Published By Sh. Hafidh Al-Sawafi

Sheikh Khalfan Mohamed Al-Eiseri (r.a) alizaliwa nchini Burundi katika Kijiji cha Mtaho ndani ya mwaka 1962 naye alianzia malezi yake akiwa na wazazi wake katika nchi hiyo ya Afrika ya Mashariki ya Kati, hadi ilipofikia mwaka wa 1973 ndipo Baba yake alipomleta katika Ardhi yao ya asili Oman kwa ajili ya masomo na malezi pia, wakati huo Sheikh Khalfan alikuwa na umri wa miaka 11, na baada ya Baba yake -Allah amrehemu- kufariki katika mwaka wa 1974 ndipo Mama yake alipotawalia malezi ya Sheikh Khalfan (r.a).

Sheikh Khalfan Al-Eiseri (r.a) alibobea vizuri katika Elimu ya Kidunia, kama alivyobobea vizuri zaidi katika Elimu ya Kidini, pia Allah mtukufu alimtunukia Sheikh Khalfan tunza ya kuweza kuzijua lugha nyingi kuu Ulimwenguni, basi alikua ni mzungumzaji wa Lugha takriban 27 tofauti.

Sheikh Khalfan ni Jua la Nuru lililoangaza kila upande wa Dunia kielimu na kitabia na ufundishaji, aliuotoa umri wake kwa ajili ya Allah mtukufu katika njia ya kulingania ulinganio wa Haki, na katika hilo alianzisha Tovuti maarufu iitwayo www.islamfact.com.

Sheikh Khalfan Al-aiseri (r.a) alifariki dunia katika mji wa Muscat Oman tarehe 12/5/2015.

Allah amrehemu.

Published By Said Al Habsy

MWANACHUONI MLEZI, SHEIKH WA MASHEIKH, AL ALLAMA HUMUOD BIN HUMEID ALSAWWAFI.

SAHABA WA MTUME S.A.W. KATIKA ZAMA ZETU.

Sheikh wetu tangu zamani alishughulikia sana kuijua nafsi yake vyema, sifa zake na tabia zake, kama ambavyo alifanya ihtimam kujua shaksia zinazomzunguka ili aweze kuamiliana na kila mmoja kwa tabia ya nafsi yake.

Shakhsia ya Sheikh Humoud - Allah amuhifadhi - ipo wazi isiyojificha, yenye misingi imara, misingi inayoanzia zama za Mtume s.a.w. na zama za wema waliopita, kila qauli na kitendo vyatokana na misingi hii.

1. Anasifika kwa kuwa mtu wa kati na kati, hatoi hukmu kwa haraka, wakati mwingine huendana na mtu kwa mujibu wa alivokinaika maadam haikhalifu sharia.

2. Anasifika kwa utambuzi na akili nyingi iliyofunguka, si mwenye kupindukia mipaka, anakwenda na mabadiliko ya zama, naye hufuata ukamilifu wa kijamii.

3. Anasifika kwa hisia zake za mapenzi, huruma, na kupenda kheri kwa wengine. Anapenda vilivyo vizuri, na anawapenda watu wote, anaipa nafsi yake wakati wa kufurahia maisha pasina kutoka katika utiifu wa Allah. Kila mmoja ana haki yake bila kupunjwa.

4. Akiongea sheikh wetu, hukaa au husimama sawa sawa, huongea kwa kujiamini na uhakika, hili huwaathiri wasikilizaji, na akiongeleshwa humpa msemaji ihtimam yote, hamkati katika maongezi yake. Sheikh huficha huzuni au maumivu yake ili kutowachosha wasikilizaji kutokana naye. Akiwa katika kundi la watu, hubadili vikao ili ahisi aliopo kuwa naye yupo na anafuatilia, na kwa namna hii wakaaji wote hufurahika naye.

5. Sheikh wetu, pamoja na manzila kubwa anayopewa na wanachuoni wote, ni mwenye kujidogosha akikutana na wanachuoni wenzake, sawa ikiwa ni wakubwa kwake au wanafunzi wake, hukaa kimya bila kujibu chochote akiulizwa, hukaa mkao wa tahiyyat akitaka kuuliza, bali husimama ikiwa atapigiwa simu na masheikh wakubwa kama Samaahat Sheikh Alkhalili - Allah awahifadhi -.

Wamesema baadhi ya waliosharafika kumfikia na kuona uzuri wa sifa zake " Ukitaka kumuona sahaba wa Mtume s.a.w. katika zama zetu, basi nenda kwa Shekh Humoud Alsawwafi- Allah amhifadhi- "