Published By Sh. Hafidh Al-Sawafi

Suali:

Mimi naomba nijuzwe kuhusu huyu Masihi Dajjali, maana tunasikia mengi kuhusu hili suala, wengine wanasema kuwa hayupo kabisa, naomba nifafanuliwe kwa uwazi na ushahidi kuhusu hili suala.

Jawabu:

Zimekuja riwaya kutoka kwa Mtume (s.a.w) kuhusiana na Dajjali, miongoni mwa riwaya hizo ni zile alizopokea Imam Rabii (r.a) katika Musnad:

1. Abu Ubaidah kutoka kwa Jabir bin Zaid kutoka kwa Ibnu Abbaas: Hakika Nabii (s.a.w) alikuwa akiwafundisha dua hii kama alivyokuwa akiwafundisha sura ya Qur-ani: ((Ewe Allah hakika mimi najikinga kwako kutokana na adhabu ya kaburi, na anajikinga kwako kutokana na adhabu ya jahannamu, na anajikinga kwako kutokana na fitina ya Masihi Dajjali, na najikinga kwako kutokana na fitina ya uhai na umauti)). [Rabii 45]
2. Na aliyoipokea kwa njia ya Ibnu Omar (r.a) kutoka kwa Nabii (s.a.w) amesema: ((Nimejiona usiku huu katika Alqaaba, basi nikamuona mtu mweupe kwa uzuri unaoonekana kwa watu weupe, naye ana nywele nyingi kwa uzuri unaoonekana wa mwenye nyingi naye amezichana nazo zinatoja maji ameegemea katika mabega ya watu wawili akiwa anazunguka Alqaaba, basi nikauliza ni nani huyu? Nami nikaambiwa: Ni Masihi mwana wa Maryam (a.s.w), kisha mara nikaona kuna mtu ana mwenye chooko timtimu ana jicho chongo la upande wa kulia kama kwamba hilo jicho ni zabibu inayoelea, basi nikauliza: Ni nani huyu? Nami nikaambiwa: Ni Masihi Dajjali)). [Rabii 54]

Pia zimekuja kwa Wanahadithi riwaya nyingi zenye kuonesha kudhihiri kwa Masihi Dajjali hata ni zaidi ya mia mbili, nazo kiujumla zinaonesha kudhihiri kwake, ama yaliyoongezeka juu ya hapo katika yaliyokuja katika nyingi ya riwaya hizo ya kuwa ataiamrisha mbingu nayo itateremsha mvua, na ataiamrisha ardhi nayo itaotesha mimea, na kuwa vitu vitajifanya kwake yeye kujifanya kulikotimia; kwa hakika hayo yanahitajia kuchunguzwa na kufuatiliwa zaidi, na sisi hatuwezi kuyakubali hayo.

Na sisi ni wenye kuamini kudhihiri wa Dajali katika Madajali na Mtume (s.a.w) ametuhadharisha naye huyo, na sisi hatujuwi. Jee! alishadhihiri katika wakati uliotangulia kabla au atadhihiri katika wakati ujao?

Basi inatulazimu kujikinga kwa Allah mtukufu kutokana na shari zake huyo Dajjali na shari za wafuasi wake, na hatujuwi zaidi ya haya, na tunanyamazia waliyoyataja Wanahadithi katika sifa zake, basi elimu ya hayo tunairejesha kwa Allah mtukufu.

[Sh. Ahmed Al-Khalili Fatawa Aqiidah 2/426]

Wallahu aalamu wa ahkamu.

Published By Sh. Hafidh Al-Sawafi

Tumepokea suali:

Ni mambo gani ambayo Ibadhi waliyakubali na nusu ambayo waliyakataa kutoka kwa Makhalifa wa tatu na wa nne (Othman (r.a) na Aliy (r.a))?

JAWABU:

Neno letu ni kuwa hayo kiuhakika yamekamatana na wakati ule na wahusika wake, nao wote wameshatangulia mbele ya Haki, baina yetu na baina yao kuna makarne mengi, kwa hiyo huo ni umma una yake uliojichumia na sisi tuna yetu tunayojichumia, na kila mtu atakwenda mbele ya Allah akihusiana na majukumu yake; kwa hiyo tushughulike na ya zama zetu na tuyawache ya zama hizo na wahusika wake, hili ndilo neno letu.

Juu ya yote haya, tufahamu kuwa Ibadhi inakataa mwenendo wa upendeleo; kwa hiyo mizani yake kwa watu wasiokuwa maasumina kama Masahaba ni kwa mujibu wa itavodhihirika kwa Muumini, kwani Ibadhi inawajuwa watu na kuwaenzi kwa kushikamana kwao na haki na uadilifu, na ambaye ataacha njia ya haki na uadilifu basi huyo hakuna upendeleo upande wake kwa sababu ya hadhi yake, ni sawa hadhi hiyo ikiwa ni ya kiukoo au kicheo.

Na sisi tunaporejea katika matokeo ya kitarehe tunakutia matukio yenye makubaliano ndani yake katika kutokea kwake, na miongini mwa hayo ni:

1. Kuuliwa Khalifa wa tatu Othman bin Affaan, nayo ni mauaji ya kuzingirwa kwa muda mrefu -zaidi ya mwezi- na katika kitovu cha Dola ya Waislamu kwa wakati ule, katika Mji wa Madina, suala la msingi hapa, hivi kweli inaingia akilini kuwa kiongozi wa waislamu katika zama za Masahaba (r.a) afanyiwe maandamano na azingirwe katika ikulu kwa muda zaidi ya mwezi na Masahaba wapo, na habari wanazo, kisha waachie hivi hivi kiongozi wao na Dola yao ichezewe?!!
2. Kisha baada ya kuuliwa kwa Othman bin Affaan achaguliwe kiongozi katika mji huo huo, kiongozi ambaye ndiye Khalifa wa nne Aliy bin Abi Twalib, kisha kiongozi huyu awafanye walioshiriki katika mapinduzi na kumuua Othman bin Affaan kuwa ni sehemu ya jeshi lake, na sio hapo tu, bali apigane na wenye kudai kisasi dhidi yao hao, kama ilivyokuwa ni maarufu kuwa Muawiyah bin Abi Sufiyan alianzisha vita dhidi ya Imam Aliy kwa msingi wa kudai kisasi cha Damu ya Othman bin Affaan.

Kwa hakika inashangaza sana tunaposoma jinsi baadhi ya Masahaba walivompiga vita Imam Aliy bin Abi Twalib mara mbili -vita vya Jamal na vita vya Siffain- kwa misingi ya kudai kisasi cha damu ya Othman bi Affaan, hususan ikiwa tutajaalia kuwa ni kosa, basi litakuwa ni moja tu, lakini wakati huo huo tukirejea katika aliyotiwa makosani kwayo Othman bin Affaan tutayakuta ni mengi, nayo yameelezwa na Maulamaa wa Kisunni, kwa mfano Sayyid Qutub katika kitabu chake Adaalatu Ijtimaaiyah ukurasa wa 159 natuambia: ((Na muweko huu wa uhakika wa hukumu ulibadilika bila ya shaka katika kipindi cha utawala wa Othman, hata kama ulibakia katika mkondo wa Uislamu, kwa hakika utawala ulimkuta Othman hali ya kuwa ni mzee mkongwe na mbele yake:

1. Yuko Marwan bin Hakam anapindisha amri ya uongozi kwa mapindisho mingi ya kuuweka mbali na Uislamu
2. Kama ilivyokuwa tabia ya Othman ya ukarimu na mapenzi yake mingi kwa jamaa zake yalichangia yote mawili katika kuchomoza mienendo walioikataa wengi katika Masahaba waliomzunguka, na mienendo hiyo ilipata ukosoaji mwingi, na ilipalilia fitina ambayo Uislamu umeteseka nayo sana.
3. Othman alimgawia mkwe wake Harith bin Hakam mume wa Binti yake katika siku ya harusi dirham laki mbili, basi ilipopambazuka alifikiwa na Zaid bin Arqam Mshika hazina ya Baiti Mali ya waislamu (Benki kuu ya dola kwa nidhamu ya leo) huku ikionekana huzuni katika uso wake, na likaongolea jicho lake katika machozi, na kumtaka amuondoshee jukumu la kazi yake, basi alipojuwa sababu na akatambuwa kuwa ni peo lake kwa mkwe wake akamuambia huku akishangaa: Hivi unalia ewe Ibnu Arqam kwa kuwa nimeunganisha ujamaa wangu?! Basi Mtu aliyekuwa na hisia za Uislamu alimjibu: Hapana ewe Amiri wa Waumini, lakini nalia kwa sababu mimi nakudhania umechukuwa hii mali kwa kujilipizia uliyotowa katika njia ya Allah wakati wa uhai wa Mtume (s.a.w), wallahi lau ungelimpa dirham mia moja basi zingelikuwa ni nyingi. Hapo Othman akamkasirikia  yule mtu ambaye kifua chake hakikuweza kuvumilia ubadhirifu wa mali ya waislamu kwa jamaa wa kiongozi wa waislamu, na akamwambia: Weka ewe Ibn Arqam hakika sisi tutapata mwengine asiyekuwa wewe.
4. Na mifano ni mingi katika mwendo wa Othman katika ubadhirifu huu, kwa hakika alimpa Zubeir siku moja laki tisa, na alimpa Twalha laki mbili, na alimgawia Marwan bin Hakam thuluthi ya pato la Afrika (33%).

Na kwa hakika walimlaumu katika hilo watu miongoni mwa Masahaba, mkuu wao alikuwa ni Aliy bin Abi Twalib, basi alijibu: Hakika mimi nina jamaa na ndugu. Nao wakamkatalia hilo kwake na wakamuuliza: Hivi Abu Bakar na Omar hawakuwa na jamaa na ndugu?! Akasema: Hakika Abu Bakar na Omar walijikaribisha kwa kuwazuilia jamaa zao na mimi najikaribisha kwa kuwapa jamaa zangu. Basi walisimama na kumuwacha huku wamekasirika wakisema: Uongofu wao wallahi unapendeza kwetu zaidi huliku hili." Mwisho wa kunukuu.

Ama kuhusu Imam Aliy bin Abi Twalib (k.a.w); kwa hakika sote tunajuwa cheo chake na ukaribu wake kwa Mtume (s.a.w), lakini hayo yote yasiwe sababu ikiwa amefanya kosa apendelewe katika hukumu za Kisheria, sisi hatupingi ushujaa wake wala daraja yake kubwa ya elimu, lakini tukirejea katika matokeo ya Kitarehe tutakuta ndani yake mambo mawili yasiyokuwa na utata ndani yake nayo ni:

1. Kukubali sulhu yenye madhumuni ya kuvunja kuhumu yenye andiko safi la Allah mtukufu, hukumu ambayo alikuwa na uwezo wa kuifanyia kazi, na kuhumu hiyo ni ile aliyoiweka Allah katika Kitabu chake ((Lipigeni vita kundi ambalo limeasi mpaka lirejee katika hukumu ya Allah)) [Hujuraati 9]. Hukumu hii ndiyo iliyotumika katika kulipiga vita kundi la waasi la Muawiyah na walio pamoja naye; ama kuwa kundi la Muawiyah ni kundi lililoasi hakuna shaka yoyote ndani yake kwa mujibu wa aliyoyabainisha Mtume (s.a.w) kwa makubaliano ya wote ya kuwa alisema ((Ammar (r.a) atauliwa na kundi lililoasi)) [Bukhari 337, 2812 Muslim 2916], na bila shaka yoyote Ammar (r.a) aliuliwa na kundi ya Shaam likiongozwa na Muawiyah, na Amri ya Allah waliyoiasi ni ile ya kuwatii viongozi waumini wenye kumtii Allah mtukufu na Mtume wake (s.a.w) [Nisaa 59]; kwa hiyo kukubali kufanya nao sulhu kumekusanya madhumuni ya kuvunja hukumu hii ya wazi kiandiko, na matunda ya Sulhu yao ni: kwanza ni kutoutambua uongozi wa Imama Aliy. Pili ni kuuvua uongozi wake. Tatu ni kusababisha mapigano ya safu za Imam Aliy wenyewe kwa wenyewe. Nne nikupelekea kusimama dola ya Bani Umayyah. Kwa hiyo sulhu ilikusanya hadaa ya uchezeaji wa Dola na kuzigawa safu zake, jambo ambalo wenye uoni na maarifa katika Masahaba na Matabiina (Qurraa) waliokuwemo katika safu zake waliona ubaya wake, nao wakachukuwa hatua ya kujitowa katika safu zake kwa kufanyia kazi fundisho ya Allah mtukufu ((Na saidianeni katika wema na uchamungu, na musisaidiane katika dhambi na uadui)) [Maidah 2] pia agizo la Mtume (s.a.w): ((Hakuna kumtii kuimbe yoyote katika kumuasi Allah)); kwa hiyo waumini hawa wakasema neno lao mashuhuri ((Hakuna hukumu isipokuwa hukumu ya Allah tu)) wakiashiria kuheshimu haki ya hukumu ya Allah mtukufu ya kulipiga vita kundi lilioasi mpaka uzimwe uasi wao, na kuwa hukumu hiyo haina nafasi ya kuvunjwa kwa rai za watu, na hapa utagunduwa kuwa mwanzo wa kutokezea tofauti katika umma huu ni kutanguliza rai za watu mbele ya andiko safi la Kitabu cha Allah mtukufu.
2. Kulipiga kwake vita kundi la wale waliokataa kushiriki katika kosa la kuvunja hukumu ya Allah mtukufu, kosa ambalo asili yake ni rai ya kundi la waasi wa Shaam, rai ambayo hata Imam Aliy mwenyewe hakukubali matokeo yake na kukubali ubatili wake, sasa ikiwa rai hiyo ya sulhu ni haki kwa nini matunda yake yakataliwe?, na ikiwa ni batili kwa nini wale waliojitenga kwa uoni wao wa kuipatia haki walaumiwe na kwa kosa gani wapigwe vita?!!. Tuzingatie kuwa kundi hili walikuwa hapo kabla ni sehemu ya jeshi la Imam Aliy, kwa hiyo vita hivi vilimsaidia Muawiyah katika kutimiza malengo yake.

Kundi hili alilolipiga vita Imam Aliy lilijulikana kwa jina la Watu wa Naharawani (r.a), nalo ni kundi lililomchaguwa Imam Abdullah bin Wahab Araasibii (r.a) baada ya kuanguka Uongozi wa Imam Aliy bin Abi Twalib (k.a.w), na kundi hili ndilo asili ya Madhehebu ya Ibadhi katika mgawiko huo uliotokezea, basi Allah mtukufu awarehemu Mashahidi waliokufa Naharawani, kwa hakika wao ni alama ya kushikamana na Kitabu cha Allah mtukufu wakati wengine anaposhikamana na rai za watu kwa kuiwacha hukumu ya Kitabu cha Allah mtukufu au kuipindisha, nao ni ruwaza njema ya kujitenga na fitna wakati wengine zinapowavaa, pia ni ruwaza njema ya kukamatana na haki hata kwa thamani ya roho na damu zao.

Na mwisho wa jawabu yetu hii ni kuwa, katika wanavyuoni wetu wako walionyamazia hukumu kwa Makhalifa hao wawili na yote yaliyotokezea baina ya Masahaba (r.a) na wakayaegemeza hayo kwa Allah mtukufu, na wako wengine wamezungumzia kwa kulazimika na njia ya uadilifu bila ya kuchukuliwa na mawimbi ya upendeleo.

Kwa hiyo waliyoyasema kwa hakika wameyasema kwa misingi ya uadilifu bila ya upendeleo wowote wakijiongoza kwa neno lake Allah mtukufu ((Enyi mulioamini kuweni wasimamizi kwa uadilifu mashahidi kwa jili ya Allah tu)) [Nisaa 135] pia neno lake Mtume (s.a.w): ((Kwa hakika yaliwaangamiza waliopita kabla yenu kuwa anapoiba kwao sharifu humuachia na anapoiba mnyonge humsimamishia hukumu ya Allah, naapa wallahi lau Fatima bint Muhammad (mtoto wake wa kike) ataiba basi nitaukata mkono wake)) [Bukhari 3475 Muslim 1688].

Ama walioyanyamazia wameyanyamazia kwa kuona hayo ni matokeo ya wahusika wake kwa wakati wake, na sisi hatujalazimishwa kufuatilia ya watu, hususan ya waliokwisha tangulia, na katika aina nyingi za Ibada kuna shughuli bora kuliko kushughulikia majukumu ya wengine, na hii ya mwisho ndiyo rai yetu.

Bbasi tunasema neno la Amiri wa Waumini/Omar bin Abdulaziz (r.a): ((Hizo ni damu Allah ameziweka mbali na panga zetu, basi tuziweke mbali nazo ndimi zetu)).

Ama mwenye kutaka kuyafuatilia basi ajuwe kuwa ulazima wa uadilifu bila ya upendeleo ndio njia ya Uislamu basi alizimike nao.

Na sisi haikuwa kuyasema haya tuliyoyasema isipokuwa kwa kubainisha ambayo wengine wameyafanya kuwa ni sababu ya kuishambulia Ibadhi.

Wallahu aalamu wa ahkam.

Published By Sh. Hafidh Al-Sawafi

Suali:

Asalamu alaykum warahmatullahi wabarakatuh.

Sheikh naomba kuuliza.

Tumefundishwa kuwa ukitaka kuomba dua ni vizuri kuomba wakati wa usiku hali ya kuwa watu wamelala; kwani Allah s.w huwa kuna wakati katika usiku anauliza ni nani ananiomba nimjibu na nani ana matatizo nimsaidie?.

Sasa Sheikh usiku ni mkubwa kuliko ule muda utakaokaa kuomba dua; kwani dua ni dakika 5 mpaka nusu saa au saa moja utakuwa unaomba, sasa jee! ni wakati gani huo ambao Allah s.w huwa anashuka na kusikiliza dua za waja wake?

Shukran.

Jawabu:

Kwa hakika Allah mtukufu hufadhilisha anachotaka katika viumbe vyake, naye huhukumu anavyotaka katika mamlaka yake, na miongoni mwa alivyoviteuwa Allah mtukufu kiufadhilisho ni nyakati za usiku kwa ajili ya Ibada za sala na dua na dhikri ya kumtaja yeye Allah mtukufu na katika hilo washindane wenye kushindana.

Na miongoni mwa nyakati za usiku alizoziteua Allah mtukufu kiufadhilisho ni thuluthi ya tatu ya mwisho ya usiku, nayo inajulikana kwa kuugawa usiku sehemu tatu kuanzia kuzama kwa jua mpaka kuchomoza kwa Alfajiri ya kweli, basi hiyo ya mwisho ndio kusudiwa, na kipindi chake chote kina ufalisho huo.

Amepokea Imam Rabii bin Habib (r.a) kuwa alihadithiwa na Abu Ubaidah (r.a) kutoka kwa Jabir bin Zaid (r.a) kuwa yalimfikia kutoka kwa Abu Huraira (r.a) amesema: Alisema Mtume wa Allah (s.a.w): ((Anasema Mola wetu mtukufu aliyetukuka wakati inapobakia thuluthi ya usiku ya mwisho: Nani ananiomba nimuitike yeye? Nani anayenitaka kitu nimpe hicho? Nani ananiomba msamaha nimsamehe yeye?)) [Rabii 507]

Kwa hiyo Allah mtukufu ameuteua wakati huo na kuufadhilisha kwa ajili ya maombi ya waja wake, kwa hiyo ni vizuri mja kuukusudia kwa ajili ya maombi yake kwa Mola wake mtukufu, na hakuna ulazima wa kuujaza wakati huo wote kwa dua na maombi, na muhimu ni kuwa dua na maombi yamekuwa ndani yake.

Na Allah mtukufu anatuambia kwenye kitabu chake:

((Na wakikuuliza waja wangu kuhusu mimi hakika mimi niko karibu naitika maombi ya muombaji wakati anaponiomba, basi waniitike mimi na waniamini mimi ili waweze kuongoka)) [Baqarah 186]

Basi Allah mtukufu yuko karibu na waja wake wakati wowote, na anaitika maombi ya muombaji wakati wowote mja anapomuomba, hivi ndivyo Qur-ani ilivyotuongoza; kwa hiyo wakati ule ni kwa ufadhilisho zaidi kimaombi.

Ama suala la kuwa Allah mtukufu huwa anashuka ukifika wakati huo. Ikiwa litachukuliwa kwa maana ya kushuka amri yake hakutakuwa na tatizo, ama ikiwa litachukuliwa kwa maana ya kuondoka Allah mtukufu -dhati yake- sehemu ya juu kwa kuja sehemu ya chini, hilo kwa hakika halitokuwa sahihi na kuliitakidi ni upotevu wa wazi kwa sababu:

1. Allah mtukufu sio mwili wa kudhitiwa na sehemu ambayo ni kiumbe chake; kwa hiyo si wa kuondoka sehemu moja na kukita sehemu nyengine kimasafa.
2. Thuluthi hii ya tatu ya mwisho haiondoki katika huu ulimwengu; kwa sababu hii Ardhi yetu ni mviringo, nayo imo katika falaki yake inaogelea kimzunguko ambao ni sababu ya kupatikana nyakati zote kwa kutofautiana kisehemu; kwa hiyo Thuluthi hii ya mwisho haiondoki katika uso wa Ardhi, na mafundisho yamezingatia wakati, kwa maana hiyo haiwezekani maana ya kushuka kitu kimoja hicho hicho kutokea juu na kuja chini.
3. Italazimika kuwa Allah mtukufu anaingia ndani ya viumbe vyake; kwa sababu atakuwa ameteremka; kwa hiyo kutakuwa juu yake kuna mbingu, ametakasika Allah mtukufu na hilo utakaso mkubwa kabisa; kwani hilo ni katika sifa za viumbe na sio Muumba.

Kwa maana hiyo inafahamika kuwa makusidio yake ni kuhusishwa wakati huo kwa kukubaliwa maombi ya waja na kuwa ukifika hupatikana wito wake alioujaalia kwa waja wake kwa kutofautiana nyakati zao.

Tunamomba Allah mtukufu atukubalie dua zetu na atupe taufiqi ya kumuabudu yeye peke yake.

Wallahu aalamu wa ahkamu.

Published By Sh. Hafidh Al-Sawafi

Suali:

Sheikh kuna suali moja huwa linanitatiza sana ninapozungumza na watu kuhusu mambo ya dini au kusikiliza, nalo huwa sipati jawabu ua kuridhisha, nalo ni pale Masheikh wanaposema kuwa Allah ni mkubwa kuliko kila kitu.

Jee!! Huu ukubwa wake hapa ni kwa maana ipi?

Ningependa kujuwa huu ukubwa wake.

Nafikiri wengi hatulijuwi vyema hili la ukubwa wa Allah subhaanahu wataala ndio maana kunakuwa na hoja za kutoonekana na kuonekana.

Tunaomba Masheikh mutuelekeze.

Shukran.

Jawabu:

Kwa hakika inalazimika kumsifu Allah mtukufu kwa yanayokubaliana na utukufu wake na kujitosheleza kwake, kama inavyolazimika kumtakasa Allah mtukufu na kila lisilokubaliana na utukufu wake na kujitosheleza kwake, basi Allah mtukufu ni Mkubwa na Mkuu na Mtukufu, na Allah mtukufu ni Mkwasi, yaani hasifiki kwa sifa yoyote yenye lazimisho la kuhitajia.

Basi ukubwa wake sio ukubwa wa kuvishinda vyengie kimaumbile au kieneo; kwani ukubwa huo ni batili kwa sababu ni ukubwa wa kuzingatia mipaka ya kumalizika, kwa sababu ni ukubwa wa kulinganisha kimaumbile, basi ametakasika Allah mtukufu na ukubwa wa namna hiyo, na sisi ni wenye kunamtakasa Allah mtukufu na ukubwa wa kudhitikiwa kwa mipaka; kwani ni ukubwa wa kimwili na Allah mtukufu sio mwili.

Tukilifahamu hili, tutajuwa kuwa ukubwa wa Allah mtukufu na ukuu wake ni ukubwa na ukuu wa kicheo, nao ni ukubwa na ukuu wa ubwana, kwa maana vitu vyote viko chini ya amri yake Allah mtukufu, basi hakuna kilichomzidi yeye, wala kinachomzidi yeye, wala kitakachomzidi yeye Allah mtukufu, na kiwe kitakavyokuwa.

Haya ndiyo makusudio yake, na sio ukubwa wa kimwili, ametakasika Allah mtukufu na ukubwa wa kimwili utakaso mkubwa kabisa.

Na tukilifahamu hili na kulijuwa, basi tutakuwa tayari tumejuwa kuwa Itikadi ya kuonekana Allah mtukufu au Itikadi ya uwezekano wa kuonekana Allah ni itikadi batili; kwa sababu haikubalini na utukufu wake Allah mtukufu na kujitosheleza kwake Allah mtukufu.

Na suala na kutoonekana Allah mtukufu tumelibainisha sehemu nyengine basi turejee huko kwa kulifahamu zaidi kidalili.

Wallahu aalamu wa ahakam.

Wabillahi taufiiq.

Published By Sh. Hafidh Al-Sawafi

Suali:

Asslamu alaykum.

Niulize Suali nilanolisumbua kidogo kwenye mawazo na ambalo sina hikima nalo hata kidogo.

Hii kujinasibu sisi na jina letu la Uibadhi hatukosei kweli kweli? Naogopa isije ikawa tumesukumika kijifanya kundi (sect) katika makundi ya dini kimakosa.

Jawabu:

Waalaykum salamu warahatullahi wabarakatuh.

Kwa hakika kujinabasibu kwetu na Ibadhi sio kosa, bali kiuhakika hilo limekuwa ni wajibu kwa sababu zifuatazo:

1. Masheikh wetu waliotangulia tokea mwanzo -ingawa wao hawakutumia jina isipokuwa la Uislamu na Wanadaawa, na Wanaistiqamah, na Jaamatulmuslimina- hawakupinga kuitwa Ibadhi, na baada ya muda kupita walilikubali jina la Ibadhi bila ya kutofautiana ndani yake, nao ni hoja kwetu, basi makubaliano yao ni hoja kwetu.
2. Kujiita Ibadhi hakubatilishi Uislamu wetu; kwa sababu Muibadhi ni Muislamu, kwa hiyo ni jina mahususi katika mjumuiko mkubwa, na Allah mtukufu aliwaita wema wa mwanzo wa umma huu kwa majina tofauti, aliwaita Maansari na Muhajirina, nazo bila shaka ni aina mbili za Masahaba (r.a) hali ya kuwa wote ni Waislamu wako chini ya kivuli cha Mtume (s.a.w).
3. Lengo la kuitwa Ibadhi ni kupambanua fikra moja kutokana na fikra nyengine na Itikadi moja kutokana na nyengine katika yale yenye kutofautiana ndani yake, na sio kujitungia jina, kwani jina ni alama tu ya fikra, na hapa utagundua kuwa:
   
   1. Ibadhi ni anuani ya kuhifadhika mafundisho na kuwajuwa wahusika wake, na kuwa jina hili ni ngome ya kuhifadhika kwa kutojiingiza katika safu zetu asiyukuwa wa upande wetu, kuweza kuainisha yale yenye tofauti ndani yake, na hilo limetuhifadhi na uwezekano wa wengine kuharibu mafundisho na kuzua fitna katika safu setu. Kama hayo yanavyodhihiri hayo kwa wengine; kwani tunaona jinsi walivyoweza kuathiriwa na fikra za kiitikadi zisizokuwa zao na hata kufikia kupigwa vita kwa jina lao wenyewe.
   2. Ibadhi ni utambulisho wa mafundisho na misimamo katika yale yaliyoingiwa na tofauti ndani yake tu; kwa hiyo kujinasibu kwetu na Ibadhi ni kuhifadhika kutokana na majukumu ya wengine katika yenye tofauti ndani yake, na kupelekea hilo kuhusika kila upande na mizigo ya mafundisho yake. Leo tunaona jinsi vichwa vya watu vinavyokatwa na kucherengwa kama kuku, pia tunaona uharibifu unaofanywa katika miji ya waislamu, na yote hayo yanafanywa na wafanyaji wake kwa jina la Uislamu, lakini uhakika wake utabakia pale pale kuwa ni mazao ya mafundisho ya wahusika wake tu kwa mujibu wa madhehebu zao hata kama wao wanaamini kuwa wamo katika kuisimamisha Dini na kuwa ndio Uislamu; kwa hiyo kila chuo cha Madhehebu kihusike na mambo yake katika yenye tofauti ndani yake, pia kihusishwe na majukumu yake. Tunataraji hata ndugu yetu muulizaji anafahamu kuwa yeye anahusika kwa jina lake, na kuwa jina lake ni utambulisho wake, na hakubali kubandikwa yeye makosa ya wengine kwa kutumia jina lake.   

Tunasema, kuwa Ibadhi inakataa kubebeshwa makosa ya wengine, kwa hiyo kama kutakuwa na makosa -kwa wengine- yanayoathiri safu ya waislamu kwa ujumla, ni wajibu waelekewa hao wenye makosa na na sio watujie sisi na kutubebesha matatizo ya wengine.

Ndugu zangu Maibadhi tujuwe kuwa kubaguka Ibadhi na wengine ni kwa njia ya hao wengine kujipangia Madhehebu zao.

Sisi katika Ibadhi hatuna mafundisho ya chinjachinja wengine katika tuliyotofautiana nao, wala hatuna mafundisho ya kuwakana wengine katika Uislamu uliotukusanya sote, basi tunashirikiana na wengine katika yale ambayo Uislamu umetukusanya pamoja, na katika yenye tofauti kila upande uhusike na mambo yake pia uhusishwe na athari zake.

Na Ibadhi hata kama itadhulumiwa na wengine basi katu kaitodhulumu wengine, mifano:-

1. Imam Twalibu Al-haqi Abdullahi bin Yahya Al-Kindi (r.a) aliishika Yemen katika mwaka 128 Hijiria kwa kufanya mapinduzi ya amani dhidi ya utawala wa Bani Umayyah uliokuwa ukiitawala Yemen kidhulma na ujeuri, na miongoni mwa waliongia katika mikono yake ni Magavana wa Bani Ummayah wa miji ya San-aa na Aden, wallahi hakuwaua, wala hakuwadhuru, wala hakuhalalisha chochote katika nafsi zao wala mali zao, kubwa alilolifanya kwao ni kuwaweka kizuizini kwa muda wa siku chache kisha akawambia: "Hakika nimewaweka kizuizini kwa kuogopea maisha yenu kuwa hatarini kwa Raia wa kawaida, basi hivi sasa muna hiyari yenu ya kubakia au kuondoka". Nao wakahiyari kuondoka.
2. Imam Abu Al-Khatwab Al-Maafiri (r.a) alipigana na waasi Khawariji Sufria Waafurjuumah na akawashinda vita waasi hao na kuuzima uasi wao na kuwanusuru wanye kudhulumiwa, hapo alimjia mmoja wa askari wake na kumwambia: ((Tuwafanyie hawa kama wao wanavotufanyia sisi pidi wakitushinda)) hapo Imam Al-Maafiri (r.a) alimjibu yule askari kwa kumwambia: "Basi itakuwa ni haki kwa Allah mtukufu kutuadhibu sisi kama atakavowaadhibu wao, na hapo tukawa pamoja nao kama alivyosema: ((Kila ukiingia umma huulani ndugu yake, mpaka wakishakutana humo wote, watasema wa mwisho wao kuwaambia wa manzo wao: Ewe Mola wetu, hawa walitupoteza basi wape adhabu ya Moto nyongeza mara mbili. Atasema: Kila mmoja ana maradufu yake lakini hamujui)) [Al-Aaraaf 38].

Na mifano ni mingi na kwa hii miwili tutosheke.

Wabillahi Taufiqi

Wallahu aalamu wa ahkam.

Published By Sh. Hafidh Al-Sawafi

Suali:

Kweli kiumbe kinaweza kumwambia kiumbe mwengine: ((Hakika mimi ndiye Mwenyezimungu hakuna mungu mwengine isipokuwa mimi, basi niabudu mimi?)).

JAWABU:

Ama kuhusu uwezekano wa kiumbe kuweza kumwambia kiumbe mwengine neno hilo, kwa hakika Maluuni Firauni aliwambia watu neno la kudai uungu, aliwambia: ((Sijui mimi kama munae nyinyi mungu mwengine asiyekuwa mimi)) [Qasas 38], na neno lake hilo lilimuingiza katika ukafiri wa kishirikina, na likamtopeza katika dhulma nyingi za kuwadhulumu waja, na sote tunalifahamu hilo, kwa hiyo ikiwa inakusudiwa uwezekano wa kutokezea hilo, basi hilo limetokezea nalo amelieleza Allah mtukufu katika Kitabu chake wazi wazi.

Ama ikiwa inakusudiwa kuweza kiumbe kulisema hilo nalo likawa ni haki kwa kiumbe huyo, kwa hakika hilo haliwezekani, na kiumbe yoyote atakayelisema hilo kwa kulidai kwa nafsi yake basi kiumbe huyo atakuwa ni mbatilifu muovu mpofu mpotovu, na nafasi yake itakuwa katika ukafiri ni sawa na nafasi ya Mlaaniwa Firauna katika hilo, isipokuwa kama atatubia kabla ya kufikiwa na mauti.

Ama ikiwa inakusudiwa kuweza kiumbe kulifikisha neno hilo kwa kiumbe mwengine kwa kulisikia kiumbe mkusudiwa kupitia kwa kiumbe mwenzake hali ya kuwa ni ujumbe unaotoka kwa Allah mtukufu uliomfikia kiumbe mkusudiwa kwa kupitia kwa kiumbe mwengine, kwa hakika hilo linafaa, nalo lina dalili ya wazi ndani ya Qur-ani tukufu, na sisi hatumjui anayelipinga hilo asalan.

Imekuja katika Kitabu cha Allah kilichobarikiwa:

((Isipokuwa wale waliotubia na wakaboresha na wakabainisha basi hao nitawasamehe, na mimi ni msamahevu mrehemevu)) [Baqarah 160].

Kwa hakika neno hili amelisema Kiumbe (Jibrilu (a.s)) kumwambia Kiumbe (Mtume wetu Muhammad (s.a.w)) na Kiumbe (Mtume wetu) amelisema hivo hivo kuwambia Viumbe (Umati wake), na kila mwenye kusalisha anapolifika neno hilo hulisoma, na hapo bila shaka huwa analisema kama lilivyo.

Kwa hakika sisi huwa tunawashangaa sana wale wenye kuleta suala hili mbele ya Ibadhi, kwa lengo la kudai kwao kuwa Qur-ani haiwezekani kuwa ni Kiumbe kwa sababu ndani ndani yake limo neno ((Hakika mimi ndiye Allah hakuna mungu isipokuwa mimi basi niabudu)) wakidai kuwa vipi kiumbe atayasema haya?! Na kwa vile Qur-ani imeyasema haya basi haitakuwa kiumbe.

Tunawambia hawa:

Kwa hakika neno lenu hilo ni la ajabu sana, tena sana, hivi hamufikiri nyinyi?!!

Basi inakulazimuni nyinyi -kwa mujibu wa neno lenu hilo- kuanzia leo kuiabudu Qur-ani na kuitakidi kuwa Qur-ani ndiye Allah hasa wa kuabudiwa; kwa sababu Qur-ani ndiyo iliyoyasema hayo kwa mujibu wa madai yenu hayo, basi watangizieni walimwengu kuanzia leo kuwa Qur-ani ndiye Mungu, na Allah ndiye Qur-ani, na Qur-ani ni Kitabu kilichobarikiwa kwa hiyo Allah atakuwa ni kitabu kilichobarikiwa, hayo ni kwa mujibu wa maneno yenu hayo.

Ama sisi -tunamshukuru Allah mtukufu kwa uongofu wake- tunawambia hawa kuwa Qur-ani ni kiumbe mfikishaji wa mkusudiwa wa maneno hayo, na maneno ni kwa muhusika wake na sio kwa mfikishaji wake.

Na kwa hakika Mtume Mussa (a.s.w) aliyasikia hayo kupitia Kiumbe kinachoitwa maneno yaliyobebwa na kiumbe kinachoitwa sauti, na yeye alifahamu ni nani mkusudiwa, basi hakuabudu sauti iliyobeba ujumbe, wala hakuabudu ujumbe ambao ni maneno; kwani vyote hivo ni viumbe havipasi kuabudiwa, bali alimuabudu mkusudiwa aliyeumba hayo maneno na sauti iliyomfikia.

Na sisi tunafahamu bila ya shaka yoyote kuwa maneno yote ni viwakilishi vya maana kusudiwa; kwa hiyo maneno yote ni viumbe, ama mkusudiwa katika maana yake ikiwa sio kiumbe basi siyo kiumbe, na ikiwa ni kiumbe basi ni kiumbe.

Katika Qur-ani kuna maneno kama vile Moto, Pepo, Mbingu, Iblisi, Firauni, jee ndio tuseme kuwa hao sio viumbe?!!! au tusema hayo maneno sio viumbe?!!!

Na hoja za kuwa Qur-ani ni miongoni mwa viumbe ziko wazi kwa anayetaka haki na kuikusudia, unaweza kufuata kiunganishi katika somo hilo.

https://ibadhi.com/vipindi/161-vitabu/5775

Wabillahi Taufiqi.

Wallahu aalamu wa ahakamu.

Published By Sh. Hafidh Al-Sawafi

SUALI:

Sisi ni Maibadhi tumesikia mmoja wa wahadhiri wa kisunni akisema kuwa Allah mtukufu amesema (Jee! munajipa amani nyinyi na yule aliyeko mbinguni asije akakupindueni nyinyi katika ardhi?) pia amesema: Imekuja katika Hadithi sahihi kuwa Mtume (s.a.w) alimuuliza Mjakazi Allah yuko wapi? Na yule Mjakazi akajibu: Yuko mbinguni. kisha Mtume (s.a.w) kamuambia Bwana wa yule Mjakazi: Muachie huru huyu mjakazi; kwani hakika yeye ni Muumini". Kisha akasema "Allah kasema kuwa yeye yuko mbinguni, na Mtume wake (s.a.w) kathibitisha kuwa Allah yuko mbinguni; kwa hiyo Allah yuko mbinguni."

Hivi ni kweli Allah mtukufu yuko mbinguni kwa mujibu wa alivyosema muhadhiri huyu?

JAWABU:

Kwanza: Tunashukuru sana kutufikishia masuala yenu yanayohusu Itikadi, kwa hakika huu ndio wajibu, kwa sababu tuhuma batili dhidi ya Ibadhi ni nyingi sana, basi ndugu zangu, yoyote mwenye suali au dukuduku kwa upande wa Ibadhi ni vizuri kulifikisha kwa Ibadhi wenyewe.

Pili: Sio Masunni wote wanaosema neno hilo la huyo Mhadhihiri; inawezekana kuwa huyo Mhadhiri ni miongoni mwa Mujassimah; kwani amesema Mwanachuoni wa Kisuuni ٍSheikh Mahmoud Assubki katika kitabu chake It-haaful kaainati: (Na kwa hakika yamesimama Makubaliano ya Salafu na Khalafu katika mwenye kuitakidi kuwa Allah mtukufu yuko katika upande fulani tu kuwa huyo ni Kafiri kama alivyosema hayo Al-Iraaqi, na kwa hilo amesema Abu hanifa na Malik na Shaafii na Abu Hassan Al-Ash-ari na Al-Baqillani).

Ama kuhusu jawabu ni kama ifuatavyo:

1. Kwa hakika Allah mtukufu hajasema katika Aya hiyo kuwa yeye yuko mbinguni, wala hamuna aslan ndani ya Aya hiyo neno lenye maana ya ((kuwepo)) ambalo kwa kiarabu ni (وجود أو موجود), kama ilivyokuwa hamuna ndani yake neno Allah.
2. Tunafahamu sote kuwa Qur-ani tukufu imejaaliwa kwa lugha ya kiarabu, na waarabu huyachukua maneno kwa maana inayokubaliana na wahusika wake; kwa maana hiyo inalazimika kuyaondoshea maneno maana isiyokubaliana na wahusika wake.

Sasa tunapoirejea Aya tukufu -nayo imekuja mara mbili katika Suuratu Al-Mulki- imesema:

 (أَأَمِنْتُمْ مَنْ فِي السَّمَاءِ)

Tafsiri yake neno kwa neno ni:

((Jee! Mumejipa Amani nyinyi na yule ambaye katika mbingu)) [Mulk 16].

(أَمْ أَمِنْتُمْ مَنْ فِي السَّمَاءِ)

Tafsiri yake neno kwa neno ni:

((Au mumejipa amani nyinyi na yule ambaye katika mbingu)) [Mulk 17].

Tunaona katika Aya hizo zote mbili kuna maneno haya:

مَنْ فِي السَّمَاءِ

((Yule ambaye ni katika mbingu))

Suali: ni katika mbingu nini?

Huyo Muhadhiri -kwa vile yeye anaitakidi kuwa Allah ni mwili- ndiyo akaamua kulipa neno (Yule ambaye) maana ya kuwa huyo ni Allah, kisha akamuwekea makadirio ya kimwili kwa kuifanya mbingu ndiyo sehemu ya Allah, kwa hiyo akaweka makadirio ya وجوده kuwepo kwake ikawa hivi:

مَنْ فِي السَّمَاءِ وُجُودُهُ

((Yule ambaye ni katika mbingu kuwepo kwake))

Ama sisi Ibadhi:

1. Ni wenye kumtakasa Allah mtukufu na uwezekano wa kufanana na viumbe vyake.
2. Ni wenye kuitakidi kuwa Allah mtukufu ni Mkwasi (Al-Ghaniyyu) ametakasika na uwezekano wa kusifika kwa sifa yoyote ya kuhitajia chengine chochote.

