Published By Sh. Hafidh Al-Sawafi

Ni lazima kuamini kuwa kila aliyekuwa ni hai basi atakufa, isipokua Allah peke yake; kwani yeye ndiye aliye hai uhai wa kidhati usiokuwa na mwanzo na wenye kudumu, basi Allah ndiye nafsi isiyofikiwa na kifo peke yake, kwa hiyo kila nafsi isiyokuwa Allah mtukufu nafsi hiyo itaonja kifo bila ya shaka yoyote, huu ni uhakika wa kimaumbile, nao ni dalili ya wazi ya udhaifu kwa viumbe vyote, udhaifu wa kumtegemea Muumba mtukufu katika kuwepo kwao na kuendelea kwa uhai wao, kwani Allah ndiye aliyejaalia sababu zote za kuishi vyenye kuishi.

Basi ni lazima kusadikisha hukumu ya Allah, ya kuwa ulimwengu huu wote utamalizika kwa mujibu wa alivyotaka, na kuwa baada ya hapo atarejesha viumbe katika ulimwengu wa malipo, nao ndio ulimwengu wa Akhera, na urejesho huo utakuwa kaatika siku nzito, nayo ndiyo siku ya Malipo, siku hiyo inayo majina mingi kama vile, viku ya Kiama na mengineo yaliyotajwa katika Qur-ani tukufu.

Basi imelazimika kuamini SIKU YA KIAMA kwa kusadikisha aliyotueleza Allah mtukufu ambaye ni Muweza wa kila alitakalo.

Published By Sh. Hafidh Al-Sawafi

Inalazimika kuitakidi kuwa Kiama kitafika tu, hapana shaka yoyote katika hilo, na kwa hakika Allah mtukufu atawafufua waja wote, wale waliomo katika Makaburi na wengineo katika hukumu hiyo ni sawa, na Allah mtukufu hufanyika analolitaka kwa mujibu wa alivyotaka.

Kufufuliwa

Kufufliwa ni kurejeshwa Miili iliyomalizika na kupotea kwa kuirudisha katika Roho zake kama ilivyokua hapo mwanzo, nayo ni haki ametuambia Allah amtukufu katika Kitabu chake na yeye ni mwenye kuweza kila kitu, na hakuna mkweli zaidi kuliko yeye Allah mtukufu.

 ﴿ٱللَّهُ يَبْدَأُ ٱلْخَلْقَ ثُمَّ يُعِيدُهُ ثُمَّ إِلَيْهِ تُرْجَعُونَ﴾

 ﴾Allah ameanzisha viumbe kisha atavirejesha, kisha kwake yeye mutarejeshwa﴿

 [Ruum 11]

Basi kama ilivyokua mwanzo -kwa uwezo wa Allah- ulipatikana ulimwengu bila ya kuwepo kitu isipokuwa Allah mtukufu peke yake, basi ulipatikana bila ya kutangulia mfano wake, basi vile vile kwa uwezo wa Allah mtukufu ulimwengu utarejea bila ya kuwepo kitu baada ya kumalizika na kupotea kwake.

Kwa hakika Uwezo wa Kiungu ni kufanyika vitu kwa mujibu wa Kutaka kwa Allah mtukufu tu.

Published By Sh. Hafidh Al-Sawafi

Ni lazima kuitakidi kuwa Hesabu baada ya Kufufuliwa ni haki isiyokua na shaka yoyote ndani yake, na Hesabu hiyo ni kubaguliwa waliyotanguliza waja katika uhai wao wa Duniani kwa yale matendo waliyoyafanya ikiwa ni zuri au baya (ovu), basi itapambanuka daraja yake ili yule aliyelifanya mwenyewe alione, basi hapo yataongezeka ya furaha na uzuri kwa mja mwema, na atakwenda kwa wenzake waja wema huku akiwa ni mwenye furaha kubwa kutokana na malipo bora aliyoyaopata.

Ama mja fasiki muovu aliyekufa bila ya kujiwahi kwa toba ya haki, hakika yeye huyo yatamzonga maovu yake na atan`gata vidole vyake kwa majuto na kujilaumu kutokana na mabaya aliyotanguliza yaliyomsababishia laana za Allah na adhabu kali ya kuendela, huku anaona mema aliyofanya hayakukubaliwa kwa sababu Allah amehukumu kwa Mafasiki wote kutowaridhia.

