Published By Said Al Habsy

Ukiyakinika unajisi wa pahala pa kusalia, je inasihi kusali juu ya kilichotandikwa juu yake?

Ikiwa kilichotandikwa ni kama jamvi, linalojulikana Omani kwa kuto kuungana kindu lilizo tengezewa, basi haidhuru kuwapo najsi kwenye upande wake mmoja kama mwenye kusali hakuwa juu yake. Ama kikiwa kilichotandikwa ni kama zulia, basi kuwapo najsi hata nchani mwake humharibia mwenye kusali kwa kuwa nyuzi zake zimeungana. Na Allah anajua zaidi.

Published By Said Al Habsy

Je mfeleji (mfereji) hunajisika kwa kuoga majusi ndani yake ?

Amepokea Imam Ar-Rabii bin Habib –Allah amrehemu- kwa Abu Ubaida kwa Jabir kwa Ibn Abbas -Allah awaridhie- kwa Mtume –rehma za Allah na amani zimshukie- kuwa kasema, "Maji ni toharifu, hayanajisiwi ila na najsi itakayo yaenea ikabadili rangi yake au ladha yake au harufu yake". Hili ni kwa makubaliano ya wenye ilmu (ijmai) kwa maji yapitayo, pia maji mengi hata yakiwa yametuwama, lakini lina hitilafu kwa maji kidogo. Na kwa hiyo inakubainikia kuwa mifeleji hainajisiwi na kuoga majusi ndani yake. Na Allah anajua zaidi.

_________________________________________________________________________

Mfeleji = mfereji (msingi) uliochimbwa kupitishia maji kutoka kwenye chemchemu au mtoni.

Published By Said Al Habsy

Je nguo za mwenye janaba hunajisika kwa jasho lake ? Na je hunajisika nguo za mwenye hedhi na mwenye nifasi kwa jasho lao ?

Mwili wa mwenye janaba si najsi hata zinajisike nguo zilizogandana nao, na vivyo hivyo mwenye hedhi na mwenye nifasi. Kuamrishwa wao kuoga si kwa kuwa wao ni najsi, bali ni amri ya kiibada kama vile kuosha viungo vya udhu kutokana na hadathi ndogo. Dalili juu ya hayo ni nyingi. Kati yake ni kwamba Mtume –rehma za Allah na amani zimshukie- alikuwa akisalia nguo anayojifunikia akimuingilia mkewe. Pia kauli yake kwa Bibi Aisha –Allah amridhie-, "Nipe mkeka wa kusujudia", yeye akasema: mimi nimo kwenye hedhi! Akamwambia, "Hedhi yako haimo mkononi mwako". Na alikuwa –rehma za Allah na amani zimshukie- akilala pamoja na wakeze wakiwa katika hali ya hedhi na mwili wake ukigusana na miili yao. Na Allah anajua zaidi.

Published By Said Al Habsy

Nini hukumu ya kujipangusa choo kwa mawe au karatasi n.k. kabla kunawa? Je huwa kwa mkojo tu au kwa mkojo na kinyesi?

Sahibu zetu wa Magharibi wanaona hilo ni wajibu kwa kuwa limeamrishwa katika hadithi, na kimsingi kila liloamrishwa na sharia huchukuliwa kuwa ni wajibu. Wengineo wanaona ni lenye kupendelewa. Na kauli ya kwanza ni ya hadhari zaidi na ni aula kufuatwa. Wala hapana tafauti katika hilo baina ya najsi hizi mbili. Na Allah anajua zaidi.

___________________________________________________________________________________________

 Ibadhi waliokuwa Kaskazini mwa Afrika k.m. Algeria, Libya na Tunisia wanajulikana kama Ibadhi wa Magharibi.

 Ibadhi wa Mashariki, nao ni wale waliokuwa katika Bara Arabu k.m. Omani, Yemen na Iraqi.

Published By Said Al Habsy

Nini hukumu ya maji ya wadi, tahiri au si tahiri ikiwa yamebadilika moja kati ya sifa zake, nayo ni rangi kwa sababu ya udongo yanaoukumba?

Maji hayanajisiwi ila na kitakacho yaenea kikabadili rangi yake au ladha yake au harufu yake, kwa sharti hicho kitakacho yaenea kiwe ni najsi; ama mchanga si najsi bali unashirikiana na maji katika sifa zake mbili nazo ni utohara na utoharishi, na kwa hiyo udongo hauyanyang'anyi maji mojawapo ya sifa mbili hizo. Na Allah anajua zaidi.

__________________________________________________________________

Wadi = bonde kama mto lipitalo maji ya mvua.

Published By Said Al Habsy

Nini hukumu ya kutawadha kwa maji yaliyotuwama ikiwa yameingiwa na najsi ?

Ikiwa maji hayo ni mingi kadiri ya qulat mbili (kulateni) basi inajuzu kwa mawafikiano ya wenye ilmu, ama yakiwa chini ya hayo basi yana khilafu, na hili iwapo hayakubadilika rangi yake au ladha yake au harufu yake. Na Allah anajua zaidi.