Basi tunazichukua Aya hizo kwa maana inayokubaliana na matamko yake, kwa hiyo:

1. Tukisema kuwa neno (Yule ambaye) mkusudiwa ni Malaika aliyebebeshwa jukumu husika, -nalo ni la kuangamiza kwa kudidimiza katika Ardhi katika Aya ya kwanza, na la kuangamiza kwa kimbunga (upepo mkali) katika Aya ya pili- basi makadiriyo ya (kuwepo) katika mbingu yatakuwa no sahihi, na hapo itakuwa ((Yule (Malaika) ambaye ni katika mbingu kuwepo kwake)); kwani Mbingu ndio makazi ya Malaika.
2. Tukisema kuwa neno (Yule ambaye) mkusuduwa ni Allah mtukufu; kwani yeye ndiye muangamizaji kwa kumilki amri yake, basi makadirio ya (kuwepo) yatakuwa ni batili; kwa sababu Allah mtukufu ametakasika na sifa ya kimwili, basi makadirio sahihi yanayokubaliana na utukufu wa Allah mtukufu yatakuwa ni (amri yake), na kuwa maana ya Aya ni ((Yule (Allah) ambaye ni katika mbingu amri yake)), na sote tunafahamu kuwa katika Mbingu kuna mamlaka ya Allah mtukufu, na kuwa huko kuna mahusisho yake maalumu, na miongoni mwa hayo ni Lauhi Mahfuudhi ambayo imehifadhi amri zote za Allah mtukufu.

Ama kuhusu Hadithi, sisi hatukatai kupokewa kwa hadithi hiyo; lakini sio kila linalopokewa katika Hadithi linakuwa ni sahihi, basi tunasema:

Hadithi yenye tamko la kuwa Mtume (s.a.w) alimuuliza Mjakazi: ((Yuko wapi Allah))? Ni Hadithi batili amezuliwa kwayo Mtume wetu (s.a.w), kwa hakika neno hilo hajalisema Mtume wetu (s.a.w), tumelisema hili kwa sababu hadithi hiyo imekuja kwa matamko matatu katika sehemu hiyo, nayo ni kuwa Mtume (s.a.w) alimuuliza Mjakazi:-

1. Jee! Unashuhudia kuwa hakuna mungu isipokuwa Allah?
2. Ni nani Mola wako?
3. Allah yuko wapi?

Na bila shaka Mtume (s.a.w) alimuuliza Mjakazi huyo moja kati ya matamko haya matatu, na haiwezekani kumuuliza kwa tamko la la tatu (Allah yuko wapi); kwa sababu hilo halithibitishi imani wala halivunji ushirikina, washirikina wengi wanaitakidi kuwa Mungu yuko mbinguni, na sote tunafahamu kuwa mja haingii katika Uislamu wala haithibiti Imani yake kwa kushuhudia kuwa Allah yuko mbinguni na Muhammad ni Mtume wa Allah, kwa hiyo ima Mtume (s.a.w) alimuuliza Mjakazi kwa tamko la kwanza (Jee! Unashuhudia kuwa hakuna mungu isipokuwa Allah?) au kwa tamko la pili (Ni nani Mola wako?), na sisi tunaona kuwa Mtume wetu (s.a.w) alimuuliza Mjakazi huyo kwa Tamko hilo la kwanza; kwani kusudio ni kuthibitisha Uislamu wake na Imani yake ya Uislamu, na sote tunafahamu kuwa mja unathibiti uislamu wake na imani yake ya Uislamu kwa Shahada mbili zilizo maarufu, nazo ndizo zilizokusanywa katika riwaya hiyo, basi tunasema hilo ndilo tamko lenye nguvu zaidi hata kama Imam wetu Rabii (r.a) ameipokea Hadithi hiyo kwa tamko la pili ambalo pia linakubalika.

Wabillahi Taufiqi.

Wallahu aalamu wahkam

Published By Sh. Hafidh Al-Sawafi

SUALI:

Jee! Huu ulimwengu Allah aliuumba kutoka ndani na nafsi yake au nje ya nafsi yake, au aliuumba ulimwengu huu si kutoka ndani ya nafsi yake au nje ya nafsi yake?

JAWABU:

Hili suali ni batili; kwa sababu muulizaji anaulizia kuhusu Allah mtukufu kwa makadirio batili, nayo ni makadirio ya kuwa Allah mtukufu ni mwili miongoni mwa miili; kwa sababu mwili ndio wenye ndani na nje, kwa hiyo ni suali batili kwa kubeba kwake madhumuni batili yasiyostahiki kwa Allah mtukufu.

Hatuwezi kumuulizia Allah mtukufu kwa lazimisho la maumbile, na suali lolote linalomuulizia Allah mtukufu kwa malazimisho ya kimaumbile suali hilo ni batili katika haki yake Allah mtukufu, kwa hiyo ni batili kumuulizia Allah mtukufu kuwa eti kauumba ulimwengu ndani ya nafsi yake au nje ya nafsi yake? au yumo ndani ya ulimwengu au amechana na ulimwengu kimasafa? au yuko wapi.... n.k.

Masuala haya huyauliza wenye kumuitakidi Allah kuwa ni mwili (Mujassimah), au asiyemjua Muumba wa huu ulimwengu.

Kwa hiyo jawabu yetu:

Allah mtukufu ametakasika na kuwa na sifa za kudhibitika kimipaka; kwani yeye ndiye wa Mwanzo aliyeumba sehemu na mambo yake yote, na akili zetu na fahamu zetu sisi waja hazina uwezo wa kufikiria nje ya mipaka ya sehemu na wakati, kwa hiyo hatuwezi sisi kukifikiria chochote kilichoko katika mipaka ya sehemu na wakati isipokuwa kitakuwa ni kiumbe tu, basi kila kinachodhibitiwa kifikra kwa mipaka ya sehemu hicho ni kiumbe bila ya shaka yoyote, na Allah mtukufu hajafanana nacho hicho kwani yeye ndiye Muumba.

Allah mtukufu kuwepo wake ni kabla ya sehemu na wakati; kwa hiyo kuwepo kwa sehemu na wakati na kukosekana kwa sehemu na wakati ni sawa kwake yeye Allah mtukufu wala hakuathiri chochote kwake yeye Allah mtukufu, basi sehemu zote ni sawa kwake yeye Allah mtukufu.

Sisi tunamjua Allah mtukufu kwa dalili za vitendo vyake, na sio kwa kumjengea sura fulani yenye mipaka ya sehemu.

Tunamsifu Allah mtukufu kwa yanayokubaliana na utukufu wake wa kidhati, pia tunamtakasa Allah mtukufu na yote yasiyokubaliana na utukufu wake wa kidhati, na msingi wetu katika hilo ni kuwa yeye ni Mkwasi (ALGHANIYYU); kwa hiyo hasifiki na sifa yoyote kwa namana ya kuihitajia sifa hiyo, wala kwa namna ya kuwa na sifa hiyo lazimisho la kuhitajia.

Kwa dalili za kumjua Allah mtukufu fuata kiunganisho hapo chini.

https://ibadhi.com/vipindi/jamii/384-allah-mtukufu

Wabillahi Taufiiq.

Wallahu aalamu wa ahkam

Published By Sh. Hafidh Al-Sawafi

SUALI:

Ahsante sana sh. wetu.

NIsaidieni kwamba Nabii Isa a.s atarudi duniani au la? Je bado tuna shaka na kurudi kwake? Je, hatuna msimamo imara na wa yakini?

Kama akija Nabii Isa a.s basi nani atamtumikia Mungu kuwa Nabii wa mwisho? Yaani swali si hili kwamba nani alizaliwa mapema, na nani alipewa utume kabla? bali swali ni hili kwamba nani alifanya kazi ya Utume badae?

Vile vile Katika Sahihi Muslim Issa Nabii wa Mungu ametabiriwa kuja sio Isa bin Mariamu.

JAWABU:

Suala la kurudi Mtume Issa bin Marayam (a.s) wametafautiana ndani yake wanavyuoni wetu:

1. Wa Mashariki wako waliokataa kurudi kwake na wako walionyamazia.
2. Wa Magharibi wengi wao wamelithibitisha.

Kutokana na hapa utagundua udhaifu wake, kwani lingalikuwa la yakini wasingalitafautiana ndani yake. Anatuambia Sheikh Ahmed Al-Khalili (h.a) baada ya kulielezea suala hili kwa dalili za kila upande: " Na kwa haya inabainika kuwa hakuna katika Aya za Qurani dalili ya kuweza kuitegemea katika kuthibitisha kushuka kwa Masihi (a.s) karibu na kusimama Kiama, na yalivyo hasa hao waliolisema hilo (la kushuka kwake) wametegemea mapokezi, nayo hata kama yamekuja kwa wingi lakini hayajafikia kiwango ya tawaturi ili yaweze kutegemewa katika kuthibitisha jambo la kiitikadi mfano wa hili, hasa hasa tukizingatia kuthibiti andiko la uhakika kuwa Nabii (s.a.w) ndiye khitimisho la Manabii, nalo linapelekea ya kuwa hatokuja baada yake Nabii yoyote ni sawa kupelekwa kwake kuwe upya baada yake au kuwe kabla kwa kupewa wahayi kabla yake (s.a.w), kwa sababu khitimisho ya Unabii maana yake hasa ni kufungwa mlango wake, hata kama wenye kuthibitisha kuteremka kwake (a.s) wanaona kuwa Issa (a.s) hatohukumu kwa sheria yake bali atahukumu kwa sheria ya Nabii wa mwisho (s.a.w).

Kutokana na hapa wakawa As-habu wetu (Maibadhi) wa Mashariki wako wenye kukataa kuteremka kwake (a.s) na wenye kunyamazia kuthibitisha kwake, kinyume na As-habu wetu wa Magharibi, kwani hakika wao wamelithibitisha kama walivyolithibitisha jamuhuri ya Umma.

Juu ya kuwa sisi tunaporejea katika maandiko ya Quraani tunakutia maandiko mawili yako wazi kabisa katika dalili ya kufa kwake (a.s):

La kwanza: Neno lake Allah mtukufu:

((إِذْ قَالَ اللَّهُ يَا عِيسَى إِنِّي مُتَوَفِّيكَ وَرَافِعُكَ إِلَيَّ))

((Aliposema Allah: Ewe Issa, hakika mimi ni mwenye kukufisha na mwenye kukunyanyua kwangu)) [Aala Imraan 55]

La pili: Neno lake kuelezea atakayoyasema (a.s) wakati atakapofikiwa na suali la Allah mtukufu siku ya Kiama hukusiana na watu waliomuabudu yeye (a.s):

((وَكُنْتُ عَلَيْهِمْ شَهِيدًا مَا دُمْتُ فِيهِمْ فَلَمَّا تَوَفَّيْتَنِي كُنْتَ أَنْتَ الرَّقِيبَ عَلَيْهِمْ وَأَنْتَ عَلَى كُلِّ شَيْءٍ شَهِيدٌ))

((Nilikuwa shahidi juu yao nilipokuwa ndani yao, basi uliponifisha ukawa wewe ndiye mfuatiliaji juu yao, na wewe ni mwenye kushuhudia kila kitu)) [Maaidah 117]

[Fatawa Aqidah 1/420]

Haya ndiyo aliyoyasema Sheikh Al-Khalili (h.a), ama Imamu Al-Salimi (r.a) yeye ameeleza wazi wazi katika sherhe ya Musnad kuwa As-habu wetu (Maibadhi) halijathibiti kwao pokezi kuhusiana na suala la kuja tena Masihi Issa mwana wa Maryam (a.s).

Na neno lake linatupa ishara ya wazi kuwa As-habu wetu waliochukua kauli ya kuja tena Masihi Issa (a.s) wametegemea mapokezi yaliyopokewa na Masunni katika suala hili.

Haya ndiyo mukhtasri wa ufafanuzi wa suala hili katika Ibadhi.

Ama kuhusiana na suali la kukadiria kuja kwake, atahukumu kwa sheria gani?

Hili jawabu yake imo ndani ya Quraani tukufu pale alituambia Allah mtukufu kuhusu ahadi ya Manabii wote.

((وَإِذْ أَخَذَ اللَّهُ مِيثَاقَ النَّبِيِّينَ لَمَا آتَيْتُكُمْ مِنْ كِتَابٍ وَحِكْمَةٍ ثُمَّ جَاءَكُمْ رَسُولٌ مُصَدِّقٌ لِمَا مَعَكُمْ لَتُؤْمِنُنَّ بِهِ وَلَتَنْصُرُنَّهُ قَالَ أَأَقْرَرْتُمْ وَأَخَذْتُمْ عَلَى ذَلِكُمْ إِصْرِي قَالُوا أَقْرَرْنَا قَالَ فَاشْهَدُوا وَأَنَا مَعَكُمْ مِنَ الشَّاهِدِينَ))

((Na alipochukua Allah ahadi kwa Manabii, nitakapokupeni kitabu na hekima kisha akakujieni Mtume mwenye kusadikisha yale yaliyo pamoja nanyi ya kuwa mutamuamini (Mtume) huyo na mutamnusuru yeye. Akasema: Jee mumekubali na memechukua juu ya hilo ahadi yangu? Wakasema: Tumekubali. Akasema: Basi shuhudieni na mimi ni pamoja nanyi katika wenye kushuhudia)) [Aala Imaran 81]

Aya hii inatoa ufafanuzi wa wazi kabisa katika suala la kulazimika kufuata Nabii sheria ya Mtume aliyekuja baada yake kwani huko ndiko kumsadikisha na kumnusuru, na katika kumalizika kipindi cha utume wa Mtume wa kabla kwa kuja Mtume mwengine baada yake kuna dalili za wazi katika hilo, kwa hiyo Nabii Issa (a.s) kwa kukadiria kurudi kwake basi atakuwa katika kufuata sheria ya Mtume wetu Muhammad (s.a.w) na kuisadikisha na kuinusuru na hatotengua chochote katika hukumu zake, na hili linathibitisha udhaifu wa riwaya zilizokuja katika kuthibitisha ujio wa Nabii Issa (a.s) kama riwaya ya Bukhari 2222 na Muslim 242 - (155) iliyopita kwa Ibnu Shihabi Al-Zuhuri kutoka kwa Ibnu Musayyab kuwa alimsikia Abu Huraira (r.a) anasema: Amesema Mtume wa Allah (s.a.w): ((Naapa kwa yule iliyemo nafsi yangu mkononi mwake, kwa hakika inakaribia kuteremka kwenu Ibn Maryam akiwa Hakimu Muadilifu, basi atavunja Msalaba, na ataua Nguruwe, na ataondosha Jizya, na itafurika mali mpaka hatoikubali yoyote)) riwaya hii inapingana na Quraani wazi wazi, kwa sababu Quraani hukumu yake kwa Ahalu Al-Kitabi ni kuwapiga vita au kuchukua jizya kutoka kwao na sio kuiondosha, wala hakuna katika sheria ya Mtume wetu Muhammad (s.a.w) hukumu za kuvunja msalaba wala kuua nguruwe.

Ama riwaya ya Muslim katika sahihi yake aliyoashiria muulizaji kuwa imekuja ndani yake (Issa Nabii wa Mungu ametabiriwa kuja sio Isa bin Mariamu) riwaya hiyo sisi hatujaiona mpaka hivi sasa.

Wabillahi Taufiqi.

Published By Sh. Hafidh Al-Sawafi

SUALI

Aslamu alaykum warahmatullahi wabarakatuh

Tunasikia sana tuhuma ya ukhawariji dhidi ya Ibadhi, tunataka kujua hasa hivi kweli Ibadhi ni katika makundi ya Kikhawariji? Na Ukhawariji ni nini hasa? Na nani Makhawariji?

JAWABU:

Waalaykum salam wa rahmatullahi wa barakatuhu.

Kwa hakika tuhuma ya ukhawariji dhidi ya Ibadhi imeanza mapema sana, hata kama tuhuma hii ni mbaya katika uhakika wake lakini imehakikisha ushahidi muhimu sana kwa upande wa Ibadhi, nao ni ushahidi wa ukweli na kujiepusha kwao na kila mwenye dhambi kubwa, na ushahidi huu umetoka kwa hao hao wanaoiona Ibadhi kuwa madhehebu ya Kikhawariji, mpaka ikafikia kusema kuwa haijulikani kwao wao mwenye kusema uongo, kutokana na hapo zikasalimika safu za Ibadhi kutokana na hadithi za uongo na kuongozewa, na likidhihiri hili basi Allah mtukufu ametuamrisha tuwe pamoja na walio wakweli.

Ama kuhusu Jee! Ibadhi ni miongoni mwa Makhawariji?

Tunasema kuwa ikiwa makusudio ya ukhawariji ni kutoka dhidi ya udhalimu na kutokubali kushiriki katika madhambi na uadui basi hiyo ni sifa njema asiiondoshe Allah kwa Ibadhi, ama ikiwa ukhawariji ni kutoka nje ya dini na kuiacha haki kama zilivyobashiria hadithi za Mtume (s.a.w) basi Ibadhi sio katika hao wala haiwezeni kuwa katika hao.

Na Ukhawariji mbaya na ulio hatari ni ule aliouleza Mtume (s.a.w) pale aliposema:

يَخْرُجُ فِيكُمْ قَوْمٌ تَحْقِرُونَ صَلاَتَكُمْ مَعَ صَلاَتِهِمْ، وَصِيَامَكُمْ مَعَ صِيَامِهِمْ، وَأَعْمَالَكُمْ مَعَ أَعْمَالِهِمْ، يَقْرَؤُونَ الْقُرْآنَ وَلاَ يُجَاوِزُ حَنَاجِرَهُمْ، يَمْرُقُونَ مِنَ الدِّينِ كَمَا يَمْرُقُ السَّهْمُ مِنَ الرَّمِيَّةِ

“Watatoka katika nyinyi watu mtazidharau Sala zenu mbele ya Sala zao, na funga zenu mbele ya funga zao, na vitendo vyenu (vyema) mbele vitendo vyao, wanasoma Qur`ani lakini haivuuki koo zao (haifiki Qur`ani katika mioyo yao), wanatoka katika dini mfano wa mshale unavyochopoka kwenye kiwindwa...." Rabii 36 Muwataa 694. Bukhari 5058.

Mtume (s.a.w) ametuambia kuwa Makhawariji waovu (Maariqah) sifa zao ni:

1. Watakuwa wanajinasibisha na Uislamu nao wanatoka katika safu za Waislamu.
2. Watakuwa ni wingi wa ibada kiasi cha kudharau ibada nyengine mbele ya ibada zao.
3. Wanasoma Quraani.
4. Quraani haivuuki koo zao.
5. Wataihama dini mfano wa mkuki inavyokihama kiwindwa.

Katika ufafanuzi huu wa Mtume (s.a.w) tunapata kuwa Makhawariji watakuwa ni wingi wa ibada na wasomi wazuri wa Quraani, bila shaka hizi ni sifa nzuri na bora, kila muislamu anatakiwa ajipambe nazo, wala hakuna aibu katika sifa hizi, lakini amezitaja Mtume wetu (s.a.w) kwa njia ya kutuzindua, tusije tukahadaika na mazuri yao na dhahiri yao, kwani mazuri hayo hayatawafaa kitu kwa sababu ya sifa zao mbaya, nazo ni:

1. Kutovuuka Quraani koo zao, na sifa hii inamaanisha kuwa itikadi yao itapingana na Quraani, wataipa Quraani tafsiri za kuvunja mafundisho yake.
2. Kuihama dini ingawa watajinasibisha nayo, na hili linafasiriwa katika riwaya nyengine kuwa wao wataua waislamu na kuwaacha washirikina wanaoabudu masanamu kama ilivyo katik [Bukhari 3344, 7432 Muslim 1064]

Tukirejea katika matokeo ya kitarehe, tunakutia Makhawariji wa mwanzo walipatikana mwaka wa 64 Hijiria, na makundi yao yakawa maarufu kwa majina ya Azaariqah na Najidiyah na Sufriyah. Wao walitakidi kuwa kila aliyemo katika dhambi kubwa ni kafiri mshirkina ameritadi damu yake ni lazima kuimwaga na mali yake ni ngawira na watoto wake na wake zake ni mateka wa kuingizwa katika utumwa au kuuliwa, waliitakidi kuritadi kila asiyekubaliana na wao, na huu ndio ukhawariji kiuhakika.

Kwa hiyo Ukhawariji ni kuitakidi kuritadi kila asiyekubalina na Itikadi ya wenye kuiitakidi itikadi anayoitakidi Mkhawariji.

Kutokana na hapo tutafahamu kuwa madhehebu yoyote yenye mafundisho ya kuitikadi kuwa kila aliyetafautiana nayo kiitikadi katika waislamu huyo atakuwa ni kafiri mshirkina aliyeritadi hayo ndiyo Madhehebu ya Kikhawariji.

Na Mawahabi bila shaka ni makhawariji; kwani wao wanaona ulazima wa kumuua kila aliyetafautiana na wao katika masuala ya kiitikadi, utakutia Maimamu wao tegemewa wako mbele katika kukufurisha waislamu wengine ukafiri wa kuritadi na kuwatoa nje ya uislamu, hili ni maarufu kwao hususan katika mlango wanaouita asmaau wa sifaati, kila asiyekubaliana na wao katika kumuitakidi Allah mwenye viungo walivoviita sifa, Allah mwenye harakati za kuteremka na kukaa kitako huyo kwao ni muattilah, na muattilah kwa mujibu wa itikadi yao ni jahamia kafiri murtadi, kutokana na hapo shari yao katika umma wa kiislamu ni mbaya sana, na fitina zao ni korofi sana, inalazimika kujihadhari nao.

Baada ya haya tuliyoyaeleza tufahamu kuwa Makhawariji hata kama ni wapotevu wapotezaji bado wanahesabiwa kuwa katika safu za Waislamu wala hawahesabiwi kuwa ni washirkina wala kuwa wameritadi.

Amesema Ibnu Taimiyah Al-Harrani kuhisana na Makhawariji:

((Hakika yao (hao Makhawariji) hakukuana yoyote aliye shari zaidi kwa waislamu kuliko wao, si Mayahudi wala Manasara; kwani wao walikuwa ni wenye kujitahidi katika kuua kila muislamu asiyekubalina na wao, ni wenye kuhalalisha damu za waislamu na mali zao na kuua watoto wao, wakiwaona kuwa ni makafiri, walikuwa ni wenye kuliitakidi hilo kwa ukorofi mkuu wa ujinga wao, na bidaa yao yenye kupoteza. Pamoja na hayo, Masahaba (r.a) na Matabiina waliowafutia kwa wema hawakuwakufurisha (Makhawariji), wala hawakuwafanya wenye kuritadi, wala hawakuwafanyia uadui kwa neno wala kitendo, bali walimcha Allah kwao wao)) [Mihaaj Sunna 5/248].

Na maesema katika sehemu nyengine ya kitabu chake hicho kuhusu Makhawariji ((Na haukuacha mwendo wa Waislamu kuwa juu ya hili, hawakuwaona kuwa wameritadi))

Tumeleta neno la Shekhe huyu wa Kiwahabi ili liwe hoja kwao wao wenyewe, wajiepushe na sifa ya ukhawariji aliyoieleza Sheikh wao; kwani mazingatio ni maradhi sio tafauti ya wagonjwa, pia wakubali shahada ya Imamu wao waondokane na mwendo wa kuwakufurisha wanaowaona kuwa ni Khawariji nao ni Ibadhi kwa mujibu wa mtazamo wao, kwani salafu wema Masahaba na Matabiina (r.a) hawakuwakufurisha Makhawariji wala hawakuwaona kuwa wameritadi.

Wabillahi Taufiqi.

Published By Sh. Hafidh Al-Sawafi

SUALI:

Tunaulizwa suali na sisi tunatafuta jawabu, tunaomba samahani kwa kulifikisha kama tulivyoulizwa kwani muulizaji alikuwa mwenzetu kisha amebadilika na kukataa kuwepo Mungu kabisa, anatuambia hivi:

Vipi sisi tanadangwanywa na hichi kitabu wakati tunaambiwa mbingu na ardhi zimeumbwa kwa muda wa siku sita, wakati masiku yanapatikana kwa mzunguko wa kupatikana usiku na mchana, vipi mungu wetu alizipata hizi siku saba?

JAWABU:

Tunashukuru kupata suali lenu lenye dukuduku ndani yake, na kwa hakika hii ndiyo busara suali linapofika ni kulifikisha kwa wenye kufahamu ili kulipatia jawabu yake.

Kwanza tunatakiwa tufahamu kuwa masuali haya huwa yanakuja kutoka kwa Mulhidina nao ni watu wenye kukataa kuwepo kwa muumba wa huu ulimwengu, basi sisi tunawambia kuwepo muumba ni lazimisho sililopingika kiakili; kwani vitendo ni lazima kuhusika kwa watendaji wake, basi aliyeuumba huu ulimwengu na kuupangia nidhamu yake na wahusika wake huyo ndiye mkusudiwa wetu, naye ndiye Allah mtukufu aliyetuma Mitume na kuteremsha vitabu, basi sisi tumehusika na Mtume wetu Muhammad (s.a.w) na kitabu chake ni Qur-ani tukufu.

Allah kwenye kitabu chake Qur-ani tukufu ametuambia kuwa ameziumba Mbingu na Ardhi na vilivyomo ndani yake kwa muda wa siku sita, jee! kabla ya uumbaji wa mbingu na ardhi na vilivyomo ndani yake vilikuwepo viumbe vyengine ambavyo vilikuwa na nidhamu ya siku? Uwezekano huo upo, hususan kuwepo uhakika wa uvumbuzi wa Majaraati (Galaxies), huu ni uwezekano kwa mujibu wa fikra zao hawa Mulhidina wenye kukanusha kuwepo mungu tunawalazimisha nao.

Na sisi tunawaambia kuwa, Allah mtukufu ametuambia kuwa ameumba mbingu na ardhi na vilivyomo ndani yake kwa muda wa siku sita hizi tunazozijua, na siku moja imefanyika kwa usiku na mchana, na maana yake ni kuwa huo ndio muda uliotimia ndani yake hayo aliyoyaumba, na wala hakuna ulazima wa kuwepo hizo siku wakati wa kuumba alivyoumba, bali ulazima wake ni kujua ukubwa wa wakati ambao alivyoviumba vimepatikana kwa ukubwa wa wakati huo, basi ni fadhila zake Allah mtukufu kutuambia kuwa muda uliyotimia ndani yake uumbaji wa mbingu na ardhi na vilivyomo ndani yake ni wenye makadirio ya siku sita, kama alivyotuambia wakati wa kuumbika mmoja wetu ndani ya fuko la uzazi mpaka kuzaliwa na kuachishwa ni mika miwili, na aliyetuambia ni muweza ambaye hufanyika anachotakitaka kama alivyokitaka basi almetuambia kwa tunayoyajua katika maumbile yetu.

Wabillahi taufiqi

Wallahu aalamu wa ahkamu.

Published By Sh. Hafidh Al-Sawafi

SUALI:

Tunatuma suala jengine kuhusiana na ufahamu wa Aya za Quraani tukufu, lano linasema: Quraani inatuambia kuwa kabla ya kuumba Arshi ilikuwa juu ya maji, sasa hayo maji yalikuwa wapi? Na hiyo Arshi ilikaaje juu ya hayo maji?.

JAWABU:

Anatuambia Allah mtukufu katika Kitabu chake:

وَهُوَ الَّذِي خَلَقَ السَّمَاوَاتِ وَالْأَرْضَ فِي سِتَّةِ أَيَّامٍ وَكَانَ عَرْشُهُ عَلَى الْمَاءِ لِيَبْلُوَكُمْ أَيُّكُمْ أَحْسَنُ عَمَلًا وَلَئِنْ قُلْتَ إِنَّكُمْ مَبْعُوثُونَ مِنْ بَعْدِ الْمَوْتِ لَيَقُولَنَّ الَّذِينَ كَفَرُوا إِنْ هَذَا إِلَّا سِحْرٌ مُبِينٌ

((Na yeye ndiye aliyeumba mbingu na ardhi katika siku sita, na ilikuwa Arshi yake juu ya Maji, ili akujaribuni ni nani kati yenu ni mbora wa watendo, na ikiwa utasema: Hakika nyinyi mutafufuliwa baada ya kifo kwa hakika watasema wale waliokufu halikuwa hili isipokuwa uchawi wa wazi)) [Huud 7]

Aya tukufu inatuambia kuwa kbala ya mbingu na ardhi ilikuwa Arshi nayo ilikuwa juu ya Maji, na haya ndiyo alioyoyasema Sheikh Atfaish (r.a):

مماسًّا قبل خلق السموات والأَرض ، سواءٌ خلق العرش قبل الماءِ ثم خلق الماءَ تحته عمدة له ، أَو خلق الماءَ قبله ثم خلق على الماءِ ، وقيل أَول مخلوق من العالم بعد العرش الماءُ

"Ikiwa Arshi ni yenye kuyagusa maji, kabla ya kuumbwa mbingu na ardhi, ni sawa ikiwa arshi imeumbwa kabla ya maji kisha yakaumbwa maji chini yake yakawa tegemeo lake, au yameumbwa maji kabla yake kisha ikaumbwa juu ya maji, na imesemwa kuwa kiumbe cha mwanzo katika ulimwengu baada ya Arshi ni Maji"

Wala hakuna ulazima wa kutokuwepo viumbe kabla ya uumbaji wa mbingu na ardhi, kwa hiyo hakuna utata wowote kuwa maji yaliumbwa kabla ya mbingu na ardhi, na kuwa Arshi pia iliumbwa kabla ya mbingu na ardhi, na mazowea yetu ya kupatikana maji katika ardhi na kuanguka kutoka mawinguni katika mfumo wa mvua hayabatilishi uumbaji wa maji na Arshi kabla ya mbingu na ardhi, ama suali la kuwa hayo maji yalikuwepo wapi? Allahu aalamu wapi yalikuwepo, na kuwepo uwezekano wa kupatikana maji na arshi kabla ya mbingu na ardhi hakulazimishi elimu ya kujua sehemu iliyohusika na maji hayo wala sehemu iliyohusika Arshi.

Wallahu aalamu wa ahkamu.

Wabillahi Taufiqi.

Published By Sh. Hafidh Al-Sawafi

SUALI:

Tumeulizwa suali kuwa Mtume (s.a.w) amesifiwa kuwa hajui kusoma wala kuandika, sasa vipi tunakubali kuongozwa na mtu wa namna hiyo kwani hizo ni sifa ya ujinga?!

JAWABU:

Allah mtukufu akuthibitisheni katika haki na akuepushieni sababu za shaka, masuali hayo huwa yanatoka kwa watu wasiokuwa waislamu, na sisi tunawambia kuwa Mtume wetu (s.a.w) elimu yake ni kwa njia ya ufunuo utokao kwa Allah mtukufu aliyeumba kila kitu, basi elimu yake si kwa njia ya kusoma na kuandika, na mazingatio ni elimu sio kujua kusoma na kuandika; kwa hiyo Mtume (s.a.w) hana sifa ya ujinga, bali yeye ndiye chombo kilichojaa elimu ya uhakika, na dalili za kuthibiti utume wake (s.a.w) ni nyingi, na kubwa yao ni ufunuo wa Quraani tukufu aliopewa ambayo amewataka ushindani watu na majini wote walete mfano wake nao wakashindwa, kwa hiyo kutojua kusoma na kuandika kwanza sio ujinga, pili sio aibu kwa upande wake (s.a.w), bali hizo ni sifa za kuitulizanisha nafsi zaidi kuwa aliyokuja nayo (s.a.w) ni haki inayotoka kwa Muumba wetu Allah mtukufu; kwani hawezi mtu kuleta madai ya kuwa (s.a.w) alikuwa akisoma katika vitabu vyilivyotangulia.

Basi elimu yake (s.a.w) ni moja kwa moja kutoka kwa Allah mtukufu kupitia kwa Malaika wake Jibrilu (a.s).

Wabillahi taufiqi.

Wallahu aalamu wahkamu.

Published By Sh. Hafidh Al-Sawafi

SUALI:

Tumefikishiwa suali kuhusu msingi wanaoutumia Maslafi katika kumsifu Allah mtukufu, je! uko sawa? Nao ni ((Ulazima wa kumsifu Allah mtukufu kwa aliyojisifia nafsi yake na aliyosifiwa kwayo na Mtume wake (s.a.w) na kumtakasa Allah mtukufu na yale aliyojitakasa nayo na kumtakasa nayo Mtume wake (s.a.w) bila ya kufananisha wala kushabihisha wala kufunja maana wala kuigeuza)).

JAWABU:

Kwanza tunashukuru kutufikishia suali katika yenye kutatiza wakati wa kufikiwa na mafundisho yenye mashaka ndani yake kama hayo.

Pili tunasema kuwa Msingi huo wanaoulingania Masalafi umejengeka katika falasafa batili ya kutojua yasiyokubaliana na utukufu wa Allah mtukufu na ukamilifu wake, na kwa sababu hiyo wakashindwa kumtakasa Allah mtukufu na yale yasiyokubaliana na ukamilifu wake na utukufu wake Allah mtukufu, na ubainisho wa haya ni kama ifuatavyo:

1. Wamesema tumsifu Allah mtukufu kwa yale aliyojisifia nafsi yake na kusifiwa kwayo na Mtume wake (s.a.w), na kwa hili wamemthibitishia Allah mtukufu mambo yasiyokubaliana na yeye na kuyaita sifa kama vile mikono miwili, na macho mawili, na sura, na viganja, na vidole, na miguu, na kukaa juu ya Arshi aliyobebwa juu yake kwa mujibu wa madai yao, sasa ikiwa hizo ndizo sifa za Allah mtukufu kwa mujibu wa madai yao batili vipi tutaweza kumtakasa na yasiyokubaliana na ukamilifu wake na utukufu wake katika kusifika huko? Kwa hakika hapa ndipo tatizo lilipo katika msingi huo.
2. Huenda mtu akasema, tatizo hilo linaondoka kwani wamesema pia inalazimika kumtakasa kutokana na yale aliyoyakataa kwa nafsi yake na kumkatalia hayo Mtume wake (s.a.w), tunasema lau kuwa tutakubali neno hilo bado tatizo lipo pale pale kwa sababu inabakia kutojua yasiyokubalina na utukufu wake Allah mtukufu katika yale ambayo hayajakataliwa kusifikana nayo Allah mtukufu, kwa mfano:-
   1. Manyoya.
   2. Manukato.
   3. Kucha.
3. Msingi wao huo unabeba lazimisho la kumsifu Allah mtukufu kwa sifa ya kubadilika na kujigeuza kama zilivyothibitishwa na mapokezi ya Bukhari na Muslim katika hadithi ya kuonekana Allah mtukufu siku ya kiama, ametaksika Allah na uwezekano wa kuonekana dunaini na akhera.

Kwa hiyo tusije tukahadaika na maneno yao hayo yasiyokuwa na msingi madhubuti, bali inatulazimu kujishika vizuri na msingi wa kumsifu Allah mtukufu kwa yanayokubaliana na utukufu wake na ukamilifu wake na kumtakasa Allah mtukufu na kila lisikubaliana na utukufu wake na ukamilifu wake.

Wabillahi Taufiqi.

Wallahu aalamu wa ahakamu.

Published By Sh. Hafidh Al-Sawafi

SUALI:

Tumesoma kuwa Qur-ani ni kiumbe, kwa kweli dalili ni zenye kukinaisha lakini tumeambiwa Qur-ani ni maneno ya Allah na Allah ametuambia akitaka kuumba kitu hukiambia (KUN) nacho huwa, sasa ikiwa maneno ya Allah ni kiumbe italazimika kuwa (KUN) ni kiumbe, na ikiwa (KUN) ni kiumbe itahitajia kuambiwa na Allah (KUN) ya kuiumba na italazimika katika hii (KUN) yaliyolazimika katika (KUN) iliyotangulia na hapo itakuwa kila (KUN) inahitajia (KUN) na kupelekea hilo mtiririko usiowezekana, sasa hivi kweli hii (KUN) imeumbwa? Kwani ikiwa haikuumbwa itakuwa maneno ya Allah sio kiumbe, naomba ufafanuzi katika hili.

JAWABU:

Ni hakika isiyokuwa na shaka kuwa Qur-ani tukufu imeumbwa hayo ni kwa mujibu wa dalili nyingi zisizopingika katika kuthibitisha usahihi wa Itikadi ya kuumbwa kwake, na tunaweza kurejea kusoma maudhui ya kuumbwa Qur-ani kwa kubofya hapa. 

Basi hakuna shaka katika kuumbwa neno (KUN) kwani neno hilo ni miongoni mwa meneno ya Qur-ani tukufu ambayo ni maneno ya Allah mtukufu, na malazimisho yaliyokuja katika suali hayana dalili ndani yake kwa sababu zifuatazo:-

1. Waislamu sote tunakubaliana kuwa muumbaji ni Allah mtukufu na wala si (KUN); kwani (KUN) ni neno halina uwezo wowote isipokuwa kama litapatiwa uwezo na Allah mtukufu, na katika hilo hakuna tatizo kwani Allah ni muweza wa kuumba bila kupitia kiumbe kama alivyokuwa ni muweza wa kuumba kwa kupitia kiumbe.
2. Meneno ni viwakilishi vya maana, kwa hiyo alipotuambia Allah mtukufu kuwa yeye anapokitaka kitu hukiambia (KUN) nacho kikawa, maana yake anapokitaka kitu hupita matakwa yake kwa alichokitaka basi huwa kama alivyotaka kiwe.
3. Bila shaka neno (KUN) ni la Kiarabu, na lugha zote zimeumbwa kwa hiyo (KUN) pia limeumbwa.
4. Allah mtukufu ametumbia kuwa kila Mtume alimtuma kwa lugha ya watu wake, kwa maana hiyo maneno ya Allah katika vitabu vyake kwa Mitume waliopita yako yasiyokuwa ya Kiarabu kama vile Taurati na Injili, nayo bila shaka yalikusanya ujumbe huu kama ulivokuja katika Qur-ani ya Kiarabu, basi lilielezwa neno (KUN) katika vitabu vyao kwa mujibu wa lugha zao, kwani maana yake neno hilo kwa kiswahili ni KUWA, na hili linabatilisha madai yaliyomo katika suali kuwa Allah mtukufu hutumia (KUN) katika uumbaji au ilazimike kuwa vitabu vyote vya Allah mtukufu vilikuwa kwa lugha ya Kiarabu.
5. Tunaitakidi sote kuwa Allah mtukufu ni mwenye uwezo kamili basi yeye hashindwi kukiumba kitu kwa kukitaka kiwe tu nacho kikawa kama alivyotaka bila ya kupitia chengine chochote, na hili linabatilisha madai ya suali kwa njia mbili:
   1. Kuwa kila alichotaka kiwe kwa (KUN) alikiumbia (KUN) ya kukifanya hicho alichotaka kiwe, na hapa linaporomoka lazimisho la mtiririko wa kila (KUN) inahitajia (KUN), kwani Allah mtukufu hakutuambia kuwa kila kiumbe kakiumba kwa (KUN), alichotuambia kuwa yeye akikitaka kitu hukiambia (KUN) nacho kikawa, ama katika uumbaji wa kila kitu katuambia kuwa ((Hakika sisi kila kitu tumekiumba kwa ukadirio)) [Qamar 49] kwa hiyo alichokikadiria kukiumba kwa (KUN) alikipatia (KUN) yake, na alichotaka kipatikane bila ya kupitia (KUN) kilipatikana bila ya (KUN).
   2. Allah ni muweza asiyehitajia chengine kwa hiyo ametakasika na ufakiri wa kuwa kisifanyike anachokitaka mpaka kipate (KUN) ya kukiumba kitu hicho.

Katika kuthibitisha haya tuangalie katika uumbwaji wa Baba yetu Adam, anatuambia Allah mtukufu.

إِنَّ مَثَلَ عِيسَى عِنْدَ اللَّهِ كَمَثَلِ آدَمَ خَلَقَهُ مِنْ تُرَابٍ ثُمَّ قَالَ لَهُ كُنْ فَيَكُونُ

((Hakika mfano wa Issa kwa Allah ni kama mfano wa Adamu, alimuumba kutokana na dongo kisha akamuambia kuwa basi akawa)) [Aala Imaran 59]

Udhahiri wa neno hili kuwa Allah mtukufu alimuumba Adamu (a.s) umbile la mwanzo bila ya (KUN) kisha akamtoa katika umbile la mwanzo na kumuingiza katika umbile la pili kwa (KUN) kama walivosema Wafasiri kuwa umbile la mwanzo bila ya roho na umbile la pili ni la kupewa roho.

Na Allah mtukufu ndiye muwafikishaji na yeye ndiye anayejua zaidi.

Wabillahi Taufiqi.

Published By Sh. Hafidh Al-Sawafi

SUALI:

Limetufikia suali kuhusu matendo ya mja ikiwa Allah ameyapanga kabla na kwa hiyo mja yumo katika aliyotaka Allah yafanyike kwa nini kuwe na lawama katika anayoyafanya mja hali ya kuwa amefanya aliyotaka Allah yaafanyike?

JAWABU:

Kwanza: Suali hili linakamatana na kuamini Qadhaa na Qadar nayo ni nguzo ya sita katika nguzo za Imani katika Uislamu.

Pili: Kwa hakika Allah mtukufu ameumba watu kwa kuwafanyia mitihani ni nani kati yao atafanya matendo mema?; kutokana na hapo amejaalia kwao kuwa na hiyari katika yote wanayoyafanya katika vitendo vyao, basi akasimamisha hoja kwa kutuma Mitume na kuteremsha Vitabu, na kuwapa Akili ya kufikiri na kupambanua, basi akawaongoza katika njia ya kujua na akawapa khiyari katika uwanja wa vitendo vyao ikiwa ni kauli ya kusema au itikadi ya kuitakidi au vitendo vya kufanywa, na hakuna shaka yoyote katika kutofanyika wala kupatikana chochote isipokuwa kwa kutaka Allah mtukufu; kwani kupatikana ambacho Allah mtukufu hataki kipatikane kunalazimisha kushindwa Allah mtukufu kwa kupatikana katika mamlaka yake asiyotaka yapatikane, na lazimisho hilo ni batili bila shaka yoyote, kwa hiyo ikalazimika kuamini kuwa hakuna chochote kinachopatiakana ikiwa cha kheri au shari isipokuwa ni kwa kutaka Allah mtukufu, na kutaka kwake hakulazimishi kuridhia kwake, bali kunalazimisha uwezo wake katika kuwakalifisha waja wake na kuwalipa kwa machumo yao wenyewe na kupatikana uadilifu wake Allah mtukufu, basi huwapoteza Allah mtukufu walio madhalimu nayo ni malipo ya kujichagulia wenyewe njia ya kuasi na kudhulumu katika maisha yao, na kuwaongoa Allah wachamungu ni malipo ya kujichagulia kwao njia ya utiifu na kunyenyekea kwake Allah mtukufu; kwa hiyo mja ni mwenye kulaumiwa au kusifiwa kwa yale aliyojichagulia katika maisha yake mwenyewe.