Na matamshi ya Dhahab: "Hakika Hesabu ni kudhihirishwa ubaguzi wa matendo mema na kuyatenganisha na mengine, na kudhihirishwa yaliyokubaliwa na yaliyorejeshwa, na kiwango cha malipo mema na adhabu, na kukumbushwa aliyesahau matendo yake...".

 ALLA MTUKUFU ATAKAVYOHESABU WAJA WAKE

Na Allah mtukufu atawahesabu Waja wake juu ya wingi ya idadi yao, na yeye ndie mwepesi wa kuhesabu, kama anavyowapa riziki juu ya wingi wa idadi yao, na yeye ndio mbora wa kutoa Riziki.

Published By Sh. Hafidh Al-Sawafi

Kipimo siku ya Kiama ni Haki, na kupimwa makusudio yake ni kudhibitiwa vizuri matendo ya mja na kudhihirishwa.

Jee!! yamesalimika na yenye kuyavunja?

Na uzito wa kipimo -kwa hakika- ni kwa Matiifu ya mja.

Na kwa hakika zitakua nzito Mizani za yule aliyeondoka Duniani hali ni mchamungu, basi huyo ndiye zitakayekua nzito Mizani zake siku ya Kiama kwani ndiye mwenye kukubaliwa mema yake, nayo ni Haki kuwa nzito mizani iliyokua haiekwi isipokua matiifu.

Na kwa hakika zitakua nyepesi Mizani za mema ya yule aliyekufa hali ya kuwa ni Fasiki Asi Kafiri ikiwa ni mshirikina au sio mshirikina, huyo ndiye zitakaekua nyepesi Mizani za mema yake siku ya Kiama, hayo ni kwa sababu ya kukataliwa mema yake nasi yataporomoka malipo yake kwa sababu ya ufasiki wake; kwani Allah amehukumu kuwa yeye haridhii waja walio Waovu Mafasiki, na hayakubali ya asiowaridhia, kwani hakika yeye ni mwenye kuyakubali ya Wachamungu tu.

Basi ni Haki kwa Mizani isiyowekwa isipokua Maasi kuwa nyepesi nyepesi siku ya kiama.

Na kwa hakika ametueleza Allah mtukufu kuhusu Watu ambayo Matendo yao yataporomoka, na kuwa hatowasimamisha siku ya Kiama uzito wowote, basi hao hatowarehemu siku ya Kiama nao hawatokirimiwa, bali wao watadhalilishwa na kupuuzwa.

Na ametuambia Allah mtukufu kuhusu Waja wengine, kuwa wao atawaletea Matendo yao, na atayafanya kuwa ni vumbi lenye kupeperuka, kwa maana hawatanufaika na matendo yao, nao walijidanganya ya kuwa ni wenye kufanya Mazuri na huku yameporomoka Matendo yao, basi watakua ni wenye khasara na majuto, wala hayatowafaa kitu Majuto yao kwa sababu wao hawakua Wachamungu.

﴿إِنَّمَا يَتَقَبَّلُ ٱللَّهُ مِنَ ٱلْمُتَّقِينَ﴾

﴾Hakika yalivyo ni kuwa anakubali Allah kutoka kwa Wachamungu﴿

[Maidah 27]

Published By Sh. Hafidh Al-Sawafi

Shafaa (Uombezi) ni kuomba mazuri kwa ajili ya mwengine, na mazuri hayo ima kupandishwa cheo cha huyo mwengine au kumuokoa na kuangamia.

Basi ataombea yule ambae atapata Idhini ya Allah mtukufu, na ataombea kwa ajili ya yule ambae ameridhiwa na Allah mtukufu.

﴿مَن ذَا ٱلَّذِى يَشْفَعُ عِندَهُ إِلاَّ بِإِذْنِهِ﴾

﴾Ni nani huyo ambae ataombea kwake yeye isipokua kwa Idhini yake?﴿

[Baqara 255]

﴿وَلاَ يَشْفَعُونَ إِلاَّ لِمَنِ ٱرْتَضَىٰ﴾

﴾Na hawataombea isipokua kwa yule ambae amemridhia (Allah mtukufu)﴿

[An-biyaai 28]

Basi kwa hakika hakuna Muombezi yoyote atakayeombea mwenye kuidhulumu nafsi yake kwa maasi ya Ushirikina au kwa maasi makubwa yasiyo kuwa ya kishirikina na hali alikufa bila ya kutubia kwa Allah kutokana na udhalimu wake.

