Published By Said Al Habsy

Kila waliokuwa hawana habari ya Uislamu waliisikia siku hii aliposimama Mtume (s.a.w.) juu ya Jabal Safaa na akadhihirisha mbele ya watu wote kuwa yeye ni Mtume, amekuja kutengua ile dini yao na kufundisha dini nyengine. Watu waliokuwa wanadadisi pale pale waliondoka kuwatafuta hao Waislamu na kuwauliza hakika ya dini yao hiyo na vipi inatafautika na dini yao ya asili, wakati huo watu wengi kidogo walikuwa wamekwisha silimu, na mara walianza kueleza dini hiyo kwa kila wenye kuwauliza, wakasilimu waliojaaliwa uongofu na wakakakamia katika masanamu yao wale waliokuwa wakaidi, wakazidi kuyapenda na kuyatukuza kuliko zamani, ili wapate kuwaudhi waliosilimu. Lakini kila mchana ulipopambazuka na idadi ya Waislamu ilizidi, hata wale wakubwa wa kikafiri walipohisi hatari ya Uislamu juu ya dini yao waliazimia wauzuie kwa nguvu kama hautazuilika kwa salama. Mara wakajikusanya na wakaazimia wasiwe na chembe ya huruma katika nyoyo zao juu ya hao walioacha dini yao, mambo waliyoazimia kufanya ni:-

1. Kufanya kila inavyoyumkinika kuzuia watu wasisilimu.
2. Kumwadhibu adhabu kubwa kila aliyesilimu.
3. Kama hayumkiniki kuadhibiwa, adharauliwe na kila mtu, asipewe ile hishima aliyokuwa akipewa.
4. Kama ni mfanyaji biashara, watu wasinunue biashara yake wala wasimwuzie.
5. Na kama ni yatima asipewe pesa zake. – Kwa hivyo mayatima wengi na hao wengine waliogopa kusilimu na waliosilimu walikosa pesa zao na itibari yao –.

Published By Said Al Habsy

Waliokuwa wakiwatesa zaidi Waislamu ni hawa:-

1. Abu Lahb: Baba yake mdogo Mtume (s.a.w.)

2. Ummu Jamil bint Harb: Mke wa huyu Abu Lahb. Mungu amemtaja mwanamke huyu katika Quran kwa jina la Hammalatal Hatab[1].

3. Abu Jahl: Mjomba wake Sayyidna Umar bin Khattab, Mtume (s.a.w.) alikuwa akisema: “Kila umma una Firauni wake, na Farauni wa umma huu ni Abu Jahl” Jina lake khasa ni Abul Hakam – Babe akili – mwenye akili kubwa, lakini Waislmu wakamgeuza wakamwita Abu Jahl – baba la upumbavu[2] –.

4. Sayyidna Umar bin Al Khattab: Lakini mwisho wake alisilimu na akawa Khalifa wa pili wa Kiislamu.

5. Uqba bin Abdi Muayt: Bwana wa Kibani Umayya, na baba wa kambo wa Sayyidna Uthman bin Affan.

6. Hakam bin Abil As: Baba yake mdogo Sayyidna Uthman, alimtaabisha sana Sayyidna Uthman aliposilimu. Lakini yeye mwenyewe alisilimu mwisho wake, na yeye ndiye baba wa Wafalme wa Kibani Umayya wote, ila watatu wa mwanzo tu.

7. Walid bin Al Mughyra: Bwana mkubwa wa Kibani Makhzum na tajiri mkubwa kabisa wa Kikureshi, alikuwa na hishma kubwa ambayo hakuwa nayo yoyote wakati huo. Neno lake ndilo neno, alikuwa hana jina ila “Rrajul Adhim” – yaani yule mtu mtukufu – Mali ya mayatima wengi yalikuwa mkononi mwake, kwa hivyo alipata njia ya kuwazuilia mayatima wengi wasisilimu kwa kuogopa wasije wakakosa mali yao. Lakini mwanawe mdogo – Khalid bin Walid – alisilimu baadae, akawa jamadari mkubwa wakati wa Mtume (s.a.w.) na baada yake. Na vile vile watoto wake wengine.

8. Asi bin Wail: Baba yake Bwana Amr bin Al As – jamadari mkubwa wa Kiislamu na ndiye aliyeitoa Misr katika mikono ya Warumi.