Tatu: Tunafahamu sote kuwa Allah mtukufu na mjuzi wa kila kitu; kwa hiyo ameshajua yote yatakayofanywa na waja wake moja moja kwa khiyari zao wenyewe, na hayo ni kabla ya kuwaumba, kwa hiyo Allah mtukufu ameshathibitisha matendo ya waja na yote yanayotokea na yatakayotokea mpaka siku ya Kiama, ameyathibitisha si kwa kwa njia ya kulazimisha bali ni kwa njia ya kuyajua.

Nne: Ni wajibu wetu sisi waja kushughulikia majukumu yetu katika yale yenye maridhio ya Mola wetu; kwani huo ndio uwanja wetu, na sio tujiingize katika maasi ya Allah mtukufu kisha tumlaumu Allah tukufu kwa yale aliyoyajua kwetu na kutulipa kwa machumo ya mikono yetu wenyewe.

Mara moja Kiongozi wa Waumini Omar bin Al-Khattabi (r.a) alilirejesha jeshi kwa sababu ya kufikiwa na habari kuwa mji watakaouingia kumeingia maradhi ya Twaauni nao ni maradhi ya kuambukiza na kusababisha kifo cha haraka kama kolera au ebola, basi mmoja wa Masahaba wenzake akasema: Hivi ni kukimbia Qadhaa ya Allah ewe Kiongozi wa Waumini?!! Hapo akamjibu: "Ndio ni kukimbia Qadhaa ya Allah kwa kukimbilia Qadari yake Allah mtukufu" Akimaanisha kuwa huku kurudi kwetu pia kumeshakadiriwa na Allah mtukufu kama alivyokadiria kule kufikwa na balaa lilifika.

Kwa hiyo tukusudie mazuri anayoyardhia Mola wetu na tuchukue sababu zake na tuachane na mabaya na sababu zake ili tuweze kufanikiwa kwa Mola wetu kwa kutujaalia Taufiqi yake na kutuepusha na Khudhulani yake.

Wallahu aalamu wa Ahkamu.

Wabillahi Taufiqi.

Published By Sh. Hafidh Al-Sawafi

SUALI:

Asalam alaikum:
Naomba  kupata majibu kuhusu wale wanaodai kuwa Mtume Muhammad (S.A.W) si Mtume wa mwisho kwa munasaba wa kusema kuwa Qur-an 33:40 hakujatumia neno khaatam kwa maana ya  mwisho, bali ni kwa maana ya Muhuri. 

Je? Sisi waislamu tunaifasiri khaatam kwa maana ya mwisho kwa msingi gani?

Na je? Kun atofauti ya  neno khaatam na khaatama katika maana ijapokuwa inatofautiana wezani (wazni)?

JAWABU:

Waalaykum Salaam wa rahmatullahi wa barakatuh.

Kwa hakika wanaodai kuwa Mtume Muhammad (S.A.W) si Mtume wa wisho hao ni wapofu na wapotevu na kihakika hasa hao sio Waislamu, bali wao hao ni Washirikina, hili halina shaka ndani yake kwa sababu zifuatazo:

1. Kupingana kwao na Quraani tukufu katika neno lake Allah mtukufu: ((Hakuwa Muhammad baba wa yoyote katika wanaume wenu, lakini yeye ni Mtume wa Allah na mwisho wa Manabii...)) [Al-Ahzaab 40] Aya ambayo iko wazi katika kukatika nasabu ya Mtume (S.A.W) na kufungwa lango wa Unabii kwa ujio wake Mtume Muhammad (S.A.W).
2. Kupingana na Sunna Mutawaatiru nayo ni neno lake Mtume Muhammad (S.A.W): ((Hakuna nabii yoyote baada yangu)) [Bukhari 3455 Muslim 44 (1842)].
3. Makubaliano ya Umma mzima baada ya kufa Mtume (S.A.W) kuwa mlango wa Unabii umefungwa baadda ya Mtume Muhammad (S.A.W).

1. Neno (Khaatamu na Khaatimu) kwa kutiwa fat-ha au kasra herufi ya taa ni maana moja mwisho wa kitu imekuja katika Kitabu Al-Aini (وخاتم العمل وكل شيء آخره) (Na KHAATAMU ya kazi na kila kitu ni mwisho wake) al-aini 4/242, ama madai ya wenye kudai kuwa Khaatamu maana yake katika Aya ni mhuri hayo ni madai hewa na mageni, tena ni madai ya ajabu sana, kwa sababu waliouita muhuri kwa jina la Khatmu au Khaatamu wamezingatia kufunga mada husika kwa alama ya muhuri, kwa maana chochote kitachofuata baada ya muhuri hicho hakizingatiwi wala hakimo katika makusudio ya muhusika, kwa maana hiyo muhuri ni kimalizio cha kufunga kitabu au barua au maudhui husika.
2. Ama kuifasiri kwetu Khaatamu kwa maana ya mwisho hilo ni kwa misingi ya lugha la Quraani, wala hatujui aslan kuwepo mwanachuoni wa kutegemewa kwa waislamu aliyefasiri kwa maana nyengine isiyokuwa ya mwisho.
3. Ama tofauti ya neno Khaatam na Khatama, ni kuwa Khatama ni kitendo cha wakati uliopita (Fiilu Maadhi) na maana yake ni amemaliza. Na Khaatama ni masadar ya kitendo hicho na maana yake ni kimalizio.

Published By Sh. Hafidh Al-Sawafi

SUALI:

Jana nimeangalia kipindi cha maswali na majibu Shekhe aliulizwa Jee! Qurani ni kiumbe au ni maneno ya Allah? Naye akajibu kuwa Qurani ni maneno ya Allah ni kalaamu lwaah na wanaosema ni kiumbe wanakufuru.

Naomba ufafanuzi juu ya hili In shaa Allah

JAWABU:

Neno la kuwa Quraani ni kiumbe ndilo neno la haki kidalili, na hakuna shaka yoyote katika usahihi wake, na kwa hakika wenye kusema kuwa Quraani si kiumbe wamekosea na dalili hawana, na ajabu zaidi ni kukufurisha kwao wenye kusema neno la haki kidalili katika suala hili kama ulivyomsikia huyo Sheikh aliyejibu Allah amuongoe. 

Unaweza kupata dalili za kuwa Quraani ni kiumbe kwa kufuata kiunganishi hichi hapa.

Ama kuhusu hilo suali na jawabu yake kama ulivotunakilia; kwa hakika yote mawili ni ya kushangaza kwani hayamo katika mantiki, si ulizo wala jawabu; kwa sababu unapouliza: Jee!! Quraani ni maneno ya Allah au ni kiumbe? Ni sawa sawa na kuuliza: Jee!! Muhammad ni Mtume wa Allah au ni kiumbe? Au kuuliza: Jee!! Alqaaba ni nyumba ya Allah au ni kiumbe? Kwa hakika hakuna mkabala baina ya sifa mbili hizo, kama ilivyokua Muhammad ni Mtume wa Allah nako hakupingani na kuwa kwake kiumbe, na Alqaaba kuwa ni nyumba ya Allah hakupingani kuwa Alqaaba ni kiumbe basi vilevile kuwa Qurrani ni maneno ya Allah hakupingani na kuwa Quraani ni kiumbe, kutokana na hapo utawakuta wenye kusema kuwa Quraani ni kiumbe vilevile wanasema kuwa Quraani ni maneno ya Allah, kwa hiyo Quraani ni maneno ya Allah, nayo ni kiumbe cha Allah.

Huenda mtu akasema kuwa maneno ya Allah ni sifa ya Allah vipi sifa ya Allah iwe ni kiumbe?!!

Jawabu yake ni kuwa Allaha ni msemaji wala si maneno; kwa hiyo sifa yake ni usemaji na sio maneno; kwani maneno ni athari ya sifa hiyo ya usemaji ambayo ni sifa ya kitendo, na kila kilichopatikana kwa sifa ya kitendo bila shaka hicho ni kiumbe.

Kwa hiyo utafahamu kuwa sisi Ibadhi tunaposema kuwa Quraani ni kiumbe tunasema pia kuwa Quraani ni maneno ya Allah (KALAAMU LWAAHI) na maneno ya Allah sio sifa ya Allah bali ni athari ya sifa ya Allah ya Usemaji (TAKALLUMU).

Wabillahi taufiqi.

Published By Sh. Hafidh Al-Sawafi

SUALI:

Nabii Adam AS na mkewe bi Hawa walitolewa peponi baada ya kushawishiwa na shetani ili ale lile tunda alilokatazwa kula.

Maswali yangu ni kama yafuatavyo.

1. Hivi peponi kuna mashetani yatakayo tukera huko ?

2. Je kutakuwa na baadhi ya vitu tumeharamishiwa tusile huko peponi - tumeona mfano wa nabii Adam as kukatazwa kula tunda.

3. Kwa kweli hivi alieingia peponi atatoka tena? Kwani tumeona kuwa Nabii Adam A.S alifukuzwa baada ya kula tunda alilokatazwa.

4. Je ni kweli haya maelezo ya baadhi ya masheikh kusema kwamba Mashetani ya Peponi yatakuwepo lakini sio ndani ya pepo yenyewe, lakini kwa kuwa wana uwezo fulani mfano kama hizi Bluetooth Na wifi leo - japokuwa wako nje ya Pepo lakini wanauwezo wa kukushawishi remotely ( kwa mbali)?

5. Je hizi dhambi na dhawabu hivi tutaendelea nazo hadi huko peponi? Tumeona kwa nabii Adam AS alitolewa peponi kwa dhambi alizofanya.

Sheikh twaomba utufungue akili na utupe ukweli wa maelezo hapo juu.

JAWABU:

Haya masuali yote yamejengwa juu ya msingi wa kuwa Pepo iliyotayarishwa huko Akhera ndiyo ile ile aliyokuwemo Baba yetu Adam A.S na Mama yetu Hawa A.S, na hilo lina tafauti ndani yake hata kama usahihi ni kuwa Pepo ndiyo hiyo hiyo kama alivyosema Imam Nurudini Saalimi R.A:

((والأصح ما عليه الجمهور من وجودهما الآن لما ثبت بالأدلة القاطعة أن آدم وحواء كانا في الجنة وقد أُهْبِطَا منـها، والقول بأن الجنة التي كانا فيها غير الجنة الموعود بـها تكَلُّف لا دليل عليه))

((Na lililo sahihi zaidi ni lile waliloshika Jamuhuri ya Umma ya kuwa Pepo na Moto vipo hivi sasa, kwani imethibiti kwa dalili za yakini kuwa Adamu na Hawa walikuwemo ndani ya Pepo na wakatolewa humo, na neno la kusema kuwa Pepo waliyokuwemo ndani yake siyo Pepo iliyotolewa ahadi (ya Akhera) ni ulazimishaji usio kuwa na dalili yoyote)).

Kwa hiyo hilo la kuwa Pepo ndiyo hiyo hiyo halina utata, lakini kutafautiana hukumu kwa kutafautiana zama ni yakini isiyokuwa na shaka ndani yake; kwani tunaamini sote kuwa Adamu na Hawa A.S na watoto wao wote ni wenye kufa katika ulimwengu huu, nayo ndiyo hukumu ya zama za kabla ya Akhera, lakini katika zama za Akhera hukumu ya kifo itaondolewa; kwani hakuta kuwa na kufa huko Akhera wala kumalizika, basi neno la haki ni kuwa hukumu ya Pepo kabla ya kusimama Kiama ni tafauti na hukumu yake baada ya kusimama Kiama.

Kwa nini?

Kwa sababu Allah alijaalia mti ndani yake uwe ni mtihani kwa Baba yetu Adam A.S na Mama yetu Hawa A.S, kama alivyojaalia uwezekano wa kufikiwa wao na wasiwasi wa Iblis L.A, na hilo liko wazi katika tahadharisho lake kwao kutokana na uadui wa Iblis L.A. dhidi yake, basi Allah mtukufu aliyeuweka huo mti ndani ya Pepo ni mwenye uwezo wa kuuondoa Mti huo ndani ya Pepo, kama alivyokua Allah mtukufu ni muweza wa kuondoa hukumu ya uharamu wake kwa wahusika wapya wa Peponi.

Pia tufahamu kuwa hali waliyoumbiwa Baba yetu Adamu na Mama yetu Hawa A.S ilikuwa na uwezekanao wa kuasi amri au katazo na ndio maana ya kuhadharishwa kwao na kuukaribia huo mti waliokatazwa, nayo pia ndiyo hali ya kizazi chao katika ulimwengu huu katika kuyakaribia maasi waliyokatazwa, ama hali ya viumbe huko Akhera haitakuwa na uwezekano wa kuasi tena; kwani tayari Allah mtukufu ameshahukumu kuwa Iblisi L.A na waliomuitika wito wake wa kuasi bila ya kutubia hao mafikio yao ni Motoni milele hilo ndilo gereza lao, ama Mitume A.S.W na wema waliotubia wote hawa mafikio yao ni Peponi milele, basi kama ilivyokua katika Pepo ya Akhera hakuna kuzeeka, wala kufa, wala tabu, wala kugonjwa, wala kwenda haja, vile vile hakuna ndani yake uwezekano wa kuasi wala kutenda dhambi, hivo ndivyo Allah  mtukufu alivyokuhumu na atavyowajaalia waja wake wema katika Pepo huko Akhera kama alivyotumbia:

((يَتَنَازَعُونَ فِيهَا كَأْسًا لَا لَغْوٌ فِيهَا وَلَا تَأْثِيمٌ))

((Wanapokezana ndani yako humo (Peponi) kinywaji, hakuna upuuzi humo wala kuasi kokote)) [Tuur 23]

Tukisema kuwa maana yake ni hakuna upuuzi humo peponi wala kuasi kokote, hukumu ya yale aliyoyajaalia Allah mtukufu kwa watu wa peponi itakuwa iko wazi kama jua la kiangazi.

Na tukisema kuwa maana yake ni hakuna upuuzi humo katika kinywaji wala kuasi kokote, pia hukumu ya yale aliyoyajaalia Allah mtukufu kwa watu wa Peponi itakuwa iko wazi bila ya utata; kwani imezoeleka kwa waarabu kutumika neno kinywaji kumaanisha ulevi, na ikiwa hiyo ndiyo hali ya ulevi wa Peponi basi mengine hali yake itakua ni hiyo hiyo na zaidi ya hiyo.

Ama suala la Mashetani.

Tufahamu kuwa Ushetani ni jina sifa, na sio viumbe maalumu kama wanavofikiria baadhi ya watu; basi ushetani ni sifa mbaya ya kushawishi katika maasi, na Iblis L.A imemlazimu sifa hii kwa hiyo akajulikana kwa jina la Shetani milele, basi Mashetani walaaniwa na wafuasi wao wote huko Akhera watafungiwa katika gereza lao alilolityarisha Allah mtukufu, nalo ni Jahannamu humo watateseka Milele; kwa hiyo hizo nguvu za kibulutothi na kiremoti zitamalizika ndani ya moto wa Jahannamu. Allah mtukufu atuepushe na adhabu zake.

Kwa hakika hakuna Shetani katika Pepo, wala hakuna uwezekano wa kuwemo ushetani ndani yake.

Wabillahi taufiiqi.

Published By Sh. Hafidh Al-Sawafi

Asalam Alaikum:

Nina swali naomba kukuuliza kidogo tafadhali.

BAADA YA HADITHI HII

افترقت اليهود على إحدى وسبعين فرقة، وافترقت النصارى على اثنتين وسبعين فرقة، وستفترق هذه الأمة على ثلاث وسبعين فرقة كلها في النار إلا واحدة،)) فقال الصحابة: من هي يا رسول الله؟ قال: ((من كان على مثل ما أنا عليه وأصحابي)) الترمذي و الحاكم

((Waligawanyika Mayahudi katika makundi sabini na moja, na waligawanyika Manaswara katika makundi sabini na mbili, na utagawanyika Umma wangu katika makundi sabini na tatu, yote yataingia motoni ila moja!)) Maswahaba wakasema: 'Ni kundi lipi hilo Ee Mtume wa Allaah? Akajibu: ((Ni lile ambalo litakuwa katika mwenendo wangu hii leo na Maswahaba zangu)) [Imepokewa na Maimaam At-Tirmidhiy na Al-Haakim]

JEE! KUNA HADITHI AMBAYO INAELEZA YA KWAMBA KUNDI MOJA WAPO NI AHLU SUNNA WAL JAMAA?

JAWABU:

Hadithi ya kugawika umma wa Mtume wetu Muhammad S.A.W katika makundi sabiini na tatu ni mashuhuri, na miongoni mwa walioipokea na Imamu Rabii bin Habiib R.A katika Musnadi wake hadithi no 42 amesema: Abu Ubaidah kutoka kwa Jabir bin Zaid kutoka kwa Ibnu Abbaas kutoka kwa Nabii S.A.W amesema:

((Utagawika umati wangu katika makundi sabiini na tatu, yote yatakwenda motoni isipokua moja litaokoka, na wote watadai kuwa ndilo hilo moja)).

Na kugawika umma huu ni uhakika wa kutokea usiopingika, na kudai kila kundi kuwa ndilo la peponi ni uhakika pia; kwani nani anayeridhia kuwa katika kundi la motoni ikiwa ana kusudio la kuwa mja wa peponi?!!!

Kutokana na hapo utagundua kuwa madai kusema Ahalu Sunna Wal-jamaa ndilo kundi la peponi ni madai ambayo kila kundi linayadai; basi hayo ni madai hewa kwa kuwepo uwezekano wa kuwa haki iko kwa wengine, hasahasa tukizingatia kuwa unasibisho wa Ahalu Sunna Wal-jamaa una utata mkubwa ndani yake kiitikadi na kifiqhi, kwani kiitikadi kuna Maash-ari na Mamaturidi wao wanadai kuwa ndio Ahalu Sunna wal-Jamaa, na upande mwengine kuna Masalafi (Mawahabi) nao pia wanadai kuwa ndio Ahalu Sunna wal-jamaa, na kila upande unakufurisha upande mwengine, achilia mbali tufauti zao za kiwakati katika Itikadi. Ama katika mgawiko wa Kifiqhi, kwa hakika kila mmoja anajua kuwepo kwa makundi manne ya Kihanafi na Kimaliki na Kishaafii na Kihambali.

Ama upande wetu Ibadhi, juu ya kuwepo Maibadhi wa Mashariki na Maibadhi wa Magharibi kwa hakika inabakia Ibadhi kuwa ni Madhehebu moja kiitikadi na kifiqhi kwa karne zote zilizotangulia mpaka hivi leo, na itikadi yetu iko wazi katika hili kuwa haingii peponi isipokua mchamungu tu, ama mafasiki hao wote ni motoni milele, kwa maana hiyo tunaitakidi kuwa kundi la watu wa Peponi ni kundi la Wachamungu peke yao, wala hakuna huko Akhera mazingatio ya majina ya kimadhehebu; kwani hukumu ni moja tu huko, na haya madhehebu yamekuja hapa duniani kwa lengo la kuipatia haki, basi kila kundi linadai kuwa haki iko upande wake, kutokana na hapo watu huko akhera hawendi na vitambulisho vya kimadhehebu ili viwe vya kuwaingiza peponi au motoni, kwa hakika kitambulisho cha kuingia Peponi huko akhera ni uchamungu tu, kama ilivyokua kitambulisho cha kuingia Motoni ni ufasiki tu na sio jengine lolote.

Alinijia mmoja wa wanaelimu wa Kisunni (Jina ninamuhifadhi) akaniambia, vipi nyinyi Maibadhi hamuamini kuwa waislamu watatoka motoni baada ya kuadhibiwa humo kwa makosa yao?

Nikamuambia: Kwani waliingia humo motoni kwa sifa gani? Kwa sababu Allah mtukufu ametuambia kuwa Moto umeandaliwa kwa Makafiri, sasa wao huko motoni waliingia kwa sifa gani?

Hapo akasema: Mtume S.A.W kasema: ((Atatoka motoni mwenye kusema laa ilaaha illaa llwaahu na katika moyo wake kuna chembe ya kheri)).

Nikamuambia: Lau inathibiti kwetu uwezekano wa Mtume S.A.W kwenda kinyume na Kitabu cha Allah basi lingalikua ni haki hilo kwetu kulikubali, lakini tunakata ushauri kuwa Mtume S.A.W hajasema maneno hayo kwani haiwezekani aseme kinyume na Quraani, juu ya kuwa Quraani imetuambia wazi wazi kuwa itikadi za matarajio hewa:

1. Tutasamehewa tu sisi. [7. Al Aarafi 169]
2. Na hautatugusa moto isipokua siku chache. [3. Aala Imraan 24]

Kuwa hizo ni miongoni mwa itikadi potofu za waliopita kabla, nazo ni uzushi uliofanywa katika dini, sasa vipi iwezekane kwa Mtume S.A.W apandikize katika umma huu maradhi hayo korofi?!!

Akaniambia: Mutasema nini nyinyi siku ya Kiama ikikuthibitikieni kuwa Mtume S.A.W kayasema hayo?

Nikamuambia: Tutakua katika hukumu yake, na sisi tunasema Laa ilaaha illaa lwahu na tunayo mengine mengi ya kheri hasahasa tukizingatia kuwa itikadi yetu haitukubalii kubakia katika dhambi kubwa yoyote; kwa hiyo tutakutana pamoja Peponi.

Hapo nikamgeuzia suali lake na kuwambia: Sasa itakua ipi hukumu yenu siku ya kiama pindi ikikubainikieni kuwa maneno hayo hakuyasema Mtume S.A.W na nyinyi mumehadaika kwa itikadi batili na mukafanya ukaidi baada ya hoja kukufikieni?

Hapo akashindwa na kujibu lazimisho lake; kwani itakua ni motoni milele, kwa sababu hakuna badala ya haki isipokua upofu na upotovu tu.

Basi kundi la watu wa Peponi ni Wachamungu tu, kwa hakika haingii Peponi isipokua Mchamungu na hawi mchamungu mwenye kuvaa nguo ya kiburi mbele ya haki, na haki ni kwa dalili na sio kikundi fuani wala fulani kasema, wala kwa pokezi la kupanga na kuchomekewa Mtume S.A.W.

Hii ndiyo itikadi yetu, na Kitabu cha Allah mtukufu ndio mizani yetu.

Wabillahi Taufiqi.

Published By Sh. Hafidh Al-Sawafi

Asalamu alaykum.

Nauliza suali ambalo ndugu yetu mmoja wa kisunni ametoa Aya za mwisho za Suuratu Zilazalah zenye kusema: ((Basi mwenye kufanya uzito wa tembe ya vyumbi wa kheri atauona * Na mwenye kufanya uzito wa tembe ya vumbi wa shari auaona)).

Hoja yake ni kuwa hii ni dalili ya wazi kuwa siku ya Kiama kutakuwa na Mizani na kutaadhibiwa watu kwa uzito wa yake makosa yao kidogo waliofanya baadae watatolewa watiwe Peponi kwa yale mengi mazuri yaliyopimwa na Mezani.

Jee!! Hii hoja inakubalika kwa dalili za Aya tukufu zilizotolewa?

JAWABU:

KWANZA: Kwa hakika Aya tukufu haijataja Mizani, wala haijaashiria kabisa kuwepo kwa mizani hiyo wanayodai Masunni kuwepo kwake siku ya Kiama, wala hakuna katika Quraani sehemu yoyote iliyotajwa Mizani ya kushindanisha mazuri na mabaya siku ya Kiama, pia hakuna katika Quraani sehemu inayobashiria mja wa motoni kutoka motoni, wala mja wa Peponi kuingia motoni.

PILI: Aya hizi za Suuratu Zilazalah zinatueleza kuwa kila mja ataona yote atakayoyatenda ikiwa ni mabaya au mema, hata jema au baya likiwa ni dogo namna gani basi ataliona, na haya ameyaeleza Allah mtukufu katika Aya nyengine pale alipotuambia:

وَوُضِعَ الْكِتَابُ فَتَرَى الْمُجْرِمِينَ مُشْفِقِينَ مِمَّا فِيهِ وَيَقُولُونَ يَا وَيْلَتَنَا مَالِ هَذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا وَوَجَدُوا مَا عَمِلُوا حَاضِرًا وَلَا يَظْلِمُ رَبُّكَ أَحَدًا (49)

((Na kitawekwa Kitabu, basi utawaona waovu wanahaha kwa yaliyomo ndani yake, na watasema: Ee ole wetu, kina nini Kitabu hichi?!! hakikuacha dogo wala kubwa ila kimelidhibiti!!, Na watakutia waliyoyafanya yamehudhuria na hadhalumu Mola wako yoyote))

[Kahaf 49]

Kwa hiyo Mchamungu ataona mema yake na mabaya yake, basi atafurahi furaha isiyokua na kifani kwa kukubaliwa mema yake na kusitiriwa kwa makosa yake aliyotubia kwayo; kwani atakua ameingia katika rehma za Allah mtukufu, anatuambia Allah mtukufu kupitia ndimi za Malaika wake wa karibu zaidi:

وَقِهِمُ السَّيِّئَاتِ وَمَنْ تَقِ السَّيِّئَاتِ يَوْمَئِذٍ فَقَدْ رَحِمْتَهُ وَذَلِكَ هُوَ الْفَوْزُ الْعَظِيمُ 

((Na uwakinge na makosa, na ambaye utamkinga na makosa siku hiyo (ya akhera) kwa hakika huyo umemrehemu, na huko ndiko kufaulu kukubwa))

[Ghaafir 9].

Ama muovu aliye fasiki ambaye yumo katika mwendo wa Ibilisi mlaaniwa wa kutotubia kwa dhambi anaijua mpaka mauti yakamfika, kwa hakika huyo ataona mema yake na maovu yake, lakini yeye atajawa na huzuni na majuto yasiyokuwa na mfano; kwani mema yake hayakukubaliwa kwa sababu ya ukaidi wa kutubia kwake katika dhambi kubwa iliyomzonga na hapo hali yake itakua kama alivyotueleza Allah mtukufu:

وَيَوْمَ يَعَضُّ الظَّالِمُ عَلَى يَدَيْهِ يَقُولُ يَا لَيْتَنِي اتَّخَذْتُ مَعَ الرَّسُولِ سَبِيلًا (27)يَا وَيْلَتَى لَيْتَنِي لَمْ أَتَّخِذْ فُلَانًا خَلِيلًا (28)لَقَدْ أَضَلَّنِي عَنِ الذِّكْرِ بَعْدَ إِذْ جَاءَنِي وَكَانَ الشَّيْطَانُ لِلْإِنْسَانِ خَذُولًا (29)

((Na siku atakapon`gata dhalimu mikono yake, atasema: Ee!! Laiti ningalifanya kuwa pamoja na Mtume ndio njia yangu * Ee!! Ole wangu, laiti nisingalimfanya fulani kuwa kipenzi changu * Kwa hakika amenipoteza nje ya ukumbusho baada ya kunifikia. Na akawa Shetani ni mwenye kumuacha mtu))

[Furqaan 27-29].

TATU: As-habu wetu (Ibadhi) wamechukua Itikadi yao moja kwa moja katika Quraani tukufu, basi amesema Imamu Qutubu Al-Aimah R.A kuhusu Aya hizo:

والمراد الجزاء القليل والكثير فرؤيته رؤية جزائه على حذف مضاف وذلك بحسب ما ختم عمله فالسعيد يرى ثواب علمه الصالح كله إذ لم يمت مصراً وسيئاته كلها محبطة ، والشقى يرى عقاب سيئاته كلها مبطلة بإصراره كأنه قيل خيراً يره إن لم يحبط وشراً يره إن لم يكفر

((Na Makusudio ni malipo kidogo na mingi, basi kuona kwake ni kuona malipo yake kwa njia ya kuondolewa mudhaafu, na hayo ni kwa mujibu wa aliyomalizia matendo yake, basi mwenye kufaulu ataona malipo ya matendo yake mema yote ikiwa hakufa akiwa ni mkaidi wa kutubia, basi ataona makosa yake yote yameporomoka hayakuzingatiwa. Na muovu ataona adabu ya maovu yake ya batili. Kama hapo imesemwa KHERI ATAIONA IKIWA HAIKUPOROMOKA, NA SHARI ATAIONA IKIWA HAIKUSITIRIWA)).

NNE: Kama tulivyosema kuwa katika Quraani hakuna sehemu iliyotaja kuwepo kwa Mizani ya kushindanisha mabaya na mazuri siku ya kiama, na Aya zote lizozokuja kuhusiana na suala la kipimo cha matendo ya waja zimekuja kwa mfumo wa ((Yule zitakaekua nzito mizani zake)) kwa wingi, na ((Yule zitakaekua nyepesi mizani zake)) kwa wingi vile vile, kwa maana hiyo mizani ni hizo hizo, ima zitakua nzito au zitakua nyepesi.

Bila shaka hizo ni mizani za matendo mema ya mja, kila tendo ima litakubaliwa au litakataliwa, lililokubaliwa ndilo limekua zito na lililokataliwa ndilo limekua jepesi, basi yule ambaye yatakubaliwa mema yake hata kama ni jema moja tu huyo imekua nzito mizani ya jema hilo, na huyo haguswi na moto asilani achilia mbali kutoka humo, na Allah ameshahukumu katika Kitabu chake kuwa yeye anawakubalia Wachamungu, na Pepo ameiandaa kwa ajili ya Wachamungu tu, amesema:

قَالَ إِنَّمَا يَتَقَبَّلُ اللَّهُ مِنَ الْمُتَّقِينَ (27)

((Hakika halivyo ni kuwa Allah anawakubalia wachamungu))

[Al Maaidah 27]

Ama aliye fasiki amejitosa katika asi analijua akawa ni mkaidi wa kutubia mpaka kifo kikamkutia huyo mema yake yamekosa sharti ya kukubaliwa nayo ni sharti hiyo ya uchamungu; kwa hiyo mizani za mema yake zimekua nyepesi, naye atazongwa na maovu yake hata kama ni ovu moja, na atasalia katika adhabu ya Jahannamu humo atabakia milele, na ukali wa adhabu yake humo ni kwa mujibu wa maovu yake.

Amesema Allah mtukufu:

فَمَنْ ثَقُلَتْ مَوَازِينُهُ فَأُولَئِكَ هُمُ الْمُفْلِحُونَ (102) وَمَنْ خَفَّتْ مَوَازِينُهُ فَأُولَئِكَ الَّذِينَ خَسِرُوا أَنْفُسَهُمْ فِي جَهَنَّمَ خَالِدُونَ (103)

((Basi yule ambaye mizani zake zitakua nzito hao ndio waliofaulu * Na yule ambaye mizani zake zitafifia hao ndo waliozihasiri nafsi zao katika jahannamu watabakia))

[Al Muuminuna 102-103]

TANO: Itikadi ya kusamehewa waovu wakaidi wa kutubia siku ya kiama au kuadhibiwa kwa muda au kuombewa na wakuu (Shafaa) bila shaka ni itikadi batili na maradhi mabaya ya kiitikadi yaliyowapata wana wa Israili ambao ni watoto wa Mitume kwani Israili ni Mtume ya Yaaquub A.S naye ni mwana wa Isihaqa A.S naye ni mwana wa Ibarahim A.S, lakini Wana wa Israili walioasi walilaaniwa kwa sababu ya uasi wao na uadui wao na udhalimu wao, na kwa hakika maradhi ni hayo hayo hata kama wangonjwa ni tafauti ugonjwa unabakia pale pale, basi tujihadhari nayo maradhi hayo na mengineo, kwani wao hali zao ni kama alivyozieleza Allah mtukufu:

فَخَلَفَ مِنْ بَعْدِهِمْ خَلْفٌ وَرِثُوا الْكِتَابَ يَأْخُذُونَ عَرَضَ هَذَا الْأَدْنَى وَيَقُولُونَ سَيُغْفَرُ لَنَا وَإِنْ يَأْتِهِمْ عَرَضٌ مِثْلُهُ يَأْخُذُوهُ

((Basi walifuatia baada yao waliofuatia, walirithi Kitabu wakachukua pato hili la chini na huku wanasema: TUTASAMEHEWA TU na ilikiwajia pato mfano wake wanalichukua...))

[Al Aaarafi 169]

Twabaan, Allah mtukufu amewatia aibu kwa Itikadi yao hiyo ya kuwa wao watasamehewa tu kwa kuasi kwao, nao ndio aliowasifu kuwa walirithi Kitabu chake... Jee!! Kama hawakusamehewa? Hapo wakazua Itikadi ya Adhabu ya Muda wakasema:

ذَلِكَ بِأَنَّهُمْ قَالُوا لَنْ تَمَسَّنَا النَّارُ إِلَّا أَيَّامًا مَعْدُودَاتٍ وَغَرَّهُمْ فِي دِينِهِمْ مَا كَانُوا يَفْتَرُونَ (24)

((Hayo ni kwa sababu wao wamesema: Hautatugusa moto isipokua siku chache. Na yakawadanganya katika dini yao waliyokua wakiyazua))

[Aala Imraana 24]

Pia walijipa matarajio hewa ya kuombewa siku ya kiama ikiwa hawakutubia, na kwa hakika uombezi ni kwa ajili ya waliotubia ambao amefuata mwendo wa wazazi wetu Adamu na Hawa A.S, na sio kwa waliojizonga na mwendo wa Ibilisi mlaaniwa wa kukaidika katika toba kwa makosa waliyoyaingia.

Wabillahi Taufiqi.

Published By Sh. Hafidh Al-Sawafi

Limetufikia Suali anauliza muulizaji:

Ibadhi tunaitakidi kuwa hakuna uwezekano wa kuonekana Allah mtukufu, kwa maana hiyo tunaitakidi kuwa kuonekana kwa Allah mtukufu hakukubaliani na utukufu wake na ukamilifu wake, ikiwa huo ndio uhakika vipi Mtume Mussa A.S alitaka kumuona Allah mtukufu wakati aliposemezwa? Jee!! Inawezekana kwa Mtume wa Allah asijue yanapasa kwa Allah na yasiyopasa?!! Naomba jawabu.

JAWABU

KWANZA: Tunashukuru sana kwa kuwasiliana muulizaji nasi katika masuala ya Itikadi na mengineyo yanayohusiana na Dini yetu, kwani kufanya hivo ni sababu ya kuondoa utata unaoweza kumfika muumini kwa njia moja au nyengine, basi tunawataka Waislamu wote kwa ujumla na Maibadhi kwa uhusisho kuwasiliana na Maibadhi katika yanayohusu Ibadhi na yanayohusu Uislamu kiujumla.

PILI: Quraani tukufu inatueleza kuwa Mtume Mussa A.S alipata mtihani mkubwa wa kuathirika kaumu yake na Itikadi za Mungu wa kuonekana kwa macho na Mungu wa kujipangia watu, kwani Quraani tukufu inatueleza kuwa wao  walifikia kuchongewa ndama na Saamiriyu L.A na kuwataka wamuabudu na kuwaambia kuwa ndama huyo ndiye Mungu wao na Mungu wa Mussa A.S nao waliabudu ndama huyo, na hayo yalifanyika hali ya kuwa Mtume Harouni A.S yupo akiwanasihi lakini hawakumkubali, pia Quraani inatueleza kuwa walifikia kumtaka -Mtume Mussa A.S- awafanyie mungu wa kisanamu kama wengine walioabudu masanamu.

وَجَاوَزْنَا بِبَنِي إِسْرَائِيلَ الْبَحْرَ فَأَتَوْا عَلَىٰ قَوْمٍ يَعْكُفُونَ عَلَىٰ أَصْنَامٍ لَّهُمْ ۚ قَالُوا يَا مُوسَى اجْعَل لَّنَا إِلَٰهًا كَمَا لَهُمْ آلِهَةٌ ۚ قَالَ إِنَّكُمْ قَوْمٌ تَجْهَلُونَ

((Na tumuwapitisha Wana wa Israili Baharini wakawafikia watu wanaabudia masanamu yao. Wakasema: Ewe Mussa tufanyie na sisi mungu kama ilivokua hawa wana miungu. Akasema: Hakika nyinyi ni watu wajinga))

[A-Aaarafi 138]

Na yote hayo yalipofeli walimtaka Mtume Mussa A.S awaoneshe Allah wazi wazi, na hili walilishadidia sana mpaka wakafikia kumwambia:

وَإِذْ قُلْتُمْ يَا مُوسَىٰ لَن نُّؤْمِنَ لَكَ حَتَّىٰ نَرَى اللَّهَ جَهْرَةً

((Na muliposema: Ewe Mussa Hatukuamini mpaka tumuone Allah wazi wazi.))

[Al-Baqarah 55]

Kwa haya tutafahamu kuwa itikadi ya kuonekana Allah mtukufu chanzo chake ni wabatilifu hao wa Bani Israil, kama ilivyokua kulin`gan`gania hilo ndio mwenendo wa wabatilifu hao na waliofuata nyayo zao, mpaka wakafikia kusema baadhi yao: ((Lau kuwa sina yakini ya kumuona Mola wangu kwa macho basi nisingelimuabudu)) neno chafu lenye kubeba sura ya kiburi mbele ya Muumba Allah mtukufu.

TATU: Tukifahamu hilo lililopita tutajua kuwa haiwezekani awe Mtume Mussa A.S kama Wabatilifu wa Kaumu yake eti na yeye atake kumuona Allah mtukufu wazi wazi kama walivyotaka wao kumuona Allah mtukufu, hilo ni muhali haliwezekani, lakini uhakika ulivyo ni kuwa aliitanguliza nafsi yake katika lile walilomshurutisha kaumu yake ili kuwakatisha tamaa na kuwasitisha katika baya walitakalo kwa kusimamisha hoja kwao kuwa hilo ni muhali haliwezekani kabisa kabisa, kama kwamba kawambia kwa ulimi wa hali yake: "Mimi ndiye Mtume wenu na mbora wenu, basi mujue kuwa lisilowezekana kwangu halitawezekana kwenu pia".

Kwa hiyo Mtume Mussa A.S alitumia njia ya ukinaishaji kuwa lau hilo munalolitaka linawezekana basi mimi ningalikuwa wa mwanzo kulipata, na kwa sababu haliwezekani basi sio kwenu tu hata kwangu pia haliwezekani.

NNE: Mtume Mussa A.S alijua kuwa hilo haliwezekani kabisa kabisa, hayo ni kwa mujibu wa elimu aliyojaaliwa na Allah mtukufu, kutokana na hapo alilipeleka hilo kwa adabu kubwa sana kwani alisema:

رَبِّ أَرِنِي أَنظُرْ إِلَيْكَ

((Ewe Mola wangu nioneshe nikuangalie wewe...))

[Al-Aaaraf 143] 

Kama kwamba anasema: "Ikiwa elimu ya kuonekana wewe ipo basi nioneshe uoni huo."

Kwa hiyo hakuna dalili katika Aya tukufu kuwa Mtume Mussa A.S hajui elimu ya kutowezekana kuonekana kwa Allah mtukufu, na ndio maana Allah mtukufu akamjibu jawabu ya wazi kabisa

لَن تَرَانِي

((Hutaniona)),

Bila shaka Mussa A.S atabakia kuwa ni kiumbe na Allah mtukufu atabakia kuwa ni Muumba, basi lisilowezekana kwa Allah mtukufu na lisilokubaliana na utukufu wake na ukamilifu wake halifikiwi na hali ya kuwezekana, ni sawa hapa Duniani au Akhera au Peponi, kwa maana hiyo, tunadiriki kuwa maana ya Aya hiyo tukufu ni kuwa: Hutaniona ikiwa wewe ni kiumbe na mimi ni muumba.

Na si kwa sababu nyengine yoyote kama wanavodai wabatilifu kwa kuzua kwao kuwa maana yake: Hutaniona katika maisha haya ya Duaniani lakini utaniona katika maisha ya Akhera, hata wamefikia kusema kuwa: Chenye kumalizika hakioni chenye kubakia, kwa hiyo katika nyumba ya Akhera kwa sababu ni nyumba ya kubakia basi chenye kubakia (Kiumbe) kitakiona chenye kubakia (Muumba), kama kwamba wanasema kuwa Kiumbe huko Akhera kitashirikiana na Muumba katika sifa ndio kitaweza kumuona, imewapita hawa kuwa kubakia kiumbe huko akhera ni kwa kubakishwa na Muumba na sio kwa dhati yake, pia inawalazimu kuwa watu wa Motoni pia watamuona Allah mtukufu kwani nao watakua katika sifa ya kubakishwa sawa na wa Peponi katika sifa hiyo. KUTOKANA NA HAPA INATUPASA TUZINDUKE KUWA KUTOONEKANA KWA MUUMBA SI KWA SABABU YA UDHAIFU WA KIUMBE BALI NI KWA UKAMILIFU NA UTUKUFU WA MUUMBA, kwa hiyo neno la kusema kuwa Viumbe siku hiyo watakua katika hali ya ukamilifu zaidi na uwezo mkubwa zaidi wa kuona kuliko huu wa hapa Duniani basi watakua na uwezo wa kumuona Muumba, hilo ni neno batili; kwani hiyo wanayoieleza wao ni hali itakayoathiri baina ya viumbe, wala si sababu ya kuwezekana au kutowezekana kuonekana Muumba, na haya yamekuja katika Hadithi waliyoipokea Bukhari na Muslim na wengineo kuwa Mtume S.A.W. amesema:

((جَنَّتَانِ مِنْ فِضَّةٍ آنِيَتُهُمَا وَمَا فِيهِمَا ، وَجَنَّتَانِ مِنْ ذَهَبٍ آنِيَتُهُمَا وَمَا فِيهِمَا ، وَمَا بَيْنَ الْقَوْمِ وَبَيْنَ أَنْ يَنْظُرُوا إِلَى رَبِّهِمْ إِلَّا رِدَاءُ الْكِبْرِ عَلَى وَجْهِهِ فِي جَنَّةِ عَدْنٍ))

((Pepo mbili ni vya fedha vyombo vyake na vilivyomo ndani yake, na Pepo mbili ni vya dhahabu vyombo vyake na vilivyomo ndani yake, na hakuna baina ya watu wa Peponi na kumwangalia Mola wao isipokua rubega ya kiburi juu ya dhati yake Allah mtukufu katika Pepo ya Adeni)) [Bukhari 7444, Muslim 180]

Twabaan rubega ya kiburi makusudio yake ni kusifika Allah kwa utukufu na kujitosheleza. Amesema Ibnu Hajjar Al-Asaqalani katika Fat-Hu Al-Baari alipokua akiieleza hadithi hii: ((Na maana ya hadithi ya mlango huu ni kuwa: Kwa mujibu wa utukufu wa Allah na kujitosheleza kwake asionekane na yoyote..)).