﴿وَأَنذِرْهُمْ يَوْمَ ٱلاْزِفَةِ إِذِ ٱلْقُلُوبُ لَدَى ٱلْحَنَاجِرِ كَـٰظِمِينَ مَا لِلظَّـٰلِمِينَ مِنْ حَمِيمٍ وَلاَ شَفِيعٍ يُطَاعُ﴾

﴾Na waonye wao kwa siku yenye kukaribia (siku ya Kiama); wakati nyoyo zitakapokua karibu ya makoromeo hali wamefazaika; hakuna kwa Madhalimu([1]) kipenzi yoyote wala muombezi yoyote atakayetiiwa﴿

[Ghaafir 18]

Na kwa hakika Allah mtukufu ameshatubainishia katika Kitabu chake ni nani walio madhalimu, na sisi ni wenye kusadikisha hukumu ya Allah mtukufu na hakuna mkweli zaidi kuliko yeye, basi ametuambia.

﴿وَمَن يَتَعَدَّ حُدُودَ ٱللَّهِ فَأُوْلَـئِكَ هُمُ ٱلظَّـٰلِمُونَ﴾

 ﴾Na mwenye kuichupa mipaka ya Allah basi hao ndio Madhalimu﴿

 [Baqara 229]

 ﴿وَمَن لَّمْ يَتُبْ فَأُوْلَـئِكَ هُمُ ٱلظَّـٰلِمُونَ﴾

 ﴾Na ambae hatotubu basi hao ndio Madhalimu﴿

 [Hujuraat 11]

Na Shafaa itakayotoka kwa Mtume wetu Muhammad (s.a.w) itakua kwa ajili ya watu wa kisimamo cha Kiama wote kwa ujumla, ili wafanyiwe hesabu zao kisha waende katika mafikio yao ya milele.

Na watapata Waumini katika Umma wake Shafaa maalumu ya kunyanyua daraja zao, vile vile watapata Manabii na Mawalii na Malaika nafasi za kuombea.

Na kwa hakika Maombezi yao hao wote ni kwa wale aliotuelezea Allah mtukufu hali zao katika Neno lake.

﴿وَلاَ يَشْفَعُونَ إِلاَّ لِمَنِ ٱرْتَضَىٰ وَهُمْ مّنْ خَشْيَتِهِ مُشْفِقُونَ﴾

﴾Na hawaombei isipokua kwa yule ambae amemridhia, na wao kwa kumwogopa yeye ni wenye huruma﴿

[An-biyaai 28]

Na kwa hakika Allah mtukufu haridhii Waovu wenye kuasi ikiwa ni Washirikina au Wanafiki, Amesema Allah mtukufu.

﴾فَإِنَّ ٱللَّهَ لاَ يَرْضَىٰ عَنِ ٱلْقَوْمِ ٱلْفَـٰسِقِينَ﴿

 ﴾Basi hakika Allah haridhii kwa watu Mafasiki﴿

[Taubah 96]

Published By Sh. Hafidh Al-Sawafi

Vitabu ni yale ambayo wameyadhibiti Malaika wakarimu wenye kuandika ya Waja katika Vitendo vyao vya kheri na vya shari.

﴿مَّا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيدٌ﴾

﴾Hatamki neno lolote isipokua limeshapata Rakibu na Atiidu﴿

[Qaf 18]

﴿وَإِنَّ عَلَيْكُمْ لَحَـٰفِظِينَ * كِرَاماً كَـٰتِبِينَ * يَعْلَمُونَ مَا تَفْعَلُونَ ﴾

﴾Na hakika kuna juu yenu wenye kuhifadhi * Makarimu wenye kuandika * wanajua yote munayoyafanya﴿

[Infitaar 10-12]

Basi Muumini atapewa Kitabu chake kwa Mkono wake wa kulia.

﴿فَأَمَّا مَنْ أُوتِىَ كِتَـٰبَهُ بِيَمِينِهِ فَيَقُولُ هَاؤُمُ ٱقْرَؤُاْ كِتَـٰبيَهْ * إِنّى ظَنَنتُ أَنّى مُلَـٰقٍ حِسَابِيَهْ﴾

﴾Basi yule ambae atapewa Kitabu chake kwa mkono wa kuume wake huyo atasema: Haya njooni musome kitabu changu * Hakika mimi nilijua kuwa hakika nitakua ni mwenye kukuta Hesabu yangu﴿

[Al-haaka 19-20]

Basi Muumini Mchamungu atakua ni mwenye furaha kwa sababu ya kufaulu kwake, na atakua ni mwenye bashasha kwa kupata malipo ya matendo yake mema aliyotanguliza hapo mwanzo.

