Published By Sh. Hafidh Al-Sawafi

Kwa hakika Imani katika sheria ina mazingatio mawili, zingatio la kilugha na zingatio la kisifa (kisheria).

1. IMANI KILUGHA:

Imani kilugha ni kusadikisha, basi kila mwenye kusadikisha huyo anazingatiwa kilugha kuwa ni muumini wa lile alilolisadikisha, ni sawa ikiwa hilo alilolisadikisha ni haki au ni batili, na kwa sababu usilamu ni dini yenye mafundisho, basi kila mwenye kusadikisha uhaki wa mafundisho ya Uislamu na kuyakubali huyo anazingatiwa kuwa ni Muumini wa Kiislamu kwa mujibu wa lugha, kwa maana hiyo anaweza kuitwa muumini hata kama sifa ya Imani kisheria hatokuwepo katika nafsi yake.

2. IMANI KISIFA (KISHERIA):

Kama tulivyotangulia kubainisha kuwa Imani maudhui yake -kilugha- ni kusadikisha, basi juu ya msingi huu wa kusadikisha ndipo iliposimama maana ya Imani kisifa, nayo ndiyo Imani inayozingatiwa kisheria kuwa ni sababu ya kufanikiwa kwa kupata maridhio ya Allah mtukufu Duniani na Akhera; kwani yule mwenye kusadikisha kikamilifu huyo ndiye mwenye kusifika kwa sifa ya Imani ya Kisheria.

Kusadikisha kisheria kumejishika kwa kuzingatia mja na mafundisho ya Uislamu, kwa maana hiyo, ni lazima kusadikisha huko kutimie kikamilifu ili mja aweze kusifika kisheria kuwa yeye ni Muumini, basi kusadikisha huko li lazima kutimie kwa njia tatu:

1. KUSADIKISHA KWA MOYO KWA YALE YENYE KULAZIMIKA KIITIKADI.
2. KUSADIKISHA KWA ULIMI KWA YALE YENYE KULAZIMIKA KIMANENO.
3. KUSADIKISHA KWA VIUNGO KWA YALE YENYE KULAZIMIKA KIVITENDO.

Kutokana na hapo sifa ya Imani -kwa mja yoyote yule- baina yake na Allah mtukufu inazingatiwa katika kutimia usadikishaji kamilifu kwa njia tatu tulizozieleza, na mja ambaye hatakuwemo katika moja ya njia hizo tatu za usadikishaji naye kidhahiri ni Muislamu, mja huyo -bila shaka- atakua ni Mnafiki kisifa baina yake na Allah mtukufu, na unafiki wake ima utakua wa Kiitikadi au Kimaneno au Kivitendo, na daraja ya unafiki huo ni kwa mujibu wa daraja ya kosa kubwa atalokuwa ndani yake; na atabakia katika hali hiyo mpaka atakapotubia kwa Allah mtukufu ili aweze kurejea katika duara la Imani.

Basi tujue kuwa Imani haichanganyiki na asi kubwa lolote lile, na tujue kuwa daraja ya chini ya Imani ni kutokuwemo mja katika dhambi kubwa yoyote hali kuwa anajua.

Huu ni msingi muhimu sana katika uislamu.

Published By Sh. Hafidh Al-Sawafi

2.1 UKAFIRI KILUGHA:

Ukafiri -kiasili- ni neno la lugha ya kiarabu, na maana yake ni kuficha na kusitiri, na ukafiri pia ni kinyume na Imani, basi usiku katika lugha ya kiarabu -ambayo ndiyo asili ya neno hili- unaitwa kafiri kwa sababu ya kuficha kwake, na ukafiri pia ni kuzipinga neema, nako ndiko kuzikufuru neema, kutokana na hapa, neno ukafiri lina maana pana sana kilugha, ingawa baadhi ya maana zake hazitumiki kwa sababu ya kuzoeleka maana za kisheria katrika Jamii.