TANO: Imekuja katika Aya tukufu:

وَلَٰكِنِ انظُرْ إِلَى الْجَبَلِ فَإِنِ اسْتَقَرَّ مَكَانَهُ فَسَوْفَ تَرَانِي ۚ فَلَمَّا تَجَلَّىٰ رَبُّهُ لِلْجَبَلِ جَعَلَهُ دَكًّا وَخَرَّ مُوسَىٰ صَعِقًا

((Lakini angalia mlima wa jabali ikiwa utatulizana sehemu yake basi utaniona. Basi alipojitokeza Mola wake kwa mlima aliujaalia kupasuka pasuka na akaporomoka Mussa (alizimia) kwa mshituko mkubwa))

[Al-Aaraf 143]

Katika sehemu hii ya Aya kuna dalili ya wazi kuwa chochote chenye kuhitajia sehemu haiwezekani kumuona Allah mtukufu, na hayo ni kwa sababu zifuatazo:

1. Kumefungwa kuonekana Allah na sharti ya kutuluzina milima wa jabali, na mlima wa jabali haukutulizana, basi kama ilivyokua mlima wa jabali haikutulizana vile vile kuonekana Allah mtukufu hakuwezekani, na isisemwe kuwa ulikuwepo uwezekano wa kutulizana mlima wa jabali kwa hiyo upo uwezekano wa kuonekana Allah mtukufu; kwani uwezekano wa kutokea kinyume na alivojaalia Muumba ni muhali.
2. Mlima wa Jabali ni kiumbe chenye kuhimili zaidi misukosuko na vishindo kwa sababu ya ugumu wake, na kwa hili binadamu si chochote mbele ya mlima wa Jabali, lakini juu ya yote hayo halikuhimili kutokezewa na Muumba, na katika hili kuna dalili ya kuwajibu wenye kusema kuwa kutowezekana kuonekana Muumba ni kwa sababu ya udhaifu wa binadamu katika uhai huu.
3. Allah katueleza ((Ikiwa mlima wa Jabali utatulia katika SEHEMU YAKE)), na katika hilo kuna ishara ya wazi kuwa sababu ya kupasukapasuka ule mlima ni kule kukosa kwake lazimisho la uwepo wake ambalo ni sehemu, na hayo ni kwa kufikiwa na lenye lazimisho la kukosekana sehemu katika uwepo wake, nalo ni kujitokeza kwa Muumba mtukufu asiyesifika kwa sifa ya kuhitajia sehemu, na katika hili kuna bayana ya wazi kuwa chenye kuhitajia sehemu hakiwezi kumuona Allah mtukufu aliyetakasika na sifa ya kuzingirwa na sehemu, na katika hili kunahakikisha usahihi wa neno la wenye kusema kuwa haiwezekani kuonekana Allah mtukufu kwa sababu kutalazimisha kupambanuka Allah na vyengine kirangi na kuzingirwa na sehemu na kufanana na vyenye kuonekana, na kuwa na umbo fulani la kimwili, na hayo yote ni muhali kusifika nayo Muumba wa kila kitu.

SITA: Mtume Mussa A.S alitubia baada ya kuzinduka kwake, na hilo ni fundisho kwa Watu wake waliolitaka hilo na kufikiwa na mshituko mkubwa wa kuzimia na kufa, basi ulimi wa hali yake uliwambia: Mimi ni Mtume wetu ninatubia katika hili nami sikukusudia basi na nyinyi tubieni kama nilivyotubia, na katika neno la Mtume Mussa A.S: ((Ewe Mola wetu lau ungalitaka ungeliwaangamiza hapo kabla na mimi..)) kuna ishara ya wazi kuwa hilo liliwapata Mtume Mussa A.S na wale Sabiini aliowateua Mtume Mussa A.S kuwa pamoja naye katika Mikati na kuongea na Mola wake. Na katika hili kuna fundisho la kuwa hawa wenye kuitakidi Itikadi ya kuonekana Allah mtukufu watubie kwa Mola wao na waondokane na Itikadi hiyo batili.

Wabillahi Taufiqi.

Published By Sh. Hafidh Al-Sawafi

Ndugu salum mohammed aliyeko Malaysia anauliza.

SUALI:

Assalam Alaykum...

Hivi katika dhehebu la kiibaadhi wana itikadi kwamba baadhi ya masahaba wataingia motoni kutokana na khitilafu zilotokea baadhi yao na kupelekea kufanya makosa baadhi yao na vipi kuhusu ile sura (4) aya (97) ambayo imewatakasa masahaba na ile hadithi ya mtume ambayo imesema "wasisemwe mabaya masahaba wake"....nimeuliza hilo swali baada ya kusoma tofauti ya ibaadhi na sunni katika web ya kissuni.

Baada kuona hayo nilitaka kujua ukweli juu ya hili.

Na pia ikiwezekana nilikua naomba kama kutakua na kitabu ambacho kimezungumzia chimbuko la dini basi nilikua nahitajia kukisoma ili kuelewa.
Asante.

JAWABU:

Itikadi ya Ibadhi ni kuwa kila aliyekufa hali ya kuwa yumo katika dhambi kubwa yoyote naye anaijua wala hakujiwahi kwa kutubia basi huyo amekufa akiwa ni fasiki naye ni mja wa Motoni humo atasalia milele, na katika hilo ni sawa ikiwa ni sahaba au si sahaba; kwani hakuna upendeleo katika hukumu za Allah.

Jee! Tunaamini kuwa baadhi ya Masahaba wamo katika hukumu hiyo ya kubakia Motoni milele?

Jawabu ni kuwa sisi hatuamini hilo, lakini vile vile hatuamini kuwa Masahaba wote ni Peponi, kutokana na hapo utafahamu kuwa itikadi yetu ni kuwepo uwezekano wa yoyote katika wao kuwa ni mja wa motoni iwapo amekufa hali ya kuwa ni fasiki, uwezekano huo haujaondoshwa kwao.

Jee! Ni nani?

Jawabu: Hilo la kuainisha ni nani halina nafasi katika Itikadi yetu.

Huenda mtu akasema: Tumekutia kuwa baadhi ya Masahaba wamewekwa katika hukumu ya Baraa-a na baadhi ya Wanavyuoni wa Kiibadhi.

Jee! hilo halimaanishi kuitakidi kwao kuwa hao ni waja wa motoni?

Jawabu:

Kwanza: Hao Wanavyuoni waliochukua msimamo huo wa Baraa-a kwa baadhi ya Masahaba wamechukua msimamo sahihi kwa mujibu wa misingi ya Baraa-a na Walaaya katika Ibadhi, kwani mafundisho yanalazimisha kumfanyia Baraa-a yoyote utakaethibiti ufasiki wake kwa Muumini, kwa hiyo waliyoyasema yanazingatiwa kuwa ni misimamo yao binafsi kwa kuzingatia yale waliyoyajua na kuthibiti kwao ya ufasiki wa hao walio waweka katika hukumu ya Baraa-a, na hilo linahakikisha mfumo wa uadilifu katika Ibadhi, wala halilazimiki hilo kwa ambaye haijasimama kwake hoja ya ufasiki wa yoyote katika hao, wala kwa yule anayeona kuwepo utata katika kuthibiti hukumu ya ufasiki kwao, kwani kuchukua msimamo wa Baraa-a au Walaaya kunarejea kwa mujibu wa muhusika mwenyewe.

Pili: Hukumu yao ya Baraa-a ni hukumu ya kidhahiri, na kwa mujibu wa Mafundisho ya Ibadhi katika mlango wa Baraa-a hakatiwi ushauri wa adhabu ya moto yoyote aliyemo katika Baraa-a ya kidhahiri.

Kwa nini?

Kwa sababu:

1. Uhakika unaweza kuwa kinyume na ilivyodhihiri kwa Muumini.
2. na kwa kukosekana andiko ya wahayi la kuainisha muhusika kwa jina lake.

La pili katika hayo mawili liko dhahiri, ama la mwanzo ni kwa kuzingatia uwezekano wa kutubia mja fasiki kabla ya kifo chake na kufichika toba yake kwa Muumini ambaye umedhihirika ufasiki wa yule aliyemueka katika hukumu ya Baraa-a ambaye ametubia , kwa hiyo hukumu ya Baraa-a ni ya Kidhahiri ipo katika uwezekano wa uhakika, kutokana na hapo haikatwi ushauri wa kuangamia katika moto kwa yoyote aliyemo katika hukumu ya Baraa-atu Dhaahiri isipokua kama kukata uashauri kutafungwa kwa sharti ya kutotubia.

Yaani fulani yuko katika Baraa-atu Dhaahiri naye ameshakufa, jee ni mja wa motoni au laa?

Jawabu: Ikiwa amekufa akiwa ni fasiki wala hakujiwahi kwa toba atakua ni mja wa Motoni, ama ikiwa alitubia bila ya kujua toba yake basi ni mja wa Peponi.

Na haifichiki kuwa kulijua hilo la kutotubia au kutubia ni Ghaibu baina ya mja na Mola wake basi ni haramu kuliitakidi bila ya ufunuo wa Wahayi mahususi, nao haupo.

Ama kuhusiana na Aya ya 97 ya Sura ya 4, nafikiri muulizaji amekosea, naye alikua anakusudia Aya ya 100 ya Sura ya 9, kwani Aya aliyoashiria hatujaona ndani yake tegemezi la kusudio lake, na sisi tumezoea kusikia upinzani ukitolea hoja kwa Aya tuliyoashiria nayo inasema: 

وَالسَّابِقُونَ الأَوَّلُونَ مِنَ الْمُهَاجِرِينَ وَالأَنصَارِ وَالَّذِينَ اتَّبَعُوهُم بِإِحْسَانٍ رَّضِيَ اللّهُ عَنْهُمْ وَرَضُواْ عَنْهُ وَأَعَدَّ لَهُمْ جَنَّاتٍ تَجْرِي تَحْتَهَا الأَنْهَارُ خَالِدِينَ فِيهَا أَبَدًا ذَلِكَ الْفَوْزُ الْعَظِيمُ

((Na Waliotangulia wa kwanza katika Muhajirina na Ansaari na ambao wamewafuata kwa wema amewaridhia Allah na wameridhika naye, na amewaandalia Pepo zinazopita chini yake mito wabakie humo milele, huko ndiko kufaulu kukubwa))

[Taubah 9/100].

Jawabu: Kwa hakika kusifiwa kwa Masahaba ni kwa sababu ya kushika kwao dini vizuri (Uchamungu wao), basi sababu ikivunjika na sifa ya kufaulu kwao pia inavunjika, kutokana na hapo, wako waliothibitishiwa Uislamu kisha wakathibitishiwa Ukafiri pale walipobadilika, kama alivyosema Allah mtukufu katika sura hiyo hiyo:

يَحْلِفُونَ بِاللّهِ مَا قَالُواْ وَلَقَدْ قَالُواْ كَلِمَةَ الْكُفْرِ وَكَفَرُواْ بَعْدَ إِسْلاَمِهِمْ وَهَمُّواْ بِمَا لَمْ يَنَالُواْ وَمَا نَقَمُواْ إِلاَّ أَنْ أَغْنَاهُمُ اللّهُ وَرَسُولُهُ مِن فَضْلِهِ فَإِن يَتُوبُواْ يَكُ خَيْرًا لَّهُمْ وَإِن يَتَوَلَّوْا يُعَذِّبْهُمُ اللّهُ عَذَابًا أَلِيمًا فِي الدُّنْيَا وَالآخِرَةِ وَمَا لَهُمْ فِي الأَرْضِ مِن وَلِيٍّ وَلاَ نَصِيرٍ

((Wanaapa kwa Allah kuwa hawajasema, kwa hakika wamesema neno la ukafiri, NA WAMEKUFURU BAADA YA UISLAMU WAO na wamekusudia ambalo hawajalipata, na hawakuchukia isipokuwa kwa kutajirishwa kwao na Allah na Mtume wake kutokana na fadhila zake, basi IKIWA WATATUBIA ITAKUA NI KHERI KWAO, na kama wanakengeuka atawaadhibu Allah adhabu iumizayo sana katika Dunia na Akhera, na hawana wao katika Ardhi kipenzi yoyote wala wa kuwanusuru yoyote))

[Taubah 9/74]

Basi ni wazi kuwa kuridhiwa kwao na Allah na kuridhika kwao na Allah kumefungika na kuendelea katika uchamungu wao, ama takayetoka nje ya uchamungu na kujiingiza katika njia ya ufasiki huyo atakua amejiondosha mwenyewe katika safu za wenye kustahiki yale yaliyoahidiwa na Allah mtukufu katika Aya hiyo tukufu.

Vile vile Aya hii ya 100 ya Sura ya 9 haijawahusu Masahaba peke yao bali unakusanya wote waliowafuata wao kwa wema mpaka siku ya Kiama, kwa maana hiyo inadhihiri wazi kuwa maridhio yaliyotajwa ndani yake yamefungika na sharti ya Uchamungu ambayo ni sababu ya kuridhiwa na Allah mtukufu kama tulivyoeleza, na kutajwa kwa Masahaba katika Aya tukufu ni kubainishiwa wao kuwa ndio wa mwanzo wenye kulazimika na kuchunga Uchaungu katika nafsi zao muda wa uhai wao wote.

Kwa upande mwengine, Ibadhi tunawashangaa sana hawa wanaojinasibisha na Usunni katika tuhuma yao hii dhidi ya Ibadhi, hivi wao hawaoni yale yaliyomo katika vitabu vyao tegemewa yaliyozungumzia Masahaba?!! Hivi wao wanathubutu kuyatengua au kuyadhoofisha?!

Amepokea Bukhari hadithi no 3171 kwa njia ya Ibnu Abbaas R.A imekuja ndani yake kuwa Mtume S.A.W  amesema: ((Na hakika kuna watu katika MASAHABA WANGU watachukuliwa upande wa kushoto, basi nitasema: "MASAHABA WANGU MASAHABA WANGU" basi itasemwa: HAKIKA WAO HAWAKUACHA KUWA WENYE KUKENGEUKA JUU YA VISIGINO VYAO (KWENDA KINYUME NA MAFUNDISHO YA UISLAMU) TOKEA ULIPOWAACHA (ULIPOKUFA)."

Na amepokea Muslim katika sahihi yake Hadhithi no 2297, imekuja ndani yake kuwa Mtume S.A.W amesema kuwaambia Masahaba wake: ((Mimi ninawasubiria katika Hodhi, na kwa hakika nitatetea watu kisha nitashindwa kwao, basi nitasema: EWE MOLA WANGU, MASAHABA WANGU, MASAHABA WANGU. Basi itasemwa: HAKIKA WEWE HUJUI WALIYOYAZUSHA BAADA YAKO.))

Na sisi sote (Ibadhi na Sunni) tunakubaliana kuwa Masahaba -kwa kuzingatia mmoja mmoja katika wao- hawajahifadhika kwa makosa, kwa maana uwezekano wa kufanya makosa upo kwa kila mmoja kati yao, na kufa katika makosa pia kunawezekana kwa kila mmoja kati yao, sasa wanapinga nini?

Na sisi hatuna haja ya kurefusha katika kueleza yaliyomo katika vyanzo vyao tegemewa kuhusiana na Masahaba na ambayo ndani yake kuna malazimisho ya kulazimika nayo ikiwa wao kweli ni waadilifu na wenye kuikusudia haki, na haya machache yanatosha kwa mweye kuutaka ukweli na kuikusudia haki, na Allah ndiye mweye kuwafikisha.

Ama kuhusu Hadithi iliyokuja kukataza kusemwa vibaya Masahaba, sisi tunaiheshimu na tunaifanyia kazi, na hatutaki aslan kuzungumza yaliyojiri baina yao, wala si katika masuala ya msingi katika Ibadhi, wala hutuyakutii katika vitabu vyetu vilivohusishwa kwa elimu ya Itikadi, lakini wanapokuja watu kutushutumu kibatili ni juu yetu kuwajibu kwa mujibu wa misingi ya kielimu na uadilifu wa Kiislamu; kwani hiyo ndiyo njia ya dini yetu, na uhakika tunausema kuwa hakuna lolote ambalo wao watalisema dhidi ya Ibadhi isipokua lina dalili sahihi za kulithbitisha ndani ya vyanzo vyao tegemewa na ziada, sasa kuleta shutuma maana yake ni kusababisha kuyatangaza yaliyokua haki yake kunyamaziwa; kwani -si sisi wala wao- sote hatuwezi kurudi katika Karne ya mwanzo, basi vipi tulazimishwe kuyaogelea yaliyotokezea kwao?, wao wana yao na sisi tuna yetu, na upeo wetu ni kueleza yale yaliyomo katika vitabu ambavyo vimebeba ya sahihi na yasiyo sahihi.

Wabillahi Taufiqi.

Published By Sh. Hafidh Al-Sawafi

SUALI:

Maibadhi wanasema nini kuhusu bishara ya Pepo kwa Masahaba kumi ambao tunasikia kuwa imethibiti kuwa walibashiriwa Pepo na Mtume S.A.W?

JAWABU:

Hadithi yenye kubeba bishara ya Pepo kwa watu kumi sio hoja kwa Maibadhi wala haipo katika mambo yanayolazimika kuyaitaikidi, na hayo ni kwa sababu ya utata wa maelezo ya Hadithi yenye kubeba bishara husika; kwani katika baadhi ya maelezo yake ni kuwa Mtume S.A.W ni mmoja katika hao kumi na waliobakia tisa ni Masahaba, na baadhi yake Mtume S.A.W hayumo ndani yake, na baadhi yake ametajwa Saad bin Abi Waqaas R.A kuwa ni mmoja katika hao kumi, na baadhi ya riwaya zinasema kuwa Abdullahi bin Sallaam R.A ni mmoja wa katika kumi waliobashiriwa Pepo, pia hadithi hiyo ya Bishara haikupokewa katika Sahihi Bukhari wala Sahihi Muslim.

Na katika mambo ya ajabu ni kukutia Riwaya inayosema kuwa Abdurahman bin Auf R.A alikwenda kwa Umu Salamah Mke wa Mtume R.A na kumwambia: Ewe Mama wa Waumini hakika mimi naogopa nikawa nimeangamia, hakika mimi ni mwenye mali zaidi baina ya Maquraish, nimeuza Ardhi yangu kwa Dinari elfu arubaini." Hapo Umu Salamah R.A akamuambia: Toa (katika njia za kheri) ewe kitoto changu, kwa hakika mimi nimemsikia Mtume wa Allah S.A.W anasema: ((Hakika katika Masahaba wangu yuko ambaye hataniona baada ya kufa kwangu milele" Basi Abdurahman bin Auf R.A akatoka akiwa amefazaika mpaka akaingia kwa Omar na kumwambia: Sikiliza anayoyasema Mama yako. Hapo Omar akasimama na kumwendea Umu Salamah R.A kisha akamuuliza kisha akamwambia: Nakuomba kwa ajili ya Allah, Jee mimi ni miongoni mwao (hao ambao hawatamuona Mtume S.A.W tena)?! Hapo Umu Salamah akasema: Hapana, na sitomwambia baada yako yoyote. (yaani hilo la kuwa hayumo miongoni mwao). [Musnad Ahmad 26694, 26659].

Sasa sijui Abdurahman bin Auf na Omar bin Al-Khattaabi na Umu Salamah walikua hawajui hiyo bishara ya hao kumi, hali ya kuwa Abdurahman bin Auf na Omar ni miongoni mwa hao kumi waliotajwa katika riwaya ya kumi waliobashiriwa Pepo, au wao wenyewe walikuwa hawajijui au walikua na shaka?!!!

Na katika ya ajabu vile vile ni kukutia Riwaya inayosema: ((Amesema Abu Bakar Siddiqi R.A: "Wallahi lau itasemwa haingii Peponi isipokua mtu mmoja tu basi ningalitaraji nikawa mimi ndiye huyo mkusudiwa, na lau itasemwa haingii Motoni isipokua mtu mmoja tu basi ningaliogopa kuwa ndiye huyo mkusudiwa))  [Ibaana Al-Kubraa 1043].

Bila shaka utata uliomo katika Hadithi hiyo unatosheleza kuipa moja kati ya hukumu mbili:

1. Ima ni Hadithi ya kupanga kwa malengo ya Kisiasa katika utawala wa Bani Umayyah, na hili liko wazi.
2. Au Hadithi hiyo ifungwe kwa sharti ya hali yao wakati wa bishara hiyo kuwa ni hali ya Uchamungu wenye kuhakikisha mafanikio ya kupata mafanikio ya Pepo ikiwa watadumu nayo; kwa hiyo yoyote kati yao ikiwa atatoka nje ya Uchamungu atakua amejivunjia bishara hiyo ila akitubia.

Imakujua Riwaya kuwa Sahaba Al-Baraa bin Aazib R.A aliambiwa: ((Hongera kwako, ulikua pamoja na Nabii S.A.W, na umempa Baia chini ya Mti. Basi akasema: Ewe Mtoto wa ndugu yangu, hakika wewe hujui tuliyoyafanya baada ya hapo)) [Bukhari 3877]. Na Baia ya chini ya Mti inajulikana kwa umaarufu kuwa ni Baiatu Ridhwaan.

Kwa hiyo ni wazi kuwa Masahaba wenyewe R.A walifahamu kuwa bishara ya Pepo ni kwa wale ambao watalazimika na Uchamungu mpaka mwisho wa Maisha yao tu, na kuwa hakuna Bishara kwao ya moja kwa moja isiyofungwa na hilo.

Wabillahi taufiiq.

Wallahu aalamu wa ahkam.

Published By Sh. Hafidh Al-Sawafi

Asalaam Aleikum.
Swali langu
Ikiwa Muislamu anaswali swala tano akaja akazini, vipi swala zake anazo endelea kuswali zinapokelewa?!!

JAWABU.

Ibada zina shuruti zake ili mja aweze kunufaika nazo kwa kupata Maridhio ya Allah mtukufu, na miongoni mwa shuruti hizo nia Sharti la kukubalika Ibada, nayo ni moja tu ya UCHAMUNGU, amesema Allah mtukufu ((Hakika anawakubalia Allah Wachamungu)) pia amesema: ((Hiyo ndiyo Pepo tunamrithisha katika waja wetu aliye mchamungu)).
Kwa hiyo Muislamu ikiwa amefanya dhambi kubwa ikiwa ni Uzinifu au yoyote ile, ibada zake anazofanya ni sahihi lakini kukubalika kwake ibada hizo kunaambatana na kutubia kwake kutokana na ile dhambi aliyomo ndani yake, iwapo atatubia Allah atamkubalia na kama hakutubia majuto yatamvaa siku ya kiama kwa kuziona Ibada zake zimekataliwa kwa sababu ya ukaidi wake wa kutubia uliomvisha sifa ya Ufasiki na Kiburi; kwani Allah ameshahukumu  ((Hata mukiwaridhia hao hakika Allah haridhii watu Mafasiki)).
Basi tuhifadhi Ibada zetu kwa kujiepusha na maasi, na kwa kutubia pindi tukiteleza.
Wabillahi Taufiqi.
Wallahi aalamu wa ahkamu.

Published By Sh. Hafidh Al-Sawafi

SUALI:

Sisi Ibadhi tunaamini kuwa Quraani ni kiumbe, ni neno la haki kidalili na kimantiki pia, lakini nimeulizwa swali.

Jee! Quraani ni elimu ya Allah? Bila shaka ni elimu ya Allah.

Sasa vipi elimu ya Allah iwe kiumbe, hivi hamuoni kuwa munaitakidi kuumbwa kwa siifa za Allah kwa kuitakidi kwenu kuumbwa Quraani ambayo ni elimu ya Allah?

JAWABU:

Bila shaka itikadi ya kuwa Quraani ni kiumbe ni haki kwa mujibu wa Quraani na Sunna na Mantiki ya kiakili pia, na sisi -mpaka hivi sasa- hatujaona dalili ya wenye kusema kuwa Quraani sio kiumbe.

Ama kuhusu suala la kuwa Quraani ni elimu ya Allah mtukufu, tunasema: Ndio Quraani ni elimu ya Allah mtukufu kama ilivyokua elimu zote ni zake Allah mtukufu na viumbe vyote ni vyake Allah mtukufu.

Ama kuhusu kusifika Allah mtukufu kwa elimu, ifahamike kwanza kuwa -sisi Ibadhi- itikadi yetu ni kuwa sifa za Allah sio vitu vyengine visivokua Allah mtukufu, bali ni kuelezea ukamilifu wake wa kidhati kwa mujibu wa maudhui husika, kwa hiyo Quraani ni elimu ya Allah kwa kuipatisha elimu hiyo na kuijaalia kwa waja; na ili lifahamike hili vizuri, tunasema kuwa Sunna ni elimu ya Allah mtukufu, sasa ndio tuseme kuwa Sunna ya Mtume S.A.W. sio kiumbe kwa sababu ni elimu ya Allah mtukufu?!! Bali hata hizi elimu za kidunia pia ni za Allah mtukufu, kama vile utibabu na ufahasa, sasa ndio tuseme kuwa utibabu na ufasaha si kiumbe kwa sababu ni elimu ya Allah mtukufu?!!

Kwa hiyo elimu ya Quraani ni Elimu ya Allah kwa kuzingatia umiliki wake na uazilishi wake na muhusika wake, na sio kuwa ni sifa miongoni mwa sifa zake.

Wabillahi taufiqi.

Wallahu aalamu wa ahkamu. 

Published By Sh. Hafidh Al-Sawafi

SUALI:

Asalamu alaykum wa rahmatullahi wa barakatuh.

Tunaambiwa kuwa waovu ndio ambao watanyimwa kumuona Allah mtukufu siku ya Kiama kwani Allah mtukufu amesema: ((Hapana, hakika wao kutokana na Mola wao siku hizo ni wenye kuzuwiwa)) yaani watazuwiwa kumuona Allah mtukufu.

Ni ipi jawabu katika hili?

JAWABU:

Kwa hakika kila mwenye kusoma Aya hii tukufu hakutii ndani yake uthibitisho wa kuonekana Allah mtukufu, kubwa lililomo ndani yake ni kuhakikisha makasiriko ya Allah mtukufu kwa waja hao waovu wa motoni kwa kuzuia rehma zake kuwafikia wao, na sio kumuona Allah mtukufu kama wanavodai wabatalifu wenye kuitakidi sifa ya uwezekano wa kuonekana Allah mtukufu, kwa hakika Allah mtukufu ametakasika na uwezekano wa kuonekana kama alivotakasika na uwezekano wa kufanana na chengine.

Ama kuhusu neno lao hakika sisi tunawashangaa sana kutolea kwao hoja kwa kutumia Aya hiyo tukufu; kwa sababu tukiirejea Aya hiyo tukufu tunakutia kuwa Allah mtukufu anasema ((Hapana, hakika wao kwa Mola wao ni wenye kuzuwiwa)) Sasa tujiulize: Ni nani kazuwiwa yaani aliyeekewa kizuizi? Bila shaka ni wao hao waja waovu, sasa ni nani asiyemuona mwengine? Bila shaka -kwa mujibu wa Aya tukufu- ni Allah mtukufu ndie ambae hatawaona hao, yaani wao watamuona -kwa mujibu wa itikadi ya uwezekano wa kuonekana- lakini yeye ndiye ambae hatawaona wao, na hilo halisemi muislamu yoyote achilia mbali kufaa kuliitakidi.

Wabillahi taufiqi.

Wallahu aalamu wa ahakamu.

Published By Sh. Hafidh Al-Sawafi

Asalamu alaykum wa rahmatullahi wa barakatuh.

Amesema Allah mtukufu:

(إِنَّ اللَّهَ لَا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَٰلِكَ لِمَنْ يَشَاءُ ۚ وَمَنْ يُشْرِكْ بِاللَّهِ فَقَدِ افْتَرَىٰ إِثْمًا عَظِيمًا(

((Hakika Allah hasamehe kushirikishwa yeye na anasamehe yaliyo chini ya hapo kwa anayemtaka, na mwenye kumshirikisha Allah kwa hakika amezua dhambi kubwa sana)).

Ni ipi hukumu ya madhambi yasiyokua ya kishirikina?

JAWABU:

Tufahamu kuwa Allah mtukufu hasamaehe dhambi ya ushirikina isipokua kwa kuingia katika Uislamu na huko ndiko kutubia kwake, basi kutosamehewa dhambi ya ushirikina katika Aya tukufu kunafungwa kwa sharti ya kutotubia.

Ama sehemu ya pili ya Aya tukufu inatuambia kuwa Allah mtukufu anasamehe madhambi yasiyokua ya kishirikina kwa anayemtaka, kutokana na hapo tunajua kuwa waliojitosa katika madhambi makubwa wako aina mbili:

1. Aliotaka Allah mtukufu kuwasamehe.
2. Asiotaka Allah mtukufu kuwasamehe.

Kundi la mwanzo alilotaka Allah mtukufu kulisamehe amelieleza Allah mtukufu kwa neno lake:

(إِنَّمَا التَّوْبَةُ عَلَى اللَّهِ لِلَّذِينَ يَعْمَلُونَ السُّوءَ بِجَهَالَةٍ ثُمَّ يَتُوبُونَ مِنْ قَرِيبٍ فَأُولَٰئِكَ يَتُوبُ اللَّهُ عَلَيْهِمْ ۗ وَكَانَ اللَّهُ عَلِيمًا حَكِيمًا)

((Hakika yalivyo ni kuwa usamehevu wa Allah ni kwa wale wanaofanya kosa kwa ujinga kisha wanatubia karibu iwezekanavyo basi hao Allah anawasamehe na Allah ni mjuzi mwingi wa hakima))

Pia amesema:

)وَإِنِّي لَغَفَّارٌ لِمَنْ تَابَ وَآمَنَ وَعَمِلَ صَالِحًا ثُمَّ اهْتَدَىٰ(

((Na kwaa hakika mimi ni mwingi wa kusamehe kwa mwenye kutubia na kuamini na kutenda wema kisha akaongoka))

Na hayo yote yanamaanisha kuwa kutubia toba ya kweli ni sharti ya msingi katika kupata usamehevu wake Allah mtukufu.

Ama kundi la pili ambalo hakutaka Allah mtukufu kulisamehe amelieleza Allah mtukufu katika neno lake:

﴿وَلَيسَتِ التَّوبَةُ لِلَّذينَ يَعمَلونَ السَّيِّئَاتِ حَتّى إِذا حَضَرَ أَحَدَهُمُ المَوتُ قالَ إِنّي تُبتُ الآنَ وَلَا الَّذينَ يَموتونَ وَهُم كُفّارٌ أُولئِكَ أَعتَدنا لَهُم عَذابًا أَليمًا﴾

((Na hakuna usamehevu kwa wale wanaofanya maovu mpaka anapofikiwa mmoja wao na mauti husema mimi natubia hivi sasa wala wale ambao anakufa hali ya kuwa ni Makafiri. Hao tumewaandalia adhabu yenye kuumiza sana))

Basi hao ametaka Allah kuwaadhibu hawafaliwi na toba wakati wa kifo wala kukubali makosa yao baada ya kifo, amesema Allah mtukufu:

))إِنَّهُ مَنْ يَأْتِ رَبَّهُ مُجْرِمًا فَإِنَّ لَهُ جَهَنَّمَ لَا يَمُوتُ فِيهَا وَلَا يَحْيَىٰ * وَمَنْ يَأْتِهِ مُؤْمِنًا قَدْ عَمِلَ الصَّالِحَاتِ فَأُولَٰئِكَ لَهُمُ الدَّرَجَاتُ الْعُلَىٰ((

((Hakika hasa ni kuwa atakayemjia Mola wake naye ni muovu kwa hakika atapata Jahannamu hatakufa humo wala hatahuika * na atakayemjia akiwa ni muumini amefanya mema basi hao watapata daraja kuu))

Basi fahamu kuwa mwenye kusema kuwa waovu waliovaa ukaidi wa kutubia kwa Mola wao eti watasamehewa au kuadhibiwa kwa muda huyo kwa hakika anasema kinyume na uongofu wa Allah mtukufu, tena amekumbwa na maradhi mabaya sana.

Basi tahadhari na Itikadi inayosema ((Tutasamehewa tu sisi)) na Itikadi inayosema ((Hautatugusa Moto isipokua siku chache)); kwani Itikadi hizo ni maradhi mabaya yaliyowapata waliopita kabla yetu katika Wana wa Israili ambao ni watoto wa Mitume, Allah mtukufu ameyataja maradhi hayo mabaya kwenye kitabu chake ili kuuhadharisha uma huu; kwani gonjwa ni moja hata wagonjwa watakua ni tafauti, Allah atukinge nao. (Amin).

Wabillahi taufiqi.

Published By Sh. Hafidh Al-Sawafi

Asalamu alaykum wa Rahmatullahi wa Barakatuh.

Nimesikia kuhusu Ibadhi, na kuwa ni moja ya Madhehebu ya Kiislamu, nimetaka kujua nini Ibadhi wanaitakidi kuhusu masuala yafuatayo:

1. Kumuona Allah mtukufu siku ya Kiama.
2. Quraani jee ni Maneno ya Allah au ni kiumbe?
3. Hukumu ya mteda maasi makubwa lakini ni mtu wa Tauhidi nimesikia anakua kafiri kwa mujibu wa Itikadi wanayoamini Ibadhi.
4. Mtenda maasi lakini ni mtu wa Tawhidi jee atapata Shufaa ya Mtume S.A.W?
5. Muono wenu kuhusu Khalifa wa nne Ali bin Abi Twalib Allah amridhie.

Asanteni.

JAWABU

Waalaykum Salam wa Rahamtullahi wa Barakatuh.

Naam Ibadhi ni moja ya Madhehebu za Kiislamu, nayo katika mafundisho yake inategemea Quraani tukufu na Sunna ya Mtume Muhammad S.A.W na Makubaliano ya Umma, na njia ya Ibadhi ni uadilifu usiokua na upendeleo, na usawa usiokua na ubaguzi, na dira yetu ni HAKI KWA DALILI.

Jina la Ibadhi ni anuani ya kudhibiti mafundisho katika yaliyoingiwa na tafauti baina ya Waislamu; ili kila Madhehebu ihusike na majukumu yake, kutokana na hapo Wanavyuoni wetu wa mwanzo hawakujiita jina la Ibadhi, pia huwezi kukutia katika mafundisho ya Madhehebu hii kauli za Ibu Ibadhi R.A si katika mlango wa Itikadi wala Kifiqhi.

Ama kuhusu masuala husika tunasema:

1. KUTOONEKANA ALLAH MTUKUFU:

Itikadi yetu ni kuwa Allah mtukufu ametakasika na uwezekano wa kuonekana Duniani na Akhera na Peponi, basi kama ilivokua Allah mtukufu hasifiki kwa sifa ya kufanana na kitu chochote, wala kwa sifa ya kuwa na mtoto, vile vile Allah mtukufu hasifiki kwa sifa ya kuonekana wala kwa uwezekano wa kuonekana.

Allah mtukufu alikuwepo wala hapana sehemu, wala wakati, wala nuru, wala kiza, wala mbingu, wala ardhi, wala arshi, wala chochote kisichokua yeye, hayo ni kwa sababu Allah ndiye Muumba wa kila kitu, basi yeye peke yake ndiye asiyekua kiumbe wa sababu ndiye Muumba, na vilivobakia vyote ni viumbe vyake, na hakuna shaka yoyote kuwa kuonekana ni sifa za vyenye umbo na mwili, na Allah mtukufu ametakasika na kuwa na umbo na mwili, yeye amejisifu kuwa:

((Vyenye kuona havimdiriki))

[Al-An`aam 103] 

Bila shaka macho yakiona yatakua yamediriki yalichokiona, basi Allah hadirikiwi na vyenye kuona ikiwa ni jicho au kamera au moyo au chochote kile.

Vile vile Allah mtukufu alimuambia Mtume Mussa A.S :

((Hutaniona))

[Al-A`araf 143] 

Basi sisi tukasema na kuitakidi kama alivosema Allah mtukufu kuwa Mtume Mussa A.S hatamuona, wala hatuwezi kusema: "Hapana ewe Allah bali Mtume Mussa A.S atakuona". Huko kutakua ni kumkosea heshima Allah mtukufu. 

Ama kuhusu Aya inayosema:

((Nyuso siku hiyo zitan`gara kwa Mola wake ni zinaan`galia))

[Al-Qiyaamah 22-23]

Tunasema huo ni muangalio wa kusubiria thawabu za Allah na fadhila zake kwao, na sio muangalio wa kumuona yeye.

AMA KUHUSU THAWABU KUBWA YAO KATIKA PEPO:

Tunasema Thawabu hiyo ni Maridhio yake Allah mtukufu kama alivobainisha mwenyewe katika neno lake:

((Sema: Jee! Nikuambieni yaliyo bora kuliko hayo? Watapata wale wamchao kwa Mola wao Pepo zinazopita chini yake mito watabakia humo, na wake waliotoharishwa, na MARIDHIO KUTOKA KWA ALLAH....))

[Aala Imraan 15] 

Wala hajasema na kumuona Allah kama wanavodai wenye kudai madaihewa ya kuwa kumuona Allah katika Pepo ndio thawabu kubwa, wamejidanganya hao na kudanganya wengine, hivi ni nani mkweli zaidi kuliko Allah mtukufu?!! Yeye anatumbia kuwa Maridhio yake ndio thawabu kubwa yao katika Pepo:

((Allah amewaahidi Waumini Wanaume na Waumini Wanawake Pepo zinazopita chini yake mito, wabakie humo, na makazi bora katika Pepo za Aden, NA MARIDHIO KUTOKA KWA ALLAH NDIO KUBWA ZAIDI. Hayo ndiyo mafanikio makuu))

[Ataubah 72]

Imekuja katika Hadithi sahihi kuwa Mtume S.A.W amesema:

((Pepo mbili ni vya fedha vyombo vyake na vilivyomo ndani yake, na Pepo mbili ni vya dhahabu vyombo vyake na vilivyomo ndani yake, na hakuna kilichozuia baina ya watu wa peponi na kumuona Mola wao isipokua sifa ya kiburi katika dhati yake ndani ya Pepo ya Adeni))

[Bukhari 7444 Muslim 180]

Amesema Al-Haafidh Ibnu Hajar Al-Asqalani katika ufafanuzi wake wa hadithi hii: ((Na maana ya hadithi ya mlango huu ni kuwa: KWA MUJIBU WA UTUKUFU WA ALLAH NA KUJITOSHELEZA KWAKE ASIONEKANE NA YOYOTE)), basi hadithi hii inabainisha wazi wazi kuwa kilichozuia kuonekana Allah mtukufu ni utukufu wake na kujitosheleza kwake, pia Hadithi hii ni hoja ya wazi kuwa Allah hataonekana na watu wa Peponi, na kuhusu thawabu kuu anasema Mtume S.A.W:

((Hakika Allah mtukufu atawambia watu wa Peponi: Enyi watu wa Peponi. Nao watasema: Tunakuitika Mola wetu na ukuu ni wako na kheri imo mikononi mwako. Atasema: Jee!! Mumeridhia? Nao watasema: Na vipi sisi tusiridhie? Ewe Mola wetu hakika umetupa ambayo hujampa yoyote katika viumbe wako. Atasema: Hivi nikupeni bora zaidi kuliko hayo? Watasema: Ewe Mola na kitu gani kilicho bora zaidi kuliko haya? Atasema: NAWEKA KWENU MARIDHIO YANGU, BASI SITAKASIRIKA KWENU BAADA YA HAPO MILELE))

[Bukhari 6549, 7518 Muslim 2829].

2. QURAANI NI KIUMBE NA MANENO YA ALLAH

Ama kuhusu Quraani jee ni maneno ya Allah au ni kiumbe?

Tunasema hili suali limejengwa juu ya makadirio ya kukabiliana hukumu mbili ima Quraani iwe ni maneno ya Allah au iwe ni kiumbe, na kwa sababu hakuna mkabala baina ya hukumu hizo mbili, yaani kuwa Quraani ni kiumbe hakukabiliani na kuwa kwake meneno ya Allah, basi suali hilo linakua ni batili, ni sawa na kuuiza Jee! Quraani ni maneno ya Allah au ni Kitabu cha Allah? Au kuuliza: Jee! Muhammad ni Mtume wa Allah au ni kiumbe cha Allah? Kuwa Muhamaad ni Mtume wa Allah hakukabiliani na kuwa kwake kiumbe cha Allah, kama ilivokua kuwa Quraani ni maneno ya Allah hakukabiliani na kuwa kwake Kitabu cha Allah, vile vile kuwa Quraani ni maneno ya Allah hakukabiliani na kuwa kwake kiumbe cha Allah, kutokana na hapo jawabu yetu inasema: Quraani ni kiumbe nayo ni maneno ya Allah.