Umayya bin Khalaf: Akimwadhibu yoyote yule aliyesilimu katika ukoo wake, na wengi wengineo wasiokuwa hawa, ambao itachukua dakika nyingi kuwataja licha kuwaandika.

Published By Said Al Habsy

Watu walioadhibiwa sana kwa ajili ya dini yao ni hawa:-

1. Sayyidna Abubakr: Mara tu Mtume (s.a.w.) alipodhihirisha kwa watu Utume wake, Sayyidna Abubakr alikwenda msikitini akatoa khutba juu ya Uislamu. Hakushtukia ila watu wote waliokuwa hapo wanampiga, baada ya kuanguka chini, aliinuka Utba bin Rabia akampiga kwa viatu mpaka akazimia, hakupata fahamu ila walipokuja jamaa zake wakamchukua kitikiti mpaka kwake, akasalia ndani baadhi ya siku, hawezi hata kujinyanyua kitandani.

2. Bwana Bilal: Alikuwa mtumwa wa Umayya bin Khalaf, – Adui mkubwa wa Waislamu – Huyu Umayya alikuwa akimfunga kamba za mikono na miguu na ya shingo, na akiwambia watoto wamburure njiani kama wadudu chungu wanavyoburura nyuki aliyekufa, mara nyingi alikuwa akimshindisha na akimlaza na njaa, kisha humchukua siku ya pili yenye jua kali, akenda naye akamlaza chali, utupu juu ya mchanga wa moto, na akamwekea jiwe la moto juu ya kifua chake, na akamwambia “Utasalia vivi hivi mpaka ufe au uache dini ya Muhammad” Bwana Bilal alikuwa hasemi ila “Ahad Ahad” yaani “Naabudu Mungu mmoja tu wa haki” akawa anataabishwa vivyo hivyo mpaka akakombolewa na Sayyidna Abubakr kwa kumbadilisha na mtumwa wa kikafiri pamoja na mkewe na mtoto wake na pamoja na pesa nyingi juu yake.

3. Bwana Abu Fukayha: Alikuwa akitaabishwa na mtoto wa Umayya kwa namna ile ile ambayo Umayya akimtaabisha Bwana Bilal.

4. Bibi Zinira: Abu Jahl alikuwa akikiunguza chuma motoni kisha akimgandamiza nacho machoni mpaka akawa pofu.

5. Bwana Khabbab: Alikuwa mtumwa wa mwanamke katili kweli kweli, alikuwa akinyolewa nywele kisha akichomwa kwa bapa la chuma chenye moto juu ya kichwa, akawa madonda matupu kichwani.

6-8. Ammar bin Yasir na Baba yake na Ndugu yake: Walikuwa wakibabuliwa kwa majani ya mtende kila siku, hata wakajaa madonda mwili mzima, na 2 katika hawa wakafa, akasalia Bwana Ammar tu.

9. Mama yake Bwana Ammar: Alifungwa baina ya ngamia wawili – mguu mmoja huku na wa pili huku – tena wakaendeshwa mbio njia mbali mbali, na huyu mwanamke akachanika pande mbili.

10. Bwana Amir bin Fuhayra: Aliadhibiwa hata akarukwa na akili.

11. Bibi Lubayna: Sayyidna Umar – kabla ya kusilimu kwake – alikuwa akimpiga bakora wee hata mpaka achoke mwenyewe.

Wapo wengi wasiokuwa hawa, na wengine waliteswa kwa mateso ambayo hayafai kutajwa kitabuni.

Published By Said Al Habsy

Wengine mashaka yalipowazidi – walirejea kwenye dini yao ya zamani – lakini si wengi. Miongoni mwa waliorejea ni hawa:-

1. Abu Qeys: Mtoto wa Walid bin Mughyra.
2. Ali: Mtoto wa Umayya bin Khalaf, aliyekuwa akimtaabisha Bilal.
3. Harith bin Rabia: Babu yake alikuwa katika mabwana wakubwa wa Makka.
4. As bin Munabbih: Mtoto wa mtu mkubwa sana wa Makka na ni jamaa mno na Umayya bin Khalaf.

Ilikuwa hapana ukoo wowote wa Kikureshi na Waislamu kidogo sana kuliko ukoo wa Umayya bin Khalaf, na yote haya yalikuwa kwa ajili yake, wengine walirejea kwa dhahiri yao tu, na ndani yao walikuwa Waislamu, hata mji wa Makka ulipotekwa ndipo walipodhihirisha kuwa wao walikuwa Waislamu tangu zamani, na Mtume (s.a.w.) na badhi ya Masahaba walikuwa wakijua. 