_______________________________________________________

Kulateni = maji kadiri ya kilo 200 au debe 12.

Published By Said Al Habsy

Nini tafauti baina ya manii, madhii na wadii, na nini hukumu ya kila moja kati yao?

Manii: ni maji meupe mazito yatokayo kwa nguvu, na yakitoka haya ladha humalizika sawa yakitoka kwa mwanamme au mwanamke, na yakitoka kwa mwanamme hufuatiwa na kunywea kwa uume wake; na maji haya ndiyo huwajibika kwayo kuoga.Madhii: ni yenye kutoka katika hali ya kutamani na kushikanashikana bila kuzimika kwa shauku, nayo ni mepesi kuliko manii.Wadii: ni yenye kutoka baada ya mkojo au kwa kuzidiwa na hali ya ubaridi.Maji haya ya namna mbili za mwisho hutengua udhu lakini hayawajibishi kuoga janaba. Na Allah anajua zaidi.

Published By Said Al Habsy

Je inatosheleza kujipangusa choo kwa mawe bila kujiosha kwa maji kwa ajili ya kusali?

Kwetu sisi mawe peke yake hayatoshelezi pasina kutumia maji, basi hapana budi kujumuisha viwili hivyo, na hivyo ndivyo walivyofanya watu wa Qubaa ambao Mwenyezi Mungu S.W. amewasifu kwa kauli Yake 

لَمَسْجِدٌ أُسِّسَ عَلَى التَّقْوَىٰ مِنْ أَوَّلِ يَوْمٍ أَحَقُّ أَنْ تَقُومَ فِيهِ ۚ فِيهِ رِجَالٌ يُحِبُّونَ أَنْ يَتَطَهَّرُوا ۚ وَاللَّهُ يُحِبُّ الْمُطَّهِّرِينَ

((Msikiti uliojengwa juu ya msingi wa ucha-Mungu tangu siku ya kwanza unastahiki zaidi wewe usimame humo. Humo wamo watu wanaopenda kujitakasa, na Allah anawapenda wajitakasao.))

Na Mtume –rehma za Allah na amani zimshukie- kaamuru ifanywe kama walivyofanya watu Qubaa; kwani Mtume –rehma za Allah na amani zimshukie- alikuja kwao akawauliza: kwa nini walistahiki kusifiwa huku kutoka kwa Mwenyezi Mungu? Wakasema wao hufuatisha mawe kwa maji. Kwa hiyo aliyesahau kutumia maji anawajibika kurudia sala yake kwasababu sala yake haikutimia. Na Allah anajua zaidi.

____________________________________________

Aya 108, surat At-tawbah.

Published By Said Al Habsy

Je ni lazima kutumia sabuni wakati wa kuoga janaba na kuosha najsi? Na je inatosheleza katika kuoga kujisugua chini ya mara tatu?

Si lazima kutumia sabuni katika kuoga janaba, vile vile katika kuosha najsi ila iwapo haitoki bila sabuni. Na kusugua katika kuosha najsi ni mpaka itoke. Na Allah anajua zaidi.

Published By Said Al Habsy

Je inamlazimu aliyeangukiwa na janaba kuosha mwili wake mzima?

Sijui nini unakusudia kwa kauli yako “aliyeangukiwa na janaba” ; ikiwa unakusudia yamempata manii mwilini mwake basi anawajibika katika hali hii kuosha pahala palipopatwa na manii tu na haimlazimu kuosha mwili wake wote. Na Allah anajua zaidi.

Published By Said Al Habsy

Mtu kaendelea kutokwa na upepo bila hiari wakati wa kutufu Al Kaaba na hakurudia kutawadha kwa kuwa upepo ungeendelea kutoka kwa muda mrefu, nini analazimika kufanya?

Ikiwa upepo unaendelea kumtoka kwa namna ambayo hapati nafasi ya kutufu bila upepo kutoka basi analazimika kufanya kama afanyavyo mwenye kushindwa kuzuia mkojo, yaani atawadhe wakati anapoinuka kutufu na haidhuru kwake baadae kutoka upepo, na kama hivi afanye anapoinuka kusali, lakini anapswa atawadhe upya kwa kila sala na kila tawafu. Na Allah anajua zaidi.

Published By Said Al Habsy

Ninasumbuliwa na kutoka gesi tumboni kwa namna ya mnato na huacha athari kwenye nguo, je inajuzu niwe imamu nisalishe watu ?

Ukiwa una yakini ya kutoka kitu basi haijuzu wewe kuwa imamu kwa watu, bali ikiwa hilo linaendelea bila kusita inakupasa utawadhe kwa kila sala unapotaka kuanza kuisali na usisali imamu kwa watu, kisha haidhuru kwako kitachotoka wakati unasali sala hiyo kwasababu hukumu ya jambo hilo ni sawa na hukumu ya kutozuia mkojo. Na Allah anajua zaidi.

Published By Said Al Habsy

Nini hukumu ya kusali na nguo zikiwa zinanuka vibaya?

Ikiwa hazina najsi inajuzu kusali nazo, lakini aula nguo za kusalia zinukie vizuri. Na Allah anajua zaidi.