Na hapa inapasa tuzinduke vizuri katika suala hili, kwa sababu -sisi Ibadhi- tunaitakidi kuwa Allah mtukufu ni Msemaji (Mutakallimu) kwa hiyo sifa yake ni Usemaji (Attakallumu) kwa hiyo maneno yake ni athari ya sifa yake ya usemaji na sio sifa yake, kwani maneno si sifa bali usemaji ndio sifa, basi kama ilivokua viumbe vyote ni athari za sifa vitendo za Allah mtukufu vile vile Maneno yake Allah mtukufu ni athari ya sifa kitendo ya Allah mtukufu na sifa hiyo ni Usemaji.

Mauti ni kuiumbe, uhai ni kiumbe, riziki ni kiumbe, kwani vyote hivo ni athari za sifa vitendo za Allah mtukufu, kuhuisha katika uhai, kufisha katika mauti, kuruzuku katika riziki, vile vile kusema katika maneno. Kuhuisha, kufisha, kuruzuku, kusema, zote hizo ni sifavitendo mahususi, ama kuumba hiyo ni sifakitendo ya kijumla nayo inakusanya kila kilichopatikana kwa sifakitendo mahususi.

Vile vile kuwa Quraani ni kiumbe kumejulishwa kwa dalili nyingi kama vile kuteremshwa, kuhifadhiwa, kutokezeshwa, kujaaliwa na Allah, kubarikiwa, na kupambanuliwa.

Bila shaka kila chenye kusifika kwa sifa hizo hicho ni kiumbe tu.

Sisi tunawashangaa sana wenye kusema kuwa Quraani ni sifa ya Allah kwa sababu ni maneno ya Allah na maneno ya Allah ni sifa ya Allah.

Hivi wao wanaitakidi kuwa Allah ameteremsha sifa yake na kuibariki na kuitokezesha na kuihifadhi na kuijaalia na kuipaambanua?!!!

Quraani itakuja siku ya Kiama siku ambayo Allaha atakisemesha kila kitu, na Quraani nayo itasema: "Ewe Mola wangu mpambe"..... "Ewe Mola wangu muongezee"..... "Ewe Mola wangu mridhie"...... [Tirmidhi 2915].

Bila shaka dalili za kua Quraani ni kiumbe ziko nyingi sana, wala hazirejeshi dalili hizo na kupinga Itikadi hii isipokua mja aliyejifunga na kasumba kinafsi au aliyeingiwa na kiburi mbele ya haki.

Allah awaongoe wenye kuitakidi kuwepo kitu kisichokua Allah mtukufu na kitu hicho si kiumbe.

3. HUKUMU YA MTENDA DHAMBI KUBWA

Kuhusu hukumu ya Muislamu fasiki mtenda maasi jee! ni kafiri au si kafiri?

Kwa mujibu wa Itikadi yetu tuliyoichukua moja kwa moja katika Quraani tukufu na Sunna ya Mtume S.A.W ni kuwa kila mtenda dhambi kubwa ni kafiri na dhalimu na fasiki na fajiri, hukumu hii ni sawa ikiwa asi ni la kishirikina au si la kishirikina, kinachozingatiwa katika hukumu ni asi kuwa katika madhambi makubwa tu, yaani kila dhambi kubwa ni ukafiri na ufasiki na udhalimu na ufajiri, hii ndio itikadi yetu Ibadhi.

Kwetu sisi ukisema fasiki au dhalimu au fajiri ni sawa sawa na kusema kafiri, kutokana na hapa hailazimiki ukafiri kubatilisha tawhidi kama ilivokua hailazimishi ufasiki na udhalimu na ufajiri kubatilisha tawhidi; hayo ni kwa sababu Ibadhi hatuitakidi ulazima wa kuwa ukafiri ni ushirikina kama wanavoitakidi Masunni na walivoitakidi Makhawariji wa mwanzo. Na kwa sababu ya kuondosha utata huo Wanavyuoni wetu wakasema Ukafiri uko aina mbili kama ilivokua Madhambi makubwa yako aina mbili, basi uko Ukafiri wa Kishirikina nao unakamatana na madhambi ya kishirikina tu mwenye nao ni Mshirikina, na uko Ukafiri wa Neema unaokamatana na madhambi yasiyokua ya kishirikina mwenye nao ni Mnafiki.

Kwa hiyo kusema kwetu na kuitakidi kwetu kuwa Muislamu fasiki ni kafiri hakumtoi muislamu huyo nje ya duara la Tauhidi wala nje ya safu za Waislamu, wala hakumuhukumu kuwa yeye ni Mshirkina lifahamu hili vizuri.

Ukituuliza dalili yetu, tunasema kuwa Allah mtukufu amehukumu kwenye kitabu chake kuwa kila wenye kukengeuka utiifu wa Allah na Mtume ni kafiri amesema:

((Sema mtiini Allah na Mtume, na kama watakengeuka hakika Allaha hawapendi Makafiri))

[Aala Imaraan 32] 

Pia Allah mtukufu ameondosha sifa ya Imani kwa aliyekengeuka utiifu amsema:

((Na wanasema: Tumemuamini Allah na Mtume na tumetii. Kisha wanakengeuka kundi kati yao baada ya hayo, na hao si Waumini))

[Anuur 47].

Anatuambia Allah mtukufu neno la haki la kutafautisha baina ya Waumini wa kweli na Wanafiki:

((Alif. Laam. Miiim. Hivi watu wanafikiria wataachwa waseme tumeamini na wao hawatajaribiwa?!!! * Kwa hakika tuliwajaribu waliopita kabla yao. Kwa hakika Allah atawajua walio wakweli na atawajua waongo))

Atawajua bila shaka Allah mtukufu aliwajua kabla lakini ni kuthibiti yale aliyoyajua kwao kwa kujibu wa matendo yao wenyewe bila kutezwa nguvu, bila Wakweli hao ndio Waumini halisi na Waongo hao ni Wanafiki.

4. SHUFAA YA MTUME S.A.W.

Ama kuhusu Shufaa ya Mtume S.A.W hiyo ni haki ya Waumini peke yao nao ni Wachamungu; kwa hiyo kafiri, dhalimu, fasiki, faajiri, hana sehemu yoyote katika Shufaa ya Mtume S.A.W, Allah mtukufu anatumbia kwenye kitabu chake:

((Hawana Madhalimu rafikikipenzi yoyote wala muombezi yoyote atakae tiiwa))

[Ghaafir 18]

Na ametuambia

((Ubaya ulioje jina la Ufasiki baada ya Imani. Na asiyetubia hao ndio Madhalimu))

[Hujuraati 11]

Na ametuambia katika ulimi wa waja wake wema:

((Ewe Mola wetu hakika wewe yule utakayemtia motoni hakika huyo umemdhalilisha na hawana madhalimu wa kuwanusuru))

[Aala Imraan 192]. 

Ibadhi ni kama alivotuongoza Mola wetu, hatuna sisi mlango wa kukubalisha maasi, wala hatuwapi watu matarajiohewa ya kujidanganya, ukiwa unaitaka pepo utalazimika na thamani yake ambayo ni uchamungu wa kweli, ama kuwambia watu wewe madamu ni Muislamu basi pepo ni yako tu hata ufanye maasi namna gani, au kuwambia wewe madamu ni Muibadhi pepo ni yako tu hata ufanye maasi namna gani, sisi kwetu hilo hakuna.

Itikadi yetu Pepo ni kwa Waumini Wachamungu tu peke yao, ukiitaka kama una dhambi itakulazimu utubie, la sivo huinusi wala huipati; kwani Allah anawakubalia Wachamungu tu wala haridhii ufasiki na Mafasiki.

Na ajabu watu wanaambiwa kuwa Mtume S.A.W kasema:

((Uombezi wangu ni kwa watenda akosa makubwa katika uma wangu))

Hii si sahihi wala Mtume S.A.W hakuisema, vipi Mtume S.A.W aseme maneno hayo hali ya kuwa anawahadharisha Masahaba wake R.A asije akafika mmoja wao siku ya kiama na kitu amekidhulumu, ikiwa ni mbuzi, au ghamia, au nguo, au dhahabu, kisha atake msaada kwa Mtume S.A.W. "Ewe Mtume wa Allah niokoe" Nae atamjibu:

((Kwa hakika nilikufikishia, similiki kwao chochote leo))

[Bukhari 1402, 3073 Muslim 1831] 

Kama ni kweli ataombea waasi mafasiki madhalimu, angaliwambia musiwe na wasi wasi nitawaombea tu hasa hasa nyie ni Masahaba wangu, lakini alijua kuwa Allah amemwambia:

((Hivi yule mwenye kustahiki hukumu ya adhabu, hivi wewe unaweza kumuokoa aliyemo Motoni?!!!))

[Zumar 19].

Enyi Waislamu nyi, acheni kujidanganya na musikubali kudanganywa, jueni kuwa Pepo ni kwa Wachamungu tu, na Mtu wa Peponi hafikwi na huzuni wala khofu siku ya kiama, wala hafiki motoni, bali hata mvukuto wake hausikii achilia mbali kusema kuwa ataingia motoni kisha atolewe, musijidanganye wala musikubali kudanganywa kwa kuambiwa kuwa Waislamu mafasiki watasamehewa, na kama hawatasamehewa basi motoni siku chache tu kisha watatolewa na kuingizwa Peponi pamoja na Mtume S.A.W.

Mumepata wapi nyinyi kuwa Motoni ataingia asiyekua kafiri?!!!!

Hivi hamusomi Quraani kuwa Moto Allah amewaandalia Makafiri, naam Moto ni kwa makafiri peke yao, ni sawa wakiwa Makafiri wa Kishirkina au Makafiri wa neema, Allah atuepushe nao.

5. KUHUSU SAHABA KHALIFA WA NNE ALI BIN ABI TWALIB.

Ama kuhusu Ali bin Abi Twalib, bila shaka yeye ni mmoja wa Masahaba wa Mtume wetu S.A.W, na katika walioupigania Uislamu na kuuenzi vizuri, na katika watu wa karibu na Mtume wetu S.A.W kifamilia, kwa hakika yeye ni mtoto wa Ami wa Mtume S.A.W, pia ni Mkwe wake Mume wa Binti wa Mtume S.A.W Fatima R.A, na Waislamu walimchagua Aliy kuwa Kiongozi baada ya Othman bin Affaan, basi yeye ni miongoni mwa Makhalifa wanne waliochaguliwa kwa Shuura baada ya Mtume S.A.W hili hatuna shaka nalo, lakini juu ya yote hayo anabakia Ali bin Abi Twalibu kuwa ni mja aliyemo katika mtihani wa kulazimishwa kisheria kama wengine waliobakia, alitakiwa kuwemo katika njia ya Uchamungu hadi mwisho wa maisha yake ili kupata maridhio ya Allah mtukufu, wala hakuwa mwenye kuhifadhika na uwezekano wa kukosea, yaani yeye ni sawa na Masahaba wengine katika hilo, wala hatujaona sisi katika Quraani tukufu andiko mahususi lililomtaja Ali kwa jina lake wala kwa Kuniya yake wala kwa Laqabu yake, kutokana na hapo hukumu yake ya Ghaibu iko kwa Allah mtukufu, ama sisi kwetu ni kwa mujibu wa vile itavodhihirika kwa Muumini, ikiwa imedhihirika kwao kuwa yeye kafa akiwa ni Mchamungu mridhie hiyo ni haki yake kwako, na ikiwa imedhihirika kwao kuwa yeye kafa akiwa ni Fasiki usimridhie na hiyo itakua ni haki yake kwako, na ikiwa hali yake imeingiwa na uatata kwako tulizana bila kumridhia wala kutomridhia, na hukumu hii ni kwa kila asiyekua na andiko mahususi alilotajwa ndani yake kiuanisho kuwa ni mja wa Peponi ni mja wa Motoni. 

Wabillahi Taufiiqi.

Published By Sh. Hafidh Al-Sawafi

Asalamu alaykum Wa rahmatullahi wa barakatuh.

Tunashukuru kuwa haki inabainika kwa kujibu wa dalili za Kitabu na Sunna, tunataka kujua hasa kwa nini Allah mtukufu atakasike na kuonekana, na wenzetu wanatuambia Allah akunyimeni neema ya kumuona Allah wakati Waumini watakapokuona, ni ipi jawabu yao hawa?

Asanteni:

JAWABU:

Tunapaswa kujua kuwa Itikadi ni tunda la yakini kidalili; kwa hiyo mwenye itikadi sahihi haathiriki kwa maneno yasiyokua na dalili, na sisi Itikadi yetu ni kuwa Allah mtukufu ametakasika na uwezekano wa kuonekana Duniani na Akhera kama alivotakasika na uwezekano wa kufanana na chengine Duniani na Akhera, kwa hakika Allah mtukufu amejitakasa na kuonekana pale alipojisifu kuwa yeye:

((لاَ تُدْرِكُهُ الأَبْصَارُ))

((Hayamdiriki macho))

[Al-An-aam 103]

Na bila shaka yakimuona yatakua yamemdiriki; kwa sababu kuona kwa jicho ndio kudiriki kwake.

Ama mtu kusema Allah akunyimeni neema ya kumuona wakati Waumini watakapomuona, huko ni kujifurahisha nafsi yake huyo muombaji baada ya kufilisika kihoja na dalili, sisi -mtu huyo- ni kumuombea uongofu tu; kwa sababu hajamtukuza Allah mtukufu haki ya kumtukuza kiasi ya kumfanya ni neema ya macho yake na nafsi yake kama Mahauru Al-Aini, kwa hiyo neno lake hilo ni sawa na kumuambia Muislamu, Allah asikufanye mtoto wake, au kusema Allah asikufanye kufanana na yeye. Ni upuuzi katika maneno waliojidanganya kwayo.

Ama kuhusu sababu hasa iliyomtakasa Allah na uwezekano wa kuonekana, tujue kuwa sababu hiyo ameibainisha Mtume S.A.W katika hadithi sahihi iliyopita kwa Abu Mussa Al-Asha-ari Allah amridhie kuwa Mtume S.A.W amesema kuhusu waja wa Peponi ndani ya pepo:

((وَجَنَّتَانِ مِنْ فِضَّةٍ آنِيَتُهُمَا وَمَا فِيهِمَا ، وَجَنَّتَانِ مِنْ ذَهّبٍ آنِيَتُهُمَا وَمَا فِيهِمَا ، وَمَا بَيْنَ الْقَوْمِ وَبَيْنَ أَنْ يَنْظُرُوا إِلَى رَبِّهِمْ إِلَّا رِدَاءُ الْكِبْرِ عَلَى وَجْهِهِ فِي جَنَّةِ عَدْنٍ))

"Pepo mbili ni vya fedha vyombo vyake na yaliyomo ndani yake, na Pepo mbili ni vya dhahabu vyombo vyake na yaliyomo ndani yake. Na hakuna kilichozuia baina ya Watu na kumuona Mola wao isipokua sifa ya kiburi katika Pepo za Adeni"

[Bukhari 4878, 4879, 7444. Muslim 180. Tirmidhi 2528. Ibnu Maajah 187 Ahmed 19682]

Kwa hakika Hadithi hii inatuekea wazi sababu hasa ambayo kwa sababu hiyo ametakasika Allah na uwezekano wa kuonekana, na sababu hiyo ni kusifika Allah mtukufu kwa sifa ya Kiburi; basi Allah mtukufu ni Mutakabbiru haonekani.

Amesema Al-Haafidhu Ibnu Hajar Al-Asqalani alipokua akifafanua Hadithi hii: "Na maana ya hadithi ya mlango huu ni kuwa kwa mujibu wa utukufu wa Allah na kujitosheleza kwake asionekane na yoyote".

Wabillahi Taufiqi.

Published By Sh. Hafidh Al-Sawafi

SWALI:

Ipi tofauti kati ya ´Aqiydah (Itikadi) ya Jahmiyyah na ya Ibaadhi?

Je, ni kikundi kimoja kwa jina jipya?

Kwa sababu tumeambiwa kuwa katika mlango wa sifa za Allah ni sawa wote wanazikanusha, pia katika kuonekana Allah siku ya Kiama wote wanakanusha.

Tunaomba jawabu.

JAWABU

Kwanza: Tufahamu kuwa Madhehebu ya Jahamia yananasibishwa kwa Jahamu bin Swafwani, imeelezwa kuwa alikufa mwaka 128 Hijiria, ama Madhehebu ya Ibadhi tunajua sote kuwa ipo kabla ya Jahamu huyu kuzaliwa; kwa sababu Imamu Abdullahi bin Ibadhi Al-Tamimi R.A aliishi na kufa katika kipindi cha Masahaba R.A, na kabla yake Imamu Jabir bin Zaid Al-Uzdi Al-Omani R.A aliyefariki mwaka 93 Hijira, na Abu Bilali Mirdaas bin Hudair R.A aliyefariki mwaka 61 Hijira; kwa hiyo uwepo wa Ibadhi ni kabla ya Jahamia kwa miaka mingi, wala hakuna uhusiano baina yao wala makutano.

Pili: Sisi hatujaona kitabu chochote kilichoandikwa na Jahamu bin Swafwan wala kilichoandikwa na mwandishi kwa kijahamia yoyote, kilichopo mbele yetu ni kile kilichoelezwa na wapinzani na wagomvi wa Jahamu bin Swafwan katika vitabu vyao ambao ni Masunni, nao hawana uadilifu wa kunukulu Madhehebu za wengine kama zilivyo; kwa hiyo kidhahiri Jahamu bin Swafwan anabakia kuwa ni Mtuhumiwa bila dalili yakinifu ya kuthibitisha tuhuma dhidi yake, kwa hiyo inabainika kuwa ujahamia ni tuhuma ya kupangwa lengo lake ni kumbandika nayo kila mpinzani; kwa hiyo sio ajabu tukasikia tuhuma hii kuelekezwa dhidi ya Ibadhi kama ilivoelekezwa kwa Muutazila hapo kabla.

Tatu: Madhehebu ya Kijahamia kama ilivoelezwa na wapinzani wao imesimama katika misingi ifuatayo:

1. Kuitakidi kuwa sifa za Allah ni vitu vyengine visivokua Allah mtukufu, na kwa sababu hiyo sifa zake ni viumbe vyake, Allah ameziumba na kujipamba nazo.

2. Kuitakidi kuwa Akhera ina mwisho kama Dunia kwani Allah ndiye wa Mwanzo bila kuwepo chochote basi yeye ndiye wa Mwisho baada ya kumalizika vyote, kwa hiyo Pepo na Moto vitamalizika na wahusika wake pia watamalizika.

3. Kuitakidi Irjaa nayo kuitakidi kuwa Imani haidhuriki na maasi yote yasiyokua ya kishirikina, kama ilivyokua mema hayafai kitu likiwepo kosa la ushirikina.

4. Kuitakidi Jabri nayo ni kuitakidi kuwa mja ni mtezwanguvu hana hiyari katika uhai wake, mfano wake ni sawa na sufi katika mawimbi ya upepo, basi akitii ni kwa matakwa na Allah na akiasi ni kwa matakwa ya Allah wala yeye hana lake wala hiyari katika vitendo vyake.

Kutokana na hayo kila mwenye jicho la uadilifu anajua kuwa Ibadhi si Jahamia kama ilivokua Jahamia si Ibadhi, bali tafauti iliyopo baina yao ni kama tafauti baina ya Mashariki na Magharibi.

Nne: Kuwepo baadhi ya masuala ya kiitikadi ambayo yamesemwa sawa baina ya makundi tafauti ya Kiislamu hakufanyi kundi moja kuwa jengine, kwa sababu makundi tafauti hayawi sawa ikiwa kuna masuala ya kimsingi yametafutina baina yao hata kama lililotafuatiasha ni suala moja; kwa mfano leo kumezuka kundi la Kiahmadia ambalo Itikadi zake na mafundisho yake takriban yote ni Sunni -kwa mujibu wa madai yao- isipokua suala la Umahadi na Umasihi na Unabii wa Mizra Ghulamu Ahmed ndio tutakua ni waadilifu tukisema kuwa Ahalu Sunna ni Maahmadia au Maahmadia ni Ahalu Sunna?!!! 

Ama kuhusu mulioambiwa kuwa Maibadhi wamekubaliana na Jahamina katika kukanusha sifa za Allah mtukufu na kutoonekana Allah mtukufu.

Huo ni upotoshaji wa huyo aliyesema; kwani kusudio lake ni katika kukanusha uwezekano wa kusifa Allah mtukufu kwa sifa za viungo na harakati ambazo wao wanamsifu Allah mtukufu kwa sifa hizo hadi kufikia kuitakidi kuwa Allah mtukufu yuko katika sura ya kijana barobaro asiyekua na ndevu kama ilivyo katika Haidithi ya Iqirimah ambayo Maimamu wao wakuu wamejishika nayo amesema Sheikh wa Uislamu wao Ibnu Taimia: "Kama ilivyo katika Hadithi sahihi ya Mtume kutoka kwa Iqrimah kutoka kwa Ibnu Abbaas kutoka kwa Nabii S.A.W amesema: Nimemuona Mola wangu akiwa katika sura ya kijana barobaro, ana nywele timutimu ndani ya bustani kijani" [Bayaanu Talbisi Jahamia 7/290] na Al-Albani pia ameisahihisha Riwaya hiyo ya Iqrimah katika Dhilalu Al-Junna fi Takhriiji Sunna riwaya no 440.

Amesema Imamu wao Mkuu Abu Yaala Al-Farraau baada ya kuileta Riwaya hiyo ya Iqrimah ya Allah barobaro mwenye nywele timutimu aliyemo katika butasani la kijani: "Amesema Ahmed bin Hanmbal: Hadithi hii wameipokea Wakuu kutoka kwa Wakuu kutoka kwa Masahaba, basi yoyote atakayekua na shaka katika hilo au katika chochote ndani yake huyo atakuwa ni Mjahamia, ushahidi wake usikubaliwe, na wala asisalimiwe, na akiumwa asitembelewe." [Ibtwaalu Taawilati 1/145 riwaya no. 148].

Kwa hiyo Jahamia sio Ibadhi tu bali ummaa wote ni Jahamia isipokua atakayeitakidi kuwa Allah mtukufu anasifika kwa sifa za viungo na harakati ana sura ya kijana barobaro mwenye nywele timutimu aliyeko ndani ya bustani kijani.

Ama kuhusu Itikadi ya kutoonekana Allah mtukufu kuwa hiyo ni Itikadi ya Kijahamia, basi Allah mtukufu atakua ndie Mjahamia wa mwanzo kwa sababu ndiye aliyejisifu kwenye kitabu chake kuwa vyenye kuona yeye havimdiriki kama ilivyo katika Aya ya 103 ya Suuratu Al-Anaam, kwani hakuna shaka yoyote kuwa macho yakimuona itakua vyenye kuona vimemdiriki kwani huko ndiko kudiriki kwake.

Pia Mtume S.A.W atakua ni Mjahamia kwani ametueleza wazi wazi kuwa sababu hasa iliyozuia kuonekana Allah mtukufu ni Kiburi chake, basi Allah ni Mutakabbir Dhu Al-Kibriyaai haonekani, kama ilivyo katika Hadithi ya Abdullahi bin Qias R.A kuwa Mtume S.A.W amesema: ((Pepo mbili ni vya fedha vyombo vyake na vilivyomo ndani yake, na Pepo mbili ni vya dhahabu vyombo vyake na vilivyomo ndani yake. Na hakuna kilichozuia baina ya watu wa Peponi na kumuona Mola wao isipokua sifa ya kiburi katika dhati ya Allah ndani ya Pepo ya Aden)) [Bukhari 7444 Muslim 180] amesema Al-Haafidhu Ibnu Hajar Al-Asqalaani katika Fat-hu: ((Na maana ya hadithi ya mlango huu ni kuwa kwa mujibu wa utukufu wa Allah na kujitosheleza kwake asionekane na yoyote)).

Na sisi tunawaambia hawa wanatuhumabatili: Acheni kuitakidi kama walivoitakidi Jahamia kuwa sifa za Allah ni vitu vyengine visivokua Dhati ya Allah mtukufu ili musalimike na mazalio ya Itikadi hiyo pofu potofu, nayo ni kutitakidi kupangika Allah mtukufu na kuwa na ufakiri wa kutegemea sifa, na kuitakidi kuwa Quraani ni sifa ya Allah kwa hiyo si kiumbe; kwani nyinyi mumepotea katika hilo kwa kuviitakidi vitu visivyokua Allah mtukufu kuwa ni sifa za Allah mtukufu kama walivopotea Majahamia kwa itikadi hiyo hiyo kwa kuiatkidi kwao uumbwaji wa sifa za Allah mtukufu. 

Na semeni neno la haki kuwa Quraani ni maneno ya Allah ambayo ni athari ya kusifika Allah mtukufu kwa sifa ya usemaji, wala maneno yake sio sifa yake; kwani yeye ni Muumbaji Mkwasi asiyesiyehitaji chengine kisichokua yeye, basi yeye ni Msemaji mwenye kupatisha na kutokezesha maneno yake anapotaka na kwa anayemtaka na kwa namna aliyotaka.

Wabillahi Taufiiki.

Published By Sh. Hafidh Al-Sawafi

SUALI

JAWABU:

Published By Sh. Hafidh Al-Sawafi

 SUALI:

Asalamu alaykum wa rahmatullahi wa barakatuh.

Tumefikiwa na fikra yenye kusema kuwa Baba yetu Adamu A.S. siye mtu wa mwanzo kuumbwa, bali alitanguliwa na watu wengine kabla yake, na kuwa Adamu A.S. mwenyewe ni mtoto wa kuzaliwa, na waliokuja na fikra yenye utata huu wametumia Aya mbili katika Quraani tukufu, ya kwanza ni ile iliyoko katika Suuratu Al-Aarafi yenye kusema: ((Kwa hakika tulikuumbeni kisha tulikutieni sura kisha tuliwambia Malaika msujudieni Adamu, basi wakasujudu isipokua Ibilis hakuwa miongoni mwa waliosujudu)) [7/11] ya pili ni ile inayosema: Enyi watu mcheni Mola wenu ambae kakuumbeni kutokana na nafsi moja na akaiumbia hiyo nafsi mke wake...." [4/1] wamedai kuwa hii Aya imepotoshwa kwa sababu nafsi imesifiwa kwa neno (waahidatun), wamesema kuwa hiyo ة taau iliyoko mwisho wa neno waahidatun واحدة inaonyesha wazi kuwa nafsi hiyo ni ya kike kwa hiyo neno Zaujahaa si maana yake mke wake bali maana yake ni mume wake.

Wamesema kuwa Adamu aliumbwa kama alivoumbwa Issa bin Maryamu A.S. kwa katika tumbo la Mama yake bila ya Baba kisha alizaliwa na baadae akawa mume wa mama yake na kuanza kuzaliana.Tunaomba ufafanuzi katika suala hili.

Asanteni:

 JAWABU:

Katika mambo yasiyokua na shaka yoyote kidalili ni kuwa Baba yetu Adamu A.S. ndiye mtu wa mwanzo aliyeumbwa na Allah mtukufu, ametuambia Allah mtukufu kwenye Kitabu chake:

((يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ))

((Enyi watu hakika sisi tumekuumbeni kutokana dume moja na jike moja na tumekufanyeni muwe mataifa na makabila ili mujuane. Hakika aliye mbora zaidi katika nyinyi mbele ya Allah ni mchamungu wenu zaidi. Hakika Allah ni mjuzi na muelewa ya yote))

[Hujuraati 13].

Basi Aya hii iko wazi kabisa kuwa watu wote kuzaliana kwao kulianza kwa Baba mmoja ambae ndie Baba yao wote na Mama mmoja ambae ndiye Mama yao wote, na katika Quraani Allah mtukufu amewaita watu Banii Adama mara saba, na Banii Adama maana yake ni Wana wa Adamu, ndio tukaitwa Binadamu asili yake ni maneno hayo ya Kiarabu, basi wasiokua Binadamu ni wawili tu Baba yetu Adamu na Mama yetu Hawa ambao hao ndio mwanzo wa kizazi ambacho ndio watu wote duniani, wala katika hili hakuna kutafautiana baina ya Waislamu, kutokana na hapa aliyeleta suala hilo ima ni Bilisi Maluuni au ni Mshirkina aliyeritadi lengo lake ni kuingiza utata kwa waislamu wasiofahamu. Allah atuepushe na shari zao wote wawili.

Ama kuhusu Aya iliyopo katika Suuratu Al-Aarafi yenye kusema:

((وَلَقَدْ خَلَقْنَاكُمْ ثُمَّ صَوَّرْنَاكُمْ ثُمَّ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ لَمْ يَكُنْ مِنَ السَّاجِدِينَ))

((Kwa hakika tulikuumbeni, kisha tulikutieni sura, kisha tuliwambia Malaika msujudieni Adamu, basi wakasujudu isipokua Ibilis hakuwa miongoni mwa waliosujudu))

[Al-Aaraf /11]

Aya hii haijamaanisha kuwa Adamu aliumbwa baada yetu, wala hakuna ndani yake kisha tulimuumba Adamu, kwa hiyo ima Aya inamuelezea Adamu A.S. na kwetu sisi ni zingatio la kujua asili yetu, au Aya anawaeleza watu wote na Adamu akiwemo ndani yake bila ya ainisho la kuumbwa baada ya kuumbwa kwetu, kwa hiyo kujitolea hukumu kupitia Aya hii kuwa Adamu aliumbwa baadae ni kujihukumia bila hoja wala dalili.

Juu ya yote haya pia tunasema kuwa herufi ya ((Thumma)) ambayo hufasiriwa kwa kiswahili kwa neno ((kisha)) iliyotumika katika kuunganisha baina ya matokeo tafauti ambayo ni kuumbwa kwetu, na kutiwa sura zetu, na kuambiwa Malaika wamsujudie Baba yetu Adamu A.S. herufi hiyo inapotumika katika kuunganisha baina ya jumal (Sentensi tafauti) huwa inafidisha daraja za matokeo wala haifidishi kufuatana matokeo, na katika Quraani ipo mifano kadhaa amesema Allah mtukufu:

((وَيَقُولُ الْإِنْسَانُ أَإِذَا مَا مِتُّ لَسَوْفَ أُخْرَجُ حَيًّا (66) أَوَلَا يَذْكُرُ الْإِنْسَانُ أَنَّا خَلَقْنَاهُ مِنْ قَبْلُ وَلَمْ يَكُ شَيْئًا (67) فَوَرَبِّكَ لَنَحْشُرَنَّهُمْ وَالشَّيَاطِينَ ثُمَّ لَنُحْضِرَنَّهُمْ حَوْلَ جَهَنَّمَ جِثِيًّا (68) ثُمَّ لَنَنْزِعَنَّ مِنْ كُلِّ شِيعَةٍ أَيُّهُمْ أَشَدُّ عَلَى الرَّحْمَنِ عِتِيًّا (69) ثُمَّ لَنَحْنُ أَعْلَمُ بِالَّذِينَ هُمْ أَوْلَى بِهَا صِلِيًّا (70)))

((Na anasema mtu: Hivi nikishakufa nitatolewa tena kuwa hai?!! * Hivi hakumbuki huyu Mtu kuwa sisi tulimuumba hapo kabla waka hakuwa kitu?!! * Naapa kwa enzi ya Mola wako hakika tutawakusanya wao na Mashetani kisha tutawafikisha pembezoni mwa Jahannamu udamaudama * Kisha tutavua katika kila kundi waliokua wakaidi zaidi mbele ya Mwingi wa rehema * Kisha hakika sisi ni wenye kujua zaidi wale walio kuwa na kipaumbele cha kuufikia....))

[Maryam 66-70]

Sote tunajua kuwa elimu ya Allah mtukufu ya kuwajua zaidi wale waliokua na kipaumbele cha kuufikia moto wa Jahannamu, elimu hiyo ni kabla ya yote hayo yaliyotajwa, pia imekuja:

((وَمَا أَدْرَاكَ مَا الْعَقَبَةُ (12) فَكُّ رَقَبَةٍ (13) أَوْ إِطْعَامٌ فِي يَوْمٍ ذِي مَسْغَبَةٍ (14) يَتِيمًا ذَا مَقْرَبَةٍ (15) أَوْ مِسْكِينًا ذَا مَتْرَبَةٍ (16) ثُمَّ كَانَ مِنَ الَّذِينَ آمَنُوا وَتَوَاصَوْا بِالصَّبْرِ وَتَوَاصَوْا بِالْمَرْحَمَةِ (17)))

((Lakini hakujitoma katika kiungizi * na kipi kitakulisha kiungizi? * Ni kukomboa mtumwa * au kulisha katika siku yenye njaa * Yatima aliye jamaa * au masikini aliye shidani * kisha akawa miongoni mwa walio amini na kuusiana kusubiria na kuusina kuhurumiana))

[Al-Balad 12-17]

Tunaona kuwa imeunganishwa baina ya Jumal kwa kutumia herufi ya (Thumma) Kisha, hali ya kuwa mwenye kufanya mema hayo yaliyotajwa anasifika kuwa ni Muumini mwenye kuusia subra na kuhurumiana kabla ya kukomboa mtumwa na kulisha yatima na masikini.

Kwa hiyo Allah ametanguliza kututajia neema zake ya kutuumba na kututia sura kabla ya kutueleza tokeo la kutakiwa Malaika kumsujudia Baba yetu Adamu A.S., na hapa inafaa kutoa tanbihi kama tulivotangulia kusema kuwa katika Aya tukufu haikutajwa kuumbwa kwa haikuja ndani yake ((kisha tulimuumba Adamu)), kwa sababu yeye tayari ameingia katika mjumuiko wa waliombwa na kutiwa sura, lililotajwa ni tokeo ya kutakiwa Malaika kumsujudia Baba yetu Adamu A.S. tu.

Sasa tuangalie jinsi Allah anavotubainishia uumbwaji wetu:

((يَا أَيُّهَا النَّاسُ إِنْ كُنْتُمْ فِي رَيْبٍ مِنَ الْبَعْثِ فَإِنَّا خَلَقْنَاكُمْ مِنْ تُرَابٍ ثُمَّ مِنْ نُطْفَةٍ ثُمَّ مِنْ عَلَقَةٍ ثُمَّ مِنْ مُضْغَةٍ مُخَلَّقَةٍ وَغَيْرِ مُخَلَّقَةٍ لِنُبَيِّنَ لَكُمْ.....))

((Enyi watu ikiwa nyinyi mumo katika shaka ya ufufuo, kwa hakika sisi tumekuumbieni kutokana na dongo, kisha kutokana na tutfa (manii), kisha kutokana na kipande cha damu iliyoganda, kisha kutokana na kipande ya nyama chenye umbo na kisichokua na umbo ili tukubainishieni...))

[Hajj 5]

Na sote tunajua kuwa aliyeumbwa kutokana na dongo moja kwa moja ni Baba yetu Adamu A.S. kwa hiyo bila shaka yoyote yeye ndiye Mtu wa mwanzo.

Ama suala la ة iliyopo katika neno واحدة na ها na iliyopo katika neno زوجها kuwa herufi mbili hizo zinatumika kwa kilicho na sifa ya ujike, tunamwambia huyo mbabaishaji kuwa anatangaza ujahili wake wa lugha ya Quraani tukufu kwa sababu neno نفس nafsi katika lugha ya kiarabu ni neno lenye sifa ya ujike kwa kuzingatia neno lenyewe, ni sawa nafsi inayozungumziwa ni ya mwanamme au mwanamke ni ya mnyama au kitu chochote chengine, na ndio maana Allah mtukufu amesema:

((لَا تُكَلَّفُ نَفْسٌ إِلَّا وُسْعَهَا))

((Hailazimishi nafsi isipokua inayoyaweza))

Imekuja وسعها ile ها ipo kama kawaida yake, sasa ndio huyo mtoa hoja atasema wanaume haiwahusu hiyo Aya?!!!

ama neno زوج inatupasa tujue kuwa katika Quraani linatumika neno hilo kwa maana ya mke, na ndivo Baba yetu alivoambiwa:

((وَقُلْنَا يَا آدَمُ اسْكُنْ أَنْتَ وَزَوْجُكَ الْجَنَّةَ))

((Na tukasema Ewe Adamu tulizana wewe na mkeo katika Pepo))

[Baqarah 35]

Kamwambia zaujuka wala hakumwambia zaujatuka, na neno zaujatu kwa taau hakuna katika Quraani tukufu, wala si neno fasihi katika lugha ya kiarabu, na asili yake ni utumiaji wa Mafaqihi katika masuala ya Mirathi kwa dharura ya kutafautisha baina ya mume na mke, kisha likaingia katika masuala ya Fiqhi kisha likaenea kidogo kidogo.

Na kwa sababu mleta utata tunaoujibu ametangaza ujinga wake wa utumiaji wa lugha ya Quraani basi inabainika kuwa maneno yake si hoja mbele ya wenye kufahamu.

Wabillahi Taufiqi.

Published By Sh. Hafidh Al-Sawafi

SUALI:

Tumesikiliza Darsa ya mmoja katika Maduati wa Chuo cha Kiibadhi naye amesema kuwa Nabii Mussa A.S. alipozungumzishwa na Mola wake ilikuwa ni kwa Mola kuiumba sauti ya kuzungumza na Nabii Mussa A.S. na sio Allah mtukufu aliyezungumza na Nabii Mussa A.S. Allah ametakasika na hilo, yaani Allah ameumba sauti hakuzungumza mwenyewe.

Suali alangu lipo hapa: Jee! Ni kweli Allah hakuzungumza mwenyewe? 

Naomba ufafanuzi wa Aya hiyo

وَرُسُلًا قَدْ قَصَصْنَاهُمْ عَلَيْكَ مِنْ قَبْلُ وَرُسُلًا لَمْ نَقْصُصْهُمْ عَلَيْكَ وَكَلَّمَ اللَّهُ مُوسَى تَكْلِيمًا

Kuuliza ni kuelimika.

Asanteni.

JAWABU:

Kuhusiana na Aya tukufu ni kama ifuatavo:

((Na Mitume tumekueleza habari zao hapo kabla, na Mitume hatujakueleza, na Allah amesema na Mussa usemesho)) [Nisaa 164].

Na kupitia Aya hii tukufu hakuna tafauti baina ya Waislamu kuwa Mtume Mussa -alaihi salaatu wa salaamu- alisema na Allah mtukufu, na Allah mtukufu alisema na Mtume Mussa -alaihi salaatu wa salamu- na kwa sababu hii akaitwa Al-Kaliimu pia akaitwa Kaliimullwaahi.

Na Quraani iko wazi kabisa kuwa Mtume Mussa aliitwa na hilo linalazimisha kisikia wito, amesema Allah mtukufu:

((فَلَمَّا جَاءَهَا نُودِيَ أَنْ بُورِكَ مَنْ فِي النَّارِ وَمَنْ حَوْلَهَا وَسُبْحَانَ اللَّهِ رَبِّ الْعَالَمِينَ * يَا مُوسَى إِنَّهُ أَنَا اللَّهُ الْعَزِيزُ الْحَكِيمُ ))

((Basi alipoufikia ikanadiwa: Vimebarikiwa viliomo katika moto na viliopo pembezoni mwake na ametakasika Allah Mola wa Walimwengu * Ewe Mussa: Hakika yalivyo hasa Mimi ndiye Allah mtukufu mwingi wa hekima))  [Namli 8-9]

Na hakuna tafauti kwetu kuwa Allah mtukufu anasifika kwa usemaji, na kuwa yeye ni msemaji, kama ilivokua maneno yake ni athari ya usemaji wake Allah mtukufu; kwa sababu usemaji ni sifakitendo ambayo kwayo tunajua kuwa Allah mtukufu anapotaka kusema basi yeye Allah mtukufu husema, na kwa kusema kwake hupatikana maneno yake ambayo hayakuwepo kabla ya zama za kusemwa kwake, na kwa sababu hii maneno yake Allah mtukufu yakawa ni kiumbe kwani yana mwanzo wa kuanza na mwisho wa kumaliza; kwa sababu maneno yake si sifa yake Allah mtukufu bali ni athari ya usemaji wake Allah mtukufu ambao ndio sifa yake Allah mtukufu.

Na kwa sababu usemaji wa Allah mtukufu ni tafauti na usemaji wa yoyote na chochote kisichokua yeye; kwa sababu Allah mtukufu hajafanana na chochote katika viumbe vyake wala hakuna kiumbe kilichofanana na yeye Allah mtukufu, basi ikalazimika kumtakasa na usemaji wa kutamka kwa modomo na ulimi na kuambatana na hewa na kutokwa na sauti, Allah ametakasika na usemaji wa namna hiyo utakaso mkubwa kabisa; kwani usemaji wa namna hiyo unalazimisha Allah kufanana na waja wake, pia waja kufanana na Mola wao, na hilo halipasi kwa Allah mtukufu aliyeumba kila kitu asiyehitaji sehemu wala wakati wala nafasi.

Kutokana na hapa inabainika wazi wazi kuwa usemaji wa Allah mtukufu ni kwa kutokezesha na kupatisha maneno yake kwa namna aliyotaka na wakati aliotaka na kwa muhusika aliyemtaka, maneno hayo inawezekana yakatokezeshwa na Allah mtukufu kwa njia ya sauti, au kwa njia ya muandiko, au kwa njia ya ilhamu:

وَمَا كَانَ لِبَشَرٍ أَنْ يُكَلِّمَهُ اللَّهُ إِلَّا وَحْيًا أَوْ مِنْ وَرَاءِ حِجَابٍ أَوْ يُرْسِلَ رَسُولًا فَيُوحِيَ بِإِذْنِهِ مَا يَشَاءُ إِنَّهُ عَلِيٌّ حَكِيمٌ (51)

((Na haiwi mtu yoyote aseme nae Allah isipokua kwa ufunuo au nyuma ya kizuizi au amtumie mjumbe amfunulie kwa idhini yake anayoyataka hakika yeye ni mkuu mwingi wa hikima)) [Shuura 51]

Na udhahiri ni kuwa Mtume Mussa -alaihi salaatu wa salaamu- alisemeshwa na Allah mtukufu kwa nyuma ya kizuizi, kwa hiyo alisikia maneno yaliyobebwa na sauti moja kwa moja, maneno hayo na sauti hiyo vyote viwili ni viumbe vilivopatishwa na kutokezeshwa na Allah mtukufu, wala hatuwezi kusema kuwa maneno ni ya sauti, wala kusema kuwa sauti ni ya maneno, bali maneno ni ya Allah na sauti ni ya Allah kama ilivokua viumbe vyote ni vya Allah, kutokana na hapa kusema meneno ya Allah hakupingani na uhakika wa kuumbwa maneno hayo, pia kusema sauti ya Allah hakupingani na uhakika wa kuumbwa sauti hiyo, na kwa hili inabainika wazi wazi uhakika wa usemaji wa Mtume Mussa -alaihi salatu wa salamu- na Allah mtukufu, pia usemaji wa Allah mtukufu na Mtume wake Mussa.

