Published By Said Al Habsy

Kusudio pekee la kuumbwa mwanaadamu na kuletwa duniani ni kwa ajili ya ibada. Kasema Mola Mtukufu katika Surat AD-Dhaariyaat aya ya 56 na 57, “

﴿وَ مَا خَلَقتُ الجِنَّ وَالإِنسَ إِلاَّ لِيَعبُدُونِ﴾﴿مَآ أُرِيدُ مِنهُم مِّن رِزقٍ وَ مَآ أُرِيدُ أَن يُطعِمُونِ﴾.

Maana yake, “Sikuwaumba majini na watu ila wapate kuniabudu.” “Sitaki kwao riziki wala Sitaki wanilishe.”  Na ibada ya mtu haikamiliki ila kwa kusimamisha Salaa tano za faridha. Kuacha Salaa yoyote ya faridha kwa uzembe, au kwa kukusudia, ni katika makosa makubwa na kunasababisha yule alieaiacha kupata adhabu kama ifuatavyo: 

Published By Said Al Habsy

Kuacha Salaa ni sababu ya kuingizwa motoni. Kasema Mwenyezi Mungu S.W.T. katika Surat Al-Muddath`thir aya ya 42 mpaka aya ya 44 akiwauliza watu wa motoni sababu ya kuingia kwao motoni kasema, “

﴿ماَ سَلَكَكُم فِى سَقَرَ﴾﴿قَالُواْ لَم نَكُ مِنَ المُصَلِّينَ﴾ ﴿وَلَم نَكُ نُطعِمُ المِسكِينَ﴾.

Maana yake, “Ni kipi kilichokupelekeni Motoni?” Watasema, “Hatukuwa miongoni mwa waliokuwa wakisali, wala hatukuwa tukilisha maskini.” Pia kasema katika Surat Al-Maau`n aya ya 4 na 5, “

﴿فَوَيلٌ لِّلمُصَلِّينَ﴾﴿الَّذِينَ هُم عَن صَلاَتِهِم سَاهُونَ﴾.

Maana yake, “Basi adhabu itawathibitikia wanaosali, ambao wanapuuza (maamrisho ya) Salaa zao. (Yaani wanasali lakini nyoyo zao haziko kwenye Salaa bali imeshughulika na mawazo mengine). Baadhi ya wafasiri wamesema maana ya WEIL ni bonde kubwa la Jahannam, na kama majabali ya ulimwengu mzima yangelitiwa humo yangeliyeyuka kwa ukali wa joto lake, na hapo ndipo patakuwa makaazi ya wale wenye kuzidharau Salaa zao, yaani wenye kuzipuuzia. Sasa jee vipi itakuwa adhabu ya yule ambaye hasali kabisa na anawajibika kusali?. Pia kasema Mola Mtukufu katika Surat Maryam aya ya 59, “

﴿فَخَلَفَ مِن بَعدِهِم خَلفٌ أَضَاعُو الصَّلاةَ وَا تَّبَعُواْ الشَّهَوَتِ فَسَوفَ يَلقَونَ غَيًّا﴾.

Maana yake, “Lakini wakaandamia baada yao chipukizi mbaya (watoto wabaya). Wakapuuza Salaa na wakafuata matamanio mabaya, kwa hivyo watakutana na adhabu kali”.

Published By Said Al Habsy

Atakaeacha Salaa za faridha kwa kukusudia, siku ya kiyama atafufuliwa pamoja na watu wabaya. Kasema Abdullah bin Amr R.A.A., “Kasema Mtume S.A.W. [1]“

ومن لم يحافظ على الصلوات الخمس و لم يصلهن لوقتهن وضيعهن أو فرط فيهن حشره الله مع أبي بن خلف و مع قارون وفرعون ذي الأوتاد.

Maana yake, “Na yule ambaye hatozihifadhi Salaa tano, au hatozisali kwa wakati wake, au kuziharibu, au kuzidharau, Mwenyezi Mungu atamfufua na Ubeyi Bin Khalaf na Qaruuni na Firauni.” (Hawa ni katika watu wabaya kabisa ambao watakuwa na adhabu kali. Watu hawa wametajwa hapa kwa sababu wote waliacha ibada ya Mwenyezi Mungu Mtukufu kwa ajili ya kufuata matamanio yao ya kidunia, na ndizo sababu kama hizo ambazo zina wasababishia watu wengine kuacha ibada ya Mwenyezi Mungu Mtukufu. Kwa mfano: Wale watakaoacha Salaa zao kwa ajili ya kushughulishwa na utawala walio nao, na wakafa katika hali hiyo hao watafufuliwa na Firauni. Wale walioacha Salaa kwa ajili ya kushughulishwa na mali zao watafufuliwa na Qaruuni. Wale walioacha Salaa kwa ajili ya biashara zao watafufuliwa na Ubey bin Khalaf na kadhalika. 

Katika safari ya Miiraji inasemekana Mtume S.A.W. alipita katika kundi la watu ambao vichwa vyao vilikuwa vikivunjwa na nyundo ya chuma. Malaika Jibril A.S. akasema kumwambia Mtume S.A.W. "Hawa walikuwa hawasali na hiyo ndio yatakuwa malipo yao siku ya kiyama".

Published By Said Al Habsy

Maisha ya dunia ni kama vile shamba na mtu atalipwa kufuatana na vitendo vyake, marejeo ya mwanadamu ni kesho akhera, na baraka ya uhai ni kutenda yale yenye manufaa kesho akhera. Salaa ndio kitendo cha kwanza ambacho mtu ataanza kuhisabiwa; ikiwa ataziharibu basi ameharibu kusudio la kuumbwa kwake, na vitendo vyake vyote kesho akhera vitakuwa havina thamani, na juhudi na wakati wake alioutumia duniani kwa kutenda alio tenda itakuwa haina thamani. Kasema Mwenyezi Mungu katika Surat AN-Nur aya ya 39, “

﴿وَالَّذِينَ  كَفَرُواْ اأَعمَـلُهُم كَسَرَابِ بِقِيعَةٍ يَحسَبُهُ الظَّمئَانُ مَآءً حَتّى إِذَا جَآءَهُ لَم يَجِدهُ شَيئاً وَّوَجَدَ اللَّهَ عِندهُ فَوَفَّــهُ حِسَابَهُ وَاللهُ سَرِيعُ الحِسَابِ﴾.

Maana yake, “Na wale waliokufuru, vitendo vyao (wanavyoviona vizuri) ni kama mazigazi, (mangati sura ya maji) jangwani, mwenye kiu huyadhani ni maji, akiyaendea hayaoni chochote (na wao watakapoziendea amali zao siku ya Kiyama. Hawatopata chochote); Wamkute Mwenyezi Mungu hapo, awalipe hesabu yao sawa sawa; na Mwenyezi Mungu ni Mwepesi wa kuhesabu.”

Pia kasema Mwenyezi Mungu Mtukufu katika Surat Al-Furqan aya ya 23, “

﴿وَقَدِمنَآ إِلى مَا عَمِلُواْ مِن عَمَلٍ فَجَعَلنـهُ هَبَآءً مَّنثُورًا﴾.

Maana yake, “Na tutayaendea yale waliyoyatenda katika amali (zao walizofanya japo nzuri, maadamu walikuwa wanakanusha Uislamu); Tuzifanye kama mavumbi yaliyotapanywa, (yaliyotawanyika).” Yaani vitendo vyao vitakuwa havina thamani yoyote ile. 

Baadhi ya watu wanafikiria vipi mtu aliefadhiliwa mambo duniani ambayo kwa nadharia yao ni mambo mazuri na thamani, kama vile watoto, mali, madaraka na kadhalika, atakuwa hana baraka. Fikra hizo sio sahihi kwani utulivu na furaha havitokani na vitu hivyo na inawezekana vikawa ndio sababu ya adhabu na mashaka yake duniani na kesho akhera. Wanasema waswahili, "Kitanda usicholalia hujui kunguni zake". Kasema Mola Mtukufu  katika Surat AT-Tawba aya   55, “

﴿فَلاَ تُعجِبكَ اَموَلُهُم وَلآ اَولـدُهُم إِنَّمَا يُرِيدُ  الله لِيُعَذِّبَهُم بِهَا فِى الحَيوةِ الدُّنيَا وَ تَزهَقَ أَنفُسُهُم وَ هُم كـفِرُونَ﴾. 

Maana yake, “Yasikufurahishe mali yao wala watoto wao. Anataka Mwenyezi Mungu awaadhibu kwa hayo katika maisha ya dunia, na zitoke roho zao, na hali ya kuwa ni makafiri.” Pia Mola Mtukufu ametuhadharisha na vitu hivyo kuwa vinaweza kuwa ndio sababu ya kutusahaulisha na ibada na akaonya kwa kupata hasara na adhabu kali kwa atakaefanya hivyo. Kasema Mola Mtukufu katika Surat Al-Munaafiqun aya ya 9, “

﴿ياَيُّهَا الَّذِينَ ءَامَنُواْ لاَ تُلهِكُم اَموَلُكُم وَلآ أَولـدُكُم عَن ذِكْرِ اللهِ وَ مَن يَفعَل ذلِكَ فَأُ لَـئِكَ هُمُ الخسِرُونَ﴾.

Maana yake, “Enyi Mlioamini! Yasikusahaulisheni mali yenu na wala watoto wenu kumkumbuka Mwenyezi Mungu; Na wafanyao hayo, hao ndio wenye kukhasirika.” (Na wafasiri wa Qur`aani wamesema, “Kumkumbuka Mwenyezi Mungu katika aya hii inamaanisha Salaa tano za faridha za kila siku. Kwa hali hiyo ikiwa mtu itamshughulisha biashara yake, au shughuli yake yoyote ile, au watoto wake, mpaka ashindwe kusali kwa wakati wake basi atakuwa, ni miongoni wa wenye kupata hasara.)