletwa mashahidi wa uongo, akaamini akabadilisha mwenendo wa Jeshi, akaenda kumpiga Nahodha mpya wa kisheria Abdullah bin Wahb Arraasiby, akaiua haki na watu wake, ndani yake wakiwemo baadhi ya wakubwa wa masahaba, nao ulikuwa mwaka wa 38h. Na kwa fitna hii, SAFINA ilipata dhoruba kubwa ya kukaribia kumalizika kwa watu wa Haqqi, Wallaahi hiyo ilikuwa dhulma kubwa iliyozimwaga damu tukufu na toharifu katika karatasi nyeupe za historia, akauwawa NAHODHA wa kisheria Abdullah bin Wahb Arrasibi, na wengi katika alokuwa nao… Muawiya aliposikia khabar za mauaji hayo alisema kwa furaha "Nimempiga Ally bila ya Jeshi wala kupata tabu"

Tayari haki ilosimama kwa misingi ya Qur an na sunnah imevunjwa, makundi mawili yasiyo na ruhusa ya kuendesha safina yamekamata usukani, wapi SAFINA itapelekwa ?

Published By Ust. Abu Muslim

ALLY BIN ABII TAALIB

Nahodha Othman bin Affaan akaenda kwa mola wake, akifuatiwa baada yake na Ally bin Abii taalib

Utawala umemjia Ally bin Abii Taalib katika hali hii ya hewa ilochafuka, upepo wa fitna unaongezeka na kuzidi, na mawimbi makubwa ya mfarakano yanaikaribia safina , makundi yakajikusanya, na ukaenea mpasuko baina yao, Ally bin Abii Taalib akajaribu kurejesha utulivu na amani ndani ya Safina, akawatoa madarakani wale magavana wabaya walokuwa sababu ya watu kuukasirikia utawala ulopita wa Othman bin Affan, lakini Gavana wa Sham Muawiya bin Abi Sufian alikataa kutii Amri ya Nahodha, akaasi, na akajitangaza kuwa yeye ndiye msimamizi wa haki ya Othman bin Affaan, na mwenye kudai dam yake, akajitahidi Nahodha kumrejesha gavana huyu katika njia ya sawa kwa amani, ili swaffu ziwe moja, lakini wapii…

Ghafla wanatokezea Talha na Zubeir - nao walikuwa wamemkubali nahodha na wametoa kiapo cha utiifu kwake - wanaelekea pembezoni mwa Safina huko amekaa Bii Aisha r.a. katika mji wa Madina, wakamshikilia na kumng’ang’aniza hata wakafanikiwa kutoka naye baada ya wao kuvunja utiifu wao kwa Nahodha, na wakaenda … eti kuidai dam ya Uthman…!, au wametumwa na Muawiya ? Allahu aalam, hapo Nahodha akaona ayadiriki mambo kwa amani, ili kudhibiti mwenendo wa Safina lipite katika njia zile zile za wakati wa Mtume na Makhalifa wake waongofu…, ghafla uasi wao ukalitikisa Safina kwa vita walovianzisha mwaka 36hijriyya, na hiyo ikawa ni vita ya kwanza baina ya waislam ( VITA VYA NGAMIA WA BII. AISHA ), Nahodha alilishinda jeshi la uasi, akauwawa Talha na Zuberi, na waislam wanaokaribia Elfu moja waliuwawa pia, Bii Aisha akarudi Madina akiwa ni mwenye kujuta.