Kwa hiyo hatusemi kuwa Mtume Mussa -alaihi salaamu- alisemezwa na sauti, wala hatusemi kuwa alisemezwa na maneno, kwa sababu sauti aliyoisikia si mmiliki wa maneno, wala mwazilishi wa maneno, wala mpatishi wa maneno, kama ilivokua maneno si mmiliki wa sauti, wala mwanzilishi wa sauti, wala mpatishi wa sauti; kwani vyote -sauti na maneno- ni viwakilishi vya kufikisha maana kusudiwa ambayo Mtume Mussa -alaihi salamu- aliifahamu kupitia viwakilishi hivo ambavyo ni viumbe vya Allah mtukufu.

Kwa hiyo tunafahamu wazi wazi kuwa Mtume Mussa -alaihi salaamu- alisemezwa na Allah mtukufu wala hakusemezwa na sauti wala maneno; bali alisemezwa kwa sauti na maneno.

Wallwahi aalamu.

Wabillahi Taufiqi.

Published By Sh. Hafidh Al-Sawafi

Asalamu alaykum wa rahmatullahi wa barakatuh.

Kuna kundi linajiita Jumuia ya Waislamu wa Kiahmadia, wanadai kuwa muanzilishi wa kundi lao ndiye Mtume msadikishaji naye jina lake ni Ahmad, wanasema kuwa Mtume Muhammad S.A.W. alipewa Kitabu na Hikima kwa hiyo si Matume msadikishaji aliyekusudiwa katika aya ya 81 ya Suuratu Aala Imaraan, tunaomba ufafanuzi katika hili kwa kumjua huyu Mtume msadikishaji katika Aya hiyo ni nani hasa?.

JAWABU:

Kwanza tunapaswa tujue kuwa kundi hilo limeasisiwa na muhindi mmoja kutoka mji wa Kadiani uliopo ndani ya Punjab India, naye anaitwa Ghulamu Ahmed mwana wa Ghulamu Murtadha alifariki mwaka 1908 Miladi sawa na mwaka 1326 Hijiria, Mkadiani huyu alidai kuwa zinamjia funuo kutoka kwa Allah mtukufu, na kuwa yeye ni Mahdi na Masihi na Nabii na Mtume baada ya Muhammad S.A.W. lakini sisi kwa kufuatilia funuoa zake alizodai kuzipata na maandiko yake, tumekutia kuwa hakua yeye isipokua ni mmoja kati ya Madajali 30 alioeleza Mtume wetu Muhammad S.A.W. kudhihiri kwao baada yake na kabla ya kusimama Kiama, kutokana na hapo Waislamu tokea zama zake mpaka hivi leo hawajatafautiana katika hukumu ya Ushirikina kwa kundi hilo na muasisi wake pia.

Ghulamu Ahmed Mkadiani huyu alidai kupata funuo ya kumuoa Binti mmoja aitwae Muhammadee Begam lakini alipopeleka posa mwaka 1887 hakukubaliwa, basi alidai kupata funuo isemayo kuwa Binti huyo iwapo ataolewa na mume mwengine asiyekua yeye kwa hakika Baba wa Binti atakufa ndani ya kipindi cha miaka 3 tokea tarehe ya ndoa, na mume wa Binti atakufa ndani ya kipindi ya miaka miwili na nusu tokea tarehe ya ndoa, kisha baada ya hapo Mke atarudi kwake. Ndoa ilifanywa Baba yeye alifariki baada ya miezi 6, ni ajali yake si kwa funuo hewa ya Ghulamu Ahmed, ama Mume yeye hakufariki bali aliendelea kuishi na mkewe vizuri kwa miaka, basi Ghulamu Ahmed huyo alimuandama mke wa watu kwa funuo zake hewa na ndoto za kumuota Mke wa watu mara akiwa yuko uchi mara kavaa veli nyekundu hali yake iliendelea hivo mpaka kufariki kwake 1908 bila ya kutimia funuo yake wala ndoto zake, hivi kuna dalili ya kudhihiri uongo wake zaidi kuliko hiyo?!!!

Ghulamu Ahmed huyu kabla ya kufa kwake kwa mwaka mmoja aliandika barua maalumu na kuipa anuani kuwa ni hukumu ya mwisho baina yake na Sheikh Thanaaullahi ambae alikua ni mpinzani wake mkubwa, barua hiyo ilidhamini hukumu ya kuwa muongo kati yake na Sheikh Thanaullahi atakufa katika kipindi cha uhai wa mkweli, kisha akaomba apizo zito lenye kudhamini kifo cha magonjwa hatari kama kipindupindu au tauni kwa Sheikh Thanaullahi, lakini mambo yakawa kinyume chake apizo lilimuandama muapizaji mwenyewe; kwani Ghulamu Ahmed Mkadiani alikumbwa na maradhi ya kuharisha ya kipindupindu hadi kufa, basi alikufa dhalili na kubainika kuwa yeye ni muongo aliyekufa katika kipindi cha uhai wa aliye mkweli kupitia kitanzi cha kalamu yake mwenyewe. Ijulikane kuwa Sheikh Thanaullahi alikufa mwaka 1948 Miladi.

Kwa ufupi sisi tumefuatilia hali ya kiumbe huyu aitwae Ghulamu Ahmed tukakutia ni muongo mkubwa sana na mlaghai wa maneno, hakuna funuo yake hata moja iliyotimia bali zote zimemwendea kinyume.

Ama kundi lake kwa hakika limezama katika wimbi ya kupingana na muasisi wake katika kila kitu, hata katika jina ya Jumuia yake, kwani Muasisi wake aliita Jamaa ya Kiahmadia ama wao wameongeza maneno "Waislamu wa", pia wametafautiana naye hata katika mwaka wa uzao wake, Muasisi kasema wazi wazi kuwa yeye kazaliwa ima katika mwaka 1839 au 1840 na kuwa katika mwaka 1857 alikua kijana wa miaka 16 au 17 bado hajaanza kuota ndevu wala sharubu, lakini kundi lake linasema hapana muasisi hakua akijua umri wake, na kuwa alikua akijitupia maneno tu katika hilo na uhakika ni kuwa yeye alizaliwa mwaka 1835.

Hivi kuna upofu zaidi kuliko huo?!!!

Katika kitabu chao maarufu katika safu zao kinachoitwa Siiratu Al-Mahdi, nao ni uandishi wa Mtoto wa Ghulamu Ahmed Mkadiani aitwae Bashiru Ahmed, katika riwaya ya 150 akiwa anaelezea matokeo ya mwaka 1868 anasema kuhusu Ghulamu Ahmed Mkadiani kuwa katika mwaka huo umri wake ulikua baina ya miaka 24 mpaka 28, na kuwa haiwezekani awe amevuuka umri wa miaka 28, yaani haiwezekani kuwa amezaliwa chini ya mwaka 1840, nalo ni neno la wazi kuwa uzao wake -kwa makadirio ya mbali- ulikua katika mwaka 1840 Miladi.

Na sisi katika suala hili ulilotuletea tunakujibu kupitia neno la Ghulamu Ahmed Mkadiani mwenyewe ili uweze kuona maajabu ya Waumini kupingana na Mtume wao huyo bandia.

Anasema: "Kutokana na hapo imesema Qurani tukufu ya kuwa ilichukuliwa ahadi katika kila uma kupitia Nabii wake ya kuwa watamuamini Khaatamu Nabiyiina S.A.W. wakati wa kutumwa kwake na kuwa watamnusuru" [Rf. Haqiqatu Al-Wahyi Ar. UK. 163]

Maneno hayo aliyasema Ghulamu Ahmed Mkadiani katika mwaka 1907, yaani kabla ya kufa kwake mwa mwaka au miezi tu, nayo ni hoja juu ya kila Muahmadia, kwani ima ayakufuru au ayakubali.

Ama neno la kusema kuwa Mtume Khaatamu Nabiyyina S.A.W. kapewa Hekima na Kitabu; kwa hiyo yumo katika safu ya Manabii wasadikishwaji ambao watafuatiliwa na Mtume msadikishaji.

Tunawambia kuwa neno lao hilo ni la kujihukumia lisilokua na hoja wala dalili, basi watuletee katika Quraani tukufu hapo palipoandikwa kuwa Mtume Msadikishaji huyo hatakua na Hekima wala Kitabu, au hatakua na Kitabu; ili waweze kusimamisha hoja, kinyume na hivo utakua uhakika wao ni kuzua uongo kisha kuufanya uongo huo kuwa ni hoja, na huo ni Udajali.

Lakini uhakika ni kuwa hawa watu Allah amewanyima fahamu ya Qurani kwa kuwanyima fahamu ya lugha yake; kwani katika Aya tukufu limekuja neno ((Rasuulun)) wala halikuja neni ((Nabiyun)), na neno Rasuulun linadhamini kuwa muhusika wake atakua na Risala mahususi nacho ni Kitabu.

Wabillahi Taufiki.

Published By Sh. Hafidh Al-Sawafi

Vipi nyinyi Maibadhi munaitakidi kuwa Qur’ani ni kiumbe hali ya kuwa Qur’ani ni maneno ya Allah mtukufu, sote tunafahamu kuwa katika dua maarufu ni:

((أعوذ بكلمات الله التامات من شر ما خلق))

((Najikinga kwa maneno ya Allah yaliyotimia nisipatwe na shari za alivoumba)).

Hivi inafaa kujikinga kiumbe kwa kiumbe?

Kama si ushirikina huo ni nini?

JAWABU:

Inapasa tunapouliza masuali ya Dini yetu tuulize kwa kupata faida na kujiweka mbali na hamasa za Kimadhehebu; kwani elimu ni bahari huenda likafichika kwako linalojulikana na wengine.

Ama kuhusu kujikinga mja kwa kiumbe, ikiwa hilo limeidhinishwa katika sheria ya Allah mtukufu utakua wajibu wetu ni kumtii Mola wetu mlezi Allah mtukufu.

Tunajua sote kuwa Malaika waliamrishwa kumsujudia Baba yetu Adamu A.S wala hawakusema huu ni ushirikina vipi tutamsujudia kiumbe, wa kusudujiwa ni Allah tu peke yake?!!.

Pia Mtume Yaaqoub A.S na watoto wake 11 na Mkewe wote waliporomoka wakamsujudia Mtume Youssuf A.S kama ilivoelezwa katika Suuratu Yousuf, wala haikusemwa, wala haisemwi kuwa hilo ni ushirikina; kwani hilo lilifaa katika sheria yao na kuidhinishwa na Allah mtukufu. Wewe leo katika sheria ya Mtume wetu Muhammad S.A.W haifai kumsujudia kiumbe kama ilivofaa kwa hao tuliowataja.

Sisi tumeamrishwa tunaposali tuelekee Alqaaba (Kibla), ndio tutasema kuwa ni ushirikina kwa sababu tunaelekea kiumbe?!! Niya yetu sio kusujudia na kuiabudu Alqaabah, bali ni kumsujudia na kumuabudu Allah mtukufu.

Sisi sote tunafahamu kuwa maneno hayana uwezo wowote; kwani maneno ni viwakilishi vya maana, basi nani katika sisi anayeitakidi kuwa maneno ya Allah ndiyo yatakayomuepushia shari za alivoumba Allah mtukufu bila ya kuwezeshwa maneno hayo na Allah mtukufu?!!!

Kwa hakika dua hiyo imefaa kwetu kwa sababu ya kuidhinishwa na Allah mtukufu katika sheria ya Mtume wetu S.A.W., na lau Allah mtukufu ameidhinisha kwetu tujikinge kwa Mtume S.A.W au kwa Mbingu au kwa Ardhi au kwa Malaika au kwa Alqaabah basi hali ya Waumini ingalikua kama hali ya Malaika walipoamrishwa kumsujudia Baba yetu Adamu A.S.

Sisi tunapoleta dua hiyo ya kujingika kwa maneno ya Allah, ifahamike kuwa uhakika wake ni kujikinga mmoja wetu kwa Allah mtukufu kupitia maneno yake Allah mtukufu; kwa maana atukinge Allah mtukufu na shari alivoviumba kupitia maneno yake yaliyotimia.

Wabillahi taufiiqi.

Published By Sh. Hafidh Al-Sawafi

SUALI:

Tumesikia neno la mmoja wa Mashia akisema kuwa Allah anaewatambua Abu Bakar na Omar -Allah awaridhie- huyo si mungu wao, na akasema kuwa Allah na Mtume wake hawajawateua hao kwa hiyo hawawatambui.

Nini hukumu ya neno lake hilo?

Tunaomba ufafanuzi.

JAWABU:

Bila shaka neno la Mshia huyo ni batili wazi wazi lau kuwa lachanganyika na bahari basi lingeharibu chumvi yake, na kuwa lachangwa na hewa ingeshindikana kunuswa kwa ubaya wa harufu yake, ni neno ovu lilotoka kinywani mwake hakusema ila uongo, na sisi tunasema wazi wazi kuwa Allah mtukufu amesema: ((Leo nimekukamilishieni Dini yenu na nimeitimiza kwenu neema yangu, na nimeridhia Uislamu kuwa dini yenu)), na hakuna aliye mkweli zaidi kuliko Allah mtukufu, na katika Dini yake ni Shuuraa kama alieleza hali ya Waumini (Na jambo lao ni kushauriana) wala hakusema ni kwa Ali wala Hussein wala Hassan kama wanavoitakidi Mashia, basi jambo la Waumini ni Shuuraa, na kupitia njia hiyo walipatikana Makhalifa wanne wa mwanzo (Abu Bakar Siddiiqi, na Omar Al-Faaruuq, na Othman bin Affaan na Aliy bin Abi Twalib) wa kuiongoza Jamii ya Kiislamu, nao ni viongozi sahihi hali ya kubakia kwao katika sharti ya kuhukumu kwa mujibu wa Quraani tukufu na Sunna ya Mtume wake S.A.W.

Basi hiyo ndiyo njia ya Waumini ambao Allah amewaridhia Dini yao na kuikamilisha na kutimiza neema yake kwao, basi yoyote mwenye kufuata njia isiyokua njia yao huyo anaelekea katika moto wa Jahannamu Allah atuepushe nao.

Vile vile Allah mtukufu amewaahidi Waumini kuwa miongoni mwao atawafanya Makhalifa katika Ardhi na atawamakinishia Dini yao (Hukumu yao), na haijulikani katika tarehe ya Uislamu wakati ambao ilitimia ndani yake ahadi hiyo ya Allah mtukufu na kufikia kilele chake isipokua katika kipindi cha uongozi wa Makhalifa hao wawili Abu Bakar na Omar -Allah awarihie-.

Basi huyo asiyemtambua Allah na Mtume asiyewatambua Makhalifa hao wawili wa mwanzo Abu Bakar na Omar huyo akatafute Allah wake asiyekua Allah huyu aliyeteremsha Quraani na kumpeleka Mtume wake Muhammad S.A.W. akiwa rehema kwa Walimwengu wote.

Basi sisi tunamtaka huyo aliyesema maneno hayo atubie mara moja na aachane kiburi mbele ya haki.

Ama kusema kuwa Allah na Mtume wake hawajawataja Abu Bakar na Omar Allah awaridhie kuwa ndio Makhalifa kwa hiyo hawawatambui, tunamuambia kama ni hivo basi pia Allah mtukufu na Mtume wake S.A.W. hawajataja Ushia kwa hiyo hawautambui.

Wabillahi taufiqi.

Wallahu aalamu wa ahakamu.

Published By Sh. Hafidh Al-Sawafi

Asalamu alaykum wa rahmatullahi wa barakatuh.

Huku kwetu kumetokeza majibizano makubwa baina ya Waislamu kuhusu hali ya Wazazi (Baba na Mama) wa Mtume wetu Muhammad S.A.W. jee! Ni waja wa Peponi au Motoni? Tunaomba ufafanuzi katika suala hili.

Asanteni.

JAWABU:

Inapasa kwa Muislamu kushughulikia nafsi yake ili afanikiwe kwa maridhio ya Allah mtukufu, kwani ikiwa atakufa fasiki hata kama Wazazi wawili wa Mtume S.A.W. watakua ni waja wa Peponi yeye watamsaidia nini? na iwapo atakufa akiwa mchamungu hata kama wazazi hao wawili watakua ni waja wa motoni yeye kutamdhuru nini?

Zimekuja baadhi ya riwaya zenye kueleza kuwa Mtume S.A.W. alimwambia mmoja wa Mabedui: (Baba yangu na Baba yako wako Motoni) na riwaya nyengine kuwa Mtume S.A.W. (Nimetaka ruhusa kwa Allah ya kumuombea msamaha Mama yangu nami sikupewa) lakini riwaya hizi zote ni Aaahadiyah uwezekano wa kukosewa na wapokezi upo, pia uwezekano wa kuwa zimetungwa upo, kwa hiyo hakuna ulazima wa kuliitakidi hilo; kwa sababu ni dhana si yakini, na itikadi ni tunda la yakini, kwa hiyo wajibu wetu ni kujizuia kukata hukumu katika wazazi wa Mtume wetu S.A.W. kwani uwezekano wa kuwa wao ni waja wa Peponi upo, na uwezekano wa kuwa wao ni waja wa Motoni pia upo, na elimu ya uhakika wa hali yao iko kwa Allah mtukufu.

Wallahu aalamu.

Wabillaai taufiqi

Published By Sh. Hafidh Al-Sawafi

SUALI:

Asalamu alaykum wa rahmatullahi wa barakatuh.

Tumemsikia mmoja wa Masheikh katika T.V. huku Tanzania anasema kuwa haifai kusali nyuma ya Ibadhi kwa sababu wanaitakidi kuwa Khalifa wa Tatu Othman bin Affaan -radhiyallahu anhu- ni mja wa motoni kinyume na Itikadi ya Ahalu Sunna wa Al-Jamaa ambao wanaitakidi kuwa yeye kabashiriwa Pepo, pia Ibadhi wanakanusha Itikadi ya Waumini kumtazama Allah siku ya Kiama, na wanaitakidi kuwa mtenda dhambi kubwa hatapata uombezi wa Mtume S.A.W. bali atabakia milele motoni.

Tunaomba ufafanuzi katika hili, kwani Sheikh husika amesema kuwa hiyo ndiyo Fatwa na Kamati ya kudumu ya Wanaelimu wa Saudia.

JAWABU:

Bila shaka Sheikh huyo anafuata pote la Kisalafi; kwani ndilo pote ambalo hakuna katika Waislamu aliyetafautiana nalo kisha akasalimika na shari za pote hilo, bali hata wao kwa wao hutiana katika tuhuma na kushambuliana, utasikia mara huyu ni Madkhali, mara yule ni Jaamia, mara huyo ni Hizbii, na mfano wa hayo.

Kwa ufupi Fatwa hiyo aliyoinakili huyo Sheikh si ngeni kwetu, nayo ni fatwa iliyotolewa kwa misingi ya kasumba na chuki za kimadhehebu, na ajabu zaidi ni kuwasikia hawa wafuasi wa pote la Kisalafi wakidai kuwa wao wanafuata mwenendo wa Salafu Saalih Masahaba wa Mtume S.A.W. Allah awaridhie, kisha wanakuja na fatwa hiyo pofu isiyokua na msingi wowote uliothibiti wala dalili yoyote ya kutegemea, nayo inadhamini kuwahukumu waliotafautiana na wao kwa hukumu za Kishirikina, nayo ndiyo sifa ya Ukhawariji. Allah atuepushie shari zao.

Tunawambia hawa Masalafi kuwa nyinyi munawaona Maibadhi kuwa ni Makhawariji, sasa Sheikh wa Uislamu wenu Ibnu Taimia Al-Harrani anasema: 

ومما يدل على أن الصحابة لم يكفروا الخوارج أنهم كانوا يصلون خلفهم، وكان عبد الله بن عمر -رضي الله عنه- وغيره من الصحابة يصلون خلف نجدة الحروري ، وكانوا أيضا يحدثونهم ويفتونهم ويخاطبونهم ، كما يخاطب المسلم المسلم ، كما كان عبد الله بن عباس يجيب نجدة الحروري لما أرسل إليه يسأله عن مسائل ، وحديثه في البخاري. وكما أجاب نافع بن الأزرق عن مسائل مشهورة، وكان نافع يناظره في أشياء بالقرآن، كما يتناظر المسلمان. وما زالت سيرة المسلمين على هذا، ما جعلوهم مرتدين كالذين قاتلهم الصديق رضي الله عنه.

"Na katika yenye kujulisha kuwa Masahaba hawakuwakufurisha Makhawariji ni kusali kwao nyuma yao, allikua Abdullahi bin Omar -aridhiwe na Allah- na Masahaba wengine wanasali nyuma ya Najidatu Al-Haruri, na walikua wakizungumza nao na kuwajibu masuali yao na kuwazungumzisha kama Muislamu anavozungumza na Muislamu, kama alivokua Abdullahi bin Abbaas anamjibu Najidatu Al-Haruri pale alipompelekea masuala yake akimuuliza na hadithi yake imo ndani ya Bukhari, kama alivomjibu Naafii bin Al-Azraq kuhusu masuali mashuhuri, na alikua Naafii anajadiliana naye kuhusu vitu kwa kutumia Quraani kama wanavojadiliana Waislamu wawili, na mwendo wa Waislamu uliendelea hivi hivi hawakuwafanya kuwa wameritadi kama wale aliowapiga vita Assiddiqi Allah amridhie."

Twabaan maneno hayo yamewataja Najidatu bin Aaamir na Naafii bin Al-Azraq ambao ni vichwa vikuu hasa vya Makhawariji Maariqah ambao waliitakidi kuwa kila asiyekua katika safu zao huyo si Muislamu bali ni Mshirkina, na hali yao ilikua kama alivoieleza Ibnu Taimia Al-Harani:

فإنهم لم يكن أحد شرا على المسلمين منهم: لا اليهود ولا النصارى; فإنهم كانوا مجتهدين في قتل كل مسلم لم يوافقهم، مستحلين لدماء المسلمين وأموالهم وقتل أولادهم، مكفرين لهم، وكانوا متدينين بذلك لعظم جهلهم وبدعتهم المضلة. 

Hakika wao (Makhawariji) hakukua yoyote aliye shari zaidi kwa Waislamu kuliko wao, si Mayahudi wala Manasara, kwa hakika wao walikua wakifanya juhudi ya kumuua kila Muislamu asiyekubaliana na wao, wakihalalisha damu za Waislamu na Mali zao na kuua watoto wao, wakiwakufurisha (ukafiri wa kishirkina) nao walikua wakiitakidi hilo kwa sababu ya ujinga wao mkubwa na bidaa yao yenye kupoteza. [Minhaaj Sunna 5/593]

Hapa tunataka Waislamu waone wenyewe ni nani kati yetu sisi Ibadhi na hao Masalafi waliobeba sifa ya Ukhawariji?

Ni nani kati yetu aliyeshika mwendo wa Masahaba Allah awaridhie?

Masalafi wanaona kuwa haifai kusali nyuma yetu kwa sababu sisi Makafiri, ama sisi tunawaona wao wamepotea kwa sababu ya Taawili pofu na riwaya zilizopenyezwa ambazo wamehadaika nazo kwa kuziona kuwa zinatoka kwa Mtume S.A.W. ikawalazimu kuziitakidi kuwa ni Sunna, na hilo halitufanyi sisi kukataa kusali nyuma yao, wala kuwatoa nje ya duara la Uislamu kama wanavotufanyia sisi.

Bila shaka Masalafi wapo juu ya mwendo wa Kikhawariji, na fatwa hiyo aliyoitoa huyo Sheikh ni dalili ya wazi kabisa katika hilo.

Ama kuhusu Sahaba Khalifa wa tatu Othman bin Affaan R.A. na kudai kwake huyo Sheikh wa Kisalafi kuwa sisi tunaitakidi kuwa sahaba huyo ni mja wa Motoni.

Tunasema huo ni uzushi na kujitupia maneno bila ya hoja wala dalili.

Hakuna katika Ibadhi fundisho la ulazima wa kumuitakidi Othman au yoyote katika Masahaba kuwa ni mja wa Motoni, wala hakuna katika milango ya Itikadi yetu mlango wa kumkufurisha Sahaba yoyote si Othman wala yoyote, kilichopo katika Ibadhi ni rai ya baadhi ya Wanavyuoni wetu waliotangulia ambao walimuweka Sahaba huyo katika hukumu ya Baraa-atu Dhaahiri kwa kuona kwao kuwa aliingia katika makosa yaliyomuingiza katika hukumu ya ufasiki katika kipindi cha mwisho cha utawala wake, na makosa hayo ndiyo yaliyowapeleka Masahaba na Matabiina katika kuupinduwa utawala wake na kuuliwa kwa Khalifa huyo, kisha kutoa Baia ya Uongozi kwa Khalifa wa nne Aliy bin Abi Talib R.A.

Na hao hao walioshiriki katika kumpindua Othman bin Affaan walikua ni sehemu ya Jeshi la Aliy na Viongozi katika kipindi cha Utawala wake.

Na kama inavYojulikana kuwa Khalifa wa nne Aliy bin Abi Talib aliwapiga vita wote waliodai kisasi cha damu ya Othman bin Affaan ambao hukumu ya Uasi (Baghyu) ilithibiti kwao, kwani wao ndio waliodai kuwa Othman kauliwa kidhulma, nao ni Muawiyah na kundi lake lililomuua Sahaba Ammaar bin Yaasir Allah amridhie, na Sahaba huyu alipata bishara njema ya kuuliwa na kundi la waasi (Mabughaati) kwa kuambiwa na Mtume S.A.W.:

((ويح عمار تقتله الفئة الباغية يدعوهم إلى الجنة ويدعونه إلى النار))

((Ajabu ilioje kwa Ammmaar atauliwa na kundi la waasi anawaita katika Pepo nao wanamuita katika Moto))

[Bukhari 447]

Na sisi tunasema kuwa Wanavyuoni hao walikua katika rai ya Sahaba Ammaar bin Yaasir Allah amridhie.

Amesema Al-Albaani:

قال الإمام أحمد (4/197) وابن سعد في الطبقات (3/260-261) والسياق له: أخبرنا عثمان بن مسلم قال: أخبرنا حماد بن سلمة قال: أخبرنا أبو حفص وكلثوم بن جبير عن أبي غادية قال: "سمعت عمار بن ياسر يقع في عثمان يشتمه بالمدينة" قال قتوعدته بالقتل قلت: لئن أمكنني الله منك لأفعلن .......قلت: وهذا إسناد صحيح رجاله ثقات رجال مسلم وأبو الغادية هو الجهني وهو صحابي كما أثبت ذلك جمع. اهـ المراد منه

"Amesema Imam Ahmad (4/197) na Ibnu Saad katika Twabaqaat (3/260-261) na maelezo ni yake: Ametuambia Othman bin Muslim amesema: Ametuambia Hammaad bin Salamah amesema: Ametuambia Abu Hafsi na Kulthumu bin Jubair kutoka kwa Abu Ghaadiyah amesema: Nilimsikia Ammaar bin Yaasir akimshambulia -kwa maneno- Othman (bin Affaan), anamsema vibaya katika Mji wa Madina" Akasema: Nikamuahidi kumuua nikamwambia: Akinimakinisha Allah kwako kwa hakika nitalifanya.."

Ninasema (Al-Albani): Na hii ni sanadi sahihi wapokezi wake ni waaminiwa ni wapokezi wa Muslim, na Abu Al-Ghaadiyah ni Al-Juhani naye ni Sahaba kama walivothibitisha hilo wengi" [Rej. Al-Albani - Silsilatu Ahaadithi Sahihah wa Shaiun min Fiqhiha wa Fawaaidiha 5/18-19].

Likifahamika hili ijulikane kuwa yoyote aliyemo katika hukumu ya Baraa-atu Dhaahiri -kwa mujibu wa mafundisho ya chuo cha Ibadhi katika Uislamu- hakatiwi adhabu ya moto isipokua kwa sharti, nayo ni ikiwa uhakika wake utakua sawa na udhahiri wake; hayo ni kwa sababu hukumu ya Baraa-atu Dhaahiri huwa kwa mujibu wa ilivodhihiri mbele ya Muumini mwenye kuitoa kwa muhusika wake tu, na inawezekana uhakika wa muhusika ukawa tafauti na udhahiri wake, na uhakika ni ghaibu haijulikani isipokua kwa andiko mahususi -kwa muhusika- lisilo na uwezekano wa kukosewa, wala kupenyezwa, wala kuzuliwa, na hilo halipatikani ila kwa Aya au Hadithi Mutawaatiri au kumsikia Mtume mwenyewe S.A.W. ana kwa ana.

Na maarufu katika mafundisho ya Ibadhi kuwa upo uwezekano wa aliyemo katika Baraa-atu Dhaahiri akawa katika Walaayah na Maridhio ya Allah mtukufu; kwani inawezekana kuwa alijiwahi kwa kutubia, na toba hiyo ikafichika, isijulikane, na hapo ukawa uhakika wake ni kinyume na udhahiri wake.

Vile vile uwezekano wa aliyemo katika Walaayatu Dhaahiri kuwa kuwemo katika Baraa-a; kwani inawezekana akawa amejitosa kwa siri katika dhambi kubwa aliyokaidika kutubia kwayo hadi kufa bila kujulikana, basi upo uwezekano wa kuwa uhakika wa mja ni kinyume na dhahiri yake.

Na ikiwa Othman bin Affan kweli kabashiriwa Pepo kama wanavodai, basi atakua alijiwahi kwa toba kabla ya kifo chake, kwa hiyo hajakosekana katika Walaayatu Al-Jumlah wa Wanavyuoni hao hao waliomuweka katika Baraatu Dhaahiri.

Kutokana na hapa unadhihiri wazi wazi uzushi wa neno la Sheikh huyo wa Kisalafi pale aliposema kuwa Ibadhi wanaitakidi kuwa Othman ni mja wa motoni.

Wallahu Al-Mustaan.

Ama suala la kumtakasa Allah na uwezekano wa kuonekana, hilo halina shaka yoyote nalo ni haki, kwani Allah si mwili wa kuzingirwa na eneo kama mwezi mdande kama zinavyoeleza riwaya zao, ametakasika Allah na hilo utakaso mkubwa kabisa, hakika yeye ameshajisifu katika Kitabu chake kuwa:

((لَّا تُدْرِكُهُ الْأَبْصَارُ)) 

((Havimdiriki vyenye kuona)) [Al-Anaam 103]

Kwa hiyo Allah mtukufu ametakasika na uwezekano wa kudirikiwa na vyenye kuona, ikiwa ni macho au moyo au chochote kile, na bila shaka chenye kuona kikimuona kitakua kimemdiriki; kwani kuona ndiko kudiriki kwake ambako Allah amejitakasa nako, na hili linahakikisha kuwa kutakasika Allah na uwezekano wa kuonekana si kwa udhaifu wa viumbe, bali ni kwa ukamilifu wake Allah mtukufu kama ilivokuja katika Hadithi sahihi:

النبي صلى الله عليه وسلم قال: "جنتان من فضة آنيتهما وما فيهما وجنتان من ذهب آنيتهما وما فيهما وما بين القوم وبين أن ينظروا إلى ربهم إلا رداء الكبر على وجهه في جنة عدن" 

Amesema Mtume (s.a.w): ((Na hakuna baina ya watu wa peponi na kumuona Mola wao isipokuwa rubega ya kiburi katika dhati yake ndani ya Pepo ya Adeni)) [Bukhari 4878, 4879, 7444 Muslim 180]

Rubega ya kiburi ni kiwakilishi cha sifa ya kiburi, nayo ni sifa ya Dhati ya Allah mtukufu, na madhumuni ya Hadithi hii ameyabainisha Al-Haafidh Ibnu Hajar Al-Asqalani katika Sherhe yake Fat-hu Al-Baari naye ni mwanachuoni wa Kisunni maarufu amesema:

"ومعنى حديث الباب أن مقتضى عزة الله واستغنائه أن لا يراه أحد"

((Na maana ya hadithi ya mlango huu ni kuwa: KWA MUJIBU WA UTUKUFU WA ALLAH NA KUJITOSHELEZA KWAKE ASIONEKANE NA YOYOTE)) [Ibnu Hajjar Al-Asqakani Fat-hu 13/433]. 

Ama neno lao kuwa imekuja bishara ya kumuona Allah kama unavoonekana Mwezi mdande nayo imejulishwa na Aya isemayo:

((وُجُوهٌ يَوْمَئِذٍ نَّاضِرَةٌ   *  إِلَىٰ رَبِّهَا نَاظِرَةٌ ))

((Nyuso siku hiyo zitan`gaa * Kwa Mola wake tu zitaangalia)).

Tunasema: Bishara hiyo iliyokuja katika Hadithi uhakika wake ni penyezo batili, basi tunamtakasa nalo Mtume wa Allah S.A.W., ikiwa wao wamehadika nalo na kuliona ni sahihi shauri yao, lakini uhakika utabakia kuwa sisi Maibadhi halikutuhadaa kwa sababu ya kujifunga kwetu vizuri sana na Kitabu cha Allah na Sunna ya Mtume S.A.W.

Kwa hakika Mtume S.A.W. hahusiki kabisa na hadithi hizo za kuonekana Allah mtukufu kama unavoonekana mwezi mdande, ametakasika Allah na kufanana na chochote katika viumbe vyake, si mwezi mdande wala mtu wala chochote kinachozingirwa na eneo, na yeye ametakasika na uwezekano wa kupatwa na uoni wa chenye kuona si jicho wala chengine chochote, hakika Allah hajafanana na chochote vipi aonekane na kiumbe?!!!.

Ama kuhusu Aya tukufu, kwa hakika huo mtazamo uliotajwa humo ni mtazamo wa kusubiria thawabu alizozitayarisha Allah mtukufu, wala si mtazamo wa kumuona Allah mtukufu kama yalivyothibiti hayo katika riwaya za Mujahid na Abu Swaalih ambao walichukua elimu zao kutoka kwa Masahaba moja kwa moja; kwa hakika Allah ametakasika na uwezekano wa kudirikiwa na vyenye kuona, na bila shaka vikimuona vitakua vimemdikiri kwani huko ndiko kudiriki kwake.

Ama kuhusu Shafaa ya Mtume S.A.W.  na kubakia waovu ndani ya Jahannamu milele.

Ijulikane kuwa sisi tunaamini kuwepo kwa Shafaa ya Mtume S.A.W. lakini si kwa Madhalimu walio wakaidi wa kutubia, bali ni kwa wale waliotubia au waliokua katika maasi yaliyofichika kwao bila kujua hukumu yake hali ya kuwa nyoyo zao ziko safi baina yao na Allah mtukufu.

Ama aliyejitosa katika sifa ya Ibilisi maluuni ya kukaidika kutubia kwa dhambi anaijua, kwa hakika huyo ameangamia motoni milele, kwani Allah mtukufu ameshatuambia wazi wazi katika Kitabu chake kuwa

((بِئْسَ الِاسْمُ الْفُسُوقُ بَعْدَ الْإِيمَانِ ۚ وَمَن لَّمْ يَتُبْ فَأُولَٰئِكَ هُمُ الظَّالِمُونَ))

((Ni baya mno jina la Ufasiki baada ya Imani, na asiyetubia basi hao ndio Madhalimu)) [Al-Hujuraati 11]

Naye ametuambia pia kuhusu hali ya Madhalimu siku ya Kiama:

(( مَا لِلظَّالِمِينَ مِنْ حَمِيمٍ وَلَا شَفِيعٍ يُطَاعُ ))

((Hawana Madhalimu rafiki kipenzi yoyote wala muombezi yoyote atakayetiiwa.)) [Ghaafir 18]

Ama suala la kutoka motoni hilo kwetu hakuna, kwa sababu sisi hatuitakidi kuingia motoni isipokua kafiri tu, naye ni kila aliyejitosa katika madhambi makubwa na kukaidika kutubia hadi kufikiwa na kifo, ni sawa ukafiri wake ukawa wa dhambi ya kishirkina au kwa dhambi isiyokua ya kishirikina.

Na sisi tunawaonea huruma hao waliopatwa na maradhi ya Ahalu Al-Kitaabu ambayo Allah mtukufu ameshayaeleza katika Kitabu chake wazi wazi, nayo ni:

((ذَلِكَ بِأَنَّهُمْ قَالُوا لَنْ تَمَسَّنَا النَّارُ إِلَّا أَيَّامًا مَعْدُودَاتٍ وَغَرَّهُمْ فِي دِينِهِمْ مَا كَانُوا يَفْتَرُونَ))

((Hayo ni kwa sababu wamesema hautatugusa moto isipokua siku chake. Na yakawahadaa katika Dini yao waliyokua wakiyazua))

[Aala Imraana 24]

Na kama alivoyaeleza Allah mtukufu katika Kitabu chake:

))فَخَلَفَ مِنْ بَعْدِهِمْ خَلْفٌ وَرِثُوا الْكِتَابَ يَأْخُذُونَ عَرَضَ هَذَا الْأَدْنَى وَيَقُولُونَ سَيُغْفَرُ لَنَا((

((Na kilifuatia baada yao kizazi kibaya waliorithi Kitabu wakawa wanachukua pato hili la chini na wanasema: TUTASAMEHEWA SISI))

[Al-Aarafi 169].

Allah atuepushe na maradhi hayo, kwa hakika Mtume S.A.W. hakuja na mafundisho ya kuuambukiza Umma wake maradhi ya kiitikadi za Umma zilizopita.

Wallahu Al-Muwaffiq.

Wallahu Aalamu.

Published By Sh. Hafidh Al-Sawafi

SUALI:

Asalamu Alaykum.

Tupeni ukweli hasa wa kisa cha Mtume Mussa A.S.W. bila kuangalia Madhehebu, matokeo ya Miiqaati yalikua mangapi? Moja au Mbili?

JAWABU:

Waalaykum salamu wa rahmatullahi wa barakatuh.

Kwanza: Ifahamike kuwa lengo letu si kutetea Madhehebu bali lengo letu ni HAKI KWA DALILI na katika msingi huo Ibadhi imesimama bila upendeleo wala kasumba, basi ijulikane kuwa yoyote atakayetufikishia haki kwa dalili sisi hatutafanya kiburi mbele ya haki hiyo, na kama yeye ni mbatilifu basi ubatilifu wake ni katika jengine sio katika alilopatia haki ndani yake.

Pili: Ama kuhusu Miiqaati ya Mtume Mussa A.S.W. ilikua ni mara ngapi?

Sisi kabla tulikua tukiona kuwa ni mara mbili ambazo zilikusanya yeye na wateuliwa sabiini katika kaumu yake, lakini baada ya kufuatilia jambo hili kupitia Quraani tukufu na hakikisho za Al-Allaamah Samaahatu Sheikh Al-Khalili -Allah amuhifadhi- katika Kitabu chake Burhaanu Al-Haqi tumefikia katika neno la haki la kusema kuwa tokeo la Miiqaati lilikua mara moja tu iliyokusanya Mtume Mussa A.S.W. na wateuliwa sabiini wa Kaumu yake na wakati wa kutokezea kwake ndipo Kaumu ya Mtume Mussa walipoabudia ndama aliyetengezwa na Saamiriyu -Allah amlaani-.

Amesema Al-Allaamah Al-Khalili Allah amuhifadhi:

"وقد علمت أن موسى عليه السلام لم يكن وحيدا عندما أتى إلى ميقات ربه بل كان معه سبعون رجلا ممن اختارهم كما نص عليه القرآن وسيأتي إن شاء الله أن هؤلاء كانوا معه في نفس الميقات الذي سأل فيه الرؤية" اهـ برهان الحق 4/115

"Kwa hakika umeshajua kuwa Mussa A.S. hakuwa peke yake pale alipokwenda katika Miiqaati ya Mola wake, bali walikua pamoja naye wanaume sabiini aliowateua kama ilivoeleza hilo Quraani, na itakuja -in shaa Allah- kuwa hawa (sabiini) walikua pamoja naye katika Miiqaati hiyo hiyo ambayo aliomba ndani yake kumuona Allah" [Burhaanu Al-Haqi 4/115].