Na Kafiri atapewa Kitabu chake kwa mkono wake wa kushoto, na atakikuta kimefunguliwa hakikuacha katika matendo yake dogo wala kubwa isipokua limedhibitiwa, basi atajipinza kwa majuto mazito kutokana na yale Mabaya aliyoyatanguliza, na atasema kwa kujuta na kushangaa kama alivyotueleza Allah mtukufu.

﴿وَوُضِعَ ٱلْكِتَـٰبُ فَتَرَى ٱلْمُجْرِمِينَ مُشْفِقِينَ مِمَّا فِيهِ وَيَقُولُونَ يٰوَيْلَتَنَا مَا لِهَـٰذَا ٱلْكِتَـٰبِ لاَ يُغَادِرُ صَغِيرَةً وَلاَ كَبِيرَةً إِلاَّ أَحْصَاهَا وَوَجَدُواْ مَا عَمِلُواْ حَاضِرًا وَلاَ يَظْلِمُ رَبُّكَ أَحَدًا﴾

﴾Na kitawekwa Kitabu, basi utaona Waovu ni wenye mahangaiko kwa yale ambayo yamo ndani yake, na watasema: Ee!! Ole wetu,, ni kitu gani kwa kitabu hichi? Hakiuacha dogo wala kubwa isipokua kimelidhibiti". Na watakuta yote waliyofanya yamekuja, na hatodhulumu Mola wako yoyote yule﴿

[Qahaf 19]

Basi hapo atasoma Matendo yake katika Kitabu chake, na atazidi kuhuzunika na kuyayatika, yatamvaa majuto yake, basi atatamani lau kuwa hakupewa Kitabu chake na wala hakujua Hesabu yake.

﴿وَأَمَّا مَنْ أُوتِىَ كِتَـٰبَهُ بِشِمَالِهِ فَيَقُولُ يٰلَيْتَنِى لَمْ أُوتَ كِتَـٰبِيَهْ * وَلَمْ أَدْرِ مَا حِسَابِيَهْ * يٰلَيْتَهَا كَانَتِ ٱلْقَاضِيَةَ * مَا أَغْنَىٰ عَنّى مَالِيَهْ * هَلَكَ عَنّى سُلْطَـٰنِيَهْ﴾

﴾Na ama yule ambae atapewa Kitabu chake kwa mkono wake wa kushoto; atasema: Ee!! Laiti mimi sikupewa kitabu changu. Na sikujua ni ipi Hesabu yangu. Laiti mauti yangalikua ni yenye kunimaliza. Haikunitosha kitu Mali yangu. Yameniangamiza majivuno yangu﴿

[Al-haaka 25-29]

Na hapo itakua mekwisha hoja yake, na imeondoka nguvu yake, na yeye atajuta wakati majuto hayafai kitu tena, na itaamrishwa kupelekwa katika Moto na hayo ni makazi mabaya yalioje, nayo ndiyo makazi ya waovu.

Published By Sh. Hafidh Al-Sawafi

Inalazimika kuitakidi kuwa hakika Siku ya Kiama ina visimamo, na katika kila kisimamo atasimamisha Allah -aliyeshinda- Hoja zake kwa Waja wake.

Basi mara itakua ni kwa kukubali Waja wao wenyewe kwa kwa njia ya kuzishuhudia Nafsi zao wenyewe.

Na mara itakua ni kupewa Waja Vitabu vyao na wao watakuta ndani yake Matendo yao na watasoma yaliyoenezwa katika Makosa yao na Mazuri yao.

Na mara itakua ni kufungwa midomo yao na hapo itakua ni kusemezwa mikono yao na viungo vyao na ngozi zao kwa yale yote iliyochuma, basi miguu itashuhudia kwa mwote ilimokwenda, na ngozi zao zitashuhudia kwa yote iliyogusa.

Na mara itakua ni Kushuhudiwa na Mitume.

Na Mtume wetu (s.a.w) na Umma wake watashuhudia juu ya Umma zilizopita, ya kuwa waliwafikia Mitume wao kwa Mabainisho na wao walikadhibisha na wakawa ni Makafiri, na kuwa Mitume walifikisha kwa haki.