Kabla Safina haijatulia… Muawiya akaanza fujo tena ati naye akidai dam ya Uthman..!!, na Si kweli hayo, lakini alitaka kuhifadhi ugavana wake usimtoke. Kuanzia hapa SAFINA haikutulia tena, mawimbi ya Batili na matamanio yalikuwa makubwa, Alijitahidi Nahodha kumtuliza Muawiya kwa amani lakini yeye alitaka vita, na hapo ukasimama Uasi wake, na ikamuwajibikia Nahodha kumpiga vita kwa kufuata amri ya Allah mtukufu : " BASI LIPIGENI LILE KUNDI LILOASI MPAKA LIKUBALI KUWA CHINI YA AMRI YA ALLAH MTUKUFU " 49:9, yakakutana makundi mawili hapo Swiffiin katika mwaka 37, na ilikaribia ushindi kuwa wa NAHODHA wa kisheria Ally bin Abi Taalib, kama siyo ujanja na hadaa waloifanya Muawiya na rafiki yake Amru bin Al aas kwa kunyanyua misahafu katika ncha za mikuki, wakidai hukmu ya Allah mtukufu, wakijisahaulisha kuwa hukmu ni kuwa wapigwe mpaka wajisalimishe,. Nahodha alijua kuwa ni HADAA akasema " Hawakukunyanyulieni misahafu ispokuwa kwa Hadaa na Ujanja", Masahaba wenye elimu walimuunga mkono, lakini wengi katika wasiokuwa na elimu hawakumuunga mkono,Nahodha akaona awafuate hao wengi, akakubali ifanyike hukmu ya watu katika jambo ambalo Allah mtukufu alishalitolea hukmu…. Innaa lillaahi wainnaa ilayhi raajiun.

NAHODHA AMEKUBALI KUACHA NJIA YA UONGOFU KWA KUFUATA WINGI BADALA YA HAKI, JE MASAHABA WASOMI NAO WATAKUBALI KUTOKA KATIKA NJIA YA UONGOFU, SAFINA IPOTEE KABISA ? NINI HATIMA YA KUWAFUATA WAJINGA ? … Endelea kuwa nasi.

Published By Ust. Abu Muslim

HADAA YA MUAWIYA NA AMR BIN AL AAS

Baada ya Nahodha kukubali kutoka katika njia ya sawa, na kuwafuata walokuwa wengi kwa kuacha uwazi wa aya, akachaguliwa Abuu Muusa l Ash ari kuwakilisha kundi la Ally bin Abi Talib na waliomkubali katika wafuasi wake, na Amru bin Al aas akiwakilisha kundi la Muawiya , – Wayaaa leit asingelifanya hilo – kwani hili lilimaanisha -:
1. Nahodha kujivua ukhalifa na kujiweka sawa na mfanyakazi wake Muawiya.
2. Kuzalika kwa dhanna ya kuwa waasi wamepatia katika madai yao.
3. Kugawanyika kwa jeshi la Ally – baina mashaba wasomi wenye kupinga sulhu yenye kukhalifu Qur an na wafuasi wa kawaida wenye kukubali sulhu hiyo –
Amma masahaba wema na wasomi waliopinga walijitenga na uovu huo, wakakaa sehem inayoitwa HAARUURA, wakisema “ HAKUNA HUKMU ISPOKUWA YA ALLAH MTUKUFU” na wakasema “ hivi mnawapa watu wahukumu katika hukmu alokwisha ihukumu Allah mtukufu ?”,
Kufikia hapa, simama kidogo ewe mwenye kutaka uongofu, ulizingatie vyema neno lao hao masahaba wasomi kuwa “HAKUNA HUKMU ISPOKUWA ALIYOHUKUMU ALLAH MTUKUFU” nayo ni hukmu ya kumpiga Muawiya mpaka ajisalimishe kwa khalifa wa kisheria Ally bin Abi Talib, hawakutaka cheo au mali za kidunia, bali wanakitafuta kifo ili khalifa wa kisheria abaki kuwa Ally bin Abii Talib, lakini mawimbi ya batili yalianza kuizamisha meli, kwani Ally bin Abi Talib aliuangusha utawala wake, na alijiuzulu kwa kujikubalisha kwake Tahkiim na waasi, SAFINA imebaki bila uongozi wa kisheria, Kukiwa ndani yake kuna makundi matatu,

1. Kundi la waasi linaloongozwa na Muawiya na Amr bin Al aas
2. Kundi la watu wa kawaida linaloongozwa na Nahodha aliyejiuzulu Ally bin Abii Talib,
3. Kundi la masahaba Wasomi wanaolilia hukmu ya Allah isimamishwe ndani ya SAFINA na waasi watiwe adabu.