Anatuambia Allah mtukufu katika Suuratu Al-Baqarah Aya 51:

وَإِذْ وَاعَدْنَا مُوسَىٰ أَرْبَعِينَ لَيْلَةً ثُمَّ اتَّخَذْتُمُ الْعِجْلَ مِن بَعْدِهِ وَأَنتُمْ ظَالِمُونَ

((Na tulipomuahidi Mussa misiku arubaini kisha mukajifanyia ndama baada yake hali ya kuwa nyinyi ni Madhalimu))

Na haya ndiyo aliyotueleza Allah mtukufu katika Suuratu Al-Aarafi Aya ya 142

وَوَاعَدْنَا مُوسَىٰ ثَلَاثِينَ لَيْلَةً وَأَتْمَمْنَاهَا بِعَشْرٍ فَتَمَّ مِيقَاتُ رَبِّهِ أَرْبَعِينَ لَيْلَةً ۚ وَقَالَ مُوسَىٰ لِأَخِيهِ هَارُونَ اخْلُفْنِي فِي قَوْمِي وَأَصْلِحْ وَلَا تَتَّبِعْ سَبِيلَ الْمُفْسِدِينَ 

((Na tulimuahidi Muusa misiku thalathini na tukaitimiza kwa kumi basi ikatimia Miikaqi ya Mola wake misiku arubaini, na alisema Mussa kumwambia Haaruuna nduguye bakia katika kaumu yangu na uboreshe na usijefuata njia ya waharibifu))

 Na Allah ametubainishia kuwa Miiqaati yake hii aliyomuahidi Mtume wake Mussa A.S.W. ilikusanya wateuliwa sabiini katika kaumu yake ametueleza hayo katika Suuratu Al-Aarafi Aya 155

وَاخْتَارَ مُوسَىٰ قَوْمَهُ سَبْعِينَ رَجُلًا لِّمِيقَاتِنَا ۖ فَلَمَّا أَخَذَتْهُمُ الرَّجْفَةُ قَالَ رَبِّ لَوْ شِئْتَ أَهْلَكْتَهُم مِّن قَبْلُ وَإِيَّايَ ۖ أَتُهْلِكُنَا بِمَا فَعَلَ السُّفَهَاءُ مِنَّا ۖ إِنْ هِيَ إِلَّا فِتْنَتُكَ تُضِلُّ بِهَا مَن تَشَاءُ وَتَهْدِي مَن تَشَاءُ ۖ أَنتَ وَلِيُّنَا فَاغْفِرْ لَنَا وَارْحَمْنَا ۖ وَأَنتَ خَيْرُ الْغَافِرِينَ

((Na alichagua Mussa kaumu yake wanaume sabiini kwa ajili ya Miiqaati yetu, basi waliposhikwa na mtikiso mkubwa alisema: Ewe Mola lau ungalitaka ungewaangamiza hapo kabla na mimi, utatungamiza kwa yaliyofanywa na masafihi miongoni mwetu, halikua hilo ila ni mtihani wako unampoteza kwa hilo umtakae na unamuongoa umtakae, wewe ndiye mtawalia wetu tusamehe na uturehemu na wewe ndiye mbora wa wanaosamehe)).

Utata uliowapata wenye kusema kuwa Aya hii ya wateuliwa sabiini ilikua ni kwenda katika Miiqati kwa mara ya pili umetokana na kuja kwake baada ya Aya inayoeleza tokeo la kuabudia ndama, ndio wakasema kuwa lilikua ni tokeo la kwenda kutaka msamaha kwa kosa la kuabudia ndama, hata wamesema kuwa sabiini hawa ni miongoni mwa wale waliokataa kuabudia ndama walikwenda kwa ajili ya kuwaombea msamaha wenzao, lakini utata huo unaondoka tunaposoma katika mwanzo wa Aya kuwa Mussa A.S.W. aliteuwa wanaume sabiini kwa ajili ya Miiqati ya Allah mtukufu, bila shaka Miiqaati hiyo ndiye ileile ya misiku arubaini kwa sababu ndiyo Miiqaati pekee aliyoahidiwa Mtume Mussa A.S.W. na mpangilio wa Aya si dalili kwa sababu Quraani haijalazimika na kuelezea visa kwa kufuatiliza mtiririko wa matokeo yake, amesema Al-Allaamah Al-Khalili -Allah amuhifadhi-:

"أما ما يزعمونه من أن هذه الرجفة ما كانت على سؤال الرؤية وإنما كانت على عبادة العجل فهو دعوى تنقضها نصوص الكتاب العزيز إذ ليس في الكتاب ما يدل قط على أنهم عوقبوا بالرجفة على عبادة العجل وإنما كانت عقوبتهم عليها بأمرهم أن يقتلوا أنفسهم -أي أن يقتل بعضهم بعضا- وكل النصوص التي دلت على أخذهم بالصاعقة إنما جاءت مقرونة بسؤال الرؤية" اهـ برهان الحق 4/121

"Ama wanayoyadai kuwa huu mtikiso mkubwa (Al-Rajfah) haukua kwa ombi za kumuona Allah lakini yalivo hasa ilikua kwa kuabudia ndama, hayo ni madai yanayobatilishwa na maelezo ya Kitabu Kitukufu (Quraani) kwani hakuna kabisa katika Kitabu (Quraani) yenye kujulisha kuwa wao walitiwa adabu ya mtikiso mkubwa kwa kuabudia ndama na yalivyo adabu ya kuabudia ndama ilikua kwa kuamrishwa kuziua nafsi zao - yaani kuuana wao kwa wao- na maandiko yote yanajulisha kuwa kuchukuliwa kwao kwa mshituko mkubwa kulipatikana tu kwa kuambatana na ombi la kumuona Allah" [Burhaanu Al-Haqi 4/121]

Na katika yenye kujulisha uhakika huu ni kuwepo athari zenye kujulisha kuwa mtikiso mkubwa (Al-Rajfah) ni kwa sababu ya hao sabiini kutaka kumuona Allah mtukufu.

Na ndio maana Al-Allaamah Al-Khalili Allah amuhifadhi akasema:

وما ذكروه من دعوى كون هذا الميقات ميقاتا آخر جاء إليه موسى بخيار بني إسرائيل للاعتذار من عبادة العجل ليس له ما يعززه ولا ما يشير إليه في القرآن من قريب ولا بعيد، إذ لم يأت ما يدل على أن بني إسرائيل خرجت منهم طائفة مع موسى عليه السلام للاعتذار عن عبادتهم العجل، على أن خروجهم -لو كان- هو توبة وابتغاء لعفو الله تعالى ورحمته لكان الأحرى أن يعاملوا باللطف لا أن يؤخذوا بالرجفة، فكيف تكون عقوبتهم إبَّان توبتهم وابتغائهم فضل الله ويخص بها أولئك الذين خرجوا للاعتذار والتوبة ولا تكون لجماهريهم التي أقدمت على الباطل وأصرت على اتخاذ إله من دونه سبحانه في حال تلبسها بذلك؟ أويُعَدُّ هذا من العدل الإلهي ومن سننه تعالى في معاملته للمصرين والتائبين بحيث يؤاخذ التائبين في حال التوبة ويمهل المصرين في إصرارهم؟! كلا، إنما هو من قلب الحقائق لإدحاض الحق بالباطل.

"Ama waliyoyataja ya madai ya kuwa Miiqaati hii ni Miiqaati nyengine aliyoijia Mussa akiwa na wabora wa Bani Israili kwa ajili ya kuomba msamaha kwa kuabidia ndama, hayo hayana ya kuyapa nguvu wala yenye kuyaashiria katika Quraani, si karibu wala mbali, kwa sababu hayakuja kabisa yenye kujulisha kuwa Bani Israili kulitoka kati yao kundi pamoja na Mussa A.S. kwa ajili ya kuomba msamaha kutokana na kuabudia kwao ndama, juu kuwa kutoka kwao huko -lau kulipatikana- kulikua ni kwa kutubia na kutaka usamehevu wa Allah mtukufu na rehema zake basi kungestahiki zaidi kufanyiwa upole na sio kuchukuliwa na Al-Rajfah (Mtikiso mkubwa wa kushitua), basi vipi iwe kuadhibiwa kwao kwa kutubia kwao na kutafuta kwao fadhila za Allah na lihusishwe hilo la kuadhibiwa wale waliotoka kwa ajili ya kuomba msamaha na kutubia wala haliwi kwa wengi wao waliobakia ambao ndiwo walioiingia batili na wakashilia katika kujifanyia mungu pasina Allah mtukufu aliyetakasika? Hivi linaweza kuhesabiwa hilo kuwa ni katika Uadilifu wa Kiungu na kuwafanyia kwake waliokaidika katika dhambi na wenye kutubia kiasi cha kuwatia adabu waliotubia katika hali ya kutubia kwao na kuwaacha wakaidi wa kuacha dhambi katika hali ya kukaidikwa kwao?!!! Hapana hilo haliwezekani lakini yalivo hasa hilo ni kupindua uhakika kwa ajili ya kuvunja haki kwa batili" [Burhaanu Al-Haqi 123].

Published By Sh. Hafidh Al-Sawafi

SUALI:

Asalamu alaykum wa rahmatullahi wa barakatuh.

Tumefikiwa na utata kuhusu suala la ujio wa Issa Mwana wa Mariaym A.S. kwani Aya ya 61 ya Suuratu Zukhruf inasema: ((Na hakika yeye ni elimu ya Kiama basi musiwe na shaka nacho na nifuateni hii ndiyo njia iliyonyooka)) pia Imekuja riwaya katika Bukhari inayolazimisha kushuhudia pamoja na Shahada mbili kuwa Issa Mwana wa Mariyam ni neno la Allah na roho wake na na Mtume wake, na inafahamika kuwepo hadithi kadhaa zenye bishara ya ujio wa Issa A.S. kabla ya kusimama Kiama, na tumesikia wenye kusema kuwa Mtume wetu Muhammad S.A.W. alisema kuwa yeye ni wa mwanzo kumfuata Issa mwana wa Mariyam A.S. Duniani na Akhera.

Tunaomba ufafanuzi katika hili.

JAWABU:

Hakika sisi Waislamu tunaamini kuwa Issa Mwana wa Mariyam A.S. ni Mtume wa Allah na Roho wake na Neno lake aliloliweka kwa Marayam naye ni Mja wa Allah aliyetumwa kwa Wana wa Israili nao ni Watoto wa Mtume Yaaqoob A.S. basi Issa Mwana wa Mariyam ni kiumbe si Mungu wala Mwana wa Mungu, na Allah mtukufu ametuambia hali ya Manasara (Wakiristo) katika neno lake: 

((لَقَدْ كَفَرَ الَّذِينَ قَالُوا إِنَّ اللَّهَ هُوَ الْمَسِيحُ ابْنُ مَرْيَمَ ۖ وَقَالَ الْمَسِيحُ يَا بَنِي إِسْرَائِيلَ اعْبُدُوا اللَّهَ رَبِّي وَرَبَّكُمْ ۖ إِنَّهُ مَن يُشْرِكْ بِاللَّهِ فَقَدْ حَرَّمَ اللَّهُ عَلَيْهِ الْجَنَّةَ وَمَأْوَاهُ النَّارُ ۖ وَمَا لِلظَّالِمِينَ مِنْ أَنصَارٍ* لَّقَدْ كَفَرَ الَّذِينَ قَالُوا إِنَّ اللَّهَ ثَالِثُ ثَلَاثَةٍ ۘ وَمَا مِنْ إِلَٰهٍ إِلَّا إِلَٰهٌ وَاحِدٌ ۚ وَإِن لَّمْ يَنتَهُوا عَمَّا يَقُولُونَ لَيَمَسَّنَّ الَّذِينَ كَفَرُوا مِنْهُمْ عَذَابٌ أَلِيمٌ * أَفَلَا يَتُوبُونَ إِلَى اللَّهِ وَيَسْتَغْفِرُونَهُ ۚ وَاللَّهُ غَفُورٌ رَّحِيمٌ * مَّا الْمَسِيحُ ابْنُ مَرْيَمَ إِلَّا رَسُولٌ قَدْ خَلَتْ مِن قَبْلِهِ الرُّسُلُ وَأُمُّهُ صِدِّيقَةٌ ۖ كَانَا يَأْكُلَانِ الطَّعَامَ ۗ انظُرْ كَيْفَ نُبَيِّنُ لَهُمُ الْآيَاتِ ثُمَّ انظُرْ أَنَّىٰ يُؤْفَكُونَ))

(((Kwa hakika wamekufuru wale wenye kusema: "Hakika Allah ndiye Masihi Mwana wa Mariyam." Na Masihi alisema: "Enyi Wana wa Israili muabuduni Allah Mola wangu na Mola wenu, Hakika yoyote mwenye kumshirkisha Allah huyo Allah amemuharamishia Pepo na makazi yake ni Moto. Na Madhalimu hawana wa kuwanusuru." * Kwa hakika wamekufuru wenye kusema: "Hakika Allah ni mmoja wa watatu." Hali ya kuwa hakuna mungu yoyote isipokua mungu mmoja tu, na kama hawakuacha hayo wanayosema itawashika waliokufuru miongoni mwao adhabu iumizayo sana *  Hivi hawatubii kwa Allah na wakamuomba msamaha?!! Na Allah ni msamehevu sana mrehemevu sana * Hakua Masihi Mwana wa Mariyam isipokua ni Mtume tu, wamepita kabla yake Mitume, na Mama yake ni mkweli. Walikua wote wawili wakila chakula. Tizama jinsi tunavowabainishia Ishara kisha tizama vipi wanavogeuzwa)) [Maaidah 72 - 75].

Kwa hiyo Itikadi ya Utatu. na Itikadi kuwa Mwana wa Mariyam A.S. ni Mungu, zote hizo ni itikadi ukafiri ushirikina, wala hakuna tafauti katika hili ndani ya safu za Waislamu, sasa yoyote yule mwenye kutafuta wokozi katika Ukiristo na msalaba huyo anatopea katika kiza cha Ukafiri wa Kishirikina, wala hakuna shaka katika hili.

Ama kuhusu Aya za Suuratu Zukhrufi, kwa hakika Aya hizo hazina ndani yake madai ya Wakiristo, na sisi ni wajibu wetu ni kuziangalia vizuri.

((وَلَمَّا ضُرِبَ ابْنُ مَرْيَمَ مَثَلًا إِذَا قَوْمُكَ مِنْهُ يَصِدُّونَ * وَقَالُوا أَآلِهَتُنَا خَيْرٌ أَمْ هُوَ ۚ مَا ضَرَبُوهُ لَكَ إِلَّا جَدَلًا ۚ بَلْ هُمْ قَوْمٌ خَصِمُونَ * إِنْ هُوَ إِلَّا عَبْدٌ أَنْعَمْنَا عَلَيْهِ وَجَعَلْنَاهُ مَثَلًا لِّبَنِي إِسْرَائِيلَ * وَلَوْ نَشَاءُ لَجَعَلْنَا مِنكُم مَّلَائِكَةً فِي الْأَرْضِ يَخْلُفُونَ * وَإِنَّهُ لَعِلْمٌ لِّلسَّاعَةِ فَلَا تَمْتَرُنَّ بِهَا وَاتَّبِعُونِ ۚ هَٰذَا صِرَاطٌ مُّسْتَقِيمٌ))

((Na alipopigwa Mwana wa Mariyam mfano mara watu wako wakawa ni wenye kupiga kelele * Na wamesema: "Hivi Miungu yetu ni bora zaidi au yeye huyo?!!" hawajakupigia (mfano) huo isipokua ni ubishi tu, bali wao ni watu wagomvi mno * Hakua yeye (Mwana wa Maryam) ila ni mja tuliyemneemesha na kumfanya kuwa mfano kwa Wana wa Israili * Na lau tungalitaka -kwa hakika- tungalifanya miongoni mwenu Malaika katika Ardhi wakiwafuatia * Na hakika yo ni elimu ya Wakati (Kiama) basi musiwe na shaka nacho na nifuateni. Hii ndiyo njia iliyonyooka)) [Zukhruf 57-61]

Inafahamika kuwa Mtume wetu Muhammad S.A.W. alipambana na Waarabu waliokua wakiabudu Masanamu kwa hiyo waliposikia habari za Mtume Issa A.S. katika mfundisho yake S.A.W. wakaionea wivu Miungu yao na kumtuhumu Mtume Muhammad S.A.W. kuwa anataka kuwaingiza katika Ibada za kumuabudia Issa A.S. kama Manasara (Wakiristo). Ndio wakasema:  (("Hivi Miungu yetu ni bora zaidi au yeye huyo?!!")). Kwa hiyo inafahamika wazi kuwa Aya hizi zimekuja kumuelezea Mja huyo (Issa Mwana wa Mariyam A.S.) na kuvunja utata wa Washirikina hao wenye kuabudia Masanamu.

Ama kuhusu Aya inayosema: ((Na hakika yo ni elimu ya Wakati (Kiama) basi musiwe na shaka nacho na nifuateni. Hii ndiyo njia iliyonyooka)) imeelezwa kuwa kusudio la elimu ya Kiama ni Quraani tukufu, na imesemwa kuwa kusudio ni Issa Mwana wa Maryam, pia inawezekana kuwa kusudio ni Mtume wetu Muhammad S.A.W. na tafsiri yoyote katika hizi tatu hakuna yenye bishara ya ujio wa Issa Mwana wa Mariyam A.S. kabla ya Kiama.

Kwa hakika Allah ameteua Manabii na akajaalia miongoni mwao Mitume, wa mwanzo wao ni Baba yetu Adamu A.S. na mwisho wa Manabii ni Mtume wetu Muhammad S.A.W. naye amesema: ((Hakuna nabii yoyote baada yangu)) pia Allah mtukufu amesema:

((مَّا كَانَ مُحَمَّدٌ أَبَا أَحَدٍ مِّن رِّجَالِكُمْ وَلَٰكِن رَّسُولَ اللَّهِ وَخَاتَمَ النَّبِيِّينَ ۗ وَكَانَ اللَّهُ بِكُلِّ شَيْءٍ عَلِيمًا))

((Hakua Muhammad baba wa yoyote katika wanaume wenu lakini ni Mtume wa Allah na khitimisho (mwisho) wa Manabii)) [Al-Ahzaabi 40]

Na Mtume wetu S.A.W. amesema: "Niletumwa mimi hali yangu na Kiama ni kama hivi viwili" Akanyanyua Mtukufu wa daraja S.A.W. vidole vyake viwili cha kuashiria na cha katikati.

Kwa hiyo hakuna Nabii yoyote baada yake S.A.W., si Issa A.S. wala yoyote yule.

Ama kuhusu kuwa ni elimu ya Kiama, ni kwa sababu kila Nabii alipotumwa alikua ni elimu ya kukaribia Kiama; kwani hakika yao ni vituo na awamu za Sheria, basi kituo cha mwisho na awamu ya mwisho ni Mtume wetu Muhammad S.A.W. wala hakuna tatizo kusemwa kuwa Issa A.S. au Mussa. A.S. au yoyote katika Mitume na Manabii ni elimu ya Kiama; kwani alikua ni kituo cha kujulisha kukaribia Kiama. Hili liko wazi kabisa wala halina utata wowote.

Wala sisi hatujaona katika Quraani bishara yoyote ya Ujio wa Issa Mwana wa Mariyam A.S. bali udhahiri wake ni kuwa ameshakufa na kurejeshwa roho yake kwa Mola wake kama ilivyo hali za nyoyo zote za Waja wema kama ilivoelezwa katika Aya ya mwisho ya Suuratu Al-Fajri.

Quraani tukufu imetueleza kuwa Issa Mwana wa Mariyam A.S. hakuuliwa wala hakusulubiwa, hili halina shaka yoyote, lakini hakuna sehemu yoyote katika Quraani iliyosema kuwa Masihi Issa Mwana wa Maryam hakufa, bali udhahiri wake ni kuwa Allah mtukufu ndiye aliyemfisha bila ya kuuliwa na maadui zake wala kusulubiwa, kama ilivo katika Aya ya 55 ya Suuratu Aal Imaraana. na Aya ya 157 ya Suuratu Nisaa.

Ama kuhusu riwaya inayosema: ((Anaa aulaa bi Issaa bin Maryama)) kwa hakika Allah mtukufu ameteremsha katika Quraani ((Annabiyyu aulaa bi l-muuminina)) [Al-Ahzaabi 6]. Na maana yake ni moja. Kwa hiyo amesema: ((Mimi (Nabii) nina haki zaidi kwa Issa Mwana wa Mariyam)) na Allah amesema kuhusu Nabii wake S.A.W.: ((Nabii ana haki zaidi kwa Waumini)) nayo ni haki ya kuaminiwa na kufuatwa na kunusuriwa kama ilivyo katika Ayatu Al-Miithaaqi.

((وَإِذْ أَخَذَ اللَّهُ مِيثَاقَ النَّبِيِّينَ لَمَا آتَيْتُكُم مِّن كِتَابٍ وَحِكْمَةٍ ثُمَّ جَاءَكُمْ رَسُولٌ مُّصَدِّقٌ لِّمَا مَعَكُمْ لَتُؤْمِنُنَّ بِهِ وَلَتَنصُرُنَّهُ ۚ قَالَ أَأَقْرَرْتُمْ وَأَخَذْتُمْ عَلَىٰ ذَٰلِكُمْ إِصْرِي ۖ قَالُوا أَقْرَرْنَا ۚ قَالَ فَاشْهَدُوا وَأَنَا مَعَكُم مِّنَ الشَّاهِدِينَ))

((Na Allah alipochukua ahadi nzito ya Manbii ya kuwa nitakapokupeni katika Kitabu na Hekima kisha akakujieni Mtume mwenye kusadikisha yaliyo pamoja nanyi ya kuwa mutamuamini (Mtume huyo) na kumnusuru. Akasema: Jee!! Mumekiri na mumechukua juu ya hilo agizo langu? Wakasema: Tumekiri. Akasema: Basi Shuhudieni na mimi ni pamoja na nyinyi katika Mashahidi)) [Aala- Imraana 81].

Na ndiyo Itikadi ya Waislamu wenye kuitakidi ujio wa Issa Mwana wa Mariyam A.S. kabla ya kusimama Kiama kupitia mapokezi ya riwaya ambazo sisi hatuoni usahihi wake. Hakika wao wanaitakidi kuwa yeye atakua ni Mfuasi wa kufanyia kazi Sheria ya Mtume wa Ahadi ambae ni Muhammad S.A.W.

Wabillahi Taufiqi.

Published By Sh. Hafidh Al-Sawafi

Allah mtukufu ametueleza katika Kitabu chake kuwa Nabii Yusuf alayhi salaam kuwa alimkusudia hasa mwanamke aliyemtaka kwa uchafu wa zinaa, tunapenda kujua kuhusu kududio lake kwani tunaambiwa kuwa tafsiri ya Jalaleni inasema kuwa alikusudia kumuendea yule mke wa mkuu wa Misri.

Asante.

JAWABU:

Bila shaka Mtume Yusuf alayhi salam ni mteuliwa wa Allah mtukufu cheo chake katika uchamungu ni cha juu sana, wala hakuna katika Quraani maelezo ya kuwa alikusudia kufanya uchafu wa zinaa wala baya lolote, na ikiwa sisi tunaliona suala la kuingia katika uzinifu ni gumu sana kwa Mchamungu wa kawaida basi vipi liwezekane kwa mteuliwa wa Allah mtukufu katika Manabii wake na Mitume alayhimu salaatu wa salaamu?

Ikiwa katika Tafsiri ya Jalaleni yako hayo au kwa mfasiri mwengine yoyote sisi hiyo si kauli yetu wala haitakua kauli yetu.

Samaahatu Sheikh Ahmad Al-Khalili Allah amuhifadhi na atufae kwa elimu yake amesema kuwa hizo ni riwaya za Ahalu Al-Kitabi ndizo zilizoathiri kwa baadhi ya wafasiri katika suala hili, ama uhakika ni kuwa mwenye kusema neno hilo anakadhibishwa na Allah mtukufu, pia anakadhibishwa na Mtume Yusuf alayhi salaam mwenyewe, vile vile anakadhibishwa na mwanamke husika Mke wa mkuu wa Misri, pia amekadhibishwa na wanawake waliojikata mikono yao, na sio hapo tu bali anakadhibishwa na Iblisi mlaaniwa pia.

Ama kukadhibishwa na Allah ni kaatika neno lake:

كَذَٰلِكَ لِنَصْرِفَ عَنْهُ السُّوءَ وَالْفَحْشَاءَ ۚ إِنَّهُ مِنْ عِبَادِنَا الْمُخْلَصِينَ 

(( Namna hiyo ili tumuweka mbali na ubaya na uchafu hakika yeye ni miongoni mwa waja wetu waliotakaswa)) [Yusuf 24].

Ama kukudhibishwa madai hayo na Mtume Yusuf alayhi salaam mwenyewe ni katika neno lake:

قَالَ هِيَ رَاوَدَتْنِي عَن نَّفْسِي

((Hakika yeye ndiye aliyenitaka bila mimi kumtaka)) [Yusuf 26.]

Na neno lake:

قَالَ رَبِّ السِّجْنُ أَحَبُّ إِلَيَّ مِمَّا يَدْعُونَنِي إِلَيْهِ

((Alisema (Yusuf): Ewe Mola wangu. Gereza ni bora kwangu kuliko hayo wanayoniita (Wanawake hao) kuyaendea)) [Yusuf 33].

Ama kukadhibishwa madai hayo na Mwanamke husika ni katika neno lake:

وَلَقَدْ رَاوَدتُّهُ عَن نَّفْسِهِ فَاسْتَعْصَمَ

((Kwa hakika nilimtaka bila ya nafsi yake kutaka naye alijihifadhi sana)) [Yusuf 32].

قَالَتِ امْرَأَتُ الْعَزِيزِ الْآنَ حَصْحَصَ الْحَقُّ أَنَا رَاوَدتُّهُ عَن نَّفْسِهِ وَإِنَّهُ لَمِنَ الصَّادِقِينَ

((Alisema mke wa mkuu: Hivi sasa imebainika haki, mimi ndiye niliyemtaka bila ya nafsi yake (kutaka) na hakika yeye hasa ni katika wakweli)) [Yusuf 51]

Ama kukadhibishwa na wanawake waliojikata mikono yao ni katika neno lao:

قُلْنَ حَاشَ لِلَّهِ مَا عَلِمْنَا عَلَيْهِ مِن سُوءٍۚ 

((Walisema (Wanawake waliojikata mikono): Hasha lillahi (neno la kutakasa) hatujui kwake ubaya wowote.)) [Yusuf 51]

Ama kukadhibishwa na Iblisi Mlaaniwa ni katika neno lake:

قَالَ فَبِعِزَّتِكَ لَأُغْوِيَنَّهُمْ أَجْمَعِينَ * إِلَّا عِبَادَكَ مِنْهُمُ الْمُخْلَصِينَ 

((Alisema (Iblisi): Basi naapa kwa utukufu wako, hakika hasa nitawapoteza wote, isipokua waja wako katika wao waliotakaswa)) [Saad 82-83]

Likibainika hili basi itakua wazi kuwa alilokusudia Mtume Yusuf alayhi salaam haliwezi kuwa katika azimio la kuitika wito wa kishetani aliouitika mke wa mkuu wa misri wa kuingia katika uchafu wa zina, bali uhakika kusudio la Mtume Yussuf alayhi salaam alilomkusudia kwalo kumfanyia mwanamke huyo lilikua ni kumpiga, lakini Allah mtukufu alimuonesha ishara za matokeo ya hilo pindi akilifanya, na ndio maana Allah mtukufu akaeleza: ((namna hivo ili tumueke mbali na ubaya na uchafu....)) ubaya wa tuhuma ya kuwanya au kumpiga mwanamke huyo ambae ni Mke wa Mkuu wa nchi ya Misri katika zama hizo, kwa hiyo aliloliazimia Mwanamke yule silo alilolizimia Nabii wa Allah alayhi salaam.

Kisha kuna lililo wazi zaidi kuliko aliyotueleza Allah mtukufu katika kitabu chake:

رَاوَدَتْهُ الَّتِي هُوَ فِي بَيْتِهَا عَن نَّفْسِهِ وَغَلَّقَتِ الْأَبْوَابَ وَقَالَتْ هَيْتَ لَكَ ۚ قَالَ مَعَاذَ اللَّهِ ۖ إِنَّهُ رَبِّي أَحْسَنَ مَثْوَايَ ۖ إِنَّهُ لَا يُفْلِحُ الظَّالِمُونَ

((Alimtaka yule (Mwanamke) ambaye yeye (Yusuf) yumo katika nyumba yake (Mwanamke) bila ya nafsi yake (Yusuf), na alifunga (Mwanamke) milango na akasema (Mwanamke): Haya (mimi) ni wako.  Akasema (Yusuf): Najikinga kwa Allah, hakika yeye ni Mola wangu amenifanyia vizuri mafikio yangu. Na yalivo hasa hawafanikiwi Madhalimu)) [Yusuf 23].

Basi vipi baada ya yote haya isemwe kuwa Nabii Yusuf alayhi salaam alitaka kufanya tendo la uzinifu na mwanamke huyo, kwa hakika hilo ni uzushi mkuu tunajiepusha nao sisi Ahlul-haqi wal-istiqaamah (Ibadhi).

Hii ndiyo kauli yetu.

Wabillahi taufiqi

Wallahu aalamu.

Published By Sh. Hafidh Al-Sawafi

Asalamu Alaykum wa rahmatullahi wa barakatuh.

Ndugu Yunus Esmail kutoka Tanzania anauliza

SAWALI:

Masuni na Maibadhi wote wanakubali kuwa Mtume s.a.w hakuwacha mtu wa kushika pahala pake baada ya yeye kuondoka.

Mimi binafsi ni msuni ila nikiwasikiliza mashia naona kama wana hoja za nguvu sana.

Kwanza, wakati Mtume s.a.w alipokuwa hai hata akiwatuma watu pahala hakuna hata siku moja aliwatuma bila kuwa na kiongozi, hata kwenye vita na pahali pengine.

Sasa inakuwaje anataka kufariki asiacha mtu pahala pake?

Pili, kama aliwaachia wachaguane mbona Abubakar r.a hakuwacha kama alivyoacha mtume s.a.w. na pia mbona Umar kumchagua Othman ilikuwa ni tofauti?.

JAWABU:

Kwanza: Ibadhi, Sunni na Shia katika suala la uongozi tumetafautiana, Ibadhi hatuzingatii ukabila kama ilivo katika Sunni ambao wanaona utawala ni haki ya Maquraishi tu, wala hatuzingatii Uali kama wanavoona Mashia kuwa utawala ni haki ya Ali na kizazi chake tu.

Kwetu sisi katika suala la uongozi kinachozingatiwa ni sifa za elimu, uchamungu, uwezo wa kuongoza, kukubalika katika Shuura ya Ahalu Al-halli wal-Aqdi na Baia ya Kisheria, ama suala la ukabila halimo katika masharti, nalo linaingia wakati mwengine katika yenye kutilia nguvu tu (murajjihaatu) ikikhofiwa fitna, si zaidi ya hapo.

Pili: Kinachozingatiwa katika Uongozi wa Waumini ni kuridhiana na kuchukua Baia (Ahadi ya Uongozi) na haya yote yalipatikana kwa Abu Bakar na Omar ba Othman na Ali na Abdullahi Allah awaridhie.

Abu Bakar alipata sharafu ya Ukhalifa kwa mashauriano na makubaliano katika Saqiifah, na Omar pia alipata kwa Ushauri na Makubaliano, na Othman pia kwa Mashauri na Makubaliano, na Ali na Abdullahi bin Wahbi Arraasibi pia wote walishika hatamu za Uongozi kwa njia hiyo hiyo.

Tatu: Suala la Uongozi wa juu ni tafauti na suala la kuteua wasimamizi katika mamlaka, ikiwa ni wa vikosi vya jeshi, au maliwali, au mfano wa hao; kwani hilo ni jukumu ya Kiongozi katika mamlaka yake.

Nne: Allah mtukufu kwenye kitabu chake hajamteua yoyote kwa Uongozi baada ya Mtume Muhammad S.A.W. bali ametuwekea msingi wa kuweza kupata viongozi wetu katika zama zozote nao ni msingi wa Shuuraa, na hii si Dini ya Ukabila wala Ujamaa, na ndio maana akatuamrisha ((Enyi Mulioamini mtiini Allah na mtiini Mtume na viongozi katika nyinyi)) wala hakusema na viongozi katika Quraishi au mfano wa hayo ya ukabila au uali.

Na kupitia mafundisho haya Maibadhi waliweza kuhakikisha tawala adilifu na uongozi bora katika miji waliyoihukumu kwa karne nyinyi.

Wabillahi taufiiq.

Published By Sh. Hafidh Al-Sawafi

SWALI:

Tunaambiwa kuwa kuna mwanachuoni wa Kiibadhi anaitwa Abu Bakar Al-Kindi amesema katika kitabu chake kiitwacho Jawharu Muqtasar uk. 121 kuwa kila asiyekua Ibadhi atabakia motoni milele jee! ni kweli?

JAWABU:

Kitabu Al-Jawharu Al-Muqtaswar ni uandishi wa Mwanachuoni Abu Bakar Ahmad bin Abdillahi bin Mussa Al-Kindi Allah amrehemu, nae ni miongoni mwa Wanavyuoni wetu wakongwe wa karne ya tano na ya sita Hijiria, na miongoni mwa vitabu vyake ni Musannafu.

Inafaa ifahamike kuwa Sheikh Abu Bakar Al-Kindi Allah amrehemu katika kitabu chake Jawharu Muqtasar alikua akifafanua msimamo anaouona yeye kuwa ni sahihi katika suala la jee! kila aliyekufa katika itikadi ya kiibadhi anakatiwa ushauri wa kuwa ni katika waja wa peponi au hakatiwi? Na kila aliyekufa akiwa ni mwenye kutafautiana na Itikadi ya kiibadhi katika umati wa Muhammad S.A.W. ya kuwa anakatiwa ushauri kuwa ni mja wa motoni au hakatiwi?

Na hilo ni moja ya masuali yaliyokua yameingiwa na tafauti katika safu za Ibadhi baina ya Wanavyuoni wa Nizwa na Wanavyuoni wa Rustaqi, kwa hiyo Sheikh Al-Kindi aliandika kitabu chake hicho ambacho ndani yake alichambua masuala mawili tu moja ni hilo na jengine ni suala la Jauhar.

Na Sheikh Al-Kindi ni katika Wanavyuoni wa Nizwa, kwa hiyo neno lake katika suala hili ni msimamo wa upande wa Wanavyuoni wa Nizwa katika Maibadhi wa Oman.

Ama Wanavyuoni wa Rustaq wao wanaona kama msimamo wao alivyoueleza Sheikh Al-Kindi katika kitabu chake hicho ukurasa 117 ya kuwa: "Ama mpinzani wetu yametufikia kuwa yeye amelitia makosani neno letu hili na ameona kuwa huo ni ushahidi wa ghaibu, basi hakuna nafasi ya kukata ushauri ndani yake, lakini inafaa kusema hayo kwa kumaanisha matarajio tu ya kuwa yule aliyekufa katika Itikadi ya Kiibadhi basi inatarajiwa kwake pepo, na yule aliyekufa akiwa mpinzani wa Itikadi ya kiibadhi huyo inakhofiwa kuwa ni mja wa motoni."

Kwa hiyo aliyoyasema Sheikh Abu Bakar Al-Kindi Allah amrehemu ni rai ya Wanavyuoni wa Nizwa wala hakuna tatizo lolote ndani yake.

Amesema katika ukurasa 121: Ama daraja ya tatu katika daraja za wahusika wa ukafiri (ukafiri kwa mujibu wa itikadi ya ibadhi ni kila dhambi kubwa, nao uko daraja mbili, ukafiri wa kishirikina kwa madhambi ya kishirikina tu, na ukafiri wa neema kwa madhambi yasiyokua ya kishirikina tu), ni daraja ya wale waliotoka nje ya haki kwa kuachana kwao na yale yaliyopatia haki kwa sababu ya kujishika kwao na tafsiri zao mbaya za Sunna na Kitabu pamoja na kukubali kwao Dini na kusadikisha kwao Unabii wa Nabii wetu Muhammad aliye mwisho wa Manabii S.A.W.

Na hao ndio mapote ya watu wa Kibla ambao kwao inapita hukumu ya mila ya Kiislamu, nao ndio mapote sabiini na mbili, isipokua wale ambao miongoni mwao wamekaribia kuunganyika na wahusika wa daraja ya pili.

Na kwa hakika amesema Nabii S.A.W.: ((Utagawika umati wangu na kuwa makundi sabiini na tatu, yote ni motoni isipokua kundi moja tu)).

Wamesema As-haabu wetu (Maibadhi): "Sisi ndilo hilo kundi moja (la peponi) na haki kwetu haijapotea na haijafichika."

Na wahusika wa daraja hii (ya tatu) wana itikadi zao zinajulikana na madhehebu zao zenye kusifiwa, kwa kutaja yote hayo kitabu kitarefuka.

Na sisi tunashuhudia kuwa yule ambae atakufa katika hao naye akiwa ni mkaidi katika kupingana kwake na wanayoitakidi Ibadhi, ya kuwa huyo amefikwa na unyongefu na udhalilifu na kubakia ndani ya Moto." Mwisho wa kunakili.

Neno la Sheikh Abu Bakar Al-Kindi Allah amrehemu liko wazi, nalo ni sahihi kabisa, kuwa yoyote yule ambae itikadi sahihi ya ibadhi imeshamfikia, na hoja za usahihi wake zimeshasimama juu yake, kisha akakaidika mbele ya haki, akaifanyia kiburi, na akawa ni mwenye kupingana nayo hadi kufa kwake, bila shaka huyo atakua ni mja wa motoni milele, kwa sababu kuna kipi chengine badala ya haki isipokua upotevu tu.

Na sisi hatuna shaka katika usahihi wa Ibadhi katika ambayo Waislamu wametafautiana ndani yake katika Itikadi na Fiqhi pia, lakini upande wa Itikadi tu ndio unaoshika hukumu hii tuliyoieleza.

Wabillahi Taufiiqi

Wallahu aalamu wa ahkamu.

Published By Sh. Hafidh Al-Sawafi

SUALI:

Asalamu Alaykum.

Jee! Kuna ufafanuzi wowote kuhusu hizi Imani za Asmaa wa Sifaati, Tauhidi Rububiyah na Uluuhiyah, tunataka kujua Imani hizi zina nafasi gani kwetu sisi Ibadhi?

Jazaakumu Allahu khairan.

JAWABU:

Masuala haya siku zote huwa ni tija ya ufafanuzi wa Wanavyuoni katika maandiko yao ili kuwepesisha ufahamu wake kwa wanafunzi na waumini wa kawaida, wameieleza Tauhidi kwa kuzingatia mambo mawili:-

La kwanza ni kuhitajia kila kiumbe kwa Muumba wake ambaye ni Allah mtukufu bila ya yeye kuhitajia chochote katika viumbe vyake, basi Allah mtukufu ndiye aliyepatisha kila kisichokua yeye, yaani kila kiumbe, na yeye Allah mtukufu ndiye mwenye kusimamia mamlaka yake, uumbaji ni wake na amri ya kuvitawala na kuvisimamia ni yake peke yake, na kwa kuzingatia upande huu anakua ndiye Rabbu na hapa inapatikana Tauhidi rububiyah.

Jambo la pili ni kuzingatia kustahiki kwake ibada za waja wake bila ya kushirikishwa na chengine chochote, na hapa ndipo inapopatikana Tauhidi uluuhiyah, yaani Tauhidi ya Uungu, na uhakika wa Uungu ni kuabudiwa, kwa hiyo, kama alivokua Allah mtukufu ni mpweke katika kupatisha viumbe na kuvisimamia vile vile ni mpweke katika kustahiki ibada za waja wake, hana mshirika katika yote mawili.

Ama Tauhidi na Asmaa wa Sifaati, hili wameliweka Masalafi ambao maarufu wanajulikana kwa jina la Mawahabi, nalo wameliweka ili kupitisha itikadi zao pofu za kumuitakidi Allah kuwa na sifa za viungo na harakati, na kuwakufurisha kwa kuwatoa nje ya Uislamu wale wote waliopingana na wao katika kumsifu Allah kwa sifa hizo za viungo na harakati nao wamewatungia jina ambalo Allah hakuliteremshia hoja wala dalili wamewaita Muattilah, uitaji wa bidaa hakuwahipo Mtume S.A.W. kufundisha uitaji huo.

Sisi hatuna shaka katika uhaki wa majina ya Allah mtukufu na kusifika Allah mtukufu lakini yote hayo elimu yake inapatikana katika Tauhidi Rububiyah na Tauhidi Uluuhiyah, bila ya hii ya Asmaau wa Sifaatu.

Wallahu Aaalamu wa ahakamu.

Wabillahi Taufiq. 

Published By Sh. Hafidh Al-Sawafi

SUALI:

Asalaamu alaykum wa rahmatullahi wa barakatuh.

Tulifuatilia mada ya Quraani ni kiumbe baina ya Sh. Abu Hamed Al Sawafi kwa upande wa Ibadhi na Masheikh kadhaa walioko U.K. Sh. Salim Khatib na Sh. Muhammad Awesi na Sh. Youssuf Anaufali kwa upande wa Sunni.

Tija ya mada hiyo ilifikia kuwa Quraani lafdhi ni kiumbe ama Quraani maana Sh. Abu Hamed Al Sawafi akasema ni kwa mujibu wa neno husika ikiwa mkusudiwa ni muumba basi si kiumbe ama ikiwa ni kiumbe basi ni kiumbe, ama Masheikh waliobaki walisema kuwa Quraani maana si kiumbe, lakini Sh Abu Hamed Al Sawafi alisema kuwa Quraani hiyo haipo na alitaka nakala za Wanavyuoni waliothibitisha Quraani maana, hapa aliletewa neno la Al-Imamu Saalimi akiwa amesema: "Vile vile maana (imeumbwa) usiwe na shaka." na yeye bila shaka ni moja katika Maimamu wakubwa katika Ibadhi.

Sasa Jee! Maana za maneno ya Allah pia zimeumbwa?

JAWABU:

Amesema Imamu Nuurudini Assaalimi Allah amrehemu katika Jauhari Nidhaami

والحــق ما قالت بـه الأعــلام * بأنـــــــه لـربـنــــــــا كــــــــلام
ووحيــه وأنــــه تنــزيلــــــــه * سبحـانـــه صــح لنــــا دليـلــــه
لكن أقول الأحرف الملحوظه * في الكتــب من ألسننا ملفـوظــه
بأنهـــا مخلوقـــــة للبـــــاري * قلت كـــذا المعـنى فلا تمـــاري
لأنهـــا مظــروفــة للأحـرف * وكل مظروف حدوث فاعـــرف
وذاك غيـــر علمـــه تعــــالى * وإن يكنــه يعلمــــه كمـــــــــالا
فالعلــم والمعلـوم ليــس واحدا * كالضرب والمضروب قد تباعدا
وأنــه فــي اللوح قطعا رسما * كذاك أيضا في صدور العلمـــا
وذاك مخلـوقــان هل تقـــول * يحــوي القديـم حــادث منـقــول

"Na haki ni yale waliyoyasema Maulamaa, ya kuwa Mola wetu anayo maneno, na wahyi wake, na kuwa huo ni uteremsho wake (Allah) aliyetakasika, na dalili yake imesihi kwetu. Lakini nasema: Herufi zinazotambulika katika vitabu vinazotamkwa na ndimi zetu, ya kuwa hizo ni viumbe vya Muumbaji, ninasema pia Maana (ni kiumbe) usiwe na shaka; kwa sababu ni vichukuzwi vya herufi, na kila kuchukuzwi kimetokeza utambue. Na hiyo sio elimu yake aliyetukuka, hata kama ni mwenye kuijua kiukamilifu, kwani kujua na kijulikanwacho si kitu kimoja, kama kupiga na kipigwacho ni viwili tafauti, na kwa hakika katika Lauhi -bila shaka- imeandikwa, vile vile katika vifua vya Maulamaa, na hivo viwili ni viumbe, jee! utasema kuwa cha tangu (kisichokiumbe) kimechukuliwa na kilichotokeza (kiumbe) chenye kuchukuliwa?."