2.2 UKAFIRI KISHERIA:

Ukafiri kisheria ni kuasi kwa kosa kubwa lolote; kwa maana hiyo makosa makubwa yote ni ukafiri kwa mujibu wa sheria ya Allah mtukufu, basi ukafiri huu kiaina umegawika kwa mujibu wa vigawanyo vya madhambi makubwa kisheria, na madhambi makubwa kisheria yamegawika katika vigao viwili vikuu, navyo ni:

a. Madhambi makubwa ya kishirikina.

b. Madhambi makubwa yasiyokuwa ya kishirikina.

Basi vile vile ukafiri umegawika katika vigao hivi viwili vikuu navyo ni:-

 2.2.1 UKAFIRI WA KISHIRKINA.

Ukafiri wa kishirkina ni ukafiri unaohusika na madhambi ya kishirkina tu, na madhambi hayo yamegawika sehemu mbili kubwa, nazo ni:

2.2.1.1 Madhambi ya kumfanyia Allah msawa.

Ushirikina huu anasifika nao mwenye kukubali kuwepo uungu, kwa hiyo mshirikina aliyemo katika ushirkina huu anakua ni mwenye dini, lakini amekosea katika ibada ya kumuabudu mungu wa haki -Allah mtukufu- kwa kumfanyia Allah msawa katika ibada au hukumu, na kwa hiyo basi ushirikina huu pia umegawika sehemu mbili:

2.2.1.1.1 Ushirikina kwa kujifanyia chengine kuwa katika daraja ya uungu kiibada, kwa kukiabudu pasina Allah mtukufu au pamoja na Allah mtukufu kwa kukishirikisha katika ibada ya Allah mtukufu, kama kuabudia masanamu au watu au wafu au mawalii au makaburi au mito au mizimu au miti au mapango au jini au jua au mwezi n.k.

2.2.1.1.2 Ushirkina kwa kukifanya chengine kuwa katika daraja ya uungu katika hukumu za Allah mtukufu, basi kikapelekea hicho kuhalalisha alichoharamisha Allah mtukufu, au kuharamisha alichohalalisha Allah mtukufu, au kupinga kuhumu zake Allah mtukufu.

2.2.1.2 Kumkataa Allah mtukufu.

Huu ni ushirikina wa kupinga kuwepo kwa Muumba, na kwa maana hiyo aliyemo katika ushirkina huu huwa hakubali kuwemo katika ibada maalumu, wala hazikubali sheria ya dini yoyote katika maisha yake.

Pia huingia katika ushirikina huu mwenye kupinga kuhumu za Allah mtukufu.

2.2.2 UKAFIRI USIO WA KISHIRKINA.

Ukafiri huu anahusika nao muislamu, kwa hiyo mwenye kuwemo ndani yake si Mshirikina, bali atabakia kuwa ni Muwahhidi mwenye kukiri dini ya Uislamu katika nafsi yake, lakini yeye amekua kafiri kwa kuwepo katika asi kubwa lolote miongoni mwa maasi ya Allah mtukufu bila ya kuhalalisha asi hilo; kwani akifikia hali ya kuhalalisha asi lake atakuwa ameingia katika ukafiri wa kishirkina wa kumfanyia Allah msawa katika hukumu zake.

Ukafiri huu umeitwa katika Ibadhi kwa jina ukafiri wa neema kwa kuzingatia kuwa Dini ya Uislamu ni neema ya Allah mtukufu naye ameisifu hivyo pale aliposema:

((Leo nimekukamilishieni dini yenu, na nimekutimizieni neema yangu, na nimeridhia kwenu uislamu kuwa ndio dini))

[Maaidah 3].

Pia wanavyuoni wetu wa Magharibi wameuita ukafiri huu kwa jina la ukafiri wa kinafiki kwa kuzingatia hali ya aliyejitosa ndani yake; kwani hakika yeye yumo katika hali ya Unafiki ikiwa tu hajatubia kwa Allah mtukufu kutokana na asi lake kubwa alilolivaa.