Je nani atachaguliwa kuwa NAHODHA WA TANO, wa SAFINA LILOJAA VURUGU AITULIZE ? Je Nahodha aliyejiuzulu na kuuzuliwa atachukua hatua gani ?
Hatua gani itachukuliwa na waasi, baada ya hadaa na uongo wao kudhihiri wazi wazi ? je wataanzisha vurugu na masahaba wasomi ? njoo nami katika makala ya sita…..

Published By Ust. Abu Muslim

MANAHODHA WAPYA

Akasimamia uongozi wa Safina Abubakri bin Abii Quhaafa Alswiddiiq ( 11 – 13 ), akafuata athari za Mtume – sallallaau alyh wasallam -, akaweka sawa kila kilichopindishwa baada tu ya kufa Mtume s.a.w. , akawapiga vita kila aliyeritadi na wenye kiburi, na hakika hii ilikuwa ni fitna ya mwanzo baada kuondoka nahodha, ilosimama katika SAFINA YA UONGOFU, lakini Abubakri aliimaliza kwa hikma na ikaondoka shari yake.
Na baada yake alikuja Omar bin Alkhattab Alfaaruq ( 13 – 24 ) akahukumu kwa Qur an, akaeneza wema na ihsaan, hata akawa yeye ni mfano wa uadilifu na kudhibiti mambo, watu wa SAFINA wakaneemeka kwa maisha mazuri ya amani na uadilifu, uislam ukaenea na kutangaa, na ukaingia katika miji mingine pia.

Na baada yake akakamata Uongozi Uthman bin Affan Dhi Nuurain ( 24 – 35 ), ambaye alifuata ile ile njia ya Mtume s.a.w. SAFINA ikipita katika njia iliyonyooka, upepo mzuri wa Sunnah ukiipeleka, likiwa limethibitishwa na kamba za Quraan zilo imara…

Lakini … katikati ya safari, SAFINA likaanza kutikisika, kwa kuwa kiongozi wake alitoka kidogo katika ule mstari ulionyooka ulowekwa na Mtume s.a.w. na kufuatwa na makhalifa wawili waongofu waliotangulia. HAYO ni pale walipotawalishwa katika miji wasiofaa kutawala, na mikono iliporefuka kufikia mali ya waislamu katika maslaha binafsi na kifamilia na wasio stahiki zaka.

Zingatia – ewe msomaji – mawingu ya huruma za kidugu yameanza kutanda na kuweka kiza katika njia iliyonyooka, basi vipi SAFINA itajiongoza kwa Amani na Salama ?? hapo wakatofautiana abiria wa ndani ya safina – waumini -, wapo walomkosoa Uthman bin Affan na wakajaribu kumnasihi na kumuelekeza, lakini hakukuwa na faida yoyote… basi akasimama Ally bin Abi Taalib na baadhi ya wema katika masahaba, wakambainishia haki, na wakumuwekea wazi njia, lakini hakuitikia, mawimbi ya kutaka mabadiliko ya nahodha yakanyanyuka, akazingirwa Kiongozi, akanyimwa chakula na maji, na katika SAFINA kuna zaidi ya ELFU katika Muhaajiriin – watu wa Makka - na Ansaar – watu wa Madina – wala hawakumtetea. Ukawa huu ni mtikisiko wa pili katika zama za ukhalifa, Uthman bin Affan akaenda kwa mola wake, akifuatiwa baada yake na Ally bin Abii taalib K.W.

Je Nahodha mpya ataweza Kutuliza mambo ndani ya Safina ? fuatilia

Published By Ust. Abu Muslim

SAFINA YA UONGOFU.