Published By Said Al Habsy

Makureshi walipoona ukatili wao katika kuadhibisha Waislamu haukufidisha kitu katika kuuzuia Uislamu, waliona kuwa itakuwa bora wakenda kwa Mtume (s.a.w.) wakaonane naye uso kwa uso na wampe nasaha zao, basi wakaondoka wakubwa wa Kikureshi wakenda kwa Mtume (s.a.w.), msemaji wao alikuwa Utba bin Rabia – Babu yake Bwana Muawiya kwa upande wa mama yake – Akasema kumwambia Mtume  Muhammad (s.a.w.): “Unajua kuwa hapana mwarabu yoyote aliyewaletea baa watu wake zaidi kuliko wewe? Umetutawanya mbali mbali baba hapatani na mtoto, wala mtoto hapatani na mjomba. Kaka hana huruma juu ya dada yake, wala dada hana huruma juu ya mdogo wake, basi tumekuja tuyatengeneze mambo haya, na tuondoshe huu ugomvi ulioko baina yetu. Tumekuja kukudhihirishia mambo 5, ukiyakubali utastarehe wewe na watu wako, na tutapumzika sisi vile vile. Mambo yenyewe ni haya:-

1. Kama wewe unafanya kwa ajili ya kutaka mali, basi twambie kiasi gani unataka mara moja tutachanga tukupe nawe uwache haya.
2. Au ukiwa unataka ufalme juu yetu tutakutawalisha sasa hivi mbele ya watu wote.
3. Au ukiwa unataka Ushekhe tu hili ni jepesi zaidi, tutakupa Ushekhe juu ya koo zote za Kikureshi, zisikate lolote bila ya amri yako.
4. Au kama unataka mwanamke mzuri sana, basi sisi sote tumeridhia uchague mwanamke umtakae katika ukoo wowote wa Kikureshi na katika kabila yoyote ya kiarabu.
5. Au kama ni mgonjwa – umepatwa na jini – twambie tukakutafutie kila mganga mpaka achomoke jini huyu. Kwani mwenye jini hukomolewa.

Mtume (s.a.w.) akawajibu[1]: “Yote hayo mliyoyasema hayakuwepo moyoni mwangu wala mimi sina shughuli nayo, mimi nimeletwa nije nikufundisheni dini ya haki na malipo yangu nitapata kwa Mwenyezi Mungu, sitaki kitu kwenu nyinyi ila kuniachia kufikisha utumwa wa Mola wangu” Unaonaje lau kuwa si Mtume wa kweli si mara moja angekubali shauri hii, akastarehe yeye na akapumzisha watu wake? Alikuwa anajua kwa yakini kuwa wangelimfanyia kila alilolitaka. Pana shahada kubwa ya kuonyesha ukweli wake zaidi kuliko hii?

Published By Said Al Habsy

Wale wakubwa wa Kikureshi walipoona nasaha zao hazikufidisha kitu, walimwendea Bwana Abu Talib kwa umoja wao, kama walivyomwendea Mtume (s.a.w.) wakamwambia hivi: “Abu Talib wewe ni mtu mkubwa kwetu na mwenye kusikilizwa maneno yako. Wewe ndiye mkubwa wa dini yetu, na umeona namna gani mwanao anavyoiponda dini hiyo, basi tunakuomba umzuie kutangaza hiyo dini ya uzushi, au tuache tumfanye tutakavyo, kwani wewe ni kama sisi katika kuionea uchungu dini hii ya wazee wetu”. Bwana Abu Talib akawajibu jawabu nzuri na akawaahidi kuwa atamsemesha kwa hayo.

Zilipopita siku nyingi bila ya kuona chochote kuzuilika walimjia tena mara ya pili wakamwambia: “Abu Talib hukumzuia mwanao na sisi hatuwezi kusubiri tena juu ya haya, basi khiari moja katika mawili:

1. Ima umzuie kutangaza huo uzushi wake, au.
2. Tutakupiga vita pamoja naye na kila atakayekusaidia.

Bwana Abu Talib akaona taabu kupigwa vita na watu wote, kwa hivyo akawapa ahadi kubwa kuwa atamsemesha mwanawe, akamwendea Mtume (s.a.w.) amweleze maneno yote waliyomweleza Makureshi na akamwambia: “Mwanangu! usinitwike mzigo nisioweza kuuchukua” Mtume (s.a.w.) alipomsikia baba yake mdogo anasema vile machozi yalimlengalenga, akamwambia: “Baba! kama umeshindwa kunisaidia basi, lakini mimi nitaendelea kutangaza amri ya Mungu mpaka Mungu afanye anavyotaka. Wallahi! Hata kama lau wangeliweza kunitilia jua katika mkono wangu wa kulia na mwezi katika mkono wangu wa kushoto ili niache jambo hili nisingeliacha ila akitaka mwenyewe Mwenyezi Mungu” Bwana Abu Talib akamfanyia huruma kubwa na akamwambia: “Fanya unavyotaka Wallahi sitaacha kukunusuru, nitakufa pamoja na wewe”

Huyu Bwana Abu Talib alikuwa mtungaji mashairi kwa hivyo alimwambia maneno hayo kwa mashairi. Tafsiri yake ni hii:-

                          Mimi Wallahi najua   * dini yako ni ya kweli

                          Ila mimi nachelea       * maneno ya mafedhuli

                          Mjasiri sitakuwa         * ‘kiwacha dini asili

                          Na patanenwa “Ajabu * mtu kufwata mwanawe”

                          Sasa mwanangu inuka * eleza zako amri

                          Hapana wa kukushika  * kwa yako una hiari

                          Labuda nikishafika       * mwanandani wa kaburi

                          Hapo sina la kufanya    * jisimamie mwenyewe.

Published By Said Al Habsy

Katika mwaka wa tano – October 615 mwezi wa Rajab – Mtume (s.a.w.) aliwaamrisha watu wake wende katika nchi ya Mahabushia, aliwaambia kuwa Mfalme wa nchi hiyo mwadilifu, anatumai kuwa watapata salama huko, basi akaondoka Makka kila mnyonge asiyekuwa na jamaa wa kumhifadhi. Sayyidna Uthman bin Affan – alipoona kuwa wote hao watakao kwenda huko ni wanyonge tu – aliona kuwa itakuwa bora zaidi kama yeye atakwenda pamoja nao, ili awape nguvu na wasivunjike nyoyo kwa kujiona wao tu ndio walioondoka katika mji wa Makka, Sayyidna Uthman akamtaka ruhusa Mtume (s.a.w.) ende pamoja na mkewe – Bibi Ruqayya – Mtume (s.a.w.) akampa ruhusa kwa furaha kubwa, wakaondoka kwa siri wakenda mpaka Jidda au bandari nyengine iliyokuwa ikitumika zamani, na huko wakazikuta mashua mbili, wakazikodi mpaka huko wanakotaka kwenda. Watu wenyewe walikuwa 20 tu – 15 wanaume na 5 wanawake[1] –.

Walipofika huko mara walikwenda kwa Mfalme wakamtaka ruhusa kukaa katika nchi yake, naye akawapa. Wakakaa huko muda wa miezi mitatu kamili, hata katika mwezi wa Mfunguo mosi, wakapata habari ya owongo kuwa watu wote wa Makka wamesilimu, wakajituta wote kwa umoja wao wakaja Makka, lakini waliyakuta mambo kama zamani na zaidi.

Walipofika Makka walimhadithia Mtume (s.a.w.) na Masahaba wenziwao salama waliyoipata katika nchi ya Mahabushia, kwa hivyo wakafanya hamu nao kwenda[2], wakatoka pamoja na wale wa zamani waliokuwa wamerejea, wakarejea tena huko, safari hii walitoka Masahaba 101 – wanawake 18 na wanaume 83 – na mkubwa wa msafara wao safari hii alikuwa Bwana Jaafar bin Abi Talib[3] – Kaka yake Sayyidna Ali bin Abi Talib – kwani Sayyidna Uthman hakurejea.

Watu hawa waliondoka kwa siri, hata Makureshi hawakuwaona, hawakupata habari yao ila wamekwishatoka katika mji wa Makka, wakapeleka watu[4] kwa Mfalme wa Mahabushia kumwomba awatoe hao Masahaba katika nchi yake na awape wao, lakini yule Mfalme alikataa kabisa ingawa walimwomba sana na wakamhadharisha uovu wa watu hao na kuwa watatia fitna katika nchi yake. wengi katika Masahaba hawa walisalia huko katika Uhabushia mpaka katika mwaka wa 7 A.H. Watu 41 katika hao ndio waliorejea upesi – 33 wanaume na 8 wanawake – .