Published By Sh. Hafidh Al-Sawafi

Kwa hakika masuala ya Hodhi na Sirati sio katika masuala yanayolazimika kuyaitakidi; kwa sababu Itikadi huchukuliwa katika maelezo ya Sheria yasiyokua na shaka kuthibiti kwake, na hali za Akhera ni mambo yaliyofichika (Ghaib); basi inatulazimu kuyaamini yale yaliyothibiti kutoka kwa Allah mtukufu na Mtume wake (s.a.w) bila shaka yoyote katika kuthibiti kwake, basi chenye kulazimisha Itikadi ni Aya ya Kitabu cha Allah iliyoeleza bila ya kupatikana uwezikano mwengine (Ayatu Muhkamah), au Sunna iliyopokewa na Mkweli kwa Mkweli kwa njia ya Tawaturi ya wale waliopokezana (Sunnatu Mutawaatirah), na yaliyokuja kuhusiana na Hodhi na Sirati hayajapata daraja hiyo.

HUKUMU:

Basi imekua ni haki kuyaachia yale yenye uwezekano na yasiyopingana na Qur-ani na Sunna iliyothibiti kwa njia ya Tawaturi, na hili ni katika Hodhi, ama yaliyopingana na Qur-ani na Sunna iliyothibiti kwa njia ya Tawaturi, hakika hayo imekua ni haki kuyarejesha, na hili limo katika Siraati.

HODHI:

Yamekuja -katika riwaya nyingi- maelezo kuhusu Hodhi, na kuwa Hodhi hilo ni kubwa sana, nalo atapewa Mtume mteuliwa siku ya Kiama, naye ni Mtume wetu Muhammad (s.a.w), na kuwa Hodhi hilo watalifika walio Waumini katika Umma wake, nao watakunywa katika maji yake, na kuwa yule ambae atakunywa katika hodhi hilo mara moja tu, huyo hatapata kiu tena baada ya hapo, na kuwa watazuiwa watu ambao Mtume (s.a.w) anawajua kwa majina yao na wao wenyewe, nao ni miongoni mwa Masahaba wake, na atawaita ili waje wanywe katika Hodhi lake, basi itasemwa kuhusu wao:

"Hakika hawa walibadilisha baada yako, na wakaenda kinyume na njia yako"

Basi hapo Mtume (s.a.w) atasema kwa kuwafukuza:

"Ondokeni ondokeni"

SIRATI:

Zimekuja riwaya kadha wa kadha zinazotoa taswira ya kuwepo njia nyembamba sana iliyo kali sana, na kwamba njia hiyo itakua juu ya moto wa Jahannamu, na kuwa waja wote watalazimika kupita juu ya njia hiyo, na hapo itakua kupita kwao ni kwa mujibu wa matendo yao, na kuwa wema watafanikiwa kupita na waovu wataanguka na kuingia katika Jahannamu.

Imekua ni haki kwetu kukanusha Itikadi hiyo ya Siraati na kuitakidi kuwa Riwaya zake ni penyezo asilohusika nalo Mtume wetu S.A.W. kwa sababu Itikadi hiyo imepingana na yale aliyotueleza Allah mtukufu katika Kitabu chake Qur-ani tukufu, na hakuna aliye mkweli zaidi kuliko Allah mtukufu, basi sisi tunasadikisha aliyotwambia Allah mtukufu, nayo ndiyo haki isiyo kuwa na shaka.

Allah ametueleza kuwa:

1. Jahannamu inayo milango nayo ni milango saba.
2. Waovu watapelekwa mpaka katika milango ya Jahannamu kwa kukokotwa.
3. Wasimamizi wa Jahannamu watawauliza waovu masuala ya kuwasimamishia hoja ya wazi, nao watajibu jawabu za kustahiki kwao adhabu.
4. Milango ya Jahannamu itafunguliwa kwa ajili ya kuingizwa wenye kustahiki adhabu yake.
5. Wataambiwa sasa ipiteni milango ya Jahannamu, na hapo ndio wataingia humo.

Na haya yote yanatupa taswira sahihi isiyo kuwa na shaka yoyote, nayo iko kinyume na taswira ya kudondoka kutokea juu ya Siraati kwa kufeli katika jaribio ya kuitataga Siraati mpaka mwisho.

Vile vile Qur-ani tukufu imetupa uhakika wa waja wema wazi wazi kuwa wao hawatahuzunika siku ya kiama wala kufazaika, na kuwa wao watakuwa mbali na moto, bali hawatasikia hata mingurumo yake, nalo pia linakwenda kinyume na fazaa ya kupita juu ya Siraati.