“KWA JINA LA ALLAH MTUKUFU, KWENDA KWAKE NA KUSIMAMA KWAKE”

Upepo wa fitna umeongezeka katika bahari ya maisha, mawimbi ya ujinga yameongezeka, na wengi katika watu wameangamia katika kiza cha matamanio na uasi, miaka inafuatana na kupishana, na hakuna hata mmoja anafikiria namna ya kujiokoa…!!!

Hukooo… katika fukwe ya bahari hii, amesimama kijana mtukufu, zinatoka nuru katika uso wake ulojaa unyenyekevu, lakini juu yake kuna mawingu ya huzuni, kwa anavyowaona watu wake wakibabishwa huku na huko na yale mawimbi makubwa, mawimbi ya ujinga na ushirikina, na zikiunguzwa nyuso zao na jua kali, jua kali la vita baina yao na dhulma. Kila siku…!! Kila leo…!!
Mara….!! Allah mtukufu anamchagua kijana huyu na kumleta karibu kwa kumpa utume, na anamtumia SAFINA YA UONGOFU ili avuke nayo katika bahari ilochafuka, na awaokoe kwa kadri awezavyo wale viumbe wanaopotea, kabla hawajafunikwa na kiza chake.

Naam …!!! Huyo ni MUHAMMAD, Mtume wa Allah mtukufu, Nahodha wa SAFINA YA UONGOFU, ambaye aliyaweka maisha yake katika hatari kwa ajili ya Laailaaha illallah..
SAFINA ikaendelea na safari ikiwa thabiti kwa aya za Allah mtukufu mbele ya upepo mkali wa Batili. Miaka inapita, wanaongezeka wanao okolewa, abiria wanakuwa wengi hali safari inaendelea kwa ulinzi wa Allah mtukufu, kisha kwa hikma na uwezo wa nahodha wake, kisha kwa ikhlaas na kujitolea kwa abiria wake ( masahaba ), ambao hawakuacha hata kwa kupwesa kuwatia adabu wavamizi wa baharini na wanyang’anyi – maadui wa haki -.
Muda wa mapigano ulirefuka…, lakini hali ya hewa ilitulia baadaye, na watu wakaneemeka kwa upepo mzuri wa Qur an, na wakaendelea na safari kwa muongozo wa Nahodha wao – Mtume Muhammad Rehma na Amani zimwendee -, katika bahari ile ilopanuka sana, yenye njia nyingi, lakini nahodha aliiweka SAFINA katika njia iliyonyooka, bila kupinda hata ukucha, wala kurudi nyuma.

Katika ufukwe wa amani, na nchi kavu iliyo salama, Nahodha alikhitariwa na Allah mtukufu, naam… imefikia wakati wa roho yake kupumzika, akawaacha akiwa kawatandikia njia ya uongofu, akiwacha kizazi alichokilea katika uongofu wa Qur an, na akawanywesha nuru ya kitabu hicho na utukufu wake.

Nini kilitokea baada ya Nahodha kufariki….. fuatilia makala ijayo

Published By Ust. Abu Muslim

SAFINA YA UONGOFU

“EWE MOLA WETU… WEWE NDIYE UTAHUKUMU WAJA WAKO KATIKA YALE WALIYOKUWA WAKITOFAUTIANA”
TUONGOZE KATIKA YALE WALIOTAFAUTIANA WATU KATIKA HAKI, KWA IDHNI YAKO, HAKIKA WEWE UNAMUONGOZA UMTAKAYE KATIKA NJIA ILIYONYOOKA”

Ewe msomaji mwerevu:

Hakika kusihi kwa imani kunashikamana na kukamatana na itikadi iliyo sahihi, iliyothibiti, iliyo mbali na matamanio na mapenzi ya nafsi. Na ujue – ewe mwenye kutaka uongofu – kuwa itikadi ndiyo inaziongoza tabia na mwenendo, na ndiyo siri ya kuthibiti, basi ni bora kwa kila muislam akaitafuta haki katika itikadi, na asimfuate kila msemaji, akijidai yeye ndiye mwenye haki, hali ya kuwa hana fungu lolote katika haki, jitahidi kweli kweli kufikia uhakika, na kushikamana na njia ilo imara zaidi ili ufikie makusudio yako, ukiwa mbali na ushabiki mbaya wa kimadhehebu, na kufuata kwa upofu. Na uamini moja kwa moja kuwa HAKI NI MOJA TU, basi usifuate ispokuwa hiyo tu.

Na ujihadhari - ewe Muislam -, usije ukatekwa na maandishi ya kitabu utakachokisoma, kabla hujakipima kwa kipimo cha sharia na akili, ili uupate usawa wala usitie shaka. Hapa, tutakwenda pamoja katika mfululizo huu mwepesi, ulio wazi utakaokuwekea wazi hakika ya AHLUDAAWA WA ISTIQAAMA – IBADHI, madhehebu ambayo wanajulikanwa wafuasi wake kwa uchamungu na usafi, na ambao hawaogopi kwa ajili ya Allah mtukufu lawama za wenye kulaumu,wamezitoa nafsi zao katika njia ya Allah mtukufu, wakaieneza haki, wakahukumu kwa uadilifu kwa karne nyingi, wakishikimana na kitabu cha Allah mtukufu, wakifuata Sunnah ya Mtume – Rehma na amani ziwe juu yake – LAKINII...

Madhehebu yao ikasukiwa vitimbi, ili ionekanwe kwa ubaya katika njia yake, na mashambulizi mangapi yamefanywa ili kuizima nuru yake, na mangapi mazuri yake yamechanganywa na mabaya ya wenye matamanio na nia mbaya, na mpaka leo… bado yatupiwa tuhma batili kwa sababu ya baadhi ya watu kutodiriki uhakika wa mambo. Lakini haiwezekani ikazimika nuru itokayo katika Quran na sunnah, kisha ikabebwa na vidume viloshiba mapenzi ya Allah mtukufu na kuwa tayari kufa mashahidi katika kuifikisha nuru hiyo, HAIWEZEKANI NURU HIYO IKAZIMIKA AU KUJIFICHA.

Basi tuwe pamoja ewe msomaji –, tuvuke pamoja kwa SAFINA HII YA UONGOFU tukaikamate bendera ya haki, huu ni ulinganio kwako , kwako wewe peke yako unayesoma, achana na kufuata mkumbo sasa hivi, njoo tuifutilie njia ya haki ilonyooka, huu ni wajibu wa kila muumin mwenye akili,usiukimbie, amesema Allah mtukufu “ NA WALE WATAKAOJITAHIDI KWA AJILI YETU TUTAWAONGOZA NJIA YETU”.Basi jitahidi – Allah akuhifadhi – na ipe nafsi yako njia ya kuifuatilia njia ya haki na uhakika, upate malipo ya kujitahidi na kuipatia haki. Ishi kwa haki na katika haki, weka qur-an na sunna kuwa ni mizani yako, wachana na ushabiki na ufuatishaji mkumbo wa kimadhehebu, na jihadhari kung’ang’ania rai za watu ambao wanapatia na kukosea, hawatakufaa kitu kwa kuiacha kwako haki.

Ndugu yangu , Kunywa katika chemchemi hii safi, maji ya haki na uhakika, achana na michirizi ilochanganyika na kuchafuka, na yarudie sana kuyasoma haya ninayokuandikia, mpaka lichomoze jua la maarifa katika moyo wako, kwa muono na hoja za wazi katika itikadi yako, na elimu ya kweli kuhusu dini yako.Huu ni mfuatano wa makala kuhusu haki na hakika, nauweka mbele yako, upate kuyafaham mambo kwa kufuatana,…. Allah mtukufu akuongoze, na akuweke katika njia ya Haki na msimamo katika dini.