Haya ndiyo maneno ya Imamu Assaalimi Allah amridhie, nayo hayana doa lolote, wala hayapingani na yaliyofafanuliwa katika mada husika, kwa sababu Imam Assaalimi katika beti zake hizi anatuambia kuwa Maneno ya Allah ni lafdhi na maana, na sio maana peke yake wala lafdhi peke yake, na maana sio kilichomaanishwa ambacho ndio kusudio, na dalili ni kuwa maana ni madhruufun yaani imechukuliwa na herufi zinazofanya neno, na kisichokua kiumbe hakichuliwi na kiumbe, kwa hiyo kilichomaanishwa kupitia hiyo maana aliyoizungumza Imam Saalimi Allah amridhie ndicho tulichokusudia kukieleza katika mada husika; ili kuwepesisha ufahamu kwa watu wa kawaida bila kuwapa uzito ndani yake, ama kiuhakika maana imechukuliwa na neno, nayo ndiyo inayobainisha kusudio; kwa hiyo neno na maana vyote ni viumbe ama kusudio ima litakua ni kiumbe au si kiumbe.

Wabillahi Taufiqi.

Wallahu Aalamu wa Ahkamu. 

Published By Sh. Hafidh Al-Sawafi

SUALI:

Asalam alaikum warahmatullah wabarakatuh.

Kwanza natoa shukran za dhati kwa uongozi mzima wa ukumbi huu wa www.ibadhi.com kwa elimu kubwa tunayoipata kwa wakati wake MashaaAllah.

Siku ya jana nilipokea ujumbe uliotoka kwa mshia mmoja aliyeko Iran ambao una anuani UTHIBITISHO KATIKA VITABU VYA KISHIA KUWA QURAAN HII TULIONAYO IMEBADILISHWA NA INA MAPUNGUFU.

Basi tumeona dharura ya kuuliza ni kweli kuwa Quraani imebadilishwa kama inavodaiwa?

JAWABU:

Tunashukuru sana kupata ujumbe wako unaodhamini suali kupitia utata uliofikishwa kwenu kutoka kwa Mashia, Allah atuhifadhi na shari za wabatilifu wote.

Katika mambo ya lazima kuyaamini ni kuwa hakuna mkweli zaidi kuliko Allah mtukufu, na katika hilo zimekuja Aya mbili katika Quraani tukufu katika Suuratu Nisaa ya 87 na 122, na ukianza tu kusoma Quraani Aya ya pili ya sura ya pili inasema:

ذَٰلِكَ الْكِتَابُ لَا رَيْبَ ۛ فِيهِ ۛ هُدًى لِّلْمُتَّقِينَ

((Hicho ni Kitabu hakuna shaka ndani yake ni uongofu kwa Wachamungu)) [Baqarah 2]

na Kitabu maana yake ni kilichoandikwa, kwa hiyo Allah mtukufu alimteremshia Mtume wetu S.A.W. Kitabu kiitwacho Quraani, na muhali kuwa Quraani haikuandikwa katika uhai wa Mtume S.A.W. kwa sababu hakiwi Kitabu bila ya kuandikwa na kusomwa, na katika kusomwa ndio kikaitwa Quraani yaani ni chenye kusomwa sana bila nafsi kushiba kisomo chake.

Kwa hiyo fikra ya kuwa Quraani ilikusanywa na kuandikwa katika zama za Khalifa wa Tatu Othman bin Affaan, kwetu sisi fikra hiyo haipo, bali tunaona alichokifanya Othman ni kukataa misahafu iliyoongozewa tafsiri, na kulazimisha Msahafu kubakia katika andiko lake la asili kama ilivyoteremshwa, si zaidi ya hapo, nalo ni jambo zuri bila shaka yoyote.

Allah mtukufu katika Quraani anatuambia:

إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ

((Hakika sisi hasa ndio tulioteremsha ukumbusho na hakika sisi hasa ndio wenye kuuhifadhi)) [Al Hijri 9].

Amepokea Imam Rabii bin Habib -Allah amridhie- katika Musnad kuwa Imam Abu Ubaidah -Allah mridhie- alisema: Imenifikia kuwa Mtume S.A.W. alikua ikimteremkia Aya anasema:

«اِجْعَلُوهَا فِي سُورَةِ كَذَا وَكَذَا وَفِي مَوْضِعِ كَذَا» وَمَا تُوُفِّيَ رَسُوْلُ اللَّهِ صَلَّى اللهُ عَلَيْهِ وَسَلَّمَ إِلاَّ وَالقُرْآنُ مَجْمُوْعٌ مَتْلُوٌّ.

((Iwekeni katika sura kadha na kadha, au katika sehemu kadha wa kadha)) na hakufa Mtume wa Allah ila baada ya kuwa Quraani yote imeshakusanywa na inasomwa. [Rabii 15].

Na katika nuskha nyengine ya riwaya hii imekuja kuwa Mtume S.A.W. alikua akisema: ((Iwekeni katika sura kadha katika sehemu kadha)).

Kwa hiyo hakuna shaka kuwa Msahafu huu tulionao leo ndio Quraani ile ile iliyoteremshwa kwa Mtume wetu S.A.W. bila kupungua kitu wala kuongezeka kitu, kilichofanyika katika mikono ya Waislamu ni uboreshaji wa kuweka alama za kudhibiti maneno yake na visomo vyake tu, nayo ni sharafu kubwa inayohakikisha kuhifadhiwa Quraani tukufu kama alivoahidi Allah mtukufu, na miongoni mwa waliopata Sharafu hiyo ni Mwanachuoni Muomani Al-Khalil bin Ahmad Al-Farahidi Allah amridhie.

Basi kwa hakika Quraani hii ndiyo yenye makubaliano ya Umma wote kizazi kwa kizazi karne kwa karne tokea zama na Mtume wetu S.A.W. mpaka hivi leo na mpaka Kiama kitasimama.

Amepokea Imam Rabii bin Habiib katika Athari alizotolea Hoja kwa wapinzani wake kuwa Imam Jabir bin Zaid Allah amridhie alisema: Aliulizwa Ibnu Abbaas Allah amridhie, jee! Quraani imeongezwa au umepunguzwa? Naye akajibu kwa kusema: Amesema Mtume wa Allah S.A.W.: ((Allah amlaani mwenye kuongeza katika Kitabu cha Allah)) na akasema: ((Mwenye kuikana herufi moja ameikana Quraani yote)).

Amesema Imam Jabir bin Zaid Allah amridhie: Amesema Uqubah bin Aaamir Al-Juhani: "Alitusalisha Mtume wa Allah S.A.W. sala ya Alfajiri basi akasoma muawwadhataini (suuratu Al-Falaq na suuratu Nnaasi) basi alisema: ((Ewe Uqubah, hakika sura hizi mbili ni bora ya sura katika Quraani na Zaburi na Injili na Taurati)) na kuna watu wanasema kuwa sura hizo mbili si katika Quraani kwa hakika hao wamesema uongo na wameingia katika makosa.

Amesema Ibnu Abbaas Allah amridhie: "Lau kutakua na mtu aongeze ndani yake au apunguze basi mtu huyo atakua ni kafiri mbele ya Umma wote"

Na katika yenye kuhuzunisha sana ni kukutia katika vitabu tegemewa vya hadithi yenye kuonesha kuwa Quraani imechezewa kama ilivyo katika Sahihi Al-Bukhari na Muslim katika riwaya ya Alqamah kuwa alitakiwa na Sahaba Abu Dardaa -Allah amridhie- asome suuratu Allayli kama alivyoisikia kwa mwalimu wake Sahaba Abdullahi bin Massoud -Allah amridhie- basi Alqamah akasoma "Wallayli idhaa yaghshaa * wannahaari idhaa tajallaa * wadhakari wal-unthaa." Hapo Abu Dardaa akasema: Naapa wallwaahi namna hivi ndivyo nilivyoisikia kutoka katika mdomo wa Mtume wa Allah S.A.W. na hawa watu hapa wananitaka niisome: "Wamaa khalaqa dhakara wal-unthaa" wallwaahi siwafuati. Na riwaya hii imekaririwa katika Sahihi Bukhari na Muslim zaidi ya mara moja.

Pia imepokewa kuwa Sahaba Abdullahi bin Massoud -Allah amridhie- alikua akizikwarua Muawadhataini (Suuratu Al-Falaq na Suuratu Nnaasi) na akisema kuwa hizo mbili si katika Quraani.

Kwa hakika sisi tumtakasa Sahaba Abdullahi bin Massoud ambae Mtume S.A.W. alikua akitaka kusikiliza Quraani akimtaka Sahaba huyu amsomee Quraani, hata kufikia Mtume S.A.W. kusema: "Mwenye kutaka kusoma Quraani kama ilivyoteremshwa basi aisome kwa kisomo cha Ibnu Ummi Abdi" sisi tunamtakasa na hayo waliyomnasibisha nayo wabatilifu, kama tunavomtakasa na hayo Abu Dardaa -Allah amridhie-.  

Kwa ufupi, kwetu sisi hakuna fikra wala athari yoyote ya kuonesha kuwa Quraani imepunguzwa au imezidishwa au imechezewa, hata hukumu ya kurujumiwa mzinifu mume au mke kwetu sisi imethibiti kwa njia ya Sunna na si kwa njia ya Aya iliyofutwa kisomo chake na kubakia hukumu yake kama wanavyodai Masunni.

Wabillahi taufiqi.

Wallahu aalamu wa ahkamu.

Published By Sh. Hafidh Al-Sawafi

Asalamu alaykum.

Mtume Nuhu A.S. alipomuomba Allah kwa kusema: "Ewe Mola wangu hakika mtoto wangu ni katika Ahali zangu, na hakika ahadi yako ni haki, na wewe ndiye mwenye hukumu bora kuliko wahukumuji wote" alijibiwa: "Ewe Nuhu hakika huyo si katika Ahali zako, hakika yeye ni tendo sililo jema, na usiniombe usiyo kua na elimu nayo....." Suuratu Huud 46. wakati huo huo Allah anamueleza Mke wa Mtume Nuhu na Mke wa Mtume Luti kuwa waliwafanyia khiyana waume zao. Suuratu Tahriim.

Tumesikia kuwa mtoto yule alipatikana kwa khiyana yaani hatokani na kizazi cha Mtume Nuhu A.S. bali mama yake alifanya khiyana ya uzinifu hali ya kuwa ni mke wa Mtume wa Allah na ndio maana Allah akamkatalia Mtume Nuhu kuwa mtoto huyo ni katika Ahali zake.

Tunaomba ufafanuzi.

JAWABU:

Ubaya ulioje wa kusema kuwa mtoto wa Mtume Nuhu hakua mwanawe halali bali ni tunda la uzinifu kwa khiyana ya kindoa, wenye kusema hilo wako mbali na haki na uhakika, na haki wameikosea, kwa hakika Allah anaeleza kwenye kitabu chake wazi wazi:

وَنَادَىٰ نُوحٌ ابْنَهُ وَكَانَ فِي مَعْزِلٍ يَا بُنَيَّ ارْكَب مَّعَنَا وَلَا تَكُن مَّعَ الْكَافِرِينَ

((Na Nuhu alimwita mwanawe akiwa yuko mbali naye, ewe kitoto changu panda pamoja nasi na usiwe pamoja na Makafiri)) [Huud 42] 

Allah anatuambia kuwa Mtume Nuhu A.S. alimwita mwanawe, halafu atujie mtu atuambie laa hakua mwanawe tumkubalie? Kallaa kisha Kallaa, alikua ni mwana wa Mtume Nuhu A.S. wala hakua tunda la uzinifu wa nje ya ndoa kama wanavodai wabatilifu, wala hakuna shaka katika hili.

Ama kuelezwa Mke wa Mtume Nuhu kuwa alimkhuni Mtume wa Allah hali ya kuwa ndiye mumewe, hiyo si khiyana ya ndoa bali ni khiyana ya Imani kwa unafiki, anasema Imam Qutbu

"(فخانتاهما) بإضمار الشرك وإعانة أهله." اهــ

Waliwafanyia khiyana kwa kuficha ushirikina na kusaidia wahusika wake. [Taisiiru Tafsiir] 

Allah mtukufu ndiye aliyemwambia Mtume wake Nuhu A.S.:

وَأُوحِيَ إِلَىٰ نُوحٍ أَنَّهُ لَن يُؤْمِنَ مِن قَوْمِكَ إِلَّا مَن قَدْ آمَنَ فَلَا تَبْتَئِسْ بِمَا كَانُوا يَفْعَلُونَ * وَاصْنَعِ الْفُلْكَ بِأَعْيُنِنَا وَوَحْيِنَا وَلَا تُخَاطِبْنِي فِي الَّذِينَ ظَلَمُوا ۚ إِنَّهُم مُّغْرَقُونَ (37)

((Na Nuhu alipewa wahyi: Hakika yalivyo hasa hataamini katika kaumu yako isipokua ambae ameshaamini, basi usihuzunike kwa waliyokua wakiyafanya * na tengeneza jahazi kwa hifadhi yetu na uongozi wetu, wala usinikhutubie kuhusu ambao wamedhulumu, hakika hao ni wenye kuzamishwa)) [Huud 36-37]

Kwa hiyo Allah ametueleza wazi kabisa kuwa walioangamizwa kwa Tufani ni wale waliodhulumu, na mtoto wa uzinifu habebeshwi kosa la mama yake, dhulma ni ya mama yake si ya mtoto, basi vipi isemwe kuwa aliangamizwa kwa sababu hakua mtoto halali wa Mtume Nuhu A.S.?!! Hali ya kuwa Allah mtukufu ameshamuambia Mtume wake A.S.

قُلْنَا احْمِلْ فِيهَا مِن كُلٍّ زَوْجَيْنِ اثْنَيْنِ وَأَهْلَكَ إِلَّا مَن سَبَقَ عَلَيْهِ الْقَوْلُ

((Tukasema: Chukua ndani yake (hiyo jahazi) katika kila (wanyama) pea wawili na ahali zako isipokua ambae neno limeshamtangulia)) [Huud 40].

Kutanguliwa na neno, yaani hukumu ya kuangamizwa na kuwa si katika ahali zake watakaokoa, nalo liko wazi kuwa katika ahali zake wako waliovuliwa katika hukumu ya kuokoka, na hao bila shaka ni Mke wake na Mwanawe huyo Allah awalaani.

Kwa hiyo neno lake Allah mtukufu 

قَالَ يَا نُوحُ إِنَّهُ لَيْسَ مِنْ أَهْلِكَ ۖ إِنَّهُ عَمَلٌ غَيْرُ صَالِحٍ

((Alisema (Allah): Ewe Nuhu hakika huyo si katika Ahali zako, hakika hasa ni tendo lisilo jema)) [Huud 46]

Aya hii imekuja katika kisomo chengine

إِنَّهُ عَمِلَ غَيْرَ صَالِحٍ

((Hakika yeye alitenda lisilo jema.))

Na hiyo iliyotajwa hasa ndiyo sababu ya kuangamizwa kwake na kuvuliwa katika hukumu ya Ahali wa Mtume wa Allah S.A.W. hata kama ni Mtoto wake halali lakini kujitoa kwake nje ya utiifu kumemvua katika hukumu, na hapo tunapata fundisho kubwa sana kuwa asiyekuwemo katika njia ya uchamungu ni mwenye kuangamia tu hata kama atakua ni mtoto wa Mtume.

Imekuja katika hadithi sahihi: ((Na ambae atacheleshwa na matendo yake, hatatangulizwa na nasabu yake)).

Na imesemwa kuwa kosa la Mwana huyo wa Mtume Nuhu lilikua ni kukataa amri ya kupanda Jahazi, kwa hiyo iliposemwa kuwa ni tendo lisilo jema yaani lile alilokaidika ndani yake, na katika kisomo "alitenda lisilo jema" iko wazi kabisa.

Wabillahi Taufiiq

Wallaahu Aalamu.

Published By Sh. Hafidh Al-Sawafi

1. Tunakubaliana kuwa Allah mtukufu ni mkalimifu asiyefikiwa na upungufu, na Allah mtukufu amejisifu kuwa ni msemaji, naye ameongea na viumbe vyake hata Iblisi aliongea nae, sasa hii Quraani ambayo ni maneno ya Allah Allah aliiumba wapi ndani ya dhati yake au nje ya thati yake? Ikiwa ndani ya dhati yake italazimika kuwa dhati yake amechukua viumbe ndani yake na hiyo ni kasoro ya kuchanganyika na viumbe, kwa sababu yeye ndiye aliyeisema na kwa vile ameisema itakua yeye imemtoka, na kama hakuiumba ndani ya dhati yake italazimika iwe ni dhati iliyojitosheleza isiyokua dhati ya Allah mtukufu, na ikiwa ni hivo itakua ni nani aliyemwambia Mussa: "Nenda kwa firauna hakika amepinduka mipaka" na "Hakika mimi hasa ndiye Mola wako ninabudu mimi" kwani itakua Quraani ndiyo iliyozungumza sio Allah, tunaomba dalili kua Allah aliiumba Quraani pembeni.

JAWABU:

Allah ni mkamilifu asiyefikiwa na upungufu kwa sababu yeye ndiye wa mwanzo kabla ya kila kisichokua yeye, yeye Allah ndiye mkwasi asiyehitaji chochote, na sisi waja akili zetu haziwezi kufikiri nje ya mipaka ya sehemu (fasi) na wakati, basi hatuwezi kabisa kumpata Allah kwa akili zetu kwa sababu yeye Allah mtukufu ndiye aliyeumba sehemu (nafasi) na wakati na vilivyomo ndani yake, kwa hiyo hatumsifu kwa umbo wala mwili, kutokana na hapo inabatilika kuuliza jee Quraani ilikua ndani ya Allah au nje ya Allah? Kwa sababu hakina ndani na nje isipokua chenye umbile kama mtu, na Allah ametakasika na hilo.

Ama Quraani tukufu Allah mwenyewe ametueleza kuwa imo katika ubao uliohifadhiwa (Lauhin Mahfuudh) pia katika (Kitaabun Maknuun) pia katika (Vifua vya waliopewa elimu) kwa hiyo hizo ndizo sehemu zake ambazo Allah ameiumba humo, na hakiingii ndani ya kiumbe isipokua kiumbe tu.

Ama kuhusu maneno aliyoambiwa Mtume Mussa S.A.W. udhahiri wake ni kuwa Mtume Mussa A.S. alifikiwa na maneno aliyotaka Allah ayasikie kwa njia sauti moja kwa moja naye alisikia alitotaka Allah.

Hakika Allah si kitu cha kutokwa na vitu, Allah hazai wala hatokwi na kitu wala haingiwi na kitu, Allah si mwili, shani yake Allah ni atakapo tu kitu kuwa hapo hapo kitu hicho huwa kama alivotaka (kun fayakuun), na huo ndio uumbaji wake, ama sauti na maneno aliyosikia Mussa kwa hakika vyote ni viumbe vya Allah, na kwa vile ni maneno aliyoyaanzisha Allah mtukufu mwenyewe akwa Allah ndiye msemaji na yakawa maneno ni yake, basi kuanzisha kwake maneno ndio usemaji wake Allah mtukufu, ni sawa kwa sauti au ilhamu au muandiko.

Na kama tutakadiria tu kuwa Quraani ndiyo iliyomwambia Mussa A.S. basi maneno ni ya mwanzilishi wake si ya mfikishaji wake, na sisi tunakubaliana kuwa Quraani ni maneno ya Allah, kwa hiyo alisikia maneno ya Allah wala si maneno ya Quraani wala maneno ya maneno.

Na ikiwa fikra ya muulizaji ni kuwa maneno ya Allah si kiumbe kwa sababu imesemwa na Allah, na kwa vile imesemwa na Allah itakua ni maneno yaliyotoka ndani ya dhati yake na kuja nje (astaghfirullahi), basi pia Allah mtukufu aliipuliza roho kwa Baba yetu Adamu A.S. ambaye ndiye jinsi ya watu wote; kwa hiyo vile vile roho za waja hazitakua viumbe; kwa sababu Roho imepulizwa na Allah; na kwa vile ameipuliza -kwa fikra ya muulizaji- italazimika kuwa ilikua ndani ya dhati yake na kuja nje ya dhati hiyo, na sisi hatujui mada ya roho aslan, ama mada ya Quraani tunaijua bila shaka yoyote kuwa ni lugha ya kiarabu ambayo ni kiumbe bila shaka yoyote.

2. Allah amtukufu ametueleza kuwa yeye anapotaka kitu hukiambia ((kun)) na hapo hapo kinakua, na neno hilo ((kun)) ni moja ya maneno ya Quraani, kwa hiyo neno la kusema kuwa Quraani ni kiumbe litalazimisha kuwa hiyo ((kun)) nayo alipata ((kun)) yake na hiyo ((kun)) vile vile na hapo italzimika kupatikana mtiririko usiokua na mwanzo, au ibatilike kuwa Allah kaumba kwa ((kun)) au ibatilike kauli ya kusema Quraani ni kiumbe.

JAWABU: 

Neno ((kun)) ni kiumbe kwa dalili huwezi kutamka ((n)) kabla ya kutamka ((ku)) na umri wa kila herufi unaanza kwa kuanza kutamkwa na kumalizika kutamkwa, kwa hiyo hakuna shaka kuwa neno ((kun)) ni kiumbe, nalo ni neno la lugha ya kiarabu ambayo ni kiumbe, hili halina shaka yoyote.

Kwa hiyo maelezo ya Aya tukufu yana kusudio yale, nalo ni amri ya Allah ya kupatisha viumbe, amri hiyo si neno ya kutamkwa kwa sauti na herufi, bali ni kutaka tu Allah kufanyika alichotaka kifanyike huko ndiko kulikoelezwa kwa (kun) na kufanyika kile alichotaka kifanyike kama alivotaka kifanyike ndio (yakuunu) hiyo ni lugha ya kinaaya kwa kuelezea hali si zaidi ya hapo.

Na amri hiyo huitwa amri tanjizii (amripatisha) ukitaka kupata taswira yake tazama ukichomwa sindano kwa ghafla unafanya nini? Ikiwa utashituka au utapiga kelele au utaguna au utafumba macho au utatokwa na machozi, hizo amri za kufanya hivo hata ukafanya zimetoka wapi? Ubongo ndio uliotoa amri hizo lakini si kwa herufi wala sauti, na utekelezaji unatimia kwa kasi kubwa ya ajabu, huo ndio ukaribisho tu wa kuweza kujua amri tanjizii (amripatisha). 

 Wallahu aalamu wa ahkamu.

Published By Sh. Hafidh Al-Sawafi

Asalamu alaykum wa rahmatullahi wa barakatuh.

Anasema Allah mtukufu katika Suuratu Maryam:

وَإِن مِّنكُمْ إِلَّا وَارِدُهَا ۚ كَانَ عَلَىٰ رَبِّكَ حَتْمًا مَّقْضِيًّا * ثُمَّ نُنَجِّي الَّذِينَ اتَّقَوا وَّنَذَرُ الظَّالِمِينَ فِيهَا جِثِيًّا

((Na hakuna yoyote katika nyinyi ila atauingia, limekua hilo kwa Mola wako ni pitisho imeshapitishwa * kisha tutawaokoa wale waliomcha Allah na tutawaacha Madhalimu humo wakiyayatika)) [Maryam 71-72]

Jee! Waislamu wataingia Motoni pamoja na Madhalimu kisha watatolewa?

JAWABU:

Bila shaka adhabu ya akhera inawahusu Makafiri peke yao, ni sawa ukafiri wao uwe wa kishirikina ambao unawahusu Washirikina, au uwe ukafiri wa neema wa kinafiki ambao unawahusu Waislamu Mafasiki waliokufa bila kutubia, wote hao ukafiri umewakusanya kama ulivyowakusanya ufasiki na udhalimu.

Ama Waislamu Wachamungu wao siku hiyo ya Kiama watakua katika amani kamili hawafikwi na khofu wala huzuni yoyote, anatuambia Allah mtukufu:

إِنَّ الَّذِينَ سَبَقَتْ لَهُم مِّنَّا الْحُسْنَىٰ أُولَٰئِكَ عَنْهَا مُبْعَدُونَ * لَا يَسْمَعُونَ حَسِيسَهَا ۖ وَهُمْ فِي مَا اشْتَهَتْ أَنفُسُهُمْ خَالِدُونَ * لَا يَحْزُنُهُمُ الْفَزَعُ الْأَكْبَرُ وَتَتَلَقَّاهُمُ الْمَلَائِكَةُ هَٰذَا يَوْمُكُمُ الَّذِي كُنتُمْ تُوعَدُونَ 

((Hakika wale waliotanguliwa kupata wema utokao kwetu, wao hao wataepushwa nao (huo moto) * hawatasikia hata sauti yake, nao katika yanayotamaniwa na nafsi zao watabakia * haitawahuzunisha fazaa kuu, na watakutana na Malaika: Hii ndiyo siku yenu muliyokua mukiahidiwa)) [Al-Anbiyaa 101-103]

Vilevile Allah mtukufu anatuambia:

يَوْمَ لَا يُخْزِي اللَّهُ النَّبِيَّ وَالَّذِينَ آمَنُوا مَعَهُ ۖ 

((siku ambayo Allah hatawadhalilisha Nabii na walioamini pamoja naye)) [Tahriim 8]

Na yeye ametuambia kupitia ndimi za waja wake wema:

رَبَّنَا إِنَّكَ مَن تُدْخِلِ النَّارَ فَقَدْ أَخْزَيْتَهُ ۖ وَمَا لِلظَّالِمِينَ مِنْ أَنصَارٍ

((Ewe Mola wetu hakika wewe yule utakaemuingiza Motoni kwa hakika huyo umemdhalilisha, na Madhalimu hawana kabisa wa kuwanusuru)) [Aala Imraana 192]

Ama kuhusu Aya za Suuratu Maryam Allah mtukufu anatueleza katika sura hiyo hiyo:

يَوْمَ نَحْشُرُ الْمُتَّقِينَ إِلَى الرَّحْمَٰنِ وَفْدًا * وَنَسُوقُ الْمُجْرِمِينَ إِلَىٰ جَهَنَّمَ وِرْدًا 

((Siku tutakapowakusanya wachamungu wakiwa kwa Allah ni wakirimiwa * na tutawapeleka waovu katika Jahannamu kuiingia)) [Maryam 85-86]

Kwa hiyo wachamungu ni wakirimiwa wa Allah hivi atawakirimu kwa kuwaingiza Motoni? Hapana kisha hapana, bali atawakirimu kwa amani iliyotimia na mazuri ya kufurahisha nafsi zao.

Kutokana na hapo, pale Allah aliposema:

وَإِن مِّنكُمْ إِلَّا وَارِدُهَا ۚ كَانَ عَلَىٰ رَبِّكَ حَتْمًا مَّقْضِيًّا * ثُمَّ نُنَجِّي الَّذِينَ اتَّقَوا وَّنَذَرُ الظَّالِمِينَ فِيهَا جِثِيًّا

((Na hakuna yoyote katika nyinyi ila (huo moto) atauingia, limekua hilo kwa Mola wako ni pitisho imeshapitishwa * kisha tutawaepusha Wachamungu na tutawaacha Madhalimu humo wakiyayatika)) [Maryam 71-72]

alikua anawambia wakusudiwa maalumu kwa namna ya kuwageukia (Al-Iltifaatu) na wakusudiwa hao ni wapinga ufufuo wa Akhera anatumbia Allah amtukufu:

وَيَقُولُ الْإِنسَانُ أَإِذَا مَا مِتُّ لَسَوْفَ أُخْرَجُ حَيًّا * أَوَلَا يَذْكُرُ الْإِنسَانُ أَنَّا خَلَقْنَاهُ مِن قَبْلُ وَلَمْ يَكُ شَيْئًا * فَوَرَبِّكَ لَنَحْشُرَنَّهُمْ وَالشَّيَاطِينَ ثُمَّ لَنُحْضِرَنَّهُمْ حَوْلَ جَهَنَّمَ جِثِيًّا * ثُمَّ لَنَنزِعَنَّ مِن كُلِّ شِيعَةٍ أَيُّهُمْ أَشَدُّ عَلَى الرَّحْمَٰنِ عِتِيًّا * ثُمَّ لَنَحْنُ أَعْلَمُ بِالَّذِينَ هُمْ أَوْلَىٰ بِهَا صِلِيًّا 

((Na Mtu anasema: Hivi nikishakufa kweli nitatolewa nikiwa hai? * Hivi hakumbuki (huyu) Mtu hakika sisi tulimuumba hapo kabla wala hukua kitu?!! * Kwa haki ya Mola wako kwa hakika hasa tutawakusanya na mashetani kisha tutawahudhurisha pembezoni mwa Jahannamu wakiwa tako * kisha tutavua katokana na kila kundi walio wakaidi zaidi mbele ya Mrehemevu * kisha sisi hasa tunajua zaidi wale ambao wanastahiki huo (Moto) kuuingia)) [Maryam 66-70]

Kisha hapo ndio anawageukia hao wahusika wanaostahiki adhabu ya Motoni na kuwambia:

وَإِن مِّنكُمْ إِلَّا وَارِدُهَا ۚ كَانَ عَلَىٰ رَبِّكَ حَتْمًا مَّقْضِيًّا * ثُمَّ نُنَجِّي الَّذِينَ اتَّقَوا وَّنَذَرُ الظَّالِمِينَ فِيهَا جِثِيًّا

((Na hakuna yoyote katika nyinyi ila atauingia, limekua hilo kwa Mola wako ni pitisho imeshapitishwa * kisha tutawaepusha Wachamungu na tutawaacha Madhalimu humo wakiyayatika)) [Maryam 71-72]

Wallahu aalamu wa ahkamu.

Published By Sh. Hafidh Al-Sawafi

Asalamu alaykum wa rahmatullahi wa barakatuh.

Tunataka kujua ni ipi hukumu ya Mashia kwa mujibu wa mafundisho ya Ibadhi?

JAWABU:

Mashia wamegawika lakini wote wanakusanyika katika kumnyanyua daraja Imam Ali bin Abi Talib R.A. zaidi ya Masahaba wote, ni wengi wao -kama si wote- wanaitakidi kuwa Imam Ali ni maasuum -yaani amehifadhika na kufanya kosa-, na hapa ndipo tunapowaona kupotea kwao, kwa sababu makosa yalipatikana kwa Imam Ali bin Abi Talib pale alipokubalia wito wa Tahkiim uliotoka kwa Muawiyah bin Abi Sufiyan na kundi lake ambalo hakuna shaka yoyote kuwa ni kundi la waasi kwani ndilo lililomuua Ammaar bin Yaasir R.A. na Mtume S.A.W. amesema: ((Ammaar atauliwa na kundi la waasi)), na wito huo wa Tahkiim ulimuingiza Imam Ali katika makosa ya kuvunja hukumu ya Allah tukufu ya kulipiga vita kundi la waasi hadi lirejee katika amri ya Allah ambayo kwa kuasi kwao amri hiyo umepatikana uasi wao na wakastahiki kupigwa vita, pia kosa la kumthibitisha Muawiyah katika uadui dhidi ya Ukhalifa ambao ni amana katika mikono ya Ali bin Abi Talib, na hayo ndiyo yaliyowapelekea Salafu wetu wema Ahalu Naharawani -Allah awaridhie- kujitoa katika safu ya Imam Ali; kwani waliona kubakia katika safu yake ni kusadia katika dhambi na uadui nako kumekatazwa na Allah mtukufu, pia ni kuingia katika utiifu wa kiumbe kwa kumuasi Muumba, nako pia kumekatazwa katika Uislamu, kwa hiyo wakaiacha safu yake na kujichagulia Kiongozi kwa njia ya Shuuraa naye ni Imam Abdullahi bin Wahbi Al-Raasibi R.A. kisha wakajichagulia mji wa Naharawani ambapo baada ya Imam Ali kupinga matokeo ya Tahkiim baina yake na Muawiyah akafanya kosa jengine la kuwapiga vita Ahalu Nahrawani kiuadui na dhulma, na baada ya hapo hakuweza tena kuelekeana na Muawiyah, na Ukhalifa ukaanguka kwa makosa hayo yaliyotokezea, na hapo ukaanza Utawala wa Bani Umayyah ambao haukujua njia ya uadilifu wala huruma, wakabakia Mashia ni wenye misiba ya Hussein ya kuomboleza kusikomalizika, na wakaingia katika mkondo wa kutukana ovyo Masahaba wa Mtume S.A.W. bila ya haki, na kuwalengea tuhumahewa Wake wa Mtume S.A.W. Mamama wa Waumini Bi Aisha Bi Hafsa Allah awaridhie , na wakaleta katika dini yao mambo ya ajabu ajabu ambayo hayana nafasi katika Uislamu.

Juu ya yote hayo Maulamaa wetu hawajawatoa Mashia nje ya Uislamu, ingawa wamewaona kuwa ni wapotevu na wabatilifu.

Amesema Sheikh Abu Bakar Ahmed Al-Kindi r.a.:

وعلى من جاحد هذه القاهدة فارق المسلون الروافضَ وخالفوهم، وشهدوا عليهم بالكفر كفر نفاق لا كفر شرك؛ إذ هم مخطؤون في التأويل لا التنزيل؛ ونحن من جميع أولئك براء وبالله التوفيق.

"Na kwa sababu ya kupinga msingi huu, Waislamu wamejitenga na Maraafidha (Mashia wapingaji wa Ukhalifa wa asiyekua Ali bin Abi Talib na kizazi chake) na wakatafautiana nao, na wakawashudia kwa ukafiri, ni ukafiri wa kinafiki si ukafiri wa kishirikina; kwani wao wamekosea katika taawili na sio katika tanziili, na sisi tunajitenga na wote hao. Na taufiqi ni ya Allah." [Jauhar Muqtassir 133]

Wallahu aalamu.

Published By Sh. Hafidh Al-Sawafi

Asalamu alykum wa rahmatullahi wa barakatuh.

Allah ameridhia kwetu kufuata Assaabiquna Al-Awwaluun (Masahaba wa mwanzo waliotangulia) katika Muhajirina na Ansaar, jee! kupitia itikadi yenu Maibadhi -bila kurefusha- munaweza kutueleza fungamano lenu na Masahaba hawa kwa kuchukua kutoka kwao na kwa fahamu yao?

JAWABU

Kusifiwa Masahaba -Allah mtukufu awaridhie- ni kwa sababu ya kuukubali Uislamu kwa kufuata maamrisho yake na kuepuka makatazo yake na kuyaenzi mafundisho yake, kwa hiyo Masahaba wa mwanzo Waliotangulia katika nini? Bila shaka ni katika kumtii Allah na Mtume wake S.A.W. na waliowafuata Masahaba hao katika nini? Bila shaka ni katika kumtii Allah na Mtume wake S.A.W. na hilo ndilo fungamano kuu linalotukusanya sisi na wao, unatukusanya Uchamungu na utiifu wa kumtii Allah mtukufu na Mtume wetu S.A.W., inatukusanya Itikadi isiyokubali kuwapendela Mafasiki na Madhalimu, inatukusanya Quraani tukufu.

Kutokana na hapo yoyote anayejitoa nje ya utiifu wa Allah na Mtume wake baada ya kuamini kwake huyo hayumo katika maridhio ya Allah mtukufu isipokua kama atatubia.

Wallahu aalamu.

Wabillahi taufiqi.

Published By Sh. Hafidh Al-Sawafi

Asalamu alaykum

Suali La Kwanza:

Ningependa kufahamu nyinyi IBADHI mnaitakidi kwamba ALLAH MTUKUFU hayuko mbinguni.

Je! NABII MTUKUFU (s.a.w.w) alipoenda israa na miiraj kukabidhiwa SWALAA si dalili ya kua ALLAH yuko huko au vipi ?

Suali la pili:

Kuna hii Hadithi ambayo imepokelewa SUNI na SHIA ya VIZITO VIWILI. Kwamba Nabii (s.a.w w) katika HIJA ya kuaga aliusia kwamba viwili hivyo watu washikana navyo kuwa hawatapotea milele.

Suni wanasema Quran na suna, Shia wanasema Quran na Ahlulbayt.

Je nyinyi IBADHI mmeipokea vipi ? ! Nakama Ahlilbayt wapo Maifafanua vipi ndugu ?

JAWABU:

Waalaykum salam wa rahmatullahi wa batakatuh.

Maibadhi hatumdhibiti Allah kwa sehemu, si mbinguni wala ardhini wala popote, kwa sababu yeye si kiumbe wala hasifiki kwa lenye lazimisho la kuhitajia, neno letu kuhusu uwepo wa Allah ni kuwa uwepo wake umejitegemea kidhati, kwa hiyo uwepo wa viumbe na ukosekanaji wa viumbe hauathiri chochote kwa Allah mtukufu; kwa sababu yeye ndiye wa Mwanzo kabla ya viumbe vyote ambavyo ni sehemu na wakati na viathiriwa vya sehemu na wakati.

Allah si dhatimwili; kwa hiyo sisi tumtakasa na malazimisho ya mwili, hatumuulizii kwa wapi, wala nje, wala ndani, wala kuunganyika, wala kutengana, neno letu tunasema: Uwepo wa sehemu na ukosekanaji wa sehemu ni sawa mbele ya Allah.

Ama suala la Israa na Miiraji halikua kwa ajili ya kuonana na dhati ya Allah mtukufu, bali ni kama ilivyoelezwa wazi wazi katika Quraani kuwa ni kuona ishara kuu za Allah mtukufu, kwa hiyo haina maana ya kuwa Mtume s.a.w. alikwenda pahala ambapo Mungu yupo -haasha lillaahi- ametakasika Allah na uwepo wa ndani ya sehemu.

Ama suala la vizito viwili.

Imekuja katika Musnad Imaam Rabii bin Habiib Allah amrehemu:

Abu ‘Ubaydah kasema, “Imenifikia kutoka kwa Mjumbe wa Allah (S.A.W.) ya kwamba, kasema:

«خَلَّفْتُ فِيكُمْ مَا إِنْ تَمَسَّكْتُمْ بِهِ لَنْ تَضِلُّوا أَبَدًا كِتَابَ اللَّه عَزَّ وَجَلَّ فَمَا لَمْ تَجِدُوهُ فِي كِتَابِ اللَّهِ فَفِي سُنَّتِي، فَمَا لَمْ تَجِدُوهُ فِي سُنَّتِي، فَإِلَى أُوْلِي الأَمْرِ مِنْكُمْ».

"Nimewaachieni ambacho ikiwa mtashikamana nacho hamtapotea kamwe, Kitabu cha Allah Mtukufu, na msichokiona katika Kitabu cha Allah, basi katika Sunna yangu (na ikiwa pia) hamkuona kwenye Sunna yangu, (basi angalieni) kwa wasimamizi wa mambo yenu (Maulamaa na Viongozi waadilifu)”.

Pia imekuja Riwaya ya pili:

Abu Ubaydah, kutoka kwa Jaabir bin Zayd, kutoka kwa Ibn Abbas (R.A.A.), kutoka kwa Mtume wa Allah (S.A.W.) kasema:

«إِنَّكُمْ سَتَخْتَلِفُونَ مِنْ بَعْدِي فَمَا جَاءَكُمْ عَنِّي فَاعْرِضُوهُ عَلَى كِتَابِ اللَّهِ فَمَا وَافَقَهُ فَعَنِّي وَمَا خَالَفَهُ فَلَيْسَ عَنِّي».

“Hakika nyinyi mtatofautiana (mtakhitilafiana) baada yangu, (basi) kitakachokujieni kutoka kwangu (Hadithi  na Athari zilizoegemezwa kwa Mtume wa Allah (S.A.W.) ) kilinganisheni na kitabu cha Allah, kile kitakachowafikiana nacho, basi kimetoka kwangu, na kile kitakachokwenda kinyume nacho, basi hakitokani na mimi”.

Hizi ndizo riwaya zetu katika maudhui hii.

Zinduka kuwa Kuna kile ambacho hakipingani wala hakikubaliani, hicho tunahakilisha kwa kuchunguza sanadi yake na matni yake.

Na haya tuliyojishika nayo ndiyo yanayokubaliana na Kitabu cha Allah mtukufu katika neno lake:

﴿يا أَيُّهَا الَّذينَ آمَنوا أَطيعُوا اللَّهَ وَأَطيعُوا الرَّسولَ وَأُولِي الأَمرِ مِنكُم فَإِن تَنازَعتُم في شَيءٍ فَرُدّوهُ إِلَى اللَّهِ وَالرَّسولِ إِن كُنتُم تُؤمِنونَ بِاللَّهِ وَاليَومِ الآخِرِ ذلِكَ خَيرٌ وَأَحسَنُ تَأويلًا﴾ [An-Nisâ': 59] 

Enyi mlio amini! mt'iini Allah, na mt'iini Mtume na wenye madaraka katika nyinyi. Na mkizozana katika jambo basi lirudisheni kwa Mwenyezi Mungu na Mtume, ikiwa mnamuamini Mwenyezi Mungu na Siku ya Mwisho. Hayo ndiyo bora zaidi na ndiyo yenye mwisho mwema.

Wabillaahi taufiiqi.