Ibadhi.com

1. HOJA YA DHIDI YA WANAOSEMA: WAFANYAO MADHAMBI MAKUBWA SI MAKAFIRI.

 

743. A-Rrabiy`i bin Habiyb kasema, "Jaabir bin Zaid kasema, "Kutoka kwa Mjumbe wa Allah (S.A.W.) kwamba kasema, "

 

«لاَ يَدْخُلُ الْجَنَّةَ مُخَنَّثٌ وَلاَ دَيُّوثٌ وَلاَ فَحْلَةُ النِّسَاءِ وَلاَ الرَّكَّاضَةُ»، قِيلَ: وَمَا الرَّكَّاضَةُ يَا رَسُولَ اللَّهِ؟ قَالَ: «التِي لاَ تَغَارُ».

 

Maana yake, “Haingii Peponi mwanaume anaejifananisha na mwanamke, wala mume asiyeona wivu kwa mkewe, wala dume jike la wanawake (msagaji), na wala Rrakkaadha. Ikaulizwa ni nani huyo Rrakkaadha ewe Mjumbe wa Mola? Akasema, "Mwanamke asiyeona wivu”. 

 

744. Mjumbe wa Allah (S.A.W.) kasema, "

 

«اقْتُلُوا الْحَيَّاتِ صِغَارَهَا وَكِبَارَهَا، فَإِنَّا مَا سَالَمْنَاهُنَّ مُنْذُ حَارَبْنَاهُنَّ، فَمَنْ تَرَكَهُنَّ خَشْيَةَ الثَّأْرِ فَقَدْ كَفَرَ».

 

Maana yake, “Wauweni nyoka wakubwa wake, na wadogo wake. Kwani sisi hatujasalimika nao tokea tumewafukuza. Atakayewaacha kwa kukhofia kudhurika (kwa kulipiziwa kisasi) basi mtu huyo amekufuru”.

 

 

 

745. Mtume wa Mola (S.A.W.) kasema, "

 

«مَنْ خَرَجَ مِنْ بَيْتِهِ وَرَأَى مَا يَكْرَهُهُ فَرَجَعَ تَطَيُّرًا مِنْ أَجْلِهِ رَجَعَ كَافِرًا».

 

Maana yake, “Atakaetoka nyumbani kwake akaona jambo lisilompendeza (akadhani kuwa ile ni ishara ya kutokea kitu kibaya katika safari yake) kisha akarejea kwa ajili hiyo basi amekufuru”.

 

 

 

746. Mtume (S.A.W.) kasema, "

 

«إِذَا قَالَ رَجُلٌ لِرَجُلٍ: أَنْتَ عَدُوِّي فَقَدْ كَفَرَ أَحَدُهُمَا»

 

Maana yake, “Ikiwa mtu atamwambia ndugu yake (Mwislamu), “Wewe ni adui yangu,” (basi) mmoja wao amekufuru”.

 

 

 

747. Na Mtume (S.A.W.) kasema, "

 

«يَقُولُ رَبُّنَا تَبَارَكَ وَتَعَالَى: أَنَا بَرِيءٌ مِمَّنْ تَطَيَّرَ، أَوْ تَكَهَّنَ أَوْ تُكُهِّنَ لَهُ، أَوْ تَسَحَّرَ أَوْ تُسُحِّرَ لَهُ».

 

Maana yake, “Kasema Mola wetu Mtukufu Aliyetukuka, "Mimi niko mbali na Mwenye kuamini mambo ya nukhsi (kama kuona kunguru ukarudi usiendelee na safari yako n.k), au mwenye kupiga ramli, au mpigiwa ramli, au mfanya uchawi, au mfanyiwa uchawi kwa ajili yake”.

 

 

 

748. Mtume (S.A.W.) kasema, "

 

«مَنْ أَتَى رَجُلاً شَهْوَةً مِنْ دُونِ النِّسَاءِ أَوْ أَتَى النِّسَاءَ فِي أَعْجَازِهِنَّ فَقَدْ كَفَرَ»

 

Maana yake, “Atakaemwingilia mwanaume, akawaacha wanawake, au kuwaingilia wanawake kwenye tupu zao za nyuma basi mtu huyo amekufuru”.

 

 

 

749. Mtume (S.A.W.) kasema, "

 

«مَنِ ادَّعَى غَيْرَ أَبِيهِ أَوْ تَوَلَّى غَيْرَ مَوَالِيهِ فَالْجَنَّةُ عَلَيْهِ حَرَامٌ، وَعَلَيْهِ لَعْنَةُ اللَّهِ وَالْمَلاَئِكَةِ وَالنَّاسِ أَجْمَعِينَ لاَ يُقْبَلُ مِنْهُ صَرْفٌ وَلاَ عَدْلٌ».

 

Maana yake, “Atakaejiita kwa jina la asiyekuwa baba yake mzazi, au kujinasibisha kwa kabila sio ya kwake, au jina la yule asiye kuwa bwana wake, (basi) Pepo ni haramu kwake, na anayo laana ya Allah, na Malaika na watu wote. Na wala havitokubaliwa vitendo vyake vya Faridha, na wala vya Naafila. Kasema ARrabi`i yaani Faridha na Sunna”.

 

 

 

750. Mtume (S.A.W.) kasema, "

 

«ثَلاَثَةٌ لاَ يَنْظُرُ اللَّهُ إِلَيْهِمْ يَوْمَ الْقِيَامَةِ وَلاَ يُزَكِّيهِمْ وَلَهُمْ عَذَابٌ أَلِيمٌ: أَشْمَطُ زَانٍ، وَمُفْلِسٌ مَرِحٌ مُخْتَالٌ، وَرَجُلٌ اتَّخَذَ اللَّهَ بِضَاعَةً لاَ يَشْتَرِي وَلاَ يَبِيعُ إِلاَّ بِيَمِينٍ».

 

Maana yake, “(Aina ya watu) watatu Allah hatawaangalia (hatowarehemu) siku ya Kiyama, wala hatawatakasa, nao watapata adhabu kali: Mzee mzinifu, na mtu aliyefilisika akajifanya mcheshi, na kuwadanganya watu kijanja, na mtu ambaye hauzi, wala kununua bidhaa zake ila kwa kiapo (cha uongo).

 

 

 

751. Mtume (S.A.W.) kasema, "

 

«لاَ يَدْخُلُ الْجَنَّةَ لَحْمٌ نَبَتَ مِنْ سُحْتٍ وَالنَّارُ أَوْلَى بِهِ».

 

Maana yake, “Haiingii Peponi ambaye mwili wake umekuzwa kwa haramu, basi Moto (wa Jahannam) ndipo panapoufaa zaidi”.

 

 

 

752. Mtume (S.A.W.) kasema, "

 

«ثَلاَثَةٌ لاَ يَنْظُرُ اللَّهُ إِلَيْهِمْ يَوْمَ الْقِيَامَةِ: الْمُنْفِقُ سِلْعَتَهُ بِالْحَلْفِ الْفَاجِرِ، وَالْمُسْبِلُ إِزَارَهُ الذِي يَجُرُّهُ خُيَلاَءَ، وَالْمَنَّانُ».

 

Maana yake, “(Aina ya watu) watatu Allah hatowaangalia (hatowarehemu) siku ya Kiyama: Mwenye kuuza bidhaa zake kwa kiapo cha uwongo, (mwanaume) mwenye kuvaa nguo ndefu na huku anaikokota kwa ufakhari, na anayetoa sadaka kwa kusimangia”.

 

 

 

753. Mtume (S.A.W.) kasema, "

 

«مَنْ غَشَّنَا فَلَيْسَ مِنَّا، وَمَنْ لَمْ يُؤْثِرْنَا فَلَيْسَ مِنَّا، وَمَنْ أَحْدَثَ فِي الإِسْلاَمِ حَدَثًا أَوْ آوَى مُحْدِثًا فَلَيْسَ مِنَّا، وَمَنْ لَمْ يُوَقِّرْ كَبِيرَنَا وَلَمْ يَرْحَمْ صَغِيرَنَا فَلَيْسَ مِنَّا».

 

Maana yake, “Atakaetudanganya hayupo na sisi (hayupo katika uwongofu wetu).  Na asiyesali Sala yetu ya Witri hayupo na sisi (hayupo katika uwongofu wetu). Na atakae zua katika Uislamu (vitendo vya bidaa), au kumpa makazi mzuaji hayupo na sisi. Asiyempa heshima mkubwa wetu wala kumuonea huruma mdogo wetu hayupo na sisi.

 

A-Rrabi`i kasema, "Makusudio yake yote katika Hadithi hii ni kuepukana nao”.

 

 

 

754. Mtume (S.A.W.) kasema, "

 

«الْجَنَّة حَرَامٌ عَلَى مَنْ قَتَلَ ذِمِّيًّا أَوْ ظَلَمَهُ أَوْ حَمَّلَهُ مَا لاَ يُطِيقُ، وَأَنَا حَجِيجُ الذِّمِّيِّ فَكَيْفَ الْمُؤْمِنُ».

 

Maana yake, “Pepo ni haramu kwa (mtu yule) atakaemuuwa aliyoko chini ya hifadhi ya dola ya Kiislamu, au akamdhulumu, au akambebesha jambo asiloliweza. Nami ni kama mlinzi wa aliyechini ya usalama wa dola ya Kiislamu, basi vipi Muislamu”. (yaani vipi ukimfanyia hayo muislamu)

 

 

 

755. Mtume (S.A.W.) kasema, "

 

«مَنْ أَعَانَ عَلَى قَتْلِ امْرِئٍ مُسْلِمٍ وَلَوْ بِشَطْرِ كَلِمَةٍ لَقِيَ اللَّهَ يَوْمَ الْقِيَامَةِ آيِسًا مِنْ رَحْمَتِهِ».

 

Maana yake, “Atakaesaidia katika kumwuwa Mwislamu japokuwa kwa neno atamkuta Allah siku ya Kiyama bila ya Rehema Yake”. (Hatomrehemu)

 

 

 

756. Siku moja Mtume (S.A.W.) kasema kumwambia mmoja wa Masahaba wake, "

 

«لاَ تَرْجِعُوا بَعْدِي كُفَّارًا يَضْرِبُ بَعْضُكُمْ رِقَابَ بَعْضٍ».

 

Maana yake, “Msije mkarejea baada yangu katika ukafiri mkawa mnakatana shingo (mnauana) wenyewe kwa wenyewe”.

 

 

 

757. Mtume (S.A.W.) kasema, "

 

«لَوْ أَنَّ أَهْلَ السَّمَاوَاتِ وَأَهْلَ الأَرْضِ اشْتَرَكُوا فِي دَمِ امْرِئٍ مُسْلِمٍ حَرَامًا لَكَبَّهُمُ اللَّهُ جَمِيعًا عَلَى مَنَاخِرِهِمْ فِي النَّارِ».

 

Maana yake, “Lau viumbe wa mbinguni, na viumbe wa ardhini, wangelishirikiana kumuuwa mja Mwislamu kwa haramu (kwa njia iliyokatazwa), (basi) Allah angeliwatupa wote kwa kuvutwa pua zao katika Moto”. (Yaani watatumbukizwa motoni kichwa kichwa)

 

 

 

758. Na Mtume (S.A.W.) kasema, "

 

«مَنْ آذَى مُؤْمِنًا أَوْ رَوَّعَهُ أَطَالَ اللَّهُ رَوْعَتَهُ فِي جَهَنَّمَ».

 

Maana yake, “Atakaemuudhi Mwislamu au kumkhofisha, basi Allah atairefusha khofu yake (yule mtu aliyemkhofisha Mwislamu) Motoni”.

 

 

 

759. Ibn Masu`ud alikuwa akihadithia Hadithi aliyoipokea kutoka kwa Mtume (S.A.W.) kasema, "

 

«الرَّشْوَةُ فِي الْحُكْمِ كُفْرٌ».

 

Maana yake, “Rushwa ni katika Hukumu ya ukafiri”.

 

 

 

760. Mtume (S.A.W.) kasema, "

 

«مَنْ صَلَّى وَصَامَ وَتَصَدَّقَ رِيَاءً فَقَدْ أَشْرَكَ»

 

Maana yake, “Atakaesali, na kufunga, na kutoa sadaka (zaka) kwa kujionesha ameshirikisha”.

 

Na ilikuwa ikisemwa: Shirki ndogo.

 

 

 

761. Na Mtume (S.A.W.) kasema, "

 

«مَنْ قَتَلَ بَعْدَ الْعَفْوِ أَوْ أَخَذَ الدِّيَةَ فَهُوَ خَالِدٌ مُخَلَّدٌ فِي النَّارِ»

 

Maana yake, “Atakaeua baada ya kusamehe, au akachukua dia, basi yeye atakuwa daima katika Moto”.

 

 

 

762. Na Mtume (S.A.W.) kasema, "

 

«مَنْ مَاتَ وَعَلَيْهِ دَيْنٌ لَمْ يَدْخُلِ الْجَنَّةَ». قِيلَ: وَلَوْ قُتِلَ فِي سَبِيلِ اللَّهِ؟ قَالَ: «وَلَوْ قُتِلَ سَبْعِينَ مَرَّةً ثُمَّ أُحْيِيَ ثُمَّ قُتِلَ وَعَلَيْهِ دَيْنٌ فَلاَ يَلِجُ بَابَ الْجَنَّةِ».

 

Maana yake,Atakaekufa naye ana deni hataingia Peponi.’’ Na ikasemwa (yaani akaulizwa Mtume (S.A.W.), “Hata kama ameuwawa katika njia ya Allah?, Mtume (S.A.W.) akajibu, “Hata kama ameuawa mara sabini, kisha akahuishwa tena, akauwawa naye ana deni hatouingia mlango wa Peponi”.

 

 

 

763. A-Rrabi`i kasema, "Mtume (S.A.W.) alipelekewa maiti ili amsalie akasema “Jee, ana deni?” Wakasema, "Ndiyo” kisha akasema “Jee, ameacha fedha za kulipia deni?” Wakajibu: “Hapana”. Akasema, "

 

«صَلُّوا عَلَى صَاحِبِكُمْ».

 

Maana yake, “Msalieni mtu wenu ”.

 

 

 

764. Na Mtume (S.A.W.) kasema, "

 

«مَا مِنْ رَجُلٍ يَمُوتُ وَفِي قَلْبِهِ مِثْقَالُ حَبَّةٍ مِنْ خَرْدَلٍ مِنْ كِبْرٍ لَمْ يَدْخُلِ الْجَنَّةَ وَلَمْ يَرِحْ رِيحَهَا وَلَمْ يَرَهَا، وَمَنْ لَبِسَ لأَخِيهِ ثَوْبًا مِنْ غَضَبٍ أَلْبَسَهُ اللَّهُ يَوْمَ الْقِيَامَةِ ثَوْبًا مِنْ نَارِ جَهَنَّمَ».

 

Maana yake, “Mtu yeyote anayekufa na moyoni mwake ana uzito wa kiasi ya chembe ya uwele ya kiburi hatoingia Peponi, na wala hatonusa harufu yake, na wala hataiona. Na atakayemvisha nduguye (wa Kiislamu) nguo ya ghadhabu (yaani kumkasirikia), basi siku ya Kiyama Allah atamvalisha vazi la Moto wa Jahannam”.

 

 

 

765. Na Mtume (S.A.W.) kasema, "

 

 «مَنْ سَمَّعَ بِأَخِيهِ الْمُسْلِمِ فِي الدُّنْيَا سَمَّعَ اللَّهُ بِهِ فِي الآخِرَةِ».

 

Maana yake, “Atakaemsikilizisha nduguye Mwislamu duniani, basi Allah atamsikilizisha Akhera”.

 

 

 

766. Mtume (S.A.W.) kasema, "

 

«إِذَا زَنَا الزَّانِي سُلِبَ الإِسْلاَمُ، فَإِذَا تَابَ أُلْبِسَهُ».

 

Maana yake, “Mzinifu anapozini hunyang`anywa Uislamu, anapotubu hurejeshewa”.

 

 

 

767. Na Mtume (S.A.W.) kasema, "

 

«إِنَّ أَهْلَ النَّارِ يَتَأَذَّوْنَ بِرِيحِ الزَّانِي فِي النَّارِ».

 

Maana yake, “Hakika watu wa Motoni watakereka kwa harufu ya mzinifu Motoni”.

 

 

 

Zingatia kwamba riwaya zote za Hadithi zimethibitisha kwa watu wa kibla kimoja (waisilamu) kwa ukafiri[1]. Nazo ni nyingi hazihesabiki, na Mola Ndiye anayeombwa msaada, wala hapana mwenye nguvu zaidi ila Allah aliyetukuka na kuadhimika.

 



[1] Kwa ajili ya maasi wanayoyafanya.

 

Sh. Hafidh Al-Sawafi

Website: ibadhi.com Email Anwani ya barua pepe hii inalindwa kutokana na spambots. JavaScript lazima iwe itawezeshwa kwa kuweza kuona.